٢٠٠٧-٠٧-٠٥

ما حرمتش ......تاج تاني

عايزة أقولكوا ان التاج اللى فات سبب ليه ضيق شديد لأنى ضايقت بيه ناس لما مررته لهم و اعتذارا لهم و لأي حد ما بيحبش التاجات ....أنا مش همررلهم التاج ده و حتى لو مررته لأي حد منهم فياريت يسامحونى و ما يجاوبوش و أنا هكون متفهمة جدا لوجهة نظرهم


ندخل بقى في التاج



انت مين ؟؟-
اسمي آية ...في ناس بتحب تدلعنى بيويا أو أيويا لكن الأظرف اللى بيدلعوني بآية بتفخيم الألف أو اللى بيقولولى أوءة لأنى بحس انهم بيذمونى مش بيدلعوني ..هههههه

بنت مسلمة عربية مصرية و انتمائي الأكثر للثلاث حاجات دول
اللى بياخدوا بالظاهر بيقولوا مهندسة و بيقولوا طيبة و هادية لكن العالمين ببواطن الأمور عارفين انى لا بفهم في الأولى و لا انا التانية و لا التالتة

مين اكتر ست اشخاص بتحبهم ؟؟؟-
انظر التاج اللى فات و انت تعرف




هل انت سعيد ؟؟ -
ما يهمنيش أكون سعيدة دلوقتى قد ما يهمنى أكون سعيدة في الآخرة علشان كده عمري ما سألت نفسي السؤال ده و لا ركزت في إجابته .....الأهم هو الرضا و أنا الحمد لله راضية جدا و بتمنى من ربنا انه يوفقنى أعرف أستغل النعم اللى أنعم عليه بيها في الخير

لو اجتمعت مع حسنى مبارك فى مكان واحد هتعمل ايه ؟ -
اتعلمت من التنمية البشرية انى لما حد يسألنى سؤال و أنا مش عايزة اجاوب عليه أرد عليه بالسؤال ده
انت بتسأل السؤال ده ليه؟؟؟؟؟
لو جاوبتني هرد على سؤالك
عموما : هغنيله أغنيه : اخترناه اخترناه....قاعدين ع المصطبة وياه

لو معايا مليون و نص اعمل ايه ؟؟؟ -
ربع مليون لبنك الطعام
ربع مليون لتزويج كام شاب من الفقراء
نصف مليون أبدأ بيه مشروع في دماغي نفسي أعمله لأطفال الشوارع
نصف مليون أفتح بيه مكتب هندسي معماري

بتحب مصر ؟؟ -
أمال يعني؟؟؟؟

طبعا بحبها

انت مسلم ؟؟ -
الحمد لله

ليه ؟؟ -
لأنى من يوم ما ابتديت أفهم رضيت بالله ربا و بالإسلام دينا و بسيدنا محمد صلى الله عليه و سلم نبيا و رسولا


مين اكتر شخصية متقدرش تستغنى عنها ؟؟؟ -
أكيد أمي ربنا يخليها و يحفظها و يبعد عنها كل مكروه


ايه اكتر موقف محرج ؟؟ -
ههههههه. كنت في الثانوية العامة و رايحة أذاكر مع واحدة صاحبتى ليلة امتحان الفيزياء ... و أنا رايحة عندها حسيت ان الجزمة واسعة على رجلى ...استغربت شوية و بعدين نسيت
المهم رحت عندها والمذاكرة خدتنا و هي قالتلى ريحي نفسك اقلعى الجزمة قلعتها عادي ....
و أنا ماشية جيت ألبسها .....مش راضية تتلبس أبدا ...و أحاول ...مفيش
عملت كل الحاجات ...لبيسة ...مفيش ....استنى شوية و آجي ألبسها تاني ....مش ممكن
المهم كان شكلى محرج جدا ...خصوصا ان اخواتها الولاد كانوا موجودين و كل شوية يعدوا علينا لأننا كان قاعدين في الرسيبشن ...و أحس انهم مش قادرين يمسكوا نفسهم من الضحك...أنا كمان قعدت أضحك زي الهبلة لأن الموقف بجد كان يفطس من الضحك ...و اللى زود الموضوع انى كلمت اخواتى في البيت علشان حد فيهم ييجي و يجيبلى واحدة تانية معاه ...مالقيتش حد من اخواتى الولاد في البيت
المهم من ستر ربنا ان أخوها كان عارف طريق بيتنا راح جابلى واحدة تانية من بيتنا لبستها و من يومها عمري عمري عمري ما أقلع جزمتى عند حد و لو حصلى ايه
ههههههههههههههههههه


الامنية اللى اتمنى تحقيقها؟؟
لو السؤأل على أمنية واحدة تبقى أكيد ان ربنا برحمته يدخلنى الفردوس الأعلى من الجنة بجوار الرسول صلى الله عليه و سلم أنا و كل من أحبهم


جينا بقى للكلام اللى بيزعل الناس مننا : همرر التاج لمين؟؟
همرره لكل الناس اللى عندي في يمين المدونة و خصوصا الناس اللى ما بيحبوش التاجات منهم (غلسة غلسة )ههههههههه


هناك ٣٦ تعليقًا:

ولــــــــــو يقول...

انا بصراحه ماستغربتش من الردود بما اني متابع البوستات من فتره وقدرت اعرف شويه عن الشخصيه الكويسه اللي جواكي
على فكره انا ممكن بعد التاج ده مافتكرش الاسم على اساس اني اعرفكم (انتم المدونين اللي باقرالهم باستمرار وباعتبرهم اصحابي ) باسماء المدونات او الاسماء اللي بتعلقوا بيها
فتقدري تقولي
والله مابتفرق معانا الاسماء بس الاسم جميل
الموقف بقى بصراحه
ههههههههههههههههه
هو انا عايز اقول انك ممكن تكوني مشيتي ف رده
بتاعت العيش بيقولوا بتضخم الاشياء
تاج جميل جدا مش عشان الاسئله لكن عشان الاجابات الجميله وف النهايه اتمنى ان ربنا يحققلك كل اللي بتتمنيه ويجمعنا والمسلمين ف الجنه ان شاء الله

اه نسيت اقول انا اول كومنت
yes i made it

الحلم العربي يقول...

ولو
....
و الله احنا كمان ما بتفرق معانا الأسماء
و مش مشكلة تفتكره خالص المهم تفتكر الحلم العربي
الموقف :
ههههههههههه أنا لغاية دلوقتى كل ما افتكره اضحك ...اللى يغيظ بقى انى تاني يوم جيت ألبسها لقيتها واسعة عليه...هههههههه

ربنا يكرمك ده من ذوقك بس و الحمد لله ان الاسئلة ما كانش دمها ثقيل عليك

ربنا يرزقنا جميعا الفردوس الأعلى

شكرا على مرورك و تشريفك ليه

لو كنت أعلم يقول...

بصي التاج ده عجبني أكتر من اللي فات

وهو ده اللي حسيت فيه بيك كإنسانة

عسل ياباشا

الحلم العربي يقول...

لو كنت أعلم
...........
أهلا بيكى و عود أحمد

بالنسبة لموضوع الإنسانة أحب أقولك ان : آية الإنسانة جزء لا يتجزأ من آية المدونة ...هههههههههه
المهم ان واحد في التاجين عجبك و ده اللى يهمني
و الله انتى اللى عسل يا باشا

تحياتي

حائر في دنيا الله يقول...

المشكلة انك لما تكوني مع الريس وتقوليله اخترناه اخترناه فممكن يفهم غلط لان مين دا اللي اخترناه يعني لازم تقولي اخترناكم اخترناكم وطبعا الريس هيفهم على طول

مع تحياتي لمدونتك الجميلة
السلام عليكم

الحلم العربي يقول...

حائر في دنيا الله
...............
أهلا بيك لأول مرة في المدونة المتواضعة
تصدق ما كنتش واخدة بالى من النقطة دي ...بس أنا قولتله ...قاعدين ع المصطبة وياه بيتهيألى مفيش دي أكبر دليل على مين المقصود
هههههه
المدونة إن كانت جميلة فهي زادت جمالا بتشريف حضرتك
تحياتي

محمود على يقول...


تاج جميل
جماله في ردودك
انا للاسف مقرتش التاج الي فات
بس ده كفايه اووووي

الحلم العربي يقول...

محمود على
.......
و الله الجميل هو تعليق حضرتك
شكرا ليك وفعلا التاج ده كفاية

شكرا ليك وأهلا بيك دايما

elkamhawi يقول...

في وجه المصاعب .....نقف ....نتأمل ...نتحير

ياسر سليم يقول...

موضوع الجزمة ده ما فهمتهوش

انتى فى الأول كنتى بتقولى ان الجزمة كانت واسعه عليكى وجيتى تمشى لقيتها مش راضيه تدخل ؟

ولا كنتى بتهزرى فى الأول يعنى ؟

اما بالنسبالى بما انى على اليمين عندك .. فالتاج جالى ولله الحمد ورديت عليه .. وربنا يسامحها اللى كانت السبب

حزيــــــــــــــــــن يقول...

انا اصلا داخل عندك عشان اسيبلك تاج
فمليش دعوه بالتاج ده
وبعدين التاج اللى هسيبهولك عميق جدا فى النفس البشريه
حاولى تجاوبيه
تاج طويل ومتنوع
انت مين ؟
انت ايه؟
هدفك فى الحياه ايه ؟ هدفك الكبير فى الحياه غايتك يعنى ؟
اول طموح نفسك تحققه ؟
انت سعيد ؟؟؟؟؟؟؟؟؟؟؟
امتى بتكون سعيد وضميرك مرتاح ؟؟؟؟؟؟؟؟؟
امتى تحس انك مميز ؟؟؟؟؟؟؟؟؟؟؟
ايه اكتر حاجه ممكن تضايقك ؟
ياترى همك فى الحياه ايه ؟ رضا ربك ؟ رضا اهلك ؟ رضا الناس عنك ؟ اشباع رغباتك ؟ ولا ايه ؟
هل تحب نفسك ؟ هل تحب ان يمدحك الاخرون ؟ معجب بتفكيرك وامكانياتك ومواهبك ؟
هل تتضايق من الانتقاد ؟ هل تتحدث عن نفسك كثيرا حتى مع نفسك ؟
هل انت كثير الكلام ام صموت ؟
ماهى الصفات غير التقليديه التى ترغبها فى شريك حياتك ؟ الصفات غير التقليديه يعنى بعيد عن كلمة متدين واخلاق وحنين وطموح ورومانسى ويحفظ كرامتى ويكون بيبحبنى والحاجت دى ... حاجات غيرتقليديه زى مثلا شقيه نومها خفيف منصت جيد عصبى الخ
سؤال للبنات بتقفى قدام المرايه اد ايه ؟
سؤال للشباب ممكن تتجوز بنت كانت ليها زمايل غيرك ؟
ممكن تتزوج بنت اكبر منك والبنات ممكن تتجوزى شاب اصغر منك ؟ ولو لأ يبقى ليه ولو اه هل فى صفات معينه عايزاها تعوض فرق السن ؟
هل تحب الراحه والكسل ؟
هل اعدائك او منافسوك يحترموك ؟
ما مساحة الجد من الهزل فى حياتك ؟
عارف وزنك ؟ قيمتك ؟ امكانياتك ؟
هل تلتمس الاعذار ام تحب ان تعاتب ؟ هل انت مهموم ؟ او تخلق الهموم؟
ما النسبه بين جواك وبراك ؟
هل انت عنيد ؟
هدفك من التدوين ايه ؟ بتابع اى مدونه صاحبها بيتابعك ولا بتهتم بالمدونات اللى بيعجبك محتواها ؟
ممكن تساهم فى نشر مدونه جيده غير مشهوره ؟ لو اه او لأ ليه ؟
ايه نوع المدونات المفضل لديك ؟
بتحب اكتر تتعامل مع مدونين رجال ولا مدونات بنات ؟ وليه
تفتكر مستقبل التدوين هيكون ايه ؟
ممكن تنشر لمدون تعرفه فى الصحف او تساعده فى نشر كتاب حتى لو هيتفوق عليك او هغطى عليك بفرض انه جدير بهذا ؟ اجب بصراحه .
ايه حجم اقتناعك باللى بتكتبه فى مدونتك كل اللى بتكتبه واللى بتعلق عليه ؟ وهل لو قريت عند حد بوست معجبكش اوى هتعلق تقول ايه ولا مش هتعلق خالص ؟
ايه حجم صراحتك فى اجاباتاك على هذه الاسئله ؟
اخر سؤال لو الرسول (ص) هيزورك لمدة اسبوع ايه الحاجات اللى هتبطل تعملها وايه الحاجات اللى هتحبه يشوفك بتعملها غير العبادات المعروفه ؟ وهتعامل ابوك وامك واهلك قدامه ازاى وهتعامل اصدقائك قدامه ازاى وهتعامل الناس وتتعامل فى شغلك ودراستك وحياتك والتليفزيون قدامه ازاى ؟ وهتقوله ايه عن مدونتك ؟ وهتضيع قدامه وقت اد ايه فى التدوين ومتابعة المدونات ؟
لو فى سؤال كان نفسك تتسأله ومجاش هنا يكون ايه وجاوب عليه ؟

Alaa يقول...

كل الهملة دي على اسم آية
امال لو اسمك انتصار كنتي عملتي ايه :)

بصي
انا من الشباب الفقراء
و كمان من اطفال الشوارع
افتكريني بأي حاجة مما أعطاكم الله
و لو الجزمة بتاعتك مجتش على ادك هاتيها
و كله ثواب
:)

و هنيالك يا فاعل الخير و الثواب
:)

الحلم العربي يقول...

elkamhawy
.........
ايوة ..دي جملة من البوست اللى فات ....بس ما كملتش ليه ؟؟
عجبتك و لا ....؟؟؟؟
لو ما عجبتكش عادي احنا بنتقبل النقد ..
على العموم أهلا بيك في المدونة و نورتني
تحياتي

الحلم العربي يقول...

ياسر سليم
.........
ايوة ما هوه ده اللى غاظنى في موضوع الجزمة ...انة في الأول كنت حاسة انها واسعة و تاني يوم بردو لقيتها واسعة أمال ايه ليه حصل عند صاحبتي ؟؟؟؟مش عارفة؟.؟؟؟؟

خلاص كده انت جالك اعفاء من التاج ده ...بس ما تفتكرش انك هتتعفي من الجايين لا يا بابا لا
هههههههههه
تحياتي

الحلم العربي يقول...

حزين
....
تحت امرك يا افندم هرد عليه ...لكن بعد اذنك هخليها بعد كام بوست كده علشانالناس ما تفتكرش اننا قلبناها مدونة تاجات...
بس التاج ده كبير أوي و مش سايب حاجة ...ده ممكن يتفك بخمس تاجات
هههههههههههه
بس شكرا جزيلا على تمريره ليه
و إن شاء الله هرد عليه في أقرب فرصة

تحياتي

الحلم العربي يقول...

علاء
....
ايوة مش لازم اغلبكوا معايا شوية علشان اسمي ...لو اسمى انتصار ماكونش هيدلعونى أصلا لأنه اسم صعب تدليعه ...أنا بقول للناس ماتدلعنيش لأن اسمي اصلا 3 حروف هو لوحده دلع

المهم انت صدقت اني أخدت المليون و نص و لا ايه ؟؟؟
و الله ما جالى حاجة ...و على فكرة أنا كمان زيك فلو لقيت حد يديلك ابقى افتكرني .......ههههههههههههههه

تحياتي

غير معرف يقول...

رغم اني علي يمين الشاشة بس الحمد لله رديت علية قبل كدة:)

بردو هربتي من سؤال حسني مبارك......؟؟؟؟؟ال مصطبة ال

بس اجابتك ع النص مليون جنية تدل علي انك طيبة يبقي بتنكري لييييييييه بقي؟؟؟؟

الحلم العربي يقول...

مصراوي أوي
...........
عود أحمد انت كنت فين يا راجل؟؟
حمد الله على السلامة و شرفتنى

انت كمان أخدت اعفاء من التاج ده لكن التاج الجاي مش هعتقك ههههههههه

ايوة طبعا لازم أهرب من السؤال مانا قولت لك قبل كده : سلومة الأقرع ميعرفش أبوه...ههههههه


و الله الموضوع مش مسألة طيبة .....ربنا يثبتنى بس لو اتحقق موضوع المليون و نص ده .....ساعات بيتهيألى ان كلنا مدعين طيبة ....لكن ربنا بيوفق الطيبين بجد و أنا اتمنى أكون منهم

و لعل قول الشافعي ينطبق عليه:
أحب الصالحين و لست منهم .....لعلى أنا أنال بهم شفاعة

تحياتي

نقطة مية يقول...

آية...عرفنا شخصية الحلم العربي
:-)
على فكرة جاوبت التاج ده قبل كدة..بس شكرا على تمريره بما اني من اهل اليمين في المونة و لي الشرف...

بصراحة الاجابات لذيذة و بتدل على شخصية مرحة..حسيت انك مرحة
:-)
تحياتي

الحلم العربي يقول...

نقطة مية
........
و عليكم السلام و رحمة الله و بركاته
ده رف ليه انك تعرفي شخصيتى و لو اني انا ما عرفتهاش لسة...هههههههه
ربنا يخليكي انتى اللى نفسك حلوة و الله و اللى يتابع مدونتك يعرف ان انتى اللى مرحة فعلا
تحياتي و منوراني دايما

صاحب البوابــة يقول...

وتانى

اجابتك جميلة

:)

تحياتي

الحلم العربي يقول...

صاحب البوابة
............
ربنا يكرمك يا رب ....شكرا على التشجيع و تعليق حضرتك اللى جميل
أشكر لك مرورك الكريم
تحياتي

أميرة البلطجية يقول...

بعت الميل بتاع اللعبة يا كميل شوفيه وردي

الحلم العربي يقول...

أميرة البلطجية
..............
اوك يا باشا هشوفه و أرد إن شاء الله
نورتى المدونة
تحياتي

غير معرف يقول...

تاج جميل
وأحسن ما فيه ردودك
انا للاسف مقرتش التاج اللي كان قبل ده
بس ده كفايه اووووي

الحلم العربي يقول...

أحمد محمد مرسي
.........

أشكرك جدا على تشريفك لمدونتى
و الله ده من ذوق حضرتك بس
ربنا يكرمك
و اهلا بيك دايما
تحياتي

حزيــــــــــــــــــن يقول...

براحتك خدى وقتك بس كنت عايز اخد رأيك فى اخر بوست عندى

هاني جابر يقول...

الف الف مبروك علي التاج
وعقبال كده مليون تاج
تاج جميل ما شاء الله
وجميل جدا ان يسود جو التعارف بين المدونين
وياريت يستمر ويتبعت لناس كتير عشان نعرفهم اكتر
بارك الله فيكي

الحلم العربي يقول...

حزين
.....
إن شاء الله سوف أدخل على مدونتك و اسجل رأيي
تحياتي وشكرا عل الثقة الغالية

الحلم العربي يقول...

هاني جابر
.........
ربنا يخليك يا افندم نورتني
و انا بدوري بممرلك التاج علشان نتعرف على شخصيتك ...و هي دي ميزة التاجات فعلا انها بتعرف المدونين على بعض بصورة أقرب
تحياتي و أهلا بيك لأول مرة

قضية عم أحمد Ahmed Case يقول...

شكلى انا المقصود باني مش بحب التاج ، بصى انا وراكي وراكي الفى تاج وانا ارد عليه على طول :)

شفتي التاج بتاع حزين متكلف ازاي .

انا عايز تاج من وحي القلم

الحلم العربي يقول...

أحمد رفعت
.......
طبعا انت أول المقصودين أمال مين يعني؟؟
ههههههههههه
أنا بس حبيت أغلس ...و الله هو الكلام كان لحضرتك و لناس تانيين طنشوا خالص و ناس اعتذرت لكن على الأقل حضرتك اهتميت و قد ايه أحرجتنى لما كتبت اعتذار على مدونتك ....بجد شكرا

بالنسبة لموضوع التاج ...أنا بردو مش هفوتها ...هألفلك تاج متين و ابعتهولك إن شاء الله ...و لو مستعجل ممكن اعتبرنى مررتلك التاج بتاع حزين لأنى فعلا كنت همرره لك
أما بقى لو عايز تستنى ....فسوف تجد ما يسرك ...تاج بقى من وحي القلم صحيح ...ههههههههههههههههه
تحياتي و سوري على الغلاسة

أحمد الدريني يقول...

موقف الجزمة ده مش طبيعي
اشكرك..ضحكتيني في وقت انا مكشر فيه

الحلم العربي يقول...

أحمد يكتب كما لم يكتب من قبل
...........................
ليه بس مكشر يا أ/ أحمد ....خليها على الله ...كل شئ ليه عند الكريم حل

و على العموم كل ما تحب تضحك قولى و أنا احكيلك عن المواقف و الطرائف اللى بتحصلى أصلها كتيره ....هههههههه

تحياتي و أمنياتى لك بدوام السعادة

مُصْعَب إِبْرَاهِيم يقول...

يانهار أبيض!!!

معنى كده إن التاج اتمرر لي وأنا مش واخد بالي..

على العموم حاضر يا افندم

أنا كده علي تلات تاجات ما جاوبتهمش لسة
بأجمعهم وهاجاوب عليهم بالجملة .. بس أستسمحك هتأخر شوية لأني مفحوت جدا في الشغل اليومين دول

الحلم العربي يقول...

مصـ( الخير )ـعب
..............
طبعا انا لازم اقدر حالتك اليومين دول لأنى زيك بالظبط مطحونة في الشغل ....لكن وراك وراك لغاية ما تجاوب ما تفتكرش انى هسكت .....و لو مش مصدقنى اسأل صاحبك عم احمد ...........هههههههههههههههههههههه

ربنا معاك و يوفقك يا عبقرينو
تحياتي