2007-11-11

البحث ....عن البحث العلمي


قدرا وقع في ايدي الفترة اللى فاتت كام فيلم اجنبي من نوعية الأكشن و الخيال العلمي
و اتفرجت عليهم
و ما انكرش قد ايه انبهرت بيهم
مش بس بالحركة لكن بالتفكير و طريقة العرض و الابهار
الناس دول عندهم حاجة مهمة اوي و للأسف هي معدومة عندنا
الحاجة دي هي
البحث العلمي
بالطبع كلنا نعرف المعلومة دي و نعرف كمان ان البحث العلمى ده محتاج دولة عايزة تحقق ده و مكرسة جزء كبير جدا من ميزانيتها للغرض ده انا طبعا مش أهل للحديث عن مشكلة البحث العلمى في مصر
لكن افتكرت من كام سنة لما ظهر الدكتور أحمد زويل و فرحنا بيه جدا و قلنا هو ده اللى هيضع نواة البحث العلمى في مصر

و بعدين أخد جايزة نوبل و ازداد الأمل عندنا بأنه هيرجع مصر يفيدها بكل اللى اتعلمه
و المشروع اللى قال عليه اول ما جه مصر بعدها " مدينة مبارك للبحث العلمي" تقريبا كان اسمها كده
و ساعتها قالوا انها هتكون مدينة كبيرة بتكلفة عالية جدا و ان هيساهم فيها رجال أعمال كبار و دول تانية هتساهم و هتكون فيها جامعة تخرج علماء بجد في جميع المجالات

و بعدها فوجئنا بالدكتور زويل بيقول إن الموضوع توقف لأن الناس كانت فاكراه هيشارك في حملات الدعوة لتمويل المشروع و انه مش جاي علشان يعمل كده و انه بيعرف بس انه يكون مستشار او يقول على افكار انما موضوعات التمويل ليست من اختصاصه و طار الحلم و تبخر كغيره من الأحلام الكثيرة لبلدنا المنحوس

بصراحة لما سمعت الكلام ده من الدكتور اصبت بخيبة أمل راكبة جمل زي ما بيقولوا

يعني بعد ما قلنا أخيرا ربنا هيعوض بلدنا وواحد من العقول العبقرية اللى هاجرتت هترجع وتفيد بلدها بجد تقرر يا دكتورانك مش هتعرف تعمل كده و هترجع تاني تفيد الأمريكان
يا دكتور مش انا الى هعلمك ازاي يكون عندك حلم و تصر عليه مهما كانت الصعوبات تفتكر هي مستحيلة ؟؟؟ و الله مش مستحيلة

انت بس كنت تطلق إشارة البداية صحيح كان هيتخلى عنك ناس كتير ....لكن قصادهم أكيد كنت هتلاقى ناس كتير امثال الست اللى بتروح كل شهر تتبرع بخمسة جنيه لمستشفي سرطان الأطفال

بلادنا العربية محتاجة حلم
محتاجة أمل تشوف ملامحه من ناس بتثق فيها زيك
و هي مستعده تعمل المستحيل


لكن في الأول تري نظرة الجدية من صاحب الحلم
فهل ييأس الفارس في وسط المعركة فقط لأنه لا يمتلك جوادا يحارب عليه

أنا لا اقولها للدكتور أحمد زويل فقط بل أقولها لنا جميعا فنحن بحق نحتاج لحلم كامل
نحتاج لرجل غير ملول
يمشي في الطريق
و الأهم
أن يكمل الطريق للنهاية
فهل سنجده يوما ؟؟؟؟

هناك 26 تعليقًا:

ولــــــــــو يقول...

للاسف احنا بقينا تخصص قتل احلام
الموضوع انه الدكتور زويل لقى الناس بتتنصل من المشروع وكل واحد سحب كلمته ودعم الحكومه اصبح وهم فالراجل قال يهرب بنفسه وعمل مؤتمر صحفي عشان يوضح انه للاسف احنا ماننفعش نبقى علماء احنا امه مستهلكين
هو ده اللي احنا بقينا متفوقين فيه
ولكن للحق انا مش اتصدمت لما سمعت د زويل بيقول كده وقلت لنفسي خليه بره اهو على الاقل نبقى نقول ان احنا عندنا علماء كبار بيعلموا الغرب
مادام احنا ممنوعين من التطور والقفز لركب العلماء
موضوعك محزن جدا بس صح جدا

الحلم العربي يقول...

ولو
....
طيب أليس ذلك هروب في أرض المعركة ؟؟؟
أنا في رأيي انه كده بالفعل لأن في أسوء من اننا ما يكونش عندنا أحلا أن يكون عندنا أحلا لكن بنقتلها لأن بالطريقة دي كل اللى هيفكر في عمل الفكرة دي تانى هيقول إذا كان الدكتور زويل نفسه حاول و معرفش

و كمان أختلف معاك أخيفي موضوع انه عالم من عندنا بيعلم الغرب .....طيب مش أولى انه يعلم اهل بلده بدلما يعلم اغلرب و يظلوا يمنواعلينا بما أعطيناهم إياه

مش عارفة هي قضية محيرة لكن احنا اتفقنا في اننا لازم يكون عندناحلم

تحياتي الخالصة لك

dead man يقول...

بحث علمي .. عندنا ..

:))

لما يبقزا يتعرفوا عليه الول

مصـ( الخير )ـعب يقول...

عزفتي على وتر حساس أوي عندي
المفروض كلنا نحاول نبقى الراجل اللي احنا مستنينه

رجل غير ملول
يمشي في الطريق
و الأهم
أن يكمل الطريق للنهاية

مصراوي أوي يقول...

لا طبعا مش هنلاقي هذا الرجل


لان العملية مش عملية صبر

العمليه عملية تطفيش المشكلة مش مشكلة زويل

المشكلة في اللي بيحبطوا اي نجاح

لان النجاخ عايز تخصص وعايز فلوس

وزي ما حضرتك شايفة الفلوس بتضيع ازاي وبتتصرف في اي مجالات هلس

زويل نجح لانه بيقوم بدوره ومعاه فريق عمل كل واحد عارق شغله

مش هيصة هيا وف الاخر يقنعوا الناس ان زويل هو السبب



زويل هنا مثال لاي نجاح مش بيعرف يعمل حاجة في مصرنا الحبيبة

الحلم العربي يقول...

DEAD MAN
.........
اه و الله عندك حق
يا رب يتعرفوا عليه قريب علشان احنا بجد اتأخرنا أوي

شكرا لمرورك الكريم

الحلم العربي يقول...

مصـ( الخير )ـعب
..............
بل أنت هذا الرجل بالفعل إن شاء الله
فقط ثق في قدراتك ....و أكمل السعي ....و لا تيأس
وفقك الله
ووفقنا كي يكون رجال الأمة كلها هم ذلك الرجل

تحياتى الخالصة
و نورت المدونة بعد الغياب

الحلم العربي يقول...

مصراوي أوي
..........
أولا : أنا سعيدة برجوعك للتدوين و انك بقيت متواجد زي زمان
ثانيا : يمكنن يكون معاك حق في كلامك .....لكن مفيش قدامنا غير اننا نسعى بردو بالرغم من الصعوبات الكبيرة

يعني قولى بديل ...لو اتفقنا ان النجاح في بلدنا صعب جدا جدا ايه البديل قدامنا ؟؟؟ مفيش بديل غير النجاح بردو

و اتفق معاك جدا في نقطة ان فيه ناس مش عايزة للبلد دي انها تنجح بأي صورة لأن نجاحها هيفوق اللى حواليها و ده خطر عليهم

و معاك أيضا في نقطة ان بلادنا فيها فلوس لكن بتتصرف في أي شئ غير موضعها الصحيح

ربنا يسلم بلادنا من كل سوء و نحقق أحلامنا قريب

تحيات

محمود علي يقول...


رجل غير ملول
لا يهتم بالدساس
لا يثبط عزمه من الفشل
نحن بحاجة الي سوبر مان

الحلم العربي يقول...

محمود على
........
الرجال المؤمنون بحق أحسن بكثير من سوبر مان
و الإيمان بالقضية و الحلم يعطينا قوة أكبر من قوة ذلك السوبرمان

شكرا للاضافة المثمرة
تحياتي لك

محمد فوزي آل ربيع يقول...

أولاً:
بيسرني جدا كل أما واحد يدرك ليه الشباب دايما بيتفرجوا على الأجنبي و >لك لسد حاجة و نقص في التفكير بعد طبعا تلويث عقولهم بقضايا رأي عام بتاعة يسرا و حاجات كتير من دي

المهم، الدكتور زويل زي ما أحبطك أحبطني فعلا لأن كلامه عن إن التمويل مش إختصاصه دا كلام فارغ بصراحة يعني ، لأن لو بصينا لتاريخنا القديم هنلاقي إن العلماء كانوا بيتخصصوا في أكتر من مجال مرة واحدة و بعدين التمويل و الإقتصاد دا حاجة سهلة يعني بالنسبة لأي شخص ما بتحتاجش مجهود لتعلمها و إنما بتحتاج مجهود لتنفيزها و دا هوا االتحدي اللي احنا بنواجهه حقيقة و هوا اقناع الممولين بالفايدة اللي هتيجي من المشاريع دي و في حال دا ما حصلش زي ما الدكتور أحمد زويل عمل فإحنا هنفضل محلك سر ، لأنه وحده صاحب الفكرة و المتحمس ليها يقدر يقنع صاحب رأس المال ، تعرفي؟ كنا دايما أنا و ابن عمي ندعي ربنا إننا نكون زي الإمام أبو حنيفة علم و مال ، أدينا في العلم و في طريقنا للمال بس ادعيلنا ربنا يسهلها و نقدر نفيد بحاجة ، أه يا خوفي لما الإنسان يبقى فإيده المال و بعدين يستخسره بقى

سلام أحسن أنا ابتدأت أخرف

محمد فوزي آل ربيع يقول...

آسف على بعض الكلمات مثل هزا و زلك و ل(لتنفيزها) و لكن زلك(أستغفر الله) يرجع إلى الكيبورد الغبية التي تحول حرف الزال(اللهم طولك يا روح) إلى سهم دوما فتم الإستعاضة عنه بالزاي

RAMA يقول...

حسنا أنا لدي حلم.. حلمي أن أرى هذا الرجل وأنا على قدي الحياة ... فهل أطلب الكثير ؟؟؟

بوست مؤلم :(

الصقر الجارح يقول...

ولسه ياما هنشوف

الحلم العربي يقول...

محمد فوزي آل ربيع
................
أولا : عاش من قرأ لك تعليقك ...فينك من زمان ؟؟
ثانيا : معاك حق طبعا في اننا بتفرج على الأجنبيعلشان عندنا نقص في الفن اللى بيخاطب عقولنا لكن دي بردو مشكلة خطيرة لأننا عن طريق الفن بتاعهم بنلاقى نفسنا اكتسبنا مع الوقت تصرفات مش من ثقافتنا .....و تلك هي المشكلة

ثانيا : ربنا يرزقك العلم و المال و قبلهم تقوى الله علشان تحقق اللى نفسك فيه و اللى نفس الأمة فيه من زمان أن يكون ليها ولاد علماء يرجعوها لمكانتها اللى تستحقها ....و أحسبك كذلك إن شاء الله

ثالثا : و لا يهمك انا بعرف احل طلاسم الكيبوردات كويس لأنى الكيبورد بتاعتي بتعمل نفس الحركات دي هههههههههه

تحياتي أيها العالم الصغير

الحلم العربي يقول...

rama
.....
ازيك يا صديقتى
لا طبعا انتى مش بتطلبي الكثير
إن شاء الله ربنا يحقق لك حلمك قريب و يحقق أحلامنا لأمتنا و يعيننا على تحقيقها

و انا آسفة إن كان البوست مؤلم لكن أنا جايباه من الواقع للأسف

تحياتي

الحلم العربي يقول...

الصقر الجارح
............
على رأيك :
و لسة ياماهنشوف

لكن الأمل موجود بردو

تحياتي

لو كنت أعلم يقول...

ازيك يا جميل
أخبارك إيه

ممكن سؤال ؟
هي خيبة الأمل لسه راكبة الجمل
ولا مات الجمل
ومات معاه الأمل من الخوف والجوع والعطش

ثانياً
ما تلوميش أي عالم إنه مش قاعد في مصر
لإن مثلاً الدكتور زويل
لو كان فضل في مصر كان اتحسر لكل اللي هو شايفه حواليه
كان اتحسر على علمه اللي هيموت جوه عقله

ثالثاً
أحمد زويل بيفيد العالم كله بأبحاثه الجديدة
ويمكن يكون الامريكان أحق منا دلوقت بهؤلاء العلماء
وإلا بالله عليك
هنستفيد ازاي منت الفيمتو ثانية في بلد يتعامل ابناؤها بالنظام الشمسي
يعني يقولك نتقابل المغرب
يعني امتى
او بعد العصر
ايوه يعني امتى برضه
بذمتك ينفع
إحنا محتاجين مخطط قومي شعبي يقوم به المثقفون
حملة قومية
ولما نبقى جاهزين معنوياً ومادياً وعلمياً
أكيد كل العلماء هييجوا عندنا
ولا إيه؟!

عموماً
أسعد الله التماسي

همسة قلم يقول...

تفتكري ياآية ممكن نلاقي الرجل ده او المرأة دي اللى ممكن يبدأ حلم مع الشباب ويكمله في مجال البحث العلمي ويدعمه بكل ما فيه؟؟

طيب لقيناه تفتكري هانتساب في حالنا :)

أتمنى وأحلم وادعو الله ان نجدها او نجدها يوما من الايام ... يمكن اكونا انا او انتِ او اى حد بس مخلص بجد:)

ابن اسكندرية يقول...

انا شايف ان ما حدث ليس مشكلة أحمد زويل او غيره المشكله مشكلة مجتمع أسف ان اقول سلبى لسه عنده روح المغمرة وتغير الواقع الى عايشه كلنا عارفين اننا اقل دوله بتقدم برءات أختراع وأن امريكا تأتى فى مقدمة الدول التى بتقدم ابحاث وبرءات أختراع مع الأخذ فى الأعتبار الأمور السياسية ولكن فى فى أمريكا عدد محدود هو الذى يدير امريكا ويخطط لسياستها و يعمل على ظهور امريكا بالشكل ده فحنا عايزين مش حنقول واحد أو اتنين ولكن مجموعه من الناس الى عايزة تغير يكون فكرهم واحد هدفهم واحد عيزين مصلحة البلد بكده حنكون النموذج الى ذكرتيه ونوصل لحلم الى انتى وانا وكلنا عيزين نوصله

الحلم العربي يقول...

لو كنت أعلم
..........
أولا :
وحشتينى يا بنتى انتى فين ؟؟ عاملة ايه و أخبار الكلية ايه ؟؟ يا رب تكونى بخير و مبسوطة
ثانيا :
هي خيبة الأمل تعدت مرحلى الجمل من زمان و بقت دلوقتى راكبة طيارة

ثالثا :
انا مش بلوم العلماء اللى سافروا و الله لكن بلوم العقول اللى أصبحت بالفعل مصارد قوة لبلادنا لكن بيقفوا قدام صعوبات صغيرة في طريق حلمهم
و بعدين احنا لو فضلنا احنا نضخ لهم عقول ولادنا و هما ينموها و يكبروها و يذلونا بيها هيبقى ازاي تتطور بلادنا

و الله لو حد فيهم بس كانت عنده النية بجد و ابتدى المشوار هنبقى حاجة تانية و المثال قدامنا حي في ماليزيا و اللى عمله مهاتير محمد فيها

بس ربنا يرزقنا الإخلاص و حب بلادنا كما ينبغي

تحياتي ليكى يا قمر

الحلم العربي يقول...

همسة قلم
........
و الله يا أسماء مش بعيد .... إن شاء الله هنلاقيه أو هنلاقيها
و انتى جبتى النقطة الجوهرية في الموضوع : الإخلاص
هو ده المفتاح اللى هيحقق لنا الحلم إن شاء الله
ربنا يتقبل دعائك و يستخدمنا في نهضة الأمة يا رب

تحياتي

الحلم العربي يقول...

ابن اسكندرية
............
أولا ورت المدونة
ثانيا : اتفق معك تماما فى كل ما قلت و انا و الله مش بهاجم دكتور زويل لكنى فقط أخالفه الرأي في تلك النقطة
و يكفيه انه رفع رأس بلدنا في المحافل الدولية ...و ربما يأتى من بعده من يكمل المشوار في بلدنا و يضع بذرة فكرته على أرض الواقع

تحياتي

mohamed يقول...

فقط للعلم د/ زويل حاز على جائزة بن جريون قبل جائزة نوبل طبعا انت عارفة مين بن جريون?!!!!!

الحلم العربي يقول...

mohamad
.......
ماذا تقصد ياأخى ؟؟؟
لا بجد مش فاهمة قصد حضرتك ....طبعا اناعارفة مين بن جوريون لكن مش عارفة موضوع الجايزة ده و لا سمعت عنه قبل مده

طيب هو استلمها فين يعني في مصرو لا في إسرائيل و لا فين ؟؟؟؟

على العموم نورتنا و حيرتنا

NIDAAL PAL يقول...

الناس الكويسة موجودة بس خايفة
و فيه كويسيين موجودين و ما بيخافوا
يعنى فيه من ده ومكن ده
اما عن عملية قتل الاحلام
فاحلامنا كل يوم تقتل و لكن نعود لكى نسقيها لتزهر مجدداً
فى العمل تقتل فى البيت فى الشارع فى كل مكان و من كل الجهات
بوست جميل
و اسمح لى باضافة مدونتك
بارك الله فيك
juba