2008-01-01

تاج بأية حال عدت يا تاج

أولا
كل سنة و انتو طيبين و عام سعيد إن شاء الله
ثانيا
وخشتنى التاجات
انا عارفة ان فيه ناس مش بتحب التاجات لكن التاج ده عجبني
وبشكر الزميل ولو على التاج لأنى بصراحة مررته لنفسي من مدونته محدش مررهولى و هو مشكورا وافق على ذلك
ندخل على التاج


هل هل كنت طالب شاطر في المدرسة؟

في الواقع .....في الحقيقة يعني ....احيانا

او بمعنى ادق ....مراحل في حياتي كنت شاطرة و مراحل كنت هادئة النشاط
لكن انا عامة بحب المذاكرة و بحب امسك الكتاب و افصصه و الحاجات دي لكن مش بحب أكون من الناس الدحيحة اللى مش وراهم غير المذاكرة لأنى مقتنعة إن الإفراط في أي شئ تطرف حتى لو كان التعلم

ايه كانت أحب مادة ليك في المدرسة و الكلية؟
في المدرسة : اللغات جدا جدا
ثم الرياضيات جدا
أما في الكلية : كلهم زي بعض محدش فاهم حاجة ......لكن تقدر تقول ان التصميم المعماري كان بيطلع كل العقد النفسية و الكبت اللى جوايا

أكره مادة ليك في المدرسة و الكلية؟
وهي دي عايزة سؤال؟؟
الجغرافيا ثم الجغرافيا ثم الجغرافيا ....بكرها من كل قلبي
و في الكلية : التركيبات الصحية ....و محدش يسألنى ليه...هههههههه

كنت عايز تطلع ايه و انت صغير؟
كل المهن اللى ممكن تتخيلها كان نفسي فيها
لكن اكترحاجات كانت في بالى وعلقت معايا فترة كبيرة
هي انى كان نفسي ابقى .....طيارة
ههههههههههه
محدش يضحك لو سمحتوا
بجد كان نفسي اشتغل طيارة جدا ....لكن عرفت انه صعب
و بعدين كان نفسي اشتغل عالمة فضاء و اكتشف ان فيه مجرات تانيةغير المجرو بتاعتنا و اروح ازورها و كده يعنى ....علشان اشوف الدنيا بجد ....مش تقولولى القمر .....قمر ايه بس احنا أكبر من كده بكتيييييييييير

إسم مدونتك؟
الحلم العربي ...يا افندم ..... لو مش عاجبك نغيره

لماذا اخترته ؟ واما هي نيتك من اختياره؟
اخترته لأنى عايشاه بجد
بحلم يعيش العرب أمة واحدة و يد واحدة لأن ربنا خلقنا لنكون كذلك ..... لغة واحدة ...دين واحد .... احاسيس وطباع متوافقة .....
و في رأيي
يوم ما نعرف نكون كده .....هيتحقق لنا النصر على أعدائنا وهنسترد أراضينا و كرامتنا في العالم كله
و الأهم : اننا هنعمر الأرض بجد كما أراد الله منا
لأن التاريخ أثبت إن الحضارة الحقيقية القائمة على الأخلاق كانت الحضارة الإسلامية
و أزهى عصور العالم كانت العصور اللى يد العرب كانت اليد العليا فيها

هل فكرت في إغلاق مدونتك ؟ و السبب ؟
أيون ...حصل السبب : انى حسيت فى فترة ان اللى بقوله مجرد كلام مش هيغير شئ

صورتك في المدونة و رمزيتها؟
قبل كده ماكانش عندي صورة لكن نزلت صورة قريبا و هي صورة بنوتة صغيرة بتطير فقاعات صابون و رمزيتها : أحلام البنت الصغيرة ....ياترى هتبقى مجرداحلام و لا حقائق افهموها انتو بقى


لماذا دخلت في عالم التدوين من الأساس؟
1-لأنى حبيت أكون مؤثرة ولو في شئ بسيط زي ده
2-مجرد التفاعل مع ناس محترمين زي اللى أعرفهم عن طريق المدونات في حد ذاته شئ بيديلى أمل ان الدنيا لسة بخير
3- لأنى بحب الكتابة من زماان و المدونات متنفس حر لكل هواة الكتابة في التعبير عن آرائهم في كل شئ بالطرق المختلفة و كماااااان يعرفوا رأي الناس في كتاباتهم
يبقى ليه ما ادونش بقىىىىىىىى


أحلى جملة قيلت في وصف مدونتك؟

لا هي جمل كتيرة من ناس بحترمهم أوي و بعتز بآرائهم جدا لكن اللى افتكرهم الآن :
أول تعليق مشجع من أختى أمل غنيم:
بدأت التدوين منذ شهر ولم نرك الا الآن ؟!!!!
عندك كلام كثير تحمله كتاباتك ؛ ومن المؤكد أن عندك روائع تختزنها ذاكرتك ...
نحن على استعداد تام مشاركتك اياها - اذا أحببت -.

تعليق أثر في من م/حاتم : اود ان اخبرك انني لم اتماك نفسي بعد اكتشافي لبلوجك اليوم ولم استطع الخروج ولا التعليق الا بعد قراءته كاملا بجميع البوستات وكل التعليقات
احيي فيكي نقاءك ووضوحك وعلى الدرب سائره دائما ان شاء الله

تعليق لأول مرة من شخص احترمه على المستوى الشخصي : ما شاء الله يا صاحب *الحلم العربى* مش البوست دا الى بس رائع كل كلامك رائع وجميل ربنا يزيدك
عارف ان انا من زمان ما دخلتش على البوست بتاعك بس اكيد هداوم علية عارفة لية؟؟
لان الكلام الى فية بيريح النفس .
وخارج من القلب فى موقف حساسة
شكرا
اشكرهم جميعا و بالطبع انا اعرف جيدا انى لست أهلا لهذا الكلام اللهم اجعلنى خير مما يظنون و اغفر لي ما لا يعلمون

التعليقات بالنسبة ليك اهميتها؟

دي بقى مرض نفسي جالى من أول ما دخلت عالم التدوين بهتم بيها جدا .... وممكن تعليق يخلينى افكر فيه طول اليوم لدرجة انى احيانا ممكن أتأخرفي الرد على التعليق علشان افكر فيه كويس و لدرجة مرات كتير و انا نايمة احلم ان مدون أومدونة علق في المدونة و لما اصحى أكتشف ان الشخص ده علق في المدونة فعلا تقولولي عفاريت بقىىىىىىىىى ... مش عارفة لكن لما حصل لى الموضوع ده اكتر من مرة قررت انى اعالج نفسي و الحمد لله ده حصل في رمضان اللى فات و بحاول استمر

ما أحلى بوست كتبته ؟ ضع اللينك ثم اذكر لماذا؟
مش هقول لكوا الكلام المكرر كلهم أبنائي هو صحيح كلهم أبنائي لكن فيه بوستات كانت مرتبطة بمشاعر عميقة حسيت بيها و منهم
لا نحن نحن و لا الزمان هو الزمان
هندسة الحياة
رب أرني أنظرإليك
إلى من أتمنى أن أكون من أصحابه

أحلى مدونة قريتها؟
كل اللى على يمين المدونة
بحب في دكتورة زازززو : انها مدونة اختى الجميلة و دماغها النظيفة
بحب في اللعبة : فكرة المشاركة
بحب في مدونة منسي : موهبة جميلة في الرباعيات و شخصية ذات فكر خاص
بحب في مدونة مصعب الخير : البراءة المختلطة بالعبقرية
بحب في قضية عم أحمد :انها فيها هدف نبيل وانها قضية كسبانة
بحب في دوللى : ان كلامها من جوة و من قلبها
بحب في مدونة الهواري : انه اثبت ان حي في القبر و ليس ميت
بحب في هوندا : الرغي خفيف الدم المشبع بالحكمة
بحب في راما : طفولتها و برائتهاو روحها الحلوة
بحب في اصرار أمل : النبوغ مع الاعتدال مع اللغة الرصينة
بحب في شيرين : حريتها و من لا يحب الحرية ؟
بحب في مدونة مصراوي : ان القضية ماليه كل كيانه
بحب في مدونة ممكن : انها مدونة مليئة بالحكمة
بحب في مدونة حلاوة : موهبة + عقل راجح + شقاوة
بحب في مدونة سكاير : بردو موهبة + عقل راجح +شقاوة
بحب في مدونة حائر في دنيا الله: ان حتى لما يكون حائر بيكون عارف الطريق
بحب في واحدة بتحب البلد دي : انها مؤمنة بالقضية من غير خوف
بحب في 1-2- free : ان الدنيا لسة فيها خير و مش كل حاجة بثمن زي ما بيقولوا
بحب في مدونة البراء أشرف : الاسلوب الرشيق + الجرأة
بحب في بنت البلد : انها بنت بلد صاحبة قلب جميل و بحس انها قريبة
بحب في مدونة الدرينى : الثقافة المفرطة
بحب في همسة قلم : الرقة مع الإيمان
بحب في لو كنت أعلم : انها صديقتى التى لا أعرفها لكن أشعربوجودها
بحب في مدونة انا مش معاهم : انه بيحب مصر أوي
بحب في مدونة كمون و زنجبيل : بيديلى أمل ان شباب مصر ممكن يطلع منهم نوابغ
بحب في نقطة ميه : الإيجابية
بحب في مدونة صح ولا غلط : انه في الغالب صح
بحب في بلوتيكا : احاسيسها المرهفة
بحب في مدونة مش أنا : الإيجابية + الجرأة
بحب في مدونة و لو : اثبت ان المهندسين ناس حساسين بردو مش قلم و مسطرة بس
بحب في مدونة حياتنا كلمات : ان كلماته إن شاء الله حسنات
بحب في أميرة البلطجية : انها رقيقة جدا بعيدة عن البلطجة تماما
بحب في عايزة اتجوز : خفة الدم الشديدة
بحب في مدونة الأغلبية الصامتة : الأفكارالجديدة
بحب في مدونة غريب : البحث عن الاعتدال + رجاحة العقل
بحب في مدونة مزاج : موهبة شعرية لازم تطلع للنور
بحب في بنت مصرية : بتعبر عن كتير من بنات مصر
بحب في حكاوي آخر الليل : عرفتنى على الكثير من المدونات + فكر واعي و مختلف
أما مدونة أنا آسف و مدونة مختلفة و فوضى الحواس فمنذ فترة ولم أدخلهم نظرا لأنهم لم يحدثوا و لكنى احترم أصحابهم جدا و اتمنى ان يعودوا للتدوين مرة أخرى

حد قل أدبه في تعليق عندك ؟
أبدا كل اللى اعرفهم ناس محترمين الحمد لله

ايه اللى هيحصل لإيميلك لما يموت ؟
نفسي ما يموتش لأنه عليه حاجات مفيدة كتير

اديت الباسوورد قبل كده لحد؟
ايون كتييير لكن بغيره بعدها مش لعدم ثقة لكن انا بحب اغير الباسوورد كل فترة

ايه كانت علاقتك بيه ؟
اختى
صاحبتى

واحدة كانت عايزة حاجات من عليه ضروري و مش كان متاح انى افتحه

اسمك؟

آية

اسم الدلع المشهور بيه بين اصحابك ؟
آية بردو .... ده هو 3 حروف هو ناقص دلع

مجال دراستك؟
الهندسة المعمارية

شخصيتك نوعها ايه ؟
أكيد مش باتا و برباط ....هههههههه
صعب الواحد يوصف نفسه لكن انا في الغالب شخصية هادئة مفكرة ....مرحة مع القريبين منى .... الناس بتقول طيبة لكن انا اشك في الموضوع ده

مودك ايه ؟
متقلب جدا لأبعد حد

بتعمل ايه في وقت فراغك؟
1- انترنت ثم انترنت ثم انترنت
2- تليفزيون
3-قراءة
4- رغي مع أعز أعز صديقة لي " أمى الحبيبة"
5-خروجات مع أختى أو صديقاتى لو متاح

الأكلة المفضلة؟
مممممممم
مكرونة بالبشاميل من ايد ماما

ورق عنب من ايد ماما
كوسة بالبشاميل من ايد أختى

و عموما : أي أكلة مع ناس بحبهم بتكون أكلتى المفضلة

السفر بالنسبة لك ؟
متعة + إفادة بحب الطريق في السفر جدا أكتر من السفر نفسه

الصفات اللى اخدتها من بابا؟
1- الطيبة
2- التذوق
3-العند

الصفات اللى اخدتها من ماما ؟
1- اتمنى أكون أخدت منها رجاحة العقل
2- الكرم
3- الطيبة بردو
4-التردد
5-الصبر و التحمل

اكتر 6 حاجات بتكرههم
1- البعد عن ربنا
2-الظلم و التسلط
3- الكذب
4- الذل
5- الخيانة
6- قلة الذوق

اكتر6 حاجات بتحبهم
1- القرب من ربنا
2- الحب في الله
3-الجلوس مع عائلتى
4- براءة الأطفال
5- حماس الشباب
6- حكمة الكبار

الشغل بالنسبة لك؟
تحقيق الذات
المساهمة في بناء المجتمع

باب من أبواب الدعوه إلى الله بطريقة غير مباشرة بالقول و العمل
مصدر رزق لأن اليد العليا خيرعند الله من اليد السفلى

ايه الكمبيوترو النت بالنسبة لك؟
عالم واسع كلما ازددت علما كلما ازددت علما بجهلي أو مثلما قال الإمام الشافعي

تمرره لمين؟
لكل اللى يحب يجاوب عليه علشان محدش يزعل مننا

معلش التاج طويل شوية لكن كل تاج و انتو بخير

هناك 36 تعليقًا:

*.* HoNdA *.* يقول...

ههههههههههه يو ار عثل ريلى ونفس التفكير زى ماقلتلك قبل كده يو ار ثو جود هععهعهعهع
ميرسى ع البقين الحلوين دول فى حقى هههههههه

A.SAMIR يقول...

جميل ان الواحد يبتدي 2008 بتاج
اجابات بتعكس شخصية مميزة
تحياتي

NIDAAL PAL يقول...

اجابات هايلة اوى
و موفقة و موضوعية
و اعذرينى ان كنت مقصر فى حق زيارة مدونتك التى تزيدها جمال عن جمال كل يوم بقلمك
بارك الله فيكى

RAMA يقول...

إممممم.. ده ايه تراود الأفكار الفظيع الشنيع ده ... يظهر إننا مستنسخين وإحنا مش واخدين بالنا

بس على فكرة إنت جوابتي أحسن بكتير مني ،شكلك ذاكرت كويس يا مان

وعلى فكرة الحاجة اللي بتبقى صادقة أوي بتدخل القلب على طول .. وإنت دخلت القلب على طول

سلامات يا قريني

همسة قلم يقول...

وانتي بألف خير ياآية ..

اجباتك بجد سلسة وجميلة جدا وشخصية نحسبها على خير كثير ولا نزكي على الله احد

اخجلني وصفك يااية جدا :$

رنبا يعزك ويبارك فيكِ وتحققي كل اللى بتلحمي بيه ..

momken يقول...

ماشاء الله منتهى الدبلوماسيه واللباقه فى الردود وزيره خارجيه يا ناس الى بتجاوب

كمان خفه دم وكمان نزعه دينيه جميله

ربنا يزيدك
ومتشكر ياستى على ذكر اسم مدونتى المتواضع فى البوست الرائع بتاعك واشكرك علة وصفك الجميل للمدونه

تحياتى

Halawa يقول...

حلم هانم
أو آية هانم
ازي سعادتك
تاج حلو بجد قوي
الفكرة متستفة حلو
واجاباتك لذيذة

كنت عايزة تبقي طيارة؟؟؟؟؟؟؟؟؟
حسبي الله ونعم الوكيل
وبعدين ايه تركيبات صحية؟؟؟
دي مادة ولا سباكة ولا ايه
ههههههههههه
مش فاهم بجد
ثالثا
بحب الجغرافيا بقى
مليش دعوة شيلي الاجابة دي


حبيت أغلس على سيادتك
بقالي فترة بعيد ومطنش
قليل الأدب بقى
مسلمتش على اختي من زمان

شكرا جزيلا ليكي على ذوقك
على رأيك في مدونتي
انتي شخص بجد نفخر اننا نعرفه
اسألي هوندا حتى
كنا بننم في حقك من فترة كده

أخيرا
يارب تكوني بخير دايما
بالتوفيييييييييييييييييييييييق

نقطة مية يقول...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

الحلم العربي يقول...

honda
.....
هنوده العثل
اهو انتى اللى ثو ثو ثو عثل هههههههههه
و طبعا انا عارفة اننا نفس التفكير ده يشرفنى يا جميل
و ما تشكرينيش على البقين لأنهم بجد من قلبي و انتى عارفة

تحياتي يا قمر و كل سنة و انتى اجمل و اكثر رغيا ههههه

الحلم العربي يقول...

a.samir
.......
شكرا ربنا يكرمك على التشجيع ده
و كل سنه و حضرتك طيب

تحياتي

الحلم العربي يقول...

nidaal pal
..........
ربنا يخليك ايه الكلام الجميل ده
ده المدونة اللى اتشرفت بزيارة حضرتك و ما تتأخرش علينا
كل سنة و حضرتك طيب
تحياتي

الحلم العربي يقول...

rama
....
مش قلتلك يا بنتى تراود أفكار جامد بجد
و ده يشرفنى يا باشا اننا نستنسخ من بعض ههههههه بس حلوة مستنسخين دي
هو صحيح الحاجة اللى بتبقى من القلب بتدخلالقلب على طول لكن مش أي قلب يفهمها و انتى قلبك من القلوب القليلة الصادقة اللى بتفهم ههههههه
سلامات يا جميل

الحلم العربي يقول...

همسة قلم
.......
بفرح جدا لما بلاقى تعليقك عندي
ربنا يديم المشاعر الجميلة بيننا
انتى كمان شخصية أحسبها على خير و بجد كلامى عنك و عن مدونتك هو احساسى ناحيتك مش مجاملة
دمتى أكثر إيمانا و رقة
و كل سنةوانتى طيبة
تحياتي

الحلم العربي يقول...

momken
......
امال ايه ياممكن وزيرة خارجية حته واحدة ...لا بلاش تصفيق يا جماعة دعونا نعمل في صمت هههههههههه
أشكرك بشده
و كلامى عن مدونتك ده اقل شئ لأن الحقيقة أكثر
تحياتي الخالصة

الحلم العربي يقول...

halawa
......
حلاوة بيه ....انا الحمد لله كويسة انت عامل ايه ؟
و اخبار الكلية ايه ؟؟
ايوة كنت عايزة ابقى طيارة ....و فيها ايه يعني ...بس سمعت ان المرور فوق واقف فقلت اخلينى في الأرض و خلاص ههههه

و التركيبات الصحية يا سيدي هي فعلا سباكة مش بقول محدش يسألنى بكرهها ليه ههههههههه
معقولة انت بتحب الجغرافيا ؟؟؟ ده حصل ازاي ده ؟؟ لا ما تقلقش على نفسك انا اعرف ناس كتير كانوا كده بس دلوقتى الحمد لله كويسسين ههههههههههه

لا بجد
انت من الناس اللى بيدولى أمل في المستقبل ....ربنا يوفقك و يكرمك و تحقق كل ما تتمنى

و بعدين موضوع النميمة ده هستجوب فيه هوندا طبعا ماشي ماشي ...و انا بقول كنت عمالة اكح ليه هههههه

كل سنة و انت طيب وبخير دايما

الحلم العربي يقول...

نقطة مية
.......
نورتينى يا جميلة
شكرا على دعوتك و بالتوفيق إن شاء الله
تحياتي

على الطريق يقول...

البشمهندزة آية .. تحياتي لإجاباتك على التاج وكل سنة وانتي طيبة

DR.HAMAS يقول...

ربنا يكرمك أختنا

بجد اجاباتك متميزة

جزاكم الله خيرا



د.حمــــاس

نهياوية يقول...

كل سنة وانتي بخير
ماشاء الله اجابات جميلة
ربنا يوفقك دوما لما فيه الخير والصلاح
تحياتي

بيتنا القديم يقول...

كل تاج وانت بخير..!!

(:

دمت بخير

محمد فوزي آل ربيع يقول...

أنا كمان مجاوبتش التاج ده، إذن همرره لنفسي أنا كمان مع إن أنا فاكر إن كتير ممرهولي من أربع شهور تقريباً و أنا كنت مطنش مش فاكر ليه، أي حاجة بقى

هوا ليه كله بيكره الجغرافيا صحيح؟ يعني أنا عمري ما أفتكر إني زهقت من الجغرافيا أو مليت من مذاكرتها ، يعني كنت بذاكرها زي أي مادة تانية لكن يبدو إنك مخنوقة منها فعلاً

ممتاز، لا ممتاز فعلاً، المجرة؟؟؟ بصراحة خيالك واسع بشكل مفزع، انتي كانوا تايهين عنك فين بس نفسي أعرف؟ لكن يللا الحمد لله ، دا الهندسة كانت هتخسرك فعلاً

طبعاً كون أي مدون يفكر في قفل مدونته دا شيء بيرعبني لأني مش قادر أستوعب إزاي الواحد ممكن يشيل اسمه بنفسه، يشيل بصمة هوا حطها بنفسه، كون إن الحاجة دي بتغير أو ما بتغيرش دا مش المسألة لأن التدوين لم يخلق زي ما كتير من المدونين فاهمين إنه للدفاع عن القضايا السياسية و بس، التدوين عموماً هو تعبير عن إنسان بكل ما يملكه الإنسان ده من أفكار و اهتمامات و المدونة دي زي ما يكون عقلك المقننو متنفسك بشكل أو بآخر و طبعاً الأسباب اللي ذكرتيها للتدوين مقنعة جداً

أنا تجاه المدح، وشي بيحمر و مبعرفش أقول حاجة إلا إني أشكرك و أقول زي ما انتي قلتي إني اعرف كويس انى مش أهل للكلام الكبير دة اللهم اجعلنى خير مما يظنون و اغفر لي ما لا يعلمون

طبعاً أنا مش هأخفي عليكي إني اندهشت لما قلتي مع أعز صديقة ليا أمي الحبيبة لأننا مبنلاقيش حد زي كدة الأيام دي و ربنا يجعلك قريبة منها أكتر و أكتر لأنها ببساطة مامتك

أنا نفسي أدوق طعم الكوسا بالبشاميل دي، أول مرة أسمع عنها،

أنا دلوقتي أدركت إن التاج ابتداء من سؤال اللي هيحصل لإيميلك لما تموت دا أنا جاوبت عليه بس اللي فوق لأ

أنا اللي فكرني بيه إني كنت جاوبت على السؤال بتاع مزاجي إني بردو متقلب موووت

http://kammon-we-zangabeel.blogspot.com/2007/02/blog-post_06.html

يللا، تحياتي

الحلم العربي يقول...

على الطريق
...........
أشكرك على تعليقك الجميل و نورت المدونة

تحياتي

الحلم العربي يقول...

dr.hamas
........
بنا يكرمك و نورت المدونة لأول مرة
أشكرك على ذوقك و اتمنى المدونة تكون عجبتك
تحياتي

الحلم العربي يقول...

نهياوية
......
و انتى بخير يا رب
و أشكرك على الدعاء و لك مثله إن شاء الله
تقبل الله منا و منك
تحياتي الخالصة

الحلم العربي يقول...

بيتنا القديم
...........
و انت بخير دايما يا رب
ودمت بأحسن حال
وما تتأخرش علينا
نورتنا بجد
تحياتى

الحلم العربي يقول...

محمدفوزي آل ربيع
...............
لازم تجاوب على التاج ....التاج
علينا حق....هههههه

الجغرافيا: انا طبعا لا انكر اهميتها ...لكن بصراحة ....بكرهها فعلا ...كانت مادةكلها حفظ و حاجات عجيبة ....ماتفكرنيش الله يكرمك ..هههههه

بالنسبة لقفل المدونة : كلامك مظبوط فعلا و انا مقتنعة بيه ....لكن حتة انها تكون مؤثرة أقصد بيها انها تكون بتعكس أشياء كويسة يعني على الأقل لا تحض على شئ سئ

بالنسبة لرأيي في مدونتك : بجد انا مش بقول الكلام ده على سبيل المدح انا بقول اللى مقتنعة بيه و حاساه و ربنا يتقبل دعائك و يجعلك خير مما نظن و يغفر لك مالانعلم

بالنسبة لأمى : و هل سواها يحبنى كام تحبنى هي و هل يوجد في الكون من يستحق حسن الصحابة مثلها ؟؟؟
بالطبع لا فتلك وصية الرسول صلىالله عليه و سلم
و يا رب اكون بعرف أطبقها و نعرف كلنا نطبقها لأن الأم بجد صداقتها لا مثيل لها ....كفاية الأمان و انت بتحكيلها كل شئ .....ربنا يخلييها لي و ندخل الجنة سوا ....آمين

بالنسبة للكوسة بالبشاميل : ممممم ممكن اقنع اختى تكتب طريقتها على مدونتها و هبقى اعزمك عليها إن شاء الله ..... لا هعزمك على المدونة مش الكوسة ....و زيارة المدونة هتكون رسومها خمسة و سبعين قرش ...هههههههه مادية انا مش كده

كويس انك جاوبت على التاج لنه ظريف و انا هدخل اشوف اجاباتك حالا

تحياتي لك و ربنا يوفقك

حائر في دنيا الله يقول...

مش عارف النضارة عايزة تتغير
ولا الخط فعلا زغنون
المهم وبغض النظر عن أي نظر
كل سنة وانت بخير وبصحة وسلامة

السلام عليكم

sakayar يقول...

ههههههههههههه
بجد دمك خفيف جدددددن
واجابتك عثل عل عثل
على فكرة اول مرة اعلق عندك على الرغم من اني بقرأ كتير مدوتك
بس عارف والله مقصر ... اضربي اضربي ما هم علموكي كده في المدرسة
هههههههههههه
لا بجد والله بس بوست واجابات جميلة
على فكرة انا عندي نفس التاج بس باديء من نص الاسئلة تقريبا لو حبيتي تقرأيه
http://sakayaraty.blogspot.com/2007/08/blog-post_08.html

تحياتي

أحمد رفعت يقول...

الشرف كل الشرف انك تفتكري مدونتي واني اشرف بيكي فيها ...

كل عام وانت اسعد اوي

ولــــــــــو يقول...

بصراحة مبسوط جدا انك اخدتي التاج ده علشان يزيد من اعجابنا بشخصيتك المحترمه
انا بصراحه قريت العناوين وان شاء الله ارجع لما استمتع بالقراءه المتأنيه ليا عودة ان شاء الله

Eman Eltaher يقول...

هههههههههه
أنا برضه مش بحب الجغرافيا
عرفتى تردى على التاج صح
انا مرديتش على واحد تاج لحد دلوقتى

ههههههه
جميل تعبيرك عن المدونات
بصيت و دورت فيهم كتير
ملقيتش مدونتى !!!!! ههههههه
:))))))
هعذرك المرة دى عشان دى لسه اول زيارة ليكى
و انا شاء الله يدوم التواصا بينا

الحلم العربي يقول...

حائر في دنيا الله
..............
أولا أهلا بيك بعد غياب
ثانيا فعلا الخط صغنون اطمن على نظرك لكن معلش حبيت اعمل الخط صغنون لأن التاج طوييييل اوي
و حضرتك طيب
و نورت المدونة

الحلم العربي يقول...

sakayar
.......
ربنا يكرمك يا افندم انت نورت المدونة فعلا ووجودك سواء علقت أو لأ تشريف ليه

أشكرك على كلامك جدا
و طبعا انا أصلا قرأت التاج بتاعك من ساع ما انت كتبته و اعتد انى علقت عليه كمان
تحياتي الخالصة

الحلم العربي يقول...

أحمد رفعت
..........
بالعكس قى الشرف ليه انا هههههههههههه
بجد انا سعيدة ان المدونات عرفتنى باس زيكوا
ربنا يوفقك
و كلامى عن مدونتك ده اقل من حقها
تحياتي

الحلم العربي يقول...

و لو
.....
و الله ده ذوق منك مش كفاية انى سارقاه منك يعني
ههههههههههه
ربنا يكرمك و مستنيين تشريفك لينا دايما
تحياتي

الحلم العربي يقول...

eman eltaher
............
فرصة سعيده جدا يا إيمان
و معلش بقى اعذرينى اللى ما يعرفك يجهلك
إن شاء الله تكون بداية صداقة تدينية بيننا
و طبعا هزورك
تحياتي الخالصة