٢٠٠٨-٠٢-١٩

حاجات كتييير


1- مبروك لمصر
رغم إنى ضد اختصار إنتمائنا لبلدنا في مجرد ماتشات الكورة إلا إنها كانت حاجة مشجعة و نموذج مشرف لمصر
و لأنى مش عايزة اقول نظرية المؤامرة و الحركات دي إلا إنى لازم أسجل إنى معترضة و معترضة بشدة على التشجيع المبالغ فيه من القيادات السياسية للمنتخب و كمان معترضة على زيارة منتخبنا لدولة الإمارات الشقيقة علشان يتكرموا ...
على العموم
مبروك يا مصر و عقبال باقى المجالات
...........................
2- مدونتى ...أحبك أكرهك
كل سنة و انتى طيبة يا مدونتى....كبرتى و بقى عمرك سنة كاملة
أحبك :: لأنك عرفتينى بناس حبيتهم أوي بالرغم من انى ما عرفتش عنهم الكثير ...فعلا معرفة الناس كنوز كما يقولون ....كسبت منك أصحاب مختلفين ...تيارات مختلفة ....محافظات و بلاد مختلفة ........وظائف و مجالات مختلفة.........و بالرغم من كل الإختلافات اتضح لى اني ممكن المختلف عني يكون أقرب لي من المتفق معي في أحيان كثيرة مادمنا متفقين على الاحترام المتبادل
أحبك لأنك زودتى عدد من أحبهم في الله
أكرهك:: لأنك عارفة كويس مدي تعلقى بالناس ...و عارفة انى بتفرق معايا أوي آرائهم و سؤالهم ....خلتينى اتعلق بيهم ....عملتيلى شوية أمراض نفسية بإنى لازم اشوفك كل يوم و لازم اتطمن عليكى أو بمعني أصح على الناس اللى عرفتهم من خلالك .... حتى لما حاولت ابعد عنك شوية ....لقيت نفسي هخسر كتير
أكرهك لأنك خلتينى ما اقدرش استغني عنك
......................
3- منكم لله يا اللى غليتوا الأسعار
يا من اتخذتم من مراكزكم المرموقة في الدول زريعة لنهب جيوب المواطنين المكافحين
أنصحكم بمراجعة خانة الجنسية في شهادات ميلادكم فبالطبع أنتم لستم مصريين ...و لا حتى من بلاد الأعداء ...أنتم تنمتون لدولة المال .
فهنيئا لكم أموال الغلابة
و هنيئا لكم دعوات الشعب عليكم ....و جعلها الله من نصيبكم
عن أبي هريرة رضي الله عنه قال : قال رسول الله صلى الله عليه و سلم : (تعس عبد الدينار ، تعس عبد الدرهم ، تعس عبد الخميصة ، تعس عبد الخميلة ، تعس عبد القطيفة ، إن أعطي رضي و إن لم يعط سخط ، تعس و انتكس ، و إذا شيك فلا انتقش ، طوبى لعبد آخذ بعنان فرسه في سبيل الله ، أشعث رأسه ، مغبرة قدماه ، إن كان في الحراسة كان في الحراسة ، و إن كان في الساقة كان في الساقة ، إن استأذن لم يؤذن له ، و إن شفع لم يشفع) .رواه البخاري

هناك ١٦ تعليقًا:

هوندا يقول...

سلام عليكم
ازيك ياباشا
الف كل سنة وانتى طيبه هههههههه
وبالنسبة للغلاء فبجد الموضوع زاد عن حده علبة البيض بقت ب16 جنيه والزيت ب9 والفراخ ب12
اصل ماما كل يوم تيجى تشد شعرها من بره
:)

الحلم العربي يقول...

و عليكم السلام و رحمة الله و بركاته
الحمد لله يا جميل اخبارك ايه
و الف و انتى طيبة هههههههههههههههه
بالنسبة للغلاء بقى و مين سمعك
انتي عارفة
اللى بيصعب عليه بجد في الموضوع ده الموظفين الغلابة اللى مالهمش اي مصدر رزق غير مراتباتم ....طيب دول هيعيشوا ازاي خاصة و إن الغلاء جاي في أهم السلع اللى مفيش بيت يدر يستغنى عنها
هنقول ايه ؟؟ منهم لله

تحياتي يا قمر

Eman Eltaher يقول...

مدونتك عسولة و مرحة
وهيا لازم تتحب :)

ربنا يخلينا دايما ف التدوين و يخليلنا كل أقلامنا
و لو خلصت يعنى ممكن تشترى و خلاص
ههههههه

مبروك لمصر و لينا كلنا و فعلا مينفعش انهم يربطوا بين الرياضة و بين أى حاجة تانية
و حسبنا الله و نعم الوكيل ف رفع الأسعار .. ولا مبالاتهم ف عمل كادرات الأطباء بعد كادر المدرسين

تحياتى ليكى

Unknown يقول...

هي حاجات كتير اوي

حاجات حلوة

وحاجات مؤلمة

كل سنة ومدونتك طيبة يا حلم واحب بالمناسبة دي غني أهدي ليها أغنية صباح

ساعات ساعات احب عمري عمري واعشق الحاجات :)

سلام

الحلم العربي يقول...

eman eltaher
............
اهلا بيكي في المدونة و الله نورتينى
ربنا يخليكي و يخلينا دايما في التدوين و مش مشكلة الأقلام نبقى نستوردها من الصين و خلاص
ههههههههههه
انتى موضوع تانى بردو موضوع الأطباء و المدرسين فعلا ...أما دول يكون حالهم كده أمال الناس الغلابة يعملوا ايه ؟؟؟
لك الله يا مصر

تحياتى و ما تقطعيش الزيارة يا قمر

الحلم العربي يقول...

rama
....
هههههههههه
ماشي ...أنا بقى احب أهدي اغنية خلى السلاح صاحي
ههههههههههه
من احلى الحسنات في مدونتى انها عرفتنى بإنسانة جميلة زيك يا أجمل راما
تحياتى يا صبحتى

حزيــــــــــــــــــن يقول...

بقالى كتير مجتش عند حضرتك
كل عام ومدونتك الى الحلم العربى اقرب
تقريبا انا كمان بحب مدونتى وبكرها عشان كده ساعات بقفلها وارجع افتحها تانى
يا ترى حضرتك مازلت مستمره فى حفظ القرءان والمعهد اتمنى ذلك
وربنا يحفظك

الحلم العربي يقول...

حزين
....
اين انت يا رجل؟؟؟
و الله مفتقدينك
فعلا المدونات دي شئ جميل حتى لو علمتنا أسوء عاداتنا
انا الحمد لله مستمرة في حفظ القرآن لكن بسرعة السلحفاة اللى عندها شلل
ادعيلى ربنا يكرمك لأنى بجد محتاجة دعوة إنسان محترم زيك
أدام الله عليك نعمه
و ربنا يكرمك و يوفقك
و ما تتأخرش علينا تانى

Mo3Az يقول...

:)
كل سنه والمدونة طيبة
ويارب دايما فى احسن حال مع بلوجر
:)

موضوعات مختلفة بس جميلة
سعدت بزيارتى الاولى للمدونة
ان شاء الله لن تكون الاخيرة

ولــــــــــو يقول...

يااااااااه
معقول عدى سنه
انا اكيد اعرفك بعدها بفتره بس فعلا انا تقريبا اعرف مدونتك بقالي 9 شهور
وبجد مش عدى عليا مرة ودخلت عندك الا وازددت اعجابا بالشخصيه الجميله اللي انتي عليها
كل سنه وانتي بألف خير ويارب افضل متابع حد كويس زي حضرتك
يالا مع اني مش بأقول حضرتك دي كتير بس علشان عيد الميلاد وكده
ولازم أتأسفلك واعترف اني قصرت معاكي ف المتابعة وكنت فعلا ناوي اني اعلق مرة تانيه على التاج بس تتعوض التاج الجاي ان شاء الله
تحياتي

AbdElRaHmaN Ayyash يقول...

مبروك لمصر اه (A)
و كل سنة و انتي طيبة عشان المدونة
:) جميل اوي بجد التدوين
اوي
----
تعرفي
الناس لو ما فاقتش و تأكدت ان السياسة هي طريقها لاصلاح اقتصادي
بقوللك بجد مش بهزر .. الناس هيبيعوا ولادهم للي يعرف يأكلهم
ان شا الله يكون في مخابرات موزمبيق

أحلى حيـــاة يقول...

احبك يا من عرفتينى بمن احبهم فى الله
جميل منك هذه اللفته عن مدونتك

الحلم العربي يقول...

mo3az
.....
انا الأسعد بزيارتك الاولى و يا رب تتكرر
أشكرك على تعليقك الجميل و على دعوتك
تحياتى
و فرصة سعيدة

الحلم العربي يقول...

ولو
...
ايه الكلام الجميل ده كله
أشكرك بجد على الكلام ده و على متابعتك للمدونة و انى عرفت من خلالها حد محترم زيك
و انت طيب يا باشمهندس ...انا بردو مش بقول باشمهندس بس علشان انت قلت حضرتك ...واحدة بواحدة.....هههههههههه
و يا افندم انت تيجي وقت ما تحب و انا عارفة انك لما بتتأخر بتكون مشغول ...ربنا يوفقك
و بشكرك اوي على ذوقك
تحياتي

الحلم العربي يقول...

AbdElRaHmaN Ayyash
..................
و انت طيب و اشكرك
فعلا التدوين عالم جميل

و طبعا معاك حق في مووع انهم ممكن يبيعوا ولادهم و ده بيحصل فعلا ...مش حصل السنة اللى فاتت وواحدة باعت ابنها .... بجد ربنا يكون في عون الناس و في عوننا جميعا
و ربنا يستر عليكي يا مصر
تحياتي

الحلم العربي يقول...

أحلى حياة
...........
أشكرك
و فعلا ده احساسى ناحية المدونين بجد ...كفاية اننا بنعرف بعض مش علشان مصالح أو أي ش و حتى لو كنا أحيانا متفقين فنحن بشر اجتمعنا على شئ جميل و هو الحرية
تحياتي و أشكر لك ذوقك و ياريت تشرفنا تاني