2007-07-15

تعب كلها الحياة



أول ما عملت مدونة كنت مبسوطة جدا ...كان بيتهيألى انى مش ممكن ييجي عليه يوم و ما ادخلش عليها و اشوف اللى فيها مهما كنت مشغولة
و لما تابعت مدونات ناس كتير كانت اكتر حاجة بتضايقنى انى اشوف حد بيسيب مدونته بالكام يوم من غير ما يدخل عليها ...كنت بحس زي اللى بيسيب زرعة صغيرة من غير مية لمدة كبيرة و ما كنتش أعرف إنى في يوم هكون زيهم ....لكن غصب عني

ايوة غصب عني........حاجات كتير بتحصل لي اليومين دول:
0
*رحت شغل جديد و سبت الشغل القديم اللى كنت مرتبطة بيه جدا ....كان نفسي أكمل التدوينة اللى ابتديتها و كنت بحكي فيها عن أثر كل واحد منهم في نفسي لكن مش فاضية ....غصب عني
من الأسبوع اللى فات و أنا في الشغل الجديد ....بتعب جدا ...كأنى أول مرة أشتغل ...كل يوم أروح أنام لغاية تانى يوم و أجازة يوم الجمعة مش بتكفينى طبعا لأنى قبل كده كنت باخد يوم السبت كمان دلوقتى يوم واحد و بيعدي هوا

نفسي أحكيلكوا عن حالتى النفسية اللى بتتأثر بكل كلمة حد يقولها لى في الشغل الجديد لأنه شغل جديد عليه جدا

نفسي أحكي لكم عن الناس اللى في الشغل الجديدو نظرتى الأولية ليهم طبعا ما ينفعش أحكم على الناس من الأول و لكن عايزة أقول لكوا الانطباعات الأولى ...لكن بردو ...غصب عني

بواقى الشغل القديم لسة ما خلصتش و لسة بعمل فيها في البيت و اللى زاد كمان ان الهارد بتاع الكمبيوتر اللى في البيت بيعمل حركات ندالة و شكله كده عايز يتغير و مش عارفة اشتغل خالص ده غير انى زي ما قلتكوا .....مش فاضية أصلا

مواضيع كتير عايزة اكتبها و ناس كتير عايزة اتابع مدوناتهم لكن يا ريت يعذرونى مرحلة و تعدي إن شاء الله


اللعبة : دي مدونة لعبة بنلعبها أنا و بعض المدونين الكرام و اللى حطت بذرتها أميرة البلطجية و المفروض ان عليه الدور لكن أنا بقول لها ما تقلقيش انا هآخد دوري إن شاء الله

يا ريت تعذرونى كلكوا انى مش بتابع أوي لكن على الأقل بحاول أعرف أخبار مدوناتكوا و أقرأ حتى لو ما قدرتش أعلق عندكوا

ادعولى أوي لأن الشغل الجديد ...جدييييييييييييد جدا و غريب بالنسبة لى و نفسي أعمل فيه حاجة كويسة .....

الله المستعان


سلامو عليكوا

أه نسيت اقول لكو الصورة اللى فوق دي بتاعت سندريلا ....بمناسبة انى اليومين دول عاملة زيها في النصف الأول من الحكاية لما كانت بتكنس و تنفض و تغسل لمرات أبوها بس أنا بقى برسم و أظبط و أطبع و أعدل و أهشر و أراجع

هناك 42 تعليقًا:

ولــــــــــو يقول...

ربنا معاكي
انت ادها وادود
وعادي يعني
مرحله وانشاء الله تعدي
بالتوفيق ومنتظريين

ياسر سليم يقول...

ربنا يعينك

بس ياريت تبقى مرحلة فعلاً وتعدى

ما تبقاش حياتك كلها كده

ما ينفعش ان الإنسان تبقى حياته كلها شغل فى شغل

همسة قلم يقول...

ربنا معاكِ ياقمر
ربنا ييسر لك امرك ويكرمك في شغلك الجديد :)

علاء يقول...

متابعة المدونةو لو ساعة في الاسبوع مش صعبة أوي كده :)

و ده موضوع التجمع ياريت أعرف رأيك

المدوّن خانة

احمد رفعت يقول...

مساء الخيرات

بصى هي أول حاجة في أولها صعب بعد كده الدنيا هبتقى زي الفل .

ربنا يعيتك بس فعلا لازم ترتبي اولوياتك صح وساعتها هتلاقى الدنيا زي الفل .


على العموم نحن لن نتنازل عنك في النت .

RAMA يقول...

يا حرام معلش يا حلم ياعربي .. كل حاجة حتكون كويسة جدا إن شاء الله وزي ما عم أحمد قال كل حاجة بتكون صعبة في أولها بس ولا يهمك بكرة تتجوزي الامير والشغل يخف عنك شوية.. هههههه

ربنا معاكي ويوفقك..

محمود علي يقول...

انا لسه خارج من المود ده
وكنت قافل البلوج اسبوع
بس مقدرتش
ربنا معاكي
وتعرفي تفتحيها تاني

Elmesaharati يقول...

وقل اعملوا فسيرى اللة عملكم ورسوله و المؤمنون

HoNdA يقول...

ياحبيبتشى يابنتشى انا عارفه انك كاتبه الموضوع عشانى ههههههههههه بس بردو مش هسيبك هتدخلى يعنى هتدخلى وبالنسبة لموضوع النوم فمتقلقيش هو فى الاول بس كده لحد ماتطيفى نفسك وثقى فى نفسك تقدرى تعملى اى حاجة بس محتاجة وقت متخليش كلمة حد تهزك ابدا

الحلم العربي يقول...

و لو
.....
شكرا أوي على التشجيع و يارب أكون قدها فعلا
ربنا يكرمك و يوفقك إن شاء الله و شكرا جدا على انتظاركم

تحياتي

الحلم العربي يقول...

ياسر سليم
..........
آمين و لك مثله إن شاء الله
و أنا كمان رأيي كده ما ينفعش الانسان و خصوصا البنت يكون الجزء الأكبر من عقلها في الشغل ....في أولويات تانية أهم ....لكن إن شاء الله مرحلة و تعدي

شكرا للنصيحة و تحياتي

الحلم العربي يقول...

همسة قلم
.......
ربنا يستجيب منك يارب و يكرمك ...أنا آسفة انتى من أوائل الناس اللى أنا حاسة انى مقصرة معاهم لكن أنا بدخل على مدونتك على طول و بتعجبنى جدا كتاباتك...شكرا جدا على اهتمامك يا غاليتى

تحياتي القلبية

الحلم العربي يقول...

علاء
....
ساعة في الأسبوع قليل أوي بالنسبة لواحدة زيي كانت طول النهار قدام المدونة تقريبا....الموضوع نسبي
أنا دلوقتى بدخل كل يوم بردو لكن مش عارفة اتابع الناس اللى بحبهم و أستفيد من موضوعاتهم

شكرا لك و إن شاء الله أول ما يسمح الوقت هدخل على اللينك و أتابع

تحياتي

الحلم العربي يقول...

أحمد رفعت
........
و الله أنا كنت بحاول أرتب وقتى من الأول لكن كل الجدول باظ لأن في حاجات بتحصل جديدة كل يوم بتضطرنى انى أقلب الجدول خالص....لكن الله المستعان

ايوة كده شجعونى ...شكرا جدا على انكوا لن تنازلوا عنى في النت ....و انا كمان لن أتنازل عنكوا يا شعبي الحليم الصبور المهاود و سأظل أطالب بحق كل مواظن في مدونة حرة في ظل الحرية و الديموقراطية ......تصفيق حاااااااااد

شكرا شكرا
هههههههههههه

تحياتي و شكرا جدا على الاهتمام

الحلم العربي يقول...

rama
.....
انتى اللى فاهمانى ياراما و الله بلا شغل بلا وجع قلب ....بس هو الأمير ييجي بس و أنا أوريه .....هخليه هو يطبخ و يغسل و يكنس و هخلى السندريلا تطلع عليه كل العقد اللى جتلها من مرات أبوها
ههههههههههه
شكرا يا جميلة على تعليقك الجميل

الحلم العربي يقول...

محمود على
.........
أنا مش قافلاها و مقدرش أقفلها ...أنا بس مقصرة في حقها شوية

شكرا ليك و كويس انك ما قدرتش تقفل مدونتك علشان نستفيد من موضوعاتك الجميلة

تحياتي

الحلم العربي يقول...

Elmesaharati
.............
صدق الله العظيم
اللهم طهر أعمالنا من النفاق و اجعلها كلها في سبيلك

جزاك الله خيرا على التذكرة

تحياتي

الحلم العربي يقول...

honda
......
ايوة يا بنتى أنا خفت تضربيني و لا حاجة لما تشوفينى فقلت أعمل مقدمة

و إن شاء الله أدخل قريب و نرغي مع بعضينا كتير

ادعيلى ما اهتزش أبدا ...أنا مش بتهتز ثقتى في نفسي بس بكون عايزة منهم تشجيع لأن الموضوع جديد عليه

شكرا يا قمر على متابعتك مع انى مقصرة معاكي

اصرار أمل يقول...

بقدر ما آلمنى تعبك ؛
بقدر ماأنا متأكدة من قدرتك على تخطيه ؛؛؛
الأشياء فى بدايتها غالبا ماتكون هكذا ...
لأن باذن الله ستكونين كما عهدتك _ فى الفترة القليلة التى عرفتك فيها _ أشد اصرارا وأكثر عزما من أى وقت مضى ؛
يسر الله لك ياحبيبة ؛؛ ووفقك ؛؛؛
وسدد على طريق الخير هداك ؛؛
ويسر لك الصعب فى عملك الجديد ؛ وأعانك على تخطى المصاعب فيه ؛ وجعله لك خيرا من الذى سبقه ؛؛؛
و(((( رزقك زوجا صالحا تقيا نقيا قرة عين لك ))))))))

momken يقول...

ربنا معاكى ويقويكى ياقمر
وبدعيلك من قلبى
اللهى وانت جلهى يتوب عليكى من الخدمنه فى البيون يا حلم العربى

ههههههههه
تحياتى

HoNdA يقول...

ولايهمك ياواد المدونين لبعضهم بردو هههههههه

أميرة البلطجية يقول...

ربنا معاكي يا حلم
ان شاء الله الشغل الجديد حيبقي فتحة خير
بس بررررررضه
مستنينك في اللعبة
:)

أميرة البلطجية يقول...

طب انتي متوقعة كده تنزليه على امتي؟

الحلم العربي يقول...

اصرار أمل
..........
آميييين تقبل دعائك و جزاك مثل ما قلتى و أكثر ....أشكرك بشدة
أشكرك غلى التشجيع و على مشاعرك الرقيقة و ربنا يكرمك و يوفقك في حياتك كلخها و يجمعنا في الفردوس الأعلى إن شاء الله

الحلم العربي يقول...

momken
......
قصدك الخدمة في المكاتب ....ههههه
شكرا على الدعوات
تحياتي

الحلم العربي يقول...

أميرة البلطجية
.............
شكرا أوي على مشاعرك الجميلة
و أنا بردو لن أتنازل عن دوري في اللعبة ....هو أنا إن شاء الله عاملة حسابي مش هزود عن أسبوع ....اوك؟؟
اوعى تقوليلى كتير انتى مش قلتى خدوا وقتكوا
ههههههههههه

تحياتى

حزيــــــــــــــــــن يقول...

استعينى بالله ولا تعجزى
انا سعيد انك اشركتينا معاك فى اهتماماتك وحياتك
ربنا يوفقك

نفسنا يقول...

ندعوكم لزيارة العدد الثالث لمجلة نفسنا

أميرة البلطجية يقول...

اه والله يا حلم انا فعلا مش بحاول اضغط على حد..لكن الناس هي اللي ضاغط عليا
وضاغطين كتير كمان
يا ريت تديني يوم عاشن اقولهوهم ويهدوا شوية

momken يقول...

أصعب موقف...ألا تكون أقدارنا بأيدينا ونراها في أيدي من لا يقدرون قيمة الأشياء

عزيزتى السعى فى الارض هو سنه الله فى خلقه فلم يطلب الله منا الدعاء فقط من اجل الرزق بل طلب السعى وافضل الامثله على طلب السعى
هو طلب الله من السيد
ه مريم بهز النخله وهى تضع مولودها حتى يتساقط الرطب
قال تعالى
وهزى اليك بجزع النخله تساقط عليك رطبا جنيا فكلى واشربى وقرى عينا

الايه
مع انه كانت بتولد لكن الله طلب السعى كى ينزل الرزق

تحياتى

صاحب البوابــة يقول...

اعتذر عن التحليق خارج السرب

لكنني أريد رأيكم للأهمية في آخر موضوع لي

بعنوان

شكــر وإعتــذار

تحياتي

الحلم العربي يقول...

حزين
....
أشكرك بشدة على تشجيعك و دعواتك معانا

ربنا يوفقك أنت أيضا
تحياتي

الحلم العربي يقول...

نفسنا
......
شكرا على الدعوة و هروح أشوف المجلة إن شاء الله

الحلم العربي يقول...

أميرة البلطجية
..............
أنا عارفة و الله انا لناس متشوقة تعرف التكملة للبداية الجميلة اللى انتى حطيتها لكن بردو الموضوع مش سهل و أنا إن شاء الله قبل يوم الثلاثاء القادم هكون نزلت الجزء بتاعي بس ادعيلى مفيش حاجة تحصل تعطلنى

شكرا على صبرك معايا
تحياتي

الحلم العربي يقول...

ممكن
...
كلامك كله حكم يا أستاذ ممكن بجد ...شكرا جدا على الكلام ده أنا فعلا كنت محتاجاه

تحياتي

الحلم العربي يقول...

صاحب البوابة
............
لا طبعا حضرتك ادخل و قول اللى تحبه حتى لو مش في الموضوع بتاعنا ...
أشكرك بشده على ثقتك الغالية و أنا بالفعل دخلت على مدونتك و علقت على الموضوع و هو فعلا موضوع يحتاج أن نقرأه كلنا

شكرا لك و تحياتي

mo'men mohamed يقول...

ربنا يعينك و يقدرك يا رب
ومتقلقيش المدونة موجوده مش حتمشى ولا احنا كمان حنمشى
وقت ما تبقى فاضية ادخلى
السلام عليكم

سمسم يقول...

ربنا معاكي في الشغل الجديدة
وعندي كام نصيحة كده
الابتسامة الجميلة في وش اي حد ما تعرفيهوش
عشان موضوع الانبطاعات الاولى والكلام ده
صحيح زمان مكنتش بقتنع ان الواحد لازم يبتسم في وش اللي قدامه اول مرة وبتاع
ولكني ومع الاسف اليومين دول بقيت بتنازل كتير وبقيت ببتسم اكتر في وش اللي قدامي .. عشان اعيش :d
عموماً ابتسامة خفيفة عشان يقولو عليكي بشوشة ومش نكدية
صحيح ممكن الواحد يكون بشوش ومبتسم دايماً / ولكن ما اعرفش بقى ظروفك بتكون ايه مع ناس اول مرة تتعاملي معاهم
في كل الاحوال .. ابتمسي :d

عموماً ربنا يقدملك اللي فيه الخير

خالص تحياتي
سمسم

لو كنت أعلم يقول...

ربنا معاك يا جميل

ويوفقك في الشغل الجديد

أما بالنسبة للمدونين
فزي الفل
ولسه بيدونوا
اطمني وابقي طمنينا عليك

وبعدين هي سندريلا وحشة

دي المفروض إنها تسحر كل اللي في المكان الجديد بجمالها

تماموز

ابقي طمنينا عليك

الحلم العربي يقول...

mo'men mohamed
...............
شكرا جدا و ربنا يكرمك

و انا كمان موجودة ابقوا اسألوا عليه ...ما تقطعوش التعليقات...ههههههههه

تحياتي

الحلم العربي يقول...

سمسم
....
انا مبسزطو خالث انك بتعلق في المدونة هنا لأنى كنت فاكراك قفلت مدونتك أصلا....ارجع للتدوين تاني بقى...خصوصا انى اعرفك من مجتمع خارج التدوين ....أخبار أفلامك ايه يا مخرج يا عظيم؟؟؟؟

متشكرة جدا على النصائح الغالية و بجد كنت محتاجاها

تحياتي

الحلم العربي يقول...

لو كنت أعلم
............
ايوة كده طمنينى على عالم التدوين ....ربنا ما يقطع للمدونين عادة

انا كمان الحمد لله كويسة ...شكرا جدا على سؤالك عليا ....بس هو انتى صدقتى انى سندريلا و لا ايه؟؟؟ لا بنتى أنا أحلى بكتيير ...هههههههههه

تحياتي