2008-04-05

6 أبريل


بعد تفكير عميق
و بعد حيرة
و بعد اقتناع
انا قررت
قررت أكون مضربة يوم 6 أبريل مع المضربين

هضرب علشان الحكومة تعرف إنى واحدة من اللى بيقولوا لأ
لأ للغلاء
لأ للاستبداد
لأ لإدعاء الحرية و احنا أبعد ما نكون عنها
لأ للفساد اللى مالى البلد
أنا مش من المعارضة
و مش من الإخوان
و مش من أي حركة سياسية
لكن من الشعب المصري اللى قرر و لأول مرة في تاريخه انه يتخلى عن الخوف و الاستكانة لأنه خلاص جاب آخره و عرف ان يا روح ما بعدك روح
أنا مش ضد الحكومة على طول الخط
و مش معاها على طول الخط
و عارفة ان البلد دي صعب تتغير بين يوم و ليلة
و ان احنا اللى بايدينا نعليها
لكن نعمل ايه إذا كنا بنحاول نعليها و غيرنا بيحاول ينزلها و ينزلنا
ما نقدرش نعمل غير اننا نقول لأ بطريقة محترمة
و أنا كمواطنة مصرية
بقول لأ
بطريقة محترمة
أنا مضربة يوم 6 أبريل

هناك 16 تعليقًا:

HoNdA يقول...

قشطه جدا الايجابيبن زادو واحدة الحمدلله

حزيــــــــــــــــــن يقول...

ربنا يكرم حضرتك .... يا ريت تستثمرى اليوم فى شئ مفيد مادمت قاعده فى البيت ... زيارة مريض صلة رحم مساعده مامتك او حفظ قرءان وربنا يعدى اليوم على خير

Hosam Yahia حسام يحى يقول...

كويس


مدونه حضرتك جميله


تحياتى

شيرين يقول...

رائع جدا.. يا رب كل الناس يكون عندهم نفس الوعي
على فكرة في 2 صحفيين من عندنا في عشرينات اتمسكوا
:(

RAMA يقول...

حبلغ عنك

:P

الحلم العربي يقول...

honda
.....
واضح إنهم هيزيدوا كتير في الفترة الجاية إن شاء الله
أنا متفائلة
بس ربنا يستر

الحلم العربي يقول...

حزين
.....
انا فعلا حاولت استثمره في مساعدة ماما و انى اخلص حاجات كنت مأجلاها من زمان
أشكرك على وجودك

الحلم العربي يقول...

حسام يحيي
........
أشكرك
يا ريت تشرفنا كتير

الحلم العربي يقول...

شيرين
....
انا عرفت فعلا يا شيرين ربنا يكون في عونهم و يقويهم
ويا رب يسترها مع اللى في المحلة لأنهم هما دول اللى في المعمعة بجد
اشكرك على تشريفك ليه أوي

الحلم العربي يقول...

rama
....
بقى هتبلغي عني يا راما؟؟
ماشي و انا مع أول قلم هقولهم راما هي المحرض الأساسي و هديهم اللينك بتاع مدونتك كمان .هه (:(:

Desert cat يقول...

اولا اهنيكى على اجابيتك وانا سعيدة جدا ان بلدنا فعلا بدأت تتحرك بايدين ولادها
دعواتك بقى لاهل المحلة

حائر في دنيا الله يقول...

انا بقا مش معاكي
انا ضد الحكومة على طول الحط
والقلم
و
كل حاجة

Tamer Nabil يقول...

الاضراب وقولة لا جميل

بس يارب البلد حالها يتغير


تحياتى

الحلم العربي يقول...

desert cat
..........
أشكرك جدا و أهلا بيكي لأول مرة
ربنا يكون في عون أهل المحلة بعد الدمار اللى حصل عندهم
انا سمعت ان النهاردة رئيس الوزراء أخيرا فكر يروح يقابلهم و يشوف مطالبهم .......
لك الله يا مصر
تحياتي لك

الحلم العربي يقول...

حائر في دنيا الله
..............
شكلى كده هبقى معاك قريب ....طول ما الحكومة بتتصرف كده كل يوم بتخسر ناس
أشكرك

الحلم العربي يقول...

tamer nabil
...........
إن شاء الله البلد حالها هيتغير بس الرك على اننا نحاول نبقى ايجابيين أكتر

نورت المدونة