٢٠٠٧-٠٦-٢١

الشباب عايز يتجوز ....و البنات عايزة عربيات

أولا عايزة أقدم لكم شكر و اعتذار
أما الشكر فلكل اللى حاولوا يخففوا من حالة الضيق اللى كنت فيها اليومين اللى فاتوا ....بجد جزاكم الله خيرا
و أما الاعتذار فلأنى كئبتكوا معايا في التدوينة اللى فاتت و مش المفروض ان الناس جاية تقرا المدونة علشان تكتئب ....لكل اللى اتضايقوا من حالة الغم اللى كنت عاملاها ...اعتذر بشدة


ندخل بقى في الموضوع
بحاول أرصد حال الشباب و البنات في سني و نظرتهم للزواج، و تحديدا بدأت من آخر سنة في الكلية ليه يعني حوالي من أربع سنين


كنت مثلا بسأل زملائي الشباب : عايزين تعملوا ايه لما تطلعوا من الكلية؟؟0


منهم اللى كان بيقولى عايز افتح مكتب ، و اللى كان بيقول عايز أدور على شغلانة كويسة بمرتب كويس ، واللى كان عايز يسافر ..


و لما كنت بسألهم عايزين تعملوا كده ليه ؟ كان الإجماع انهم عايزين يكونوا نفسهم علشان يتجوزوا أو علشان لما يتقدموا لواحدة يكونوا جديرين بيها و ما يقعدش باباها يقوله منين و بتقبض كام و شقتك فين و الحاجات الكتير اللى بيخاف منها أي شاب رايح يتقدم لعروسة....


و خلال الثلاث سنوات اللى مرت من ساعة ما اتخرجت من الكلية لغاية دلوقتى و أنا بحاول أشوف ايه اللى حصل للشباب دول


واحد منهم مثلا : خطب من حوالى ست شهور و كان طاير من الفرحة و عرفت أد ايه كان بيقول إنه مبسوط و إنه لقى البنت اللى كان بيحلم بيها و ان هو ده كان أمله في الحياه ..و حاجات كتير بالشكل ده


طبعا احنا قلناله ألف مبروك و احنا بجد مبسوطين ...بس كانت فيه حاجة غريبة لاحظناها انه مبسوط أوي و فكرنا ياترى البنت مبسوطة أوي كده زيه؟؟


بعدها بشهرين كانت واحدة زميلتى بتكلمه و بتسأله عن أحواله و بالمرة قالت تسأله على خطيبته و كان الرد المفاجأة : " لأ هي خلاص ما بقتش خطيبتى احنا سيبا بعض" 0


واحد تانى : كان نفسه يخطب و هو في الكلية لكن ظروفه ما كنتش مساعداه ...بعد ما اشتغل و ضمن وظيفة كويسة فوجئنا بيه بيتقدم لواحدة مننا و لأنه ماكانش مناسب ليها رفضت....ساعتها قالها :"لو سمحتى ما تقوليش لحد من زملائنا في الكلية " لكن هي كانت بالفعل قالت لنا


بعدها بشهرين اتقدم لواحدة تانية مننا و رفضت ....بعدها بشهرين تانيين تقدم لواحدة ثالثة مننا و رفضت ...و كان كل مرة يقول للى بيتقدملها نفس الجملة انها ما تقولش لحد


لغاية ما بعدها خطب واحدة من برة الكلية و اتجوز فعلا


واحد ثالث كان معانا في الكلية كان كل أمله انه يخلص الكلية بأي تقدير علشان يشتغل في أي شغلانة بتجيب فلوس كتير و لتكن البورصة مثلا .....


بعد ما اتخرجنا فتح مكتب شوية و بعدين اشتغل مقاول شوية و بعدين فوجئنا بيه اشتغل في البورصة ...طيب ليه كده ده انت مهندس ...كان رده :" يعني هي الهندسة هقبض منها كام في الشهر ..أنا مرتبي من البورصة أضعاف مرتبي من الهندسة "...0


و دلوقتى بيدور على عروسة أهم حاجة ان يكون شكلها حلو لدرجة انه خطب مرتين و محصلش نصيب و بيدوردلوقتى بكل طريقة على عروسة تكون كويسة و حلوة .......


واحد رابع خطب مرتين و ماحصلش نصيب و في كل مرة يكون مزأطط و الفرحة مش سايعاه و محسس كل اللى حواليه انه أسعد إنسان في الدنيا ....و بعد كل مرة يقول اصلها كانت كذا و كذا و طبعا يطلع فيها القطط الفاطسة


.....................


أما البنات



كذا واحدة اتجوزت و قعدت في البيت


أما اللى دخلوا معترك الحياة و الشغل ................


واحدة كل نفسها انها تحوش و تجيب عربية لدرجة انها قالتلى مرة لما كن متقدم لها عريس :" أنا بس أجيب عربية و مش عاية اتجوز خالص"ساعتها استغربت جدا


واحدة تانية لما اتخطبت قعدت تحسبها بالورقة و القلم هو خطيبها بيقبض كام و هي كام و كانت مضايقة جدا انه بيقبض اقل منها ( على فكرة هي مش مادية خالص في الحقيقة بالعكس تماما )


واحدة تالته مش مهم عندها تتجوز المهم انها تكمل حلمها و تفتح شركة بتاعتها و هي في سبيل الحلم ده ممكن تضحي بكل شئ


واحدة رابعة لا هي عايزة ده و لا ده ....كل حلمها انها يكون عندها فيلا بتاعتها تعيش فيها لوحدها بعيدا عن غطرسة الأباء و تحكم الاخوات الكبار


واحدة خامسة سابت كل اللى اتعلمته في الكلية و بتبتدي دلوقتى تتعلم العلم الشرعي و سابت الشغل علشان عايزة تتجه لدراسة الدين لأنها مقتنعة ان كل اللى اتعلمته في الكلية علم لا ينفع


و كتير من البنات اللى اتخرجوا و اشتغلوا أفكارهم بيتتغير من ناحية الجواز بالذات

الظاهرة دي مستوقفاني بقالى فترة

ليه الشباب بقوا بجد نفسهم يتجوزوا و فيه منهم اللى بيتجوز لمجرد الجواز و بيكونوا طايرين من الفرحة لما يخطبوا لمجرد انه يتقال على الواحد فيهم انه خطب ...

أما البنات بقى طموحها حاجة تانية خالص

بحاول أفسر وجهة نظر البنات .....يمكن ما بقاش الأمان للبنت دلوقتى راجل لأن فيه رجالة كتير بتمثل مثال سئ للبنات

يمكن الفلوس بقت أمان أكتر للبنت على أساس ان لو معاكي فلوس تقدري تعملى اللى انتى عايزاه من غير ما حد يتحكم فيكي

يمكن نظرة المجتمع دلوقتى للست اللى بتشتغل انها ست ليها وزنها أما اللى قاعدة في البيت تربي العيال دي عالة على المجتمع مثلا

يمكن لأن في رجالة كتيرو انا أعرف كتير بالنوعية دي معتمدين بشكل أساسي على مرتبات زوجاتهم و كأنها من واجبات الزوجة انها كمان تصرف على البيت فالبنت بتقول و انا ليه اتجوز و اجيب واحد يشاركنى في تعبي كمان

يمكن لأن الستات في مجتمعنا بجد بيتعبوا أوي و بالذات المرأة العاملة اللى مطلوب منها تكون في الشغل مركزة و زي النحلة و البيت جميلة و مرتبة و كل شئ تمام و في تربية الأولاد حكيمة و صبورة و كل الحاجات دي ...أما الراجل فبمجرد دخوله البيت هو عبارة عن كائن له كل الحقوق ....من حقه ما يشوفش حاجة مش عاجباه ...من حقه ياكل في الوقت اللى متعود عليه ...من حقه ما ينزعجش من صوت الولاد ...من حقه ولاده يتربوا أحسن تربية لأن هي دي مسئولية الست ...من حقه كل شئ و ليس عليه من المسئوليات شئ

طبعا أنا لا اتكلم عن جميع الرجال و لا جميع النساء ...فأنا شخصيا لم أر ذلك المثال في بيت أبي و أمي و لكنى رأيته في بيوت أخرى

مش عارفة تحليلى صح و لا غلط لكن ايه رايكوا انتوا ؟؟؟مش بجد الموضوع ده محتاج بعض التأمل ؟؟؟؟

هناك ٣٨ تعليقًا:

Alaa يقول...

أنا مضرب عن الجواز
لحد ما ربنا يفرجها
:)

ولــــــــــو يقول...

هو فعلا دي بقت ظاهره واضحه عندنا
انا شايف ان مشكله الولاد انهم شايفين ان مسأله انه يعرف بنت او خاطب بنت دي مسأله تكمله لمظهره الاجتماعي بس علشان كده مش بيحاول انه يدور على البنت اللي تناسبه لكن بنت مافيهاش عيب
يعني حلوة ومتدينه ومرحه وبيضه و..... وباقي المواصفات دي
اما البنات فاعتقد يعني انه الاحلام اللي كانوا بيحلموها ف سن المراهقه واللي اتحولت لكوابيس عند دخول الجامعه ومعرفه الناس خلت فيه حاجه زي الرغبه ف الاستقلال
بمعنى انه مادام حلمي ف فارس احلامي مش موجود ف انا هاحقق احلامي بس بدون الفارس انا اللي هاحققها
اما عن نفسي
انا مش لاقي ف نفسي دلوقت اني اقدر اتحمل مسئوليه حد غير نفسي فما بالك باسره وبيت وكده
لاااااااااااا
مش دلوقت خالص
الموضوع جميل زي ماتعودنا منك
واسف للاطاله

الحلم العربي يقول...

علاء
ليه كده بس ....لا تبدأ بالاضراب ...انت بس قول :" اللهم اكفني بحلالك عن حرامك و اغنني بفضلك عن من سواك "
و ربنا هيفرجها إن شاء الله
ربنا يفرجها على جميع شباب و بنات المسلمين ....آمين
تحياتي

الحلم العربي يقول...

و لو
تحليل جميل جدا ....و ضحتلى حاجات ما كنتش عارفة اعبر عنها

فعلا البنات دلوقتى بيفكروا بالطريقة دي ...ما دمت مش حاسة انى هرتاح و هكون سعيدة لما اتجوز يبقى أحقق أحلامي بنفسي ...تحليل موضوعي بجد
و بالنسبة للشباب الموضوع مختلف لأن نظرته للزواج من باب الوجاهة و الصورة المكتملة ...
طبعا مش كل البنات و لا كل الشباب
جزاك الله خيرا على وجهة النظر المتأملة
و أهلا بيك دائما

همسة قلم يقول...

حبيت اثبت وجود بس :)

ان شاء الله لي عودة اخرى للتعليق على البوست :)

لكِ ألف تحية على موضوعاتك المتميزة دائما

الحلم العربي يقول...

همسة قلم
وجودك ثبت يا افندم و أهلا بيكي دايما
يسعدني سماع وجهة نظرك في الموضوع و منتظراه بفارغ الصبر
شكرا على التعليق و على وجودك في المدونة المتواضعة
تحياتى

Ebtsam يقول...

جميلة قوى التجميعة اللى انتى عاملاها
اسفة على التأخير
تحياتى

غير معرف يقول...

السلام عليكم
الموضوع حيوي جدا ومهم جدا بدرجة لا يتخيلها بشري خارج حدود مصر طبعاههههههه
أنا هاتكلم بصراحة شوية
ويا ريت كلكم تستحملوني
أنا بدات افكر و انا في البكالوريوس وكان كتير من أهلي مستغربين عليا لاني مشواري لسة كبيييييييييييييير
لسة امتياز و الماجستييير و الدكتوراة
بس انا كنت مقتنع اني انا كطبيب لازم اخرج للواقع العملي و المهني مش هاقول و انا متزوج لكن وانا مستقر عاطفيا
المهم جه اعتقالي لمدة 6 شهور
ويادوب خرجت اعتقلت تاني 4 شهور
وبالتالي اتاخرت علي الامتحانات و هنا تغيرت الاولويات قلت لازم اخلص البكالوريوس الأول
خلصته و بدأت الامتياز
و من هنا بدا المشوار
حطيت شروط لشريكة حياتي
هي كتييير بس في الزمن اللي احنا فيه انا كنت شايف انها كلها مهمة
يعني لازم تكون من قطاع علمي مش نظري علشان تقارب التفكير
لازم تكون ست بيت لأني مهتم جدا بالعمل العام و الدعوي فلازم حد يربي الاولاد و يكون له الدور الأعظم لازم تكون هادية شوية لاني عصبي حبتين
لازم تكون ست بيت مش هاقول شاطرة بس حركة علشان لو في اي وقت اعتقلت او غيبت تقدر تتحمل الوضع و تصرف امور مملكتها لازم تكون في صفوف الدعاة الي الله علشان التقارب الفكري و الحركي فلا تعوقني و لا اعوقها
و كان الشرط الأخير اللي لو توفر يا ريت و لو متوفرش مش مهم الشكل

طبعا كان في زمايل ليا مش اخوان و لا معايا فكريا يقولك الطبيب لازم يرتبط بجميلة علشان طبيعة عمله المهم انا كنت مختلف معاهم كليا لأني اللي بيبص لبرة لو ارتبط بملكة جمال هيبص لبرة
و احنا شوفنا الامير تشارلز و بيل كلينتون

المهم
قعدت ادور و ادور ومش لاقي واحدة فيها كل الشروط

كمان بدات انضج فكريا اكتر طيب انا دخلي كم؟؟؟ و البيت المتوسط الحال عاوز كم؟؟؟؟طيب هشتغل كم يوم و ادي بيتي كم يوم؟؟ طيب و دعوتي فين؟؟


المهم انا في الاخر اجلت الموضوع خالص
قلت لما اخلص الماجستير و استقر مهنيا و ماديا و الاقي بنت الحلال اللي انا مش لاقيها

المهم احنا كشباب محتاجين الزواج و الاستقرار علشاتن نعرف نعطي الاستقرار مطلوب بس التبعات المبنية علي العجلة اكبر و اخطر
لازم الشباب يحدد اولوياته و شروطه المبنية علي اهدافه ثم يختار الوضع الامثل ثم يبدا


اللهم زوج شباب المسلمين
وارزقهم الاستقرارو الهداية و الخير

نقطة مية يقول...

الحال اتقلب دلوقتي خالص...
البنت بترضى بواحد لسببين..لو حست معاه بالامان و لو حست معاه بالضمان...لو فقدت احساس واحد منهم بترفض..فكري كدة في الحالات اللي اتفركشت هتلاقي البنت فقدت احساس من الاتنين...باختلاف معنى الاحاسيس دي فالامان تحسه في الحماية و الشخصية و التعامل..و الضمان بتحسه من الفلوس و جدية و رجولةالطرف الآخر في التعامل و احترامه لافكارها و ذاتها...وبما ان الحاجات دي اليومين دول شحيحة في الشباب فالبنت بتلاقيهم في شغلها
تحياتي

الحلم العربي يقول...

ebtsam
أهلا بيكي يا قمر
انتى عارفة لو اتأملتى كويس هتلاقى التجميعة دي موجوده في محيط أي حد مننا ....يعني هتلاقى الولد اللى عايز يتجوز لمجرد الجواز ....و هتلاقى اللى عايز يجيب فلوس بأي طريقة ....للأسف النماذج دي موجودة كتير في بلدنا
شكرا على وجودك و ما تتأسفيش على التأخير ...أنا بس بحب أطمن عليكي
تحياتي

الحلم العربي يقول...

أحمد محمد مرسي(الشاب الحر ) الأبيّ

أولا : حمد الله على سلامتك من الاعتقال و يارب ما ترجعله أبدا

ثانيا: عجبتني المواصفات اللى اخترتها في شريكة حياتك....تدل على شخصية ناضجة فعلا ....ربنا يرزقك بيها عن قريب

أنا عارفة انه بيكون صعب على الواحد انه يفكر في الزواج و هو لسة مش مستقر ماديا ....لكن بجد الزواج خير و بيجلب الرزق لأنك بتعمل طاعة ...
ربنا يسهل لك أمورك و يرزقك ببنت الحلال قريب إن شاء الله

الحلم العربي يقول...

نقطة مية
فعلا تحليلك سليم
أهم حاجتين للبنت هما الأمان و الضمان و للأسف في شباب كتير تحسي معاهم انك مستحيل تحققى النقطتين دول ....علشان كده البنت بتفضل تحققهم بنفسها في الشغل

تحياتي لكلامك الجميل
و دايما نقطة المية بتلمع و منورة الحلم العربي

AHMED SAMIR يقول...

ربنا يسامحك
يعني دة تفكير البنات بتوع اليومين دول؟
ربنا يطمنك
كدة الواحد اطمئن على مستقبله
تحياتي ليكي
موضوع جميل

الحلم العربي يقول...

a.samir
ههههههه
معلش هي الحقيقة دايما مرة كده
للأسف فيه بنات بتفكر كده فعلا ...بس مش كلهم
و الشباب بردو للأسف في منهم بيفكروا كده ....و بردو مش كلهم
المهم الواحد يعرف أولوياته و يختار كويس

تحياتي

غير معرف يقول...

انا اللي انا شايفة ان البنات هيموتوا ويتجوزوا دا اللي انا بشوفة

يمكن المجتمعات بتختلف :)


لازم يبقي في هدف مش نعيش وخلاص

اهو نتجوز زي اللي بيتجوزو ونعيش زي اللي بيعيشو



لازم يبقي في رسالة


انا كمان عايز اتجوز وعايز عربية وعايز ....و....و.....ههههههههه

انا عايز كل حاجة

الحلم العربي يقول...

مصراوي اوي
..........
أنا ما اقصدش ان البنات مش عايزة تتجوز...لا طبعا البنات فعلا هتومت و تتجوز و الشباب كمان
لكن بص للبنت لما يجيلها عريس بيكون تفكيرها عامل ازاي
و لما بتحس انه ممكن ما يحققلهاش طموحها على طول بترفضه
و منهم اللى بتحس انها مش هتلاقى طموحها ده بسهولة بفبتقرر انها تحققه بنفسها

و طبعا كلامك صح لازم النااس تعرف هي بتتجوز ليه و لا زم يكون في هدف مش بتنتجوز و خلاص

على فكرة كلنا هذا الرجل ...كلنا عايزين نتجزوز و عايزين عربيات و عايزين كل حاجة ...لكن الدنيا ما بتديش كل حاجة فلازم نختار إما نختار السهل و إما نختار الصعب لكن الأحسن على المدى البعيد

تحياتي

قضية عم أحمد Ahmed Case يقول...

أيتها الحلم العربي
بصى ازعلى براحتك واللي ميستحملكيش ميخشش يقرأ مدونتك ده أولا ويارب منشوفك زعلانه ابداً .

بالنسبة للموضوع الشيف الملعبك اللي انت اتكلمتي فيه انتي جيتي لى على الجرح .
انا من الشباب اللى بدور على زوحتي بشكل جد بقالى سنيتين الكل بيقول عليا بدلع بس انا نفسى الاقي اللى أحبها ,اجوزها ومتكنش في يوم من الايام خطيبنتي السابقة .

مش عارف بس كلمة في سرك انا حاسس إن مثلا جواز الصالونات مش ناجح بنسبة كبيرة مش بأقول على طول بس بنسبة كبيرة .

الهم انا عايز أجوز كأي مواطن او شاب مصري ولكني أفتش عن إنسان وربنا يقرب البعيد

الحلم العربي يقول...

أحمد رفعت
ربنا يكرمك
...بس انا مش بحب احس انى سبب في ضيق بنى آدم حتى لو كنت أنا مضايقة و الحياة مش ناقصة غم علشان اضايق الناس معايا
و على العموم شكرا ليك

بالنسبة لموضوع الجواز
عندك حق لازم تدور على شريكة حياتك بطريقتك ...حتى لو اتأخرت شوية لكن ما تحسش انك بتتجوز لمجرد الجواز ...تكون بتتجوز الانسانة اللى انت اخترتها عن اقتناع ....مش تجربة و يا تصيب يا تخيب

موضوع جواز الصالونات ده عايز له تدوينة لوحده ...أنا عن نفسي مش بحبه خالص و لا اتخيل نفسي فيه ...لكن في الاول و في الآخر دي آراء ....خصوصا ان الختيار بيكون صعب بالذات بالنسبة لفئة الناس اللى بتحاول ما تخالفش الدين في أي شئ من حياتها

على العموم ربنا يوفقك لبنت الحلال اللى تسعدك و تاخدوا بايد بعض للجنة

تحياتي

مشروع انسان يقول...

موضوع جميل ومهم بس ممكن نقول ان الشباب واقعين اكتر يعنى ده طريق ونهج الحياة وسنة الحياة قصدى زى ما بيقولوا بس البنت اللى بتفكر فى الفيلا او العمل بس مسيرها تفكر فى الجواز اصل ده ميل طبيعى ربنا حطه فينا مش هنتفذلك احنا بقى ونقول لا مش عاوز اتجوز الشباب فى البلد الحلوة دى امامهم صعوبات كتتير فمش مشكلة انه يحوش ويكون نفسه من اول ما يشتغل عشان عقبال ما يكون نفسه بنفسه هيبقى قرب على التلاتين ولا حاجة فمن حقه يحلم بس يحلم انه يعيش مع واحدة بقية حياته بس طبعا الاختيار مهم جدا هو الواحد هيتجوز كام مرة يعنى بس حكاية ان الراجل بعد الجواز ليه كل الحقوق انا شايف ان العملية دى حقوق وواجبات يعنى الطرفين لازم يوفروا لبعض الحقوق دى ويعملوا واجباتهم مع بعض يعنى زى ما هو مستنى يلاقى فى البيت الراحة والهدوء والمعاملة الحسنة برضه يراعى ان زوجته طول اليوم لوحدها او مع الاولاد ومحتجاله ومحتاجه ترغى معاه شوية فيسمعلها مش يسيب البيت ويقعد مع اصحابه والكلام ده يعنى بجد اذا كل واحد حس بالتانى هتبقى عيشة جميلة مش نقول حقوق المراة وبس لا نقول حقوق المراة وواجباتها وحقوق الرجل وواجباته ولا ايه

الحلم العربي يقول...

امام الجيل

اتفق معك في كل ما قلته ...يا ريت كل الشباب يفكر بالطريقة دي
علشان ما نكونش كل واحد بس بيدور على حقوقه و ينسى واجباته

تحياتي للتعليق الجميل
و أهلا بيك في المدونة المتواضعة

AbdElRaHmaN Ayyash يقول...

:)
و الله الكلام جميل
بس فعلاانا مستغرب من طريقة التفكير دي
طريقة تفكير اللييسيب الهندسة
و طريقة تفكير اللي بتحسب فلوسها بالورقة و القلم وللا اللي عاوزه فيللا عشان التحكم
ربنا يشفي
بجد .. ربنا يشفي

الحلم العربي يقول...

عبد الرحمن عياش
للأسف النماذج دي موجوده فعلا
أنا كمان لو كان حد كلمنى عن ان فيه ناس بتفكر كده كنت هستغرب لكن لأنى شفتهم بنفسي مش عارفة اقول ايه
المشكلة ان اللى ساب الهندسة ده فعلا حقق هدفه و هو الفلوس و البنت دي اللى عايزة تسيب اهلها و تعيش في فيلا لوحدها ممكن تحقق هدفها فعلا و نعيش احنا في مجتمع كل واحد عايش في جزيرته و عايز يحقق هدف تافه في الدنيا

أمال مين اللى هيبني المستقبل ؟؟؟؟ مش عارفة

بس بردو فيه ناس كويسين عارفين اهدافهم و بيحاولوا يحققوها حتى لو كانت أصعب بس أبقى في الدنيا و الآخرة

تحياتي لك و ربنا يوفقك

محمود على يقول...

انتي بتتكلمي عن شريحه كبيره اوووي في مجتمعنا
للاسف كتير منهم كده
بلاش نتكلم عن الاسباب
لان الاسباب كتير
بس تفتكري هما هيغيروا طريقه تفكيرهم
ولو غيروها هغيروها امتي
وبعد كام تجربه فاشله

ياسر سليم يقول...

بسم الله ما شاء الله

دا انتى عملتى بحث بقه ..

عموماً كويس انك قولتى ان الكلام ده مش كل البنات ولا كل الشباب ..

لكن انا من وجهة نظرى واللى شايفه ان البنت عايزه واحد بدال ما كنتش مرتبطه بيه قبل الزواج بتبقى عايزاه كامل ومعاه كل حاجة إلا من رحم ربى
وده من حقها .. بس فى نفس الوقت الشاب لو ما كانش ابوه هيساعده يبقى موت يا حمار على ما يعرف يعمل شقه وشبكة والكلام ده ..

نيجى لموضوع الشغل .. من اللى انا شايفه برضه .. ان فى ستات كتيره بتبقى عايزة تشتغل وساعة لما تطلع للشغل .. تتنطط على جوزها وتقعد تقول يعنى انا شغاله بره وكمان عايزنى اعملك الاكل واهتم بولادك وكذا وكذا .. وممكن يكون هو كان رافض موضوع الشغل من الاساس ..

الحلم العربي يقول...

محمود على
فعلا هما شريحة كبيرة للأسف
لكن بردو في أمل انهم يغيروا طريقة تفكيرهم ...لما يعرفوا أهدافهم الحقيقية و الحياة كفيلة بكده
و طبعا التجارب الفاشلة بتعلم كتير
ربنا ما يحطش حد مننا في موضع الفشل أبدا
تحياتي

الحلم العربي يقول...

ياسر سليم
أهلا بيك
رأيك في وجهة نظر بعض البنات سليم
ساعات البنت بتكون عايزة حاجة مبهرة في اللى هترتبط بيه لمجرد انها تخلت عن حلم الارتباط بشاب قبل الزواج
...طبعا دي نظرة سطحية جدا

طبعا رأيك في موضوع مساعدة الأباء للأولاد خصوصا في الظروف الحالية لازم طبعا ...لكن هما بس الآباء يقدروا يربوا ولادهم و بعدين يساعدوهم في الزواج

موضوع المرأة العاملة: و الله أحيانا بتكون المرأة العاملة شايفة انه حقها تعمل كده من ضغوط الحياه عليها ...لكن صدقنى لو شايفة زوجها بيحبها و بيحاول يساعدها أو على الأقل حاسس بتضحيتها ...عمرها ما هتحسسه بكده أبدا...ده لو هي إنسانة عاقلة يعني

تحياتي

حزيــــــــــــــــــن يقول...

السلام عليكم
لمستى موضوع مهم بعملعنه بحث ودراسه بس مش عنه بالظبط حواليه يعنى
عايز اقولك ان الرجل دائما حياته كلها جارفه يعنى مثلا الشاب مننا ممكن يسهر على النيل للصبح ويتمشى فى وسط البلد لتلاته بالليل ويروح يبات عند واحد صاحبه والصبح يكون فى اسكندريه بالليل فى مرسى مطروح وممكن يشتغل فى اى حته او يقف فى محل او يشتغل فى شركه او يبيع فى سوق وبالليل تلاقيه متلقح على القهوه ودا كله مش بيتوافر فى الشباب الضايع لأ ممكن يكون محترم جدا بس حياته مفركشع ومنكوشه ومش بيتلم الا لما يتجوز عشان كده الجواز هو محور الاستقرار فى حياته تخيلى كده شاب متجوز هينفع يعمل كل اللى قولتلك عليه طبعا لأ الا لو كانت مراته وحشه او نكديه ههههههه

بالنسبه للبنات فهى بطبعها رومانسيه وخيالاتها خصبه فعشان كده طموحتها بتبقى من غير حدود
لكن فى الاخر الواقع بيفرض نفسه

ولعل مثال الرسول صلى الله عليه وسلم شاهد انه لم تهبط عليه الرساله الا بعد الزواج لأن الزواج كان من ضمن التأهيل له لحمل الرساله ليشعر بالاستقرار

والمرأه بطبيعتها قادره على خلق نوع من الاستقرار والسكينه عشان كده ربنا قال " لتسكنوا اليها "

عجبتنى اوى البنت اللى سابت الشغل عشان العلم الشرعى وهى دى صفات البنت اللى بدور عليها لأنها هتكون صالحه فى كل شئ هتعرف ان طاعة الزوج واجبه فمش هتنشأ بينهم مشاكل وهتتعلم امور دينها فهيكون سهل تربى اولادها على الدين وكمان هتساعد زوجها على امور دينه فربنا هيباركلهم فى البيت كله

وفى النهايه عايز اقولك
ان الواقع بيفرض نفسه
انا اعرف واحد فضل يستخير على بنت من اولى كليه لرابعه كليه اربع سنين استخاره وكل ما الاستخاره تيجى بالقبول يقول لأ هى مش متدينه لما تيجى الاستخاره تانى وتيجى يقول لأ وهكذا ودلوقتى هما لسه متخرجين وهيروح يتقدم خلاص
بالنسبه للبوست اللى فات انتى كنتى زعلتنه ليه انا هبقى اقراه وارد عليكى بس مره تانيه
تحياتى

الحلم العربي يقول...

حزين
.........
أولا : تحياتي ليك و أهلا بيك دايما
ثانيا: تعليق رائع ...و ضحلى بعض الجوانب اللى ما كنتش واخدة بالى منهابالنسبة للشباب و اهتمامهم بالاستقرار ...لكن مش شايف انها متناقضة شوية لكون الشباب دول بعد الجواز بيشتكوا من التقيد اللى في الجواز...طبعا مش كلهم

بالنسبة للبنت اللى فضلت تتعلم العلم الشرعي...طبعا أنا معاها لأننا كلنا شباب و بنات محتاجين نتعلم العلم الشرعي جدا علشان على الأقل نعرف نعبد ربنا و نربي و لادنا و الكلام ده شامل الولاد و البنات ...لكن اعتراضي انها رمت كل سنين التعليم ورا ظهرها و قالت على العلم الدنيوي انه علم لا ينفع مع اننا محتاجين للدكتورة و المدرسة و المهندسة المتدينة اللى تراعي ربنا في شغلها و في نفس الوقت تاخد بالها من تربية ولادها و تربيهم بطريقة متدينة و تكون في نفس الوقت عصرية عارفة ازاي تربي و لاد في القرن الواحد و عشرين

انا شايفة انها استسهلت ...و علشان ما تقولش انى متحاملة عليها او بتكلم عن غير تجربة ...لكن انا الحمد لله بدرس علم شرعي و بحفظ قرآن و بشتغل و الحاجتين حاسة انهم بيكملوا بعض ....انى اتعلم ازاي اعبد ربنا و في نفس الوقت أحاول اكون داعية بأخلاقى في العمل ...و هي دي ثمرة العلم اللى لازم يطبقها كل متعلم. و هي انه يخالط الناس و يصبر على أذاهم مش يعتزلهم


تحياتي و آسفة للإطالة

غير معرف يقول...

و النبي؟

طب عارفة حاجة؟
أنا خلاص كنت هأروح أنتحر عشان فعلا مبقاش في أمل من الشباب بتاعنا

أصل كل حاجة بيفكروا فيها الشباب دلوقتي يدخل كلية حلوة عشان يتخرج و يشتغل و لا يسافر برة عشان يجيب فلوس و يخلف عيال

بغض النظر عن إن دي سنة ربنا و القوانين الحتمية للحياة

لكن لية بقينا نعتبر الخطوبة و الجواز إنجاز؟

يعني عمري ما سمعت من أصحابي عن واحد هدفه في الحياة إنه يأسس مركز بارابسيكولوجي أو إنه يبني محطة فضاء عربية أو إنه حتى يتخصص في حاجة تنفع الناس كأنه يفتح مصنع الكترونيات ، كهربائيات ، مستشفى بيتقاضى من الأغنيا عشان يعالج الفقرا بنفس المستوى ، واحد طموح بأي حاجة تنفع إسلامه و تنفع دينه

خلاص، بقى الجواز هدف ليه بعد ما كان من سنن الحياة و حاجة طبيعية و لا تعتبر إنجازا على الإطلاق

افتكرت كلمة بابا لما شاف واحد صاحبه في مصر ما شافهوش من أيام الثانوية فبابا بيقوله : ها ، عملت إيه في الفترة دي كلها؟
قاله: الحمدلله اتوظفت في مستشفى حكومي و اتجوزت و جبت حمادة و نورة

شكلي دخلت شمال على طول؟
مش أنا جبت 99.8 ف الثانوية؟
أه و الله
أنا نفسي مش مصدق أصلي كنت خايف من الأحياء و نقصت فيها بردو

أصلي دخلت الإمتحان مش مذاكر وحدتين

تحياتي

هوندا يقول...

بصى يابنتى هو بتختلف من ظروف بنت للتانية وعقليتها وكل راى لواحدة فيها ناتج عن مبادى وافكار خاصة بيها نتيجة لحاجات عاصرتها ونقطة ان الى بيشتغلو م البنات ممكن ينفضو للجواز ده لان دى انسان وليها طموحا وبتحب انها تحقق ذاتها دى حاجة طبيعه كلنا بنمر بيها بس بردو بيعتمد ع رغبة الواحدة فحياتها ان ع نفسى من كتر المشاكل والقرف الى بشوفه كنت هصرف نظر وافضل حره بس لان الواحد بيحاول يقرب لربنا بكل حاجة فالجواز سنة عن رسولنا وانك تكونى زوجه صالحة حاجة كبييييييييييرة اوى وممكن تكونى حاجة وانتى فى بيتك انك تطلعى عيال عدله
وثنكث :)

الحلم العربي يقول...

محمد فوزي آل ربيع
ألف مبرووووووك ..ايوة كده المجاميع الجامدة ...ربنا يوفقك و تدخل الكلية اللى بتحبها
و حمد الله على السلامة بعد غيبة الامتحانات ..

لا ربنا يكرمك انا مش بقول كده علشان تروح تنتحر...فعلا عندك حق الشباب و البنات كمان بقوا بينظروا للزواج على انه انجاز في حد ذاته ...
بس انت عارف يمكن هما بينظروا له كده علشان اللى بيلاقوا يتجوزوا دلوقتى مش كتير و لأن الحياة بقت صعبة فعلا

ربنا يستر على مستقبل بلادنا العربية من مشاكل البطالة و الزواج بجد

تحياتي لك

الحلم العربي يقول...

honda
ازيك يا قمر
و الله و مين سمعك ...أنا كمان كنت ساعات بفكر انفض للجواز و اشتريلى عيال من السوبر ماركت اربيهم و خلاص

لكن بردو دي سنة الحياة و كفاية ان الواحد يبنى بيت مسلم يعبد ربنا و يكون هدفه يخلف صلاح الدين لهذه الأمة....يمكن ربنا يحقق أمنيتنا لو رأى فينا صدق النية

تحياتي
و يو آر ويلكمد

طالب اخوانى يقول...

اكيد أى حد مبيفكرش غير فى الفلوس .. هيكون مصيره ذى أخيبنا بتاع البورصة .. بس مش شرط النجاح .. بل بالعكس تماما .. الفشل فى كل مجالات الحياة .. حتى مجاله الأصلى الذى كان يدرسه فى الجامعة ..
طبعا الكلام ده مينطبقش على بعض الكليات ذى تجارة وحقوق وآداب وتربية وتربية رياضية وتربية نوعية وبعض الشباب اللى متخرج من هندسة وطب وصيدلة وأكيد طبعا فوق ده كله طب بيطرى .. يعنى نسبة مش كبيرة ..
ربنا يعافينا ..

الحلم العربي يقول...

طالب اخوانى
أهلا بيك لأول مرة في المدونة
فعلا أي حد هدفه الفلوس هيكون ده مصيره ...ممكن يحقق اللى كان نفسه فيه لكن في الآخر هيلاقى نفسه ما حققش نجاح يذكر

تحياتي
و أهلا بيك على طول

سندباد يقول...

لازم معترف اني في خلل في المجتمع المصري من فترة طويلة ده اللي اثر علي كل حاجة فينا

الحلم العربي يقول...

sendbad
أهلا بحضرتك ...نورت المدونة
فعلا لازم نعترف بأن في خلل منذ فترة في أخلاقياتنا كمجتمع و ده بنشوفه في كل مظاهر الشارع المصري دلوقتى ...من لبس الناس للتحرشات اللى بتحصل و ما تلاقيش حد ينهر من يفعل ذلك و حاجات كتير أثرت على فكر الشباب و خلته مشوش ...
ربنا يستر علينا بجد

تحياتي لك و شكرا على التعليق

momken يقول...

صلى على النبى

كتير من الشباب فاكر انه لمل يخلص الجيش ويتجوز يبقى كده خلاص ارتاح
دى افكار طلبه الجامعه
كل الى عاوزة يخلص كليه ويخلص الجيش ويتجوز دى بالنسبع للولد
بالنسبه للبنت عاوز تخلص الكليه وباباها يشوف لها وسطه تشتغل شغلانه مرموقه ومنها تنحصل على عريس جامد

لاتنين بيتفقول فى نقطه الجواز

لكن التفكير النطقى بيقول بعد انتهاء كل مرحله نقف ونتحاسب ونفكر فى المرحله الاخرى
اغلب اصحابك فى الكليه عاوزين كل الاشياء
عاوز يبقى دكتور وظابط ومطرب وممثل وهو اصلا لسه متولدتش
يعنى لسه باباه خاطب مامته
طيب خالص مرحله وابدا فى الى وراها
لاء
هو عاوز الكل
والنوع ده بيصاب باحبتاط كتير وفشلات متكرره ومتتابعه
لانه متدربش يفكر بشكل منطقى يوافق امكاناته وطموحاته
وهذا مايسمى
الاحتياجات و الامكانات
تحياتى

الحلم العربي يقول...

momken
أهلا بيك في مناقشة بتاعتنا و أكيد رأي حضرتك هيضيفلنا كتير

فعلا انا مع حضرتك انهم عايزين يحققوا كل حاجة ...بس هي ايه كل حاجة بالنسبة لهم ؟؟؟ معقولة تكون كل امنياتنا في الدنيا الجواز و الفلوس و العربيات

يبقى فيه خلل جامد في تفكيرنا ..أو ممكن نقول ان من كتر المشاكل الاقتصادية بقت طموحاتنا هي أبسط الأشياء اللى المفروض نحققها و احنا رايحين على أهدافنا الحقيقية...أو يمكن التوهان اللى احنا عايشين فيه

أنا متفقة مع كلام حضرتك جدا

و أهلا بيك دايما في المدونة المتواضعة