2008-12-20

عن الإنتماء و مصر في خواطرنا



من يوم ما سافرت بعيد عن مصر و جيت هنا و أنا بقابل مصريين و لبنانيين كتير لما تتكلم معاهم عن الرجوع لمصر أو للبنان تلاقيهم يقولوا جملة واحده " لا مصر ما بقاش يتعاش فيها " أو " لا لبنان ما بينعاش فيه " و عرفت إن السوررين بيقولوا عن بلدهم نفس الكلام ، انا هتكلم عن القضية من ناحية مصر و أعتقد إن نفس الكلام ينطبق على لبنان و سوريا و كل البلاد اللى ظروفها الإقتصادية بتخلى ولادها يضطروا يبعدوا عنها علشان يحققوا لنفسهم حياة كريمة .

كنت بتكلم مع بعض الزملاء هنا على الموضوع ده و ابتدأ الكلام بإن مصر ما عملتش لولادها حاجة علشان يقعدوا فيها و كلام شبه كده اضطرنى لأنى أدخل معاهم في حوار بيزنطي عن مصر و عن انها قدمت لولادها كتير كفاية التعليم و الصحة و اننا لنا أهل بيحبونا وولاد البلد و حاجات كتير تانية، لكن فوجئت بإن كتير من اللى عايشين في الغربة بيحاولوا يسكتوا ضميرهم بإنهم يحسسوا نفسهم ان ما كانش قدامهم غير البعد عن بلدهم علشان يوفروا لنفسهم ولولادهم حياة كريمة فيها أقل متطلبات الإنسانية.

و اكتشفت إن كلمة إنتماء بقت كلمة غريبة قوي على المصريين مش بشكك في إنتماء أي حد بجد لكن معنى كلمة مصر فعلا إختلف كتير في نظرة المصريين ليها ما بقتش البلد اللى الواحد ممكن يستحمل أي شئ إلا البعد عنها ، لا بالعكس بقى البعد عنها و الاشتياق لها بين الحين و الآخر أحسن من الجلوس فيها و السخط عليها كل يوم أكتر من اللى قبله .

كنت برد عليهم إن مصر اللى عايشين فيها عايشين بردو مش ميتين ، و إن إذا كان اختيار حد فيهم انه ينجح برة أسهل فده مش معناه إنه ماكانش هيقدر ينجح في مصر ، لا مصر فيها خير بردو بالرغم من كل الفساد و من كل الحاجات الغلط اللى فيها و حتى الغلط إحنا نقدر نصلحه بإننا نصلح من نفسنا كشعب و نعرف أسباب الفشل و أسباب النجاح .

و هنا دخلنا في مناقشة بيزنطية أخرى عن العيب من الشعب و لا من الحكومة و الحل المفروض ييجي من مين فيهم ؟هما شايفين إن الشعب مفيش في إيده حاجة و إن الحكومة هي اللى بتتخذ القرارات و هي دايما بتكون السبب في ارتفاع الدول أو هبوطها ، و أنا شايفة إن المسئولية على الإثنين : يعني المفروض الشعب يكون عايز ينجح و بالتالى الحكومة هتكون منه و هتنفذ اللى عايزه الشعب فعلا . لكن لو الحكومة هي الحكومة اللى احنا عاوزينها و مثلا حبت تتطبق قانون صح في بلد كل اللى فيها ماشي بالرشاوي و الكوسة و المحسوبيات تقدروا تقولولى القانون هيتطبق إزاي ؟

الغريبة إننا طلعنا من المناقشة بإنى متفائلة زيادة عن اللزوم في نظرهم .... أنا مش شايفة نفسي متفائلة زي ما هما بيقولوا لأنى شايفة إن مفيش قدامنا خيار آخر غير إننا يبقى عندنا امل . يعني إيه اللى هيصبرنا على الفساد إلا إننا عندنا أمل إننا في يوم هنغيره . إيه اللي هيصبرنا على كل الى بيحصل في البلد غير الأمل في إننا نقدر نخليها أحسن.
أنا شايفة إننا نمنا لكننا لم نمت .
و الدليل: إن لسة فيه شباب بيقدر يوفر لقمة لواحد جعان في منطقة عشوائية مع إن الشاب ده ممكن ما يكونش بيشتغل أصلا او بيشتغل و بيصرف كل مرتبه على المواصلات . لسة فيه ناس بتعمل شنطة رمضان و لسة فيه ناس بتروح ملاجئ أيتام و لسة فيه ناس بتساعد المريض من غير ما تكون عايزة مقابل.. صدقونى الحاجات دي في بلدنا ليها طعم تاني ما يعرفهاش غير اللى يعيش بعيد عنها أو اللى يعيش في جو يخليه حاسس انه مجرد آلة بتشتغل علشان تطلع فلوس .

هناك 8 تعليقات:

blue-wave يقول...

العيب مش فى البلد
العيب فى اللى خلوا البلد مش بلد
نهبوها وسرقوا مننا حتى احلامنا
يلا مش عايزين نتكلم
تحياتى

سمكه واحده يقول...

كلامك صح
لسه في امل وطلما في ناس كويسه ونفسها البلد تبقي احلي ان شاء الله هتبقي احلي في ناس وشباب كتير جميله وكويسه بس لو كل الكويس يتجمع ويبقي في هدف محدد بجد هتتغير
ولازم يبقي عندنا امل
العيب مش فينا العيب في النظام ككل الشعب والحكومه كل واحد بيتكل علي التاني ويقول العيب هنا كل واحد لازم يغير من نفسه الاول بيدأببيته بأسرته
عارفه لو كل واحد شاف شغله صح وبضمير ومن غير ما يتكل علي حد هنبقي افضل

الضمير والله هو اللي نقصنا والحب والخوف علي بعضنا مش كل واحد يقول يلي نفسي

الموضوع ده كبير لو فتحنا مش هنخلص
تحياتي لاختيارك
سمكه

momken يقول...

والله انا لما بكون فى مصر بقول كده

لكن لما بسافر مش بلاقى احسن من مصر

يمكن لانى مش بشتغل بره مصر

بسافر شويه وارجه وبشتاق اوى لمصر

سواء مصر مبقاش يتعاش فيها
او هى احلى مكان فى الدنيا مقدرش استغنتى عنها

بحبها هعمل ايه يعنى

البوست جميل جداً

تحياتى

الحلم العربي يقول...

blue-wave
..........
لا لازم نتكلم يا دكتور كفاية كده علينا سكوت ...على الأقل لما نتكلم هنعرف مشكلتنا بجد و هنحاول نصلحها
خالص تحياتي

الحلم العربي يقول...

سمكة واحدة
..........
بس لو كل الكويس يتجمع ويبقي في هدف محدد بجد هتتغير
فعلا عندك حق يا سمكة احنا بس نجتمع على هدف واحد و ربنا هيوفقنا إن شاء الله
أشكرك بس احنا لازم نفضل نتكلم عن الموضوع ده كتير لأنه مستقبلنا ، و لا ايه؟؟
نورتى المدونة

الحلم العربي يقول...

momken
......
و انا كمان يا ممكن و الله و بتمنى كل المصريين يكونوا كده ، مش معترضة ان الناس تسافر و تشتغل برة أو تدرس لكن تفضل طول عمرها مشتاقة لمصر و جمالها علشان ترجع لها يوم و تبقى مصر فعلا زي ما احنا عايزينها و جميع بلادنا العربية

أشكرك يا ممكن و ربنا ما يحرمنيش من تشجيعك
:)))))

sakayar يقول...

بداية الصورة اللي حضرتك حطاها لذيذة اوووي وجميلة بجد
ثانياً بقى ندخل ف الموضوع اللي اتأخرت كتير على اما علقت عليه
بس لأهميته فعلاً ولإنه محتاج ذهن صافي شوية
---------------------------------

تلاقيهم يقولوا جملة واحده " لا مصر ما بقاش يتعاش فيها " أو " لا لبنان ما بينعاش فيه " و عرفت إن السوررين بيقولوا عن بلدهم نفس الكلام

آه فعلاً وانا كمان سمعت ده ...بس بنشوفها بطريقة تانية ... يعني ناس بتتصعب على حال المصريين اللي عايشين ف مصر ... وناس بتشوف ان الشباب اللي طالع ف مصر هيطلع شباب محطم الآمال علشان الفرص أدامه قليلة فهيجيله اكتئاب ...على الرغم اننا ف بلاد الخليج من الروتين اليومي اللي اتعودنا عليه جالنا ملل ... بس فيه فرق بين رؤية الناس للاكتئاب المصري والملل الخليجي علشان الملل الخليجي جاي ومعاه فلوس هههه
لكن هقول بصراحة جملة قالهالي مديري اللي كنت بشتغل معاه ف مصر ... قاللي : صدقني مالوش لازمة تسافر لإنك تقدر تعمل اللي عاوز تعمله وانت جوه البلد ... ولما شرحلي وجهة نظره لقيتها مقنعة ... بس متعبة ... فاختر الاسهل بصراحة وهي السفر والطريق الاسهل للحصول على ماديات أفضل ... رغم انه قابلها مشاعر تانية مفقودة متتقارنش بالطبع بالتعب اللي الواحد كان هيلاقيه وهو ف مصر بس يروح بيتهم ف اوضته وعلى سريره ووسط ناسه واصحابه
-------------------------

كنت بتكلم مع بعض الزملاء هنا على الموضوع ده و ابتدأ الكلام بإن مصر ما عملتش لولادها حاجة علشان يقعدوا فيها و كلام شبه كده

مش هتكلم زي ما حضرتك اتكلمتي على الصحة والتعليم لإن فيه ناس ف مصر بالفعل مش متوفرلهم ده ... لكن هتكلم عن إن اللي معملش حاجة مش مصر الدولة او الأرض أو المناخ ... اللي معملش ده الأفراد والحكومة ... دول اللي معملوش حاجة فعلاً ... وده لإن الشعب والحكومة شايلين السلة وكل واحد بيرمي التقل على التاني وبيعاتبه انه هو اللي مش شايل صح
أنا والحمد لله مشفتش يوم وحش ف مصر ... ولا بره مصر ههههه ... ممكن لو اتكلمت عن أي أحداث سلبية حستها او حصلتلي على المستوى الشخصي هلاقيها أحداث من أفراد أو سلطة من أفراد برضه ... لكن دول مبيمثلوش مصر ... مصر لو قلنا فيها 10 مليون مبيعملوش حاجة للمصريين وناهبين فلوسهم وناهبين الدولة ... ففيه 60 مليون ساكتين على كده او 60 مليون بيحاولوا يقفوا جنب بعض على الاقل
لكن مسألة تسكين الضمير ... هي مش تسكين أووي برضه يا بشمهندسة
يعني لو اتحسبت بالورقة والقلم مادياً هتلاقي الخليج لسه زي ما هو برضه بفلوسه بدبابيره بغربانة هههه بيعطي مادياً ف سنة اللي ممكن تحققيه ف مصر ف 4 سنين .... لكن الفرق في المشاعر والكيان الانساني ... إنك مش هتحس بآدميتك أو كون حد بيخاف عليك ع الاقل زي ف بلدك ... برضه مش الحكومة والشعب ... لكن أهلك الحي بتاعك والشارع اللي فيه وعم فوزي البقال وخالتي مش عارف ايه بتاعة الخضار وعم جرجس بتاع المخدرات ههههه كده يعني
بس أقصد انه مش علشان ابرر موقفي اني سافرت أقوم أعيب على البلد ... لأ ظروف البلد آه مش تمام ... لكن دي حالة اقتصادية موجودة ف دول كتير ... متخلينيش أقلل من انتمائي لبلدي ولا حبي ليها ... دي تخليني أسعى حتى لو بره بلدي ... وأرجع بلدي أساعد ف تنميتها ومساعدة الشباب اللي مش لاقيين حد يساعدهم ... واستفيد من تجربتي انا ف السفر والتعب ووو فإني أحاول أمنع الشباب دول يتعرضوا لنفس اللي اتعرضت ليه واحاول اوفرلهم حياة كريمة جوه بلدهم .... وانا بقول لو كل واحد فكر وهو مسافر ان ده يكون هدف ليه من السفر ... بجد بجد البلد بتاعتنا مش هتحتاج لان شبابها يسافر ... لان هيكون جواها اللي يساعد ويبني حتى لو كانت فلوسه جاية من بره
------------------------------
لو عن الانتماء ... أنا نسبة انتمائي بحسبها 25% للأسف ... لإني مش بحسني بتشد أوي ف الكلام لما حد يتكلم عن حبه لمصر واحنا ف الغربة او كده ... مش عارف بحسني بحب مصر أقل منهم ... لكن ممكن علشان انا بتكلم كتير عقلياً وعاوز اعمل مش بس اتكلم ف مشاعر ... وبصراحة مصر معملتليش حاجة وحشة علشان محبهاش ... وكفاية اني عرفت فيها المصريين بأصالتهم ودفاهم وشهامتهم وأخلاقهم اللي ناس كتير شايفاها معادتش موجودة بس انا شايف ان الوحش بس اللي ظاهر لكن الحلو موجوود.... وبرضه مش علشان حد عاش ف بلده لحظات او سنين مؤلمة يخليه يتنازل عن انتماءه ليها ... الرسول عليه الصلاة والسلام اتحارب من الكفار واتبهدل جوه مكة 13 سنة بحالهم ... طلع مقالش يحرقك بلد بنت تييييت ... لكن قال والله لو لم يخرجني أهلك منك لما خرجت وانك لأحب بلاد الله إلي ... ربنا يعيدنا إلى بلادنا ف سلام وحب ودفا كما نحب
------------------------------
عن الشعب والحكومة انا لمحت ليها فوق انه عندنا ف مصر الاتنين بيرموا على بعض وكل واحد بيعمل اللي عاوزه ويحط عجزه على التاني ... لكن الحكومة خارجة من الشعب ... نواب الشعب اللي ف المجلس دول لو كانوا حقيقي عاوزين يغيروا بلدهم للأحسن فهما قادرين على ده ... لإنهم ممثلي الشعب ومحاسبي الحكومة وهما أقدر الناس على التغيير مع الحكومة لإنهم المفروض بيعبروا عن مصلحة الشعب اللي هما منه ... وف الغالب النواب دول بيختارهم الشعب نفسه ... إلا إذا حصلت ظروف طارئة مش لينا فيها ههههه ... فالقصد انه فعلا الليلة بين الحكومة والشعب مش على حد لواحده ... دول لازم يكونوا سوا
هفتكر كلمة لأحد المشايخ كان بيقول : من نحن لنستحق حاكماً مثل عمر بن عبدالعزيز ... إن الله لا يغير ما بقوم حتى يغيروا ما بأنفسهم .... يعني لو الشعب هايص وعايش حياته ... هيجيله منين واحد يقول له عاوزين نطبق الحدود ونمشي على الصراط المستقيم؟؟ ما هو الحاكم من الشعب ... والرشاوي والكوسة والمحسوبيات دي بين الشعب وبعضه مش بقرار جمهوري
---------------------------------
هشرب ميا بس والبس نضارة علشان انا هنضرب وهنطرد بره المدونة دي بعد التعليق الطويل ده
----------------------------------
لأ لو حضرتك مش متفائلة فدوري على سبب للتفاءل لإن بالتفاءل بيفضل الأمل موجود وواقف على أرض صلبة .... فيه ايجابيات أكيد ف مصر ... البلد مش كلها سلبية .... فيه نماذج ناجحة كتير بسمع عنها جوه مصر ومن القرى ومن الجيران ومن القرايب ... وده دليل على ان فيه ناس مصممة على النجاح وعرفت تنجح ... وطالما واحد عرف ينجح يبقى المناخ مساعده على ده ... يبقى ليه الباقيين مينجحوش؟؟؟
انا عن نفسي متفاءل جداً
بس برضه متفق مع حضرتك ... احنا نمنا او ممكن رحنا ف غيبوبة بس هنفوق منها ونصحى م النووم
-------------------------------
وأجمل خاتمة لنماذج الشباب اللي بيساعدوا ف الخير وتجميعات الخير والروح المصرية اللي فعلا مش شفتها لحد النهاردة بره مصر وإن كنت حاولت اعملها بيني وبين الناس اللي اعرفهم هنا ... لكن فعلا ده دليل على ان فيه ناس مش واقفة تتفرج وساكتة او عاوزة بس تعيش يومها وتعدي الايام ورا بعض ومع السلامة .... فيه لسه ايجابية جوانا وف الشباب اللي طالعين ... ومتهيألي دول اللي بيعملوا التغيير للمستقبل
---------------------------------
مش هقول آسف ع الاطالة .... هقول انتو اللي جبتوه لنفسكم هههههه
رديت على بوست حضرتك بتعليق أكبر من البوست هههه بس آسف بقى لو تعبتم من كتر التعليق ويااارب أكون قدرت أوصل حاجة م اللي عاوز اقولها بعد اللك الكتييييير ده
تحياااتي جداً للروح المصرية ويارب ترجعوا مصر على خير وسعادة وأمل متجدد

almthalia يقول...


شركة المثالية للتنظيف
شركة المثالية للتنظيف بالدمام
شركة المثالية للتنظيف بالخبر