خنقتيني

بحب النور
لأن النور بيهديني
و أكره عتمة الضلمة في عز الليل تغطينى
أقولك حاجة يا دنيا
و من قلبي : خنقتيني

اللهم بلغنا رمضان

كنت بتصفح موقع الأستاذ عمرو خالد و لقيت الموضوع ده ....يا ريت كلنا نحاول نعمل الفكرة دي لغاية رمضان ما يبدأ
عايزين تعرفوا الفكرة ...
ادخلوا على اللينك

اقترب رمضان فهل أنتم مستعدون؟؟

إلى حلمي الذي لم يأت بعد........؛

لن أنتظرك
و لن أكون لغيرك

لن أنتظرك كي أحقق أحلامي الأخري
لأن الحياة قصيرة كما تعلم

و لن أكون لغيرك
لأنى - كما تعلم - لا أتنازل عن أحلامي بسهولة
و لن أستطيع

بين توظيف الموهبة....... والاغترار بها

صلاح جاهين:0

موهبة فذة ...كنت لوقت قريب احترمها جدا بل و اعتبره من هؤلاء القلائل الذين جاد بهم الزمان ... ليس في موهبة الرباعيات و الكتابة فقط ...و لكن في الفكر و الآراء عامة و في كل شئ

إلى أن سمعت عن الخلاف الذي كان قد حدث بينه و بين الشيخ الغزالى رحمه الله و كيف كان الخلاف على شئ جوهري في الدين و هو الحجاب الإسلامى و كيف كانت طريقة صلاح جاهين في نقد الشيخ بالكاريكاتير لاذعة غير متناسبة مع قدر الشيخ الغزالى رحمه الله .....وقتها سألت نفسي .....هل تعطيه موهبته التى أعترف بها الحق في أن يسلطها بذلك الشكل على رمز من رموز الدين في ذلك الوقت؟؟؟؟؟؟؟

أسامة أنور عكاشة:0

لم و لن أنسي تلك المسلسلات التى أعتبر نفسي كنت مبهورة بها ....الشهد و الدموع - ليالى الحلمية بأجزاءه الخمسة - ضمير أبلة حكمت - الحب و أشياء أخرى - أرابيسك - امرأ

ة من زمن الحب - .....و جميع اعماله التى كنت و لا زلت أتابعها بشغف و ارفع القبعة لها من فرط الاعجاب بامتلاك كاتبها لأدواته دون أن يخرجنا عن النص أو يجنح بنا بعيدا عن إطار الفكرة بشكل متناغم جميل.....

ثم تأتينى الصدمة :0

تصريح لأستاذ أسامة أنور عكاشة بأن حجاب الفنانات ما هو إلا مؤامرة مقصود بها تفريغ الفن من محتواه، وتحويله إلى "وهابي"، وعودة هؤلاء المعتزلات هو تنفيذ لمخطط خليجي الغرض

منه تقديم أعمال درامية مصرية دون المستوى
،

و كثير من المواهب و الشخصيات ذوي الأفكار المتميزة

و الموهوبة ...تتغير نظرتنا لهم فجأة عندما نسمع بعض أفكارهم المختلفة عن المألوف
و حتى لا أتجنى على أحد فاختلاف الآراء بطبيعة الحال لا يفسد للود قضية كما يقولون ...و لكن أي اختلاف آراء ؟؟؟؟ أتكون الثورة على ثوابت الدين و الحياة مجرد اختلاف في الآراء ؟؟؟ أم أن الموهبة و العقل المتقد يعطي صاحبه الحق في التحليق بعيدا عن السرب بل و أن يصنع سربا جديدا يفتح الباب لأن يحلق ورائه من لا يمتلكون موهبته و المبهورون بها و من اختلطت عليهم الأفكار ...و من لا يستطيعون التفريق بين الاعجاب و التبعية...
و فيم نعمل العقل و الموهبة ؟؟؟؟
أفي كل شئ نستطيع أن نقحم أفكارنا ؟؟؟
أفي أمور الدين أيضا؟؟؟
بالطبع لا
فالله سبحانه و تعالى أعطانا المواهب و التفكير و العقل كي نتفكر و نهتدي إلى الطريق الصحيح ...و لكن أنى عرفنا ذلك الطريق و اتبعناه فليس لنا الحكم في شئ قد حكم الله فيه ... و كيف يعطي الإنسان لنفسه الحق في أن يكون له الخيرة بعد أن قضى الله و رسوله أتكون مظلة التنوير أو الإصلاح أو الانفتاح أو كما يسمون أكبر و أقرب للإنسان أم مظلة الدين الذي خلقنا من أجله و من أجل إعلاءه و لأجله سوف نحاسب بعد الموت

تأملت حينا ...هل يفرح الإنسان بالموهبة عندما يكتشفها في نفسه أم يدعو الله ألا تكون نقمة عليه...وكيف يقيس الإنسان موهبته أكانت نعمة أو نقمة؟؟؟ أعتقد أن المقياس الحقيقي هو الدين
فمهما حاول البعض التمرد و الانفتاح يأتينا شرع الله دائما بالفائدة القصوى للمجتمع...
و لكل من تغره موهبته أو يتخيل أن تفكيره و عقله أرجح من ثوابتنا أقول : لا تجعل شكر النعمة تمردا على شرع من وهبك إياها فالله سبحانه و تعالى أعطانا العقل كي نهتدي به لا كي نضل و نضل من لا يمتلكون ثقافتنا...و الله سبحانه و تعالى خلقنا و هو أعلم بنا و بما يصلحنا و قد أنزله سبحانه في كتابه و في سنة حبيبه صلى الله عليه و سلم فلنبحث عن الإصلاح الحقيقي في أمورنا خير من أن نضيع حياتنا في التفكير في أشياء أراحنا الله من عناء التفكير فيها و قضي فيها من فوق سبع سماوات

بسم الله الرحمن الرحيم
" وماكان لمؤمنٍ ولامؤمنةٍ إذا قضى الله ورسوله أمراً أن يكون لهم الخيرة من أمرهم ومن يعص الله ورسوله فقد ضل ضلالاً مبيناً "
صدق الله العظيم

ملحوظة: ذكر بعض الأسماء لم يكن المقصود به التجريح أو النقد بأي شكل من الأشكال و لكنى أردت أن أوضح الفكرة بالأمثلة و أناقش الأفكار مع كامل احترامي لهم و لأعمالهم التى ساهمت في تشكيل مجتمعنا في الوقت االحالي..

زازووو... في الفضاء الالكترونى

لولا حالة الحزن اللى تخيم على من الأمس لكانت انطباعاتى أكثر فرحا من ذلك
و لكنها الحياة كعادتها
دائما يختلط فيها طعم الحزن مع الفرح و الألم مع السعادة و البكاء مع الضحك

أما عن الخبر الذي خفف من حالة الحزن فهو
دخول اختى عالم التدوين
حياة زازووو....كما اختارت لمدونتها عنوانا
بالطبع لم افرح لمجرد ان اختى دخلت عالم التدوين
و لكن
لأن ذلك جاء بعد إلحاح منى عليها بذلك
فأنا أرى ان كلماتها تستحق ان تقرأ
و إن كنت ادعي حب الكتابة
فقراءة كتابات أختى متعة حقيقية بالنسبة لى

هي أختى الكبرى
دكتورة ....بيقولوا
جراحة ....و هي فعلا كذلك ....في الحق
منذ صغري..... و كما يفعل الأخوة الصغار دائما...يتخذون من أخواتهم الكبار قدوة...فقد كانت و مازالت لي قدوة ...و إن اختلفنا في بعض الأشياء
و لكنى دائما أحمل لها قدرا كبيرا من العرفان
فلولاها ما كنت أحببت القراءة
و لولاها ما كانت تشكلت أحلامى بذلك الشكل

انا هوجع دماغكوا بالكلام عنها ليه؟؟؟؟؟؟؟؟؟؟
ادخلوا مدونتها و انتوا تعرفوها

http://zazooo-life.blogspot.com/

و ما تنسوش تقولولي رأيكو

سلام

إنا لله و إنا إليه راجعون

تلقيت صباحا من صديقتى المدونة هوندا خبر وفاة مدونة زميلة لم أكن أعرفها و لكنى عندما دخلت مدونتها و كأنى عرفتها ...و كأنى عانيت معها ما عانت من المرض ....
حزنت كثيرا لوفاتها ....رحمها الله
و اكتب لكم هذه التدوينة حتى ندعول لها جميعا بالرحمة و بأن يسكنها الله الفردوس الأعلى من الجنة و يلهم أهلها الصبر و السلوان....
و حتى نتعظ جميعا من الموت ....حقا ... كفى بالموت واعظا
اللهم ارحم اختنا شيماء و اجعل قبرها روضة من رياض الجنة
اللهم اسكنها الفردوس الأعلى من الجنة
آميييييييين

عنوان مدونة شيماء رحمها الله
http://shikoonline.blogspot.com/
اقرأو الشات بوكس ستجدوا الخبر من أخوها يبلغ بوفاتها

و لا تنسوا الدعاء لها يسر الله لنا من يدعو لنا عند الموت

لعنة الأوتوكاد

هل تعلم أن حياتك مثل برنامج أتوكاد

إذا أردت أن تفتح صفحة جديدة في حياتك اضغط
file / new
إذا أردت أن تستعيد الماضي اضغط
file / open
و شاهد الماضي
إذا أردت أن تري الصورة بشكل عام اضغط
zoom /all
أما إذا اردت أن تري تفاصيل الحياة بوضوح اضغط
zoom /window
أراك تريد أن ترى الحياة من كل الاتجاهات فلتضغط
3d orbit
هل تاملت يوما تلك الحياة بطبقاتها ؟؟
الاوتوكاد أيضا يحمل الطبقات ذات الألوان و الأشكال المختلفة تماما مثل الحياة
فقط عليك ان تضغط
format / layers
تريد أن تقيم أحلامك و تقيسها ؟؟
فما وحدة القياس التى تريد ؟؟؟
هل تعلم انك تمتلك الكثير منها تحت يديك في هذا البرنامج
فقط افعلها و اضغط
dimensions
لتجد العديد من الاختيارات

الناس تماما مثل أوامر الاوتوكاد
فستجد منهم من يشبه أمر ال
move
متحرك دائما ...يعمل و لا يكل ...و لكن قليلا ما يعمل هذا الأمر في حياتنا تري لم؟؟!!!0
منهم من هو مثل ال
rotate
يأخذ حاجته منك ثم يستدير ليبحث عن آخرين لينال منهم البعض
أما ال
mirror
ستجده و لكن قليلا في حياتك فهذا هو الصاحب الذي هو مرآتك ...يكشف لك عما بداخلك يصارحك
يصدقك فصديقك كما تعلم من صدقك لا من صدَقك
trim
اقطع به العضو الذي لابد من بتره حتى يصح البدن كله
أما
extend
فصل به من وصلك .... ومن قطعك إن لزم الأمر
explod
ستحتاجه كثيرا عندما تريد أن تنفجر و تفجر كل ما حولك من سلبيات
أما
scale
ستحتاجه عندما تريد ان تعرف حجمك مقارنة بأحجام الآخرين
انعش حياتك...... فقط اضغط
REGEN

أخطأت كثيرا في الطريق عليك ب
undo


و لكن تبا للاوتوكاد فالحياة لا تحمل ال

UNDOOOOOO

فضفضات ....و إيمان....بحبك وحشتينى

فضفضات

مش مصدقة نفسي انى بقالى أكتر من أسبوع ما كتبتش ....مستغرباني أوي
طبعا أنا زهقتكوا من الكلام عن نفسي اللى مبحبوش ...بس لازم أفضفض علشان ما اطقش و كمان لازم أشكركم كلكوا على مشاعركم الجميلة و نصائحكم الأجمل ....طول مانا قاعدة في الشغل بحاول افتكر كلامكوا و تشجيعكوا ليه ...صحيح ماما و اصحابي و كل اللى حوالية حاولوا يشجعونى لكن علاقة المدونين ليها طعم مختلف

كان نفسي اطمنكوا و اقول لكو انى بقيت بنام كويس و مواعيدى اتنظمت و كله بقى تمام ....لكن للأسف مفيش حاجة من دي حصلت

الحمد لله خلصت جزء كبير من الشغل اللى كنت بعمله في البيت و اطحنت فيه ...و طبقت فيه كام يوم من غير نوم أو بساعات نوم قليلة و كنت بروح الشغل مش قادرة ...لكن البركة في النسكافيه ...صحيح مضر لكن مجبر أخاك لا بطل

اليومين اللى فاتوا كانوا غريبين ...ماما و بابا و اخواتى سابونى و راحو بيتنا الجديد و انا كنت مضطرة اقعد لوحدي مع اخويا اللى عنده مشواير كتير و مش بيرجع غير بالليل اوي ....و اكتشفت انى لغاية دلوقتى مش بعرف انام لوحدي ...ههههههه..أه و الله ...مع انى كنت هموت من التعب و نفسي انام لكن كل ما عينى تروح في النوم اصحى مفزوعة ...كل ما اقول لحد يضحك عليه و يقولولى انتى لسة عيلة ...الظاهر ان عندهم حق

مواعيد الشغل الجديدة خلتنى بقالى 3 أسابيع ما رحتش معهد تحفيط القرآن و لغاية دلوقتى معرفش عملوا ايه ....ادعولى اعرف اكمل معاهم و ربنا يقدرنى اعرف اوفق بين الحفظ و الشغل لأنى الفترة اللى فاتت فاتنى كتير اوي و مستوايا بقى وحش بعد ما كنت خلاص قربت اكون معلمة لأن مديرة المعهد كانت هتديلى فصل جزء عم أدرس لهم ....خايفة يكون ده من ذنوبي .....ادعولى ربنا يغفر لى ....و انجح في الاختبار الصعب ده.....و ربنا يخلص نوايانا جميعا

اللهم إنا نعوذ بك من السلب بعد العطاء

أما بقى عن الشغل الجديد فحدث و لا حرج
كل يوم فيه جديد
نفسيتى ...حبة فوق ...و حبة تحت

بتفرق معايا الناس أوي....و هي دي مشكلتى
أنا عارفة ان مشكلتى انى عشرية شويتين و مش عارفة أتأقلم مع فكرة انى خلاص سبت الناس اللى في الشغل القديم و المفروض آخد على الناس الجديدة ....و بحاول فعلا ....اتصاحبت عليهم و بقينا بناكل و بنصلى مع بعض و بنغلس على بعض أحيانا ...لكن لسة في دماغى (وما الحب إلا للحبيب الأول)ههههههههه
خصوصا انهم جادين شوية ...يعني في الشغل القديم كان فيه حالة من المرح الدائم ....و التجديد المستمر ...ناس داخلة و ناس طالعة ....بتوع الحسابات بيتخانقوا مع الشئون القانونية ....و المدير بيتخانق مع الأوفيس بوي و كمان شوية كلنا قاعدين نهزرمع بعض ....اجتماعات بنقعد فيها نتكلم عن نرتب هنروح الرحلة الجاية فين .....هههههه و وشوية حد فينا عمل مشكلة صغيرة مع صاحب الشركة....و هكذا و هكذا
أما الآن ...الناس كلها قاعدة مركزة في الكمبيوترات ....ممكن تعدي ساعات كاملة ما تسمعش فيها كلمة لحد بالرغم من ان العدد كبير ...لكن الكل مركز و بيشتغل ...طبعا ده كويس للخبرة و الحاجات دي ....لكن بردو جو المرح بيعطي دفعة كويسة للعمل

المهم ...بالطبع انا دوشتكوا و صدعتكوا ....كان نفسي اتكلم عن إيمان صاحبتى اللى كنت بقالى 4 سنين ماشفتهاش و قابلتها امبارح لكن تدوينة تانية إن شاء الله

الدعاااااااااء جزاكم الله خيرا


ملحوظة:رمضان قرب أوي يا جماعة اوصيكم بالاستعداد له علشان ما يجيش و يعدي من غير ما ناخد بالنا خلوها في لسانكم على طول
اللهم بلغنا رمضان
اللهم بلغنا رمضان
اللهم بلغنا رمضان

تعب كلها الحياة

أول ما عملت مدونة كنت مبسوطة جدا ...كان بيتهيألى انى مش ممكن ييجي عليه يوم و ما ادخلش عليها و اشوف اللى فيها مهما كنت مشغولة و لما تابعت مدونات ناس كتير كانت اكتر حاجة بتضايقنى انى اشوف حد بيسيب مدونته بالكام يوم من غير ما يدخل عليها ...كنت بحس زي اللى بيسيب زرعة صغيرة من غير مية لمدة كبيرة و ما كنتش أعرف إنى في يوم هكون زيهم ....لكن غصب عني

ايوة غصب عني........حاجات كتير بتحصل لي اليومين دول:
0 *رحت شغل جديد و سبت الشغل القديم اللى كنت مرتبطة بيه جدا ....كان نفسي أكمل التدوينة اللى ابتديتها و كنت بحكي فيها عن أثر كل واحد منهم في نفسي لكن مش فاضية ....غصب عني
من الأسبوع اللى فات و أنا في الشغل الجديد ....بتعب جدا ...كأنى أول مرة أشتغل ...كل يوم أروح أنام لغاية تانى يوم و أجازة يوم الجمعة مش بتكفينى طبعا لأنى قبل كده كنت باخد يوم السبت كمان دلوقتى يوم واحد و بيعدي هوا

نفسي أحكيلكوا عن حالتى النفسية اللى بتتأثر بكل كلمة حد يقولها لى في الشغل الجديد لأنه شغل جديد عليه جدا

نفسي أحكي لكم عن الناس اللى في الشغل الجديدو نظرتى الأولية ليهم طبعا ما ينفعش أحكم على الناس من الأول و لكن عايزة أقول لكوا الانطباعات الأولى ...لكن بردو ...غصب عني

بواقى الشغل القديم لسة ما خلصتش و لسة بعمل فيها في البيت و اللى زاد كمان ان الهارد بتاع الكمبيوتر اللى في البيت بيعمل حركات ندالة و شكله كده عايز يتغير و مش عارفة اشتغل خالص ده غير انى زي ما قلتكوا .....مش فاضية أصلا

مواضيع كتير عايزة اكتبها و ناس كتير عايزة اتابع مدوناتهم لكن يا ريت يعذرونى مرحلة و تعدي إن شاء الله


اللعبة : دي مدونة لعبة بنلعبها أنا و بعض المدونين الكرام و اللى حطت بذرتها أميرة البلطجية و المفروض ان عليه الدور لكن أنا بقول لها ما تقلقيش انا هآخد دوري إن شاء الله

يا ريت تعذرونى كلكوا انى مش بتابع أوي لكن على الأقل بحاول أعرف أخبار مدوناتكوا و أقرأ حتى لو ما قدرتش أعلق عندكوا

ادعولى أوي لأن الشغل الجديد ...جدييييييييييييد جدا و غريب بالنسبة لى و نفسي أعمل فيه حاجة كويسة .....

الله المستعان

سلامو عليكوا

أه نسيت اقول لكو الصورة اللى فوق دي بتاعت سندريلا ....بمناسبة انى اليومين دول عاملة زيها في النصف الأول من الحكاية لما كانت بتكنس و تنفض و تغسل لمرات أبوها بس أنا بقى برسم و أظبط و أطبع و أعدل و أهشر و أراجع

عصرية

في آخرالزمان

يصير الكذب ....تجارة

و الإحساس ....دعارة

و المدفع في يد الطفلة ...دمية

و الدم يجري بين الكفين ......طهارة

قد أصحو يوما من غيبوبة

فأراني فأرا في مختبر أو أنبوبة

فالأحياء حقول تجارب

و أمام عيون التاريخ .....حجارة

.....................

جزء من قصيدة قرأتها منذ عدة سنوات في إحدى المجلات لشاعر مغمور

ما حرمتش ......تاج تاني

عايزة أقولكوا ان التاج اللى فات سبب ليه ضيق شديد لأنى ضايقت بيه ناس لما مررته لهم و اعتذارا لهم و لأي حد ما بيحبش التاجات ....أنا مش همررلهم التاج ده و حتى لو مررته لأي حد منهم فياريت يسامحونى و ما يجاوبوش و أنا هكون متفهمة جدا لوجهة نظرهم

ندخل بقى في التاج

انت مين ؟؟-
اسمي آية ...في ناس بتحب تدلعنى بيويا أو أيويا لكن الأظرف اللى بيدلعوني بآية بتفخيم الألف أو اللى بيقولولى أوءة لأنى بحس انهم بيذمونى مش بيدلعوني ..هههههه

بنت مسلمة عربية مصرية و انتمائي الأكثر للثلاث حاجات دول

اللى بياخدوا بالظاهر بيقولوا مهندسة و بيقولوا طيبة و هادية لكن العالمين ببواطن الأمور عارفين انى لا بفهم في الأولى و لا انا التانية و لا التالتة

مين اكتر ست اشخاص بتحبهم ؟؟؟-
انظر التاج اللى فات و انت تعرف

هل انت سعيد ؟؟ -
ما يهمنيش أكون سعيدة دلوقتى قد ما يهمنى أكون سعيدة في الآخرة علشان كده عمري ما سألت نفسي السؤال ده و لا ركزت في إجابته .....الأهم هو الرضا و أنا الحمد لله راضية جدا و بتمنى من ربنا انه يوفقنى أعرف أستغل النعم اللى أنعم عليه بيها في الخير

لو اجتمعت مع حسنى مبارك فى مكان واحد هتعمل ايه ؟ -
اتعلمت من التنمية البشرية انى لما حد يسألنى سؤال و أنا مش عايزة اجاوب عليه أرد عليه بالسؤال ده

انت بتسأل السؤال ده ليه؟؟؟؟؟

لو جاوبتني هرد على سؤالك

عموما : هغنيله أغنيه : اخترناه اخترناه....قاعدين ع المصطبة وياه

لو معايا مليون و نص اعمل ايه ؟؟؟ -
ربع مليون لبنك الطعام

ربع مليون لتزويج كام شاب من الفقراء

نصف مليون أبدأ بيه مشروع في دماغي نفسي أعمله لأطفال الشوارع

نصف مليون أفتح بيه مكتب هندسي معماري

بتحب مصر ؟؟ -
أمال يعني؟؟؟؟

طبعا بحبها

انت مسلم ؟؟ -
الحمد لله

ليه ؟؟ -
لأنى من يوم ما ابتديت أفهم رضيت بالله ربا و بالإسلام دينا و بسيدنا محمد صلى الله عليه و سلم نبيا و رسولا

مين اكتر شخصية متقدرش تستغنى عنها ؟؟؟ -
أكيد أمي ربنا يخليها و يحفظها و يبعد عنها كل مكروه

ايه اكتر موقف محرج ؟؟ -

ههههههه. كنت في الثانوية العامة و رايحة أذاكر مع واحدة صاحبتى ليلة امتحان الفيزياء ... و أنا رايحة عندها حسيت ان الجزمة واسعة على رجلى ...استغربت شوية و بعدين نسيت

المهم رحت عندها والمذاكرة خدتنا و هي قالتلى ريحي نفسك اقلعى الجزمة قلعتها عادي ....

و أنا ماشية جيت ألبسها .....مش راضية تتلبس أبدا ...و أحاول ...مفيش

عملت كل الحاجات ...لبيسة ...مفيش ....استنى شوية و آجي ألبسها تاني ....مش ممكن

المهم كان شكلى محرج جدا ...خصوصا ان اخواتها الولاد كانوا موجودين و كل شوية يعدوا علينا لأننا كان قاعدين في الرسيبشن ...و أحس انهم مش قادرين يمسكوا نفسهم من الضحك...أنا كمان قعدت أضحك زي الهبلة لأن الموقف بجد كان يفطس من الضحك ...و اللى زود الموضوع انى كلمت اخواتى في البيت علشان حد فيهم ييجي و يجيبلى واحدة تانية معاه ...مالقيتش حد من اخواتى الولاد في البيت

المهم من ستر ربنا ان أخوها كان عارف طريق بيتنا راح جابلى واحدة تانية من بيتنا لبستها و من يومها عمري عمري عمري ما أقلع جزمتى عند حد و لو حصلى ايه
ههههههههههههههههههه

الامنية اللى اتمنى تحقيقها؟؟

لو السؤأل على أمنية واحدة تبقى أكيد ان ربنا برحمته يدخلنى الفردوس الأعلى من الجنة بجوار الرسول صلى الله عليه و سلم أنا و كل من أحبهم

جينا بقى للكلام اللى بيزعل الناس مننا : همرر التاج لمين؟؟

همرره لكل الناس اللى عندي في يمين المدونة و خصوصا الناس اللى ما بيحبوش التاجات منهم (غلسة غلسة )ههههههههه

عن الصبر و الإنتظار

في وجه المصاعب .....نقف ....نتأمل ...نتحير

أحيانا تجبرنا الحياة على الصبر.....و أحيانا تجبرنا على الانتظار ....و أحيانا أخرى تجبرنا على ....الصمت

إذا أردت أن أتكلم عن الصبر هنا فأنا أكاد أجزم أنه لا يوجد على أرض الوطن العربي من لا يحفظ هذه الكلمات:0

إن الله مع الصابرين

و اصبر و ما صبرك إلا بالله

إنما يوفى الصابرون أجرهم بغير حساب

الصبر مفتاح الفرج

كلها عبارات جميلة نحفظها جيدا و مصدرها آيات القرآن الكريم و ميراث قديم من الأجداد و الأباء عن معاني الصبر المحمودة................0

و لكن هل نحن بالفعل نصبر ؟؟؟....أم ننتظر

و ما الفرق بين الصبر و الانتظار ؟

أعتقد ان مفهوم الصبر هو الصبر عند المصيبة أو البلاء ....أن ترتضي ما كتبه الله عليك و أن تحمده على البلاء كما حمدته من قبل على النعمة ...إن كنت قد فعلت

أن تبذل جهدك كي تحسن من وضعك و لكن إن لم يحالفك التوفيق فلتصبر و لترضى و لكن مع الاستمرار في العمل و البذل

هذا هو مفهوم الصبر من وجهة نظري

أما ما نفعله أو يفعله كثيرون مناهو.................. الإنتظار

أن تنتظرهم بينما تعلم انهم لن يأتوا أبدا

هؤلاء ...الذين كلما هبت رياح ذكراهم ملئت عيناك دموعا لم تمسحهما غير يداك

هؤلاء الذين نسوا ...و باعوا ...و تركوك ....و لكنك تأبى إلا أن تلعب دور الشهيد المنتظر

هؤلاء الذين أخذوا و لم يعطوا ....هؤلاء الذين وعدوك ....ثم خانوا....و لكنك دائما تلتمس الأعذار

أن تنتظرها كي تكون حياتك أفضل و كي تستقر في حياتك و كأنها امتلكت مفاتيح حياتك قبل أن تراها....تلك التى سوف يكون كلامها أعذب من صوت أمك ......تلك التى ستحبك و تبذل من أجلك كل شئ .......تلك التى ستعطيها حنانا لم تعطه من قبل لأمك التى بذلت بالفعل من أجلك كل شئ

أن تنتظريه ...ذلك الذي سيجعل لحياتك معني ...ذلك الذي سيجعلك تنظمين وقتك و تهمتين بنفسك .....ذلك الذي سيفهمك من قبل أن تتحدثي ....ذلك ال ..............الذي هو في علم الغيب

من منا ليس في حياته ذلك الشئ الذي يشل حركته و يجعله ينتظر

ينتظر لحظة الاستقرار كي يحدد حلمه و أهدافه

ينتظر رمضان كي يقرأ القرآن

ينتظر ليلة خالية البال كي يركع هاتين الركعتين في جوف الليل

ينتظر النصف الآخر كي يقلب له موازين الحياة

ينتظر ضربة الحظ التى ستجعله سعيدا طوال حياته

ينتظر الحب كي يعطي

ينتظر الأمل كي يبذل

ينتظر النهاية كي يبدأ

استوقفتنى مرة جملة سمعتها تقول :

"أصعب ما في حياة الموظفين الانتظار فهم :

في أول اليوم ينتظرون آخره كي يعودوا للبيت

و في أول الأسبوع ينتظرون آخره كي يحصلوا على يوم الإجازة

و في أول الشهر ينتظرون آخره كي يحصلوا على الراتب .....فحياتهم كلها انتظار"

للصبر حلاوة لأن آخره جزاء بغير حساب ...أما الانتظار فآخره.....انتظار فحسب

كلام أغاني

اشتروني و اشتروا خاطر عيوني......ريحوني
ياللى غاويين تتعبوني ........ريحوني
صدقوني
النهاردة أنا بين ايديكوا صدقوني
بس بكرة هتدوروا مش هتلاقوني
صدقوني بكرة
هتدوروا مش هتلاقوني
.........................
جزء من أغنية لوردة

حد فهم حاجة؟؟؟؟؟
مفهمتوش!!!!!!
ليه بس كده؟؟؟؟؟
من الآخر هو ده اللى انا حاسة بيه النهاردة

هو مش كلام أغاني ؟؟
بس ساعات بيبقى في الجووول
يا سلام عليكي يا وردة لما تبدعي

نفسك....إن لم تشغلها بالطاعة ....شغلتك بالمعصية

الشباب عايز يتجوز ....و البنات عايزة عربيات

أولا عايزة أقدم لكم شكر و اعتذار

أما الشكر فلكل اللى حاولوا يخففوا من حالة الضيق اللى كنت فيها اليومين اللى فاتوا ....بجد جزاكم الله خيرا
و أما الاعتذار فلأنى كئبتكوا معايا في التدوينة اللى فاتت و مش المفروض ان الناس جاية تقرا المدونة علشان تكتئب ....لكل اللى اتضايقوا من حالة الغم اللى كنت عاملاها ...اعتذر بشدة


ندخل بقى في الموضوع

بحاول أرصد حال الشباب و البنات في سني و نظرتهم للزواج، و تحديدا بدأت من آخر سنة في الكلية ليه يعني حوالي من أربع سنين

كنت مثلا بسأل زملائي الشباب : عايزين تعملوا ايه لما تطلعوا من الكلية؟؟0

منهم اللى كان بيقولى عايز افتح مكتب ، و اللى كان بيقول عايز أدور على شغلانة كويسة بمرتب كويس ، واللى كان عايز يسافر ..

و لما كنت بسألهم عايزين تعملوا كده ليه ؟ كان الإجماع انهم عايزين يكونوا نفسهم علشان يتجوزوا أو علشان لما يتقدموا لواحدة يكونوا جديرين بيها و ما يقعدش باباها يقوله منين و بتقبض كام و شقتك فين و الحاجات الكتير اللى بيخاف منها أي شاب رايح يتقدم لعروسة....

و خلال الثلاث سنوات اللى مرت من ساعة ما اتخرجت من الكلية لغاية دلوقتى و أنا بحاول أشوف ايه اللى حصل للشباب دول

واحد منهم مثلا : خطب من حوالى ست شهور و كان طاير من الفرحة و عرفت أد ايه كان بيقول إنه مبسوط و إنه لقى البنت اللى كان بيحلم بيها و ان هو ده كان أمله في الحياه ..و حاجات كتير بالشكل ده

طبعا احنا قلناله ألف مبروك و احنا بجد مبسوطين ...بس كانت فيه حاجة غريبة لاحظناها انه مبسوط أوي و فكرنا ياترى البنت مبسوطة أوي كده زيه؟؟

بعدها بشهرين كانت واحدة زميلتى بتكلمه و بتسأله عن أحواله و بالمرة قالت تسأله على خطيبته و كان الرد المفاجأة : " لأ هي خلاص ما بقتش خطيبتى احنا سيبا بعض" 0

واحد تانى : كان نفسه يخطب و هو في الكلية لكن ظروفه ما كنتش مساعداه ...بعد ما اشتغل و ضمن وظيفة كويسة فوجئنا بيه بيتقدم لواحدة مننا و لأنه ماكانش مناسب ليها رفضت....ساعتها قالها :"لو سمحتى ما تقوليش لحد من زملائنا في الكلية " لكن هي كانت بالفعل قالت لنا

بعدها بشهرين اتقدم لواحدة تانية مننا و رفضت ....بعدها بشهرين تانيين تقدم لواحدة ثالثة مننا و رفضت ...و كان كل مرة يقول للى بيتقدملها نفس الجملة انها ما تقولش لحد

لغاية ما بعدها خطب واحدة من برة الكلية و اتجوز فعلا

واحد ثالث كان معانا في الكلية كان كل أمله انه يخلص الكلية بأي تقدير علشان يشتغل في أي شغلانة بتجيب فلوس كتير و لتكن البورصة مثلا .....

بعد ما اتخرجنا فتح مكتب شوية و بعدين اشتغل مقاول شوية و بعدين فوجئنا بيه اشتغل في البورصة ...طيب ليه كده ده انت مهندس ...كان رده :" يعني هي الهندسة هقبض منها كام في الشهر ..أنا مرتبي من البورصة أضعاف مرتبي من الهندسة "...0

و دلوقتى بيدور على عروسة أهم حاجة ان يكون شكلها حلو لدرجة انه خطب مرتين و محصلش نصيب و بيدوردلوقتى بكل طريقة على عروسة تكون كويسة و حلوة .......

واحد رابع خطب مرتين و ماحصلش نصيب و في كل مرة يكون مزأطط و الفرحة مش سايعاه و محسس كل اللى حواليه انه أسعد إنسان في الدنيا ....و بعد كل مرة يقول اصلها كانت كذا و كذا و طبعا يطلع فيها القطط الفاطسة

.....................

أما البنات

كذا واحدة اتجوزت و قعدت في البيت

أما اللى دخلوا معترك الحياة و الشغل ................

واحدة كل نفسها انها تحوش و تجيب عربية لدرجة انها قالتلى مرة لما كن متقدم لها عريس :" أنا بس أجيب عربية و مش عاية اتجوز خالص"ساعتها استغربت جدا

واحدة تانية لما اتخطبت قعدت تحسبها بالورقة و القلم هو خطيبها بيقبض كام و هي كام و كانت مضايقة جدا انه بيقبض اقل منها ( على فكرة هي مش مادية خالص في الحقيقة بالعكس تماما )

واحدة تالته مش مهم عندها تتجوز المهم انها تكمل حلمها و تفتح شركة بتاعتها و هي في سبيل الحلم ده ممكن تضحي بكل شئ

واحدة رابعة لا هي عايزة ده و لا ده ....كل حلمها انها يكون عندها فيلا بتاعتها تعيش فيها لوحدها بعيدا عن غطرسة الأباء و تحكم الاخوات الكبار

واحدة خامسة سابت كل اللى اتعلمته في الكلية و بتبتدي دلوقتى تتعلم العلم الشرعي و سابت الشغل علشان عايزة تتجه لدراسة الدين لأنها مقتنعة ان كل اللى اتعلمته في الكلية علم لا ينفع

و كتير من البنات اللى اتخرجوا و اشتغلوا أفكارهم بيتتغير من ناحية الجواز بالذات

الظاهرة دي مستوقفاني بقالى فترة

ليه الشباب بقوا بجد نفسهم يتجوزوا و فيه منهم اللى بيتجوز لمجرد الجواز و بيكونوا طايرين من الفرحة لما يخطبوا لمجرد انه يتقال على الواحد فيهم انه خطب ...

أما البنات بقى طموحها حاجة تانية خالص

بحاول أفسر وجهة نظر البنات .....يمكن ما بقاش الأمان للبنت دلوقتى راجل لأن فيه رجالة كتير بتمثل مثال سئ للبنات

يمكن الفلوس بقت أمان أكتر للبنت على أساس ان لو معاكي فلوس تقدري تعملى اللى انتى عايزاه من غير ما حد يتحكم فيكي

يمكن نظرة المجتمع دلوقتى للست اللى بتشتغل انها ست ليها وزنها أما اللى قاعدة في البيت تربي العيال دي عالة على المجتمع مثلا

يمكن لأن في رجالة كتيرو انا أعرف كتير بالنوعية دي معتمدين بشكل أساسي على مرتبات زوجاتهم و كأنها من واجبات الزوجة انها كمان تصرف على البيت فالبنت بتقول و انا ليه اتجوز و اجيب واحد يشاركنى في تعبي كمان

يمكن لأن الستات في مجتمعنا بجد بيتعبوا أوي و بالذات المرأة العاملة اللى مطلوب منها تكون في الشغل مركزة و زي النحلة و البيت جميلة و مرتبة و كل شئ تمام و في تربية الأولاد حكيمة و صبورة و كل الحاجات دي ...أما الراجل فبمجرد دخوله البيت هو عبارة عن كائن له كل الحقوق ....من حقه ما يشوفش حاجة مش عاجباه ...من حقه ياكل في الوقت اللى متعود عليه ...من حقه ما ينزعجش من صوت الولاد ...من حقه ولاده يتربوا أحسن تربية لأن هي دي مسئولية الست ...من حقه كل شئ و ليس عليه من المسئوليات شئ

طبعا أنا لا اتكلم عن جميع الرجال و لا جميع النساء ...فأنا شخصيا لم أر ذلك المثال في بيت أبي و أمي و لكنى رأيته في بيوت أخرى

مش عارفة تحليلى صح و لا غلط لكن ايه رايكوا انتوا ؟؟؟مش بجد الموضوع ده محتاج بعض التأمل ؟؟؟؟

مدينتى بلا عنوان

مش بحب اكتب عن نفسي تدوينات ...لكن النهاردة بجد محتاجة أكتب لأنى مضايقة كتير

مش عارفة مالي

كتبت ثلاث تدوينات و حفظتهم في الدرافت لأنى مش راضية عنهم

مخنوقة

مضايقة

و لأنى مش بحب اتكلم عن نفسي هنا هسيبكوا مع قصيدة كئيبة معبرة عن حالتى لفاروق جويدة بس جميلة جدا جدا
هي القصيدة طويلة شوية لكن تستحق القراءة

مدينتي.. بلا عنوان

........................

ما عاد يا دنياي وقت للهوى
ما عاد همس الحب.. في وجداني
ما عاد نبض الحب ينطق بالمنى
و كفرت بالدنيا.. و بالإنسان
فحملت أحلاما تلاشى سحرها
كرفات قلب ضاق بالأكفان
و نسيت أزهارا غرسناها معا
و جنى عليها الدهر بالحرمان
و جنيت منها الحزن كأسا ظالما
كم ذبت يا عمري من الأحزان
و حسبت أن العمر بحر هادئ
فرأيت موج البحر كالبركان
و غرقت في ألم الحياة و هدني
عبث السنين.. و حيرة الفنان
فالكأس أيام نعيش بحزنها
و العمر سجن خانق الجدران
و الناس أطياف تمر كأنها
أشباح صيف شاحب الأغصان
هم كالسكارى في الحياة و خمرهم
أمل عقيم.. أو شعار فان
و تعربد الأيام فيهم ما ترى
في العمر في الأخلاق.. في الوجدان
ما أجبن الإنسان يدفن عمره
ليعيش تحت السوط.. و السجان
و يقول حظي أن أعيش ممزقا
و أظل صوتا.. لا يراه لساني

* * *

ما عاد يا دنياي وقت للهوى
ما عاد نبض الحب.. في وجداني
الحب أن نجد الأمان مع المنى
ألا يضيع العمر في القضبان
ألا تمزقنا الحياة بخوفها
أن يشعر الإنسان.. بالإنسان
أن نجعل الأيام طيفا هادئا
أن نغرس الأحلام كالبستان
ألا يعاني الجوع أبنائي غدا
ألا يضيق المرء.. بالحرمان
أخشى بأن يقف الزمان بحسرة
و يقول كانوا.. لعنة الإنسان
فغدا سيذكرنا الزمان بأننا
بعنا الهواء الطلق.. بالدخان

* * *

كلماتنا صارت تباع و تشترى
و بأبخس الأسعار.. بالمجان
كلماتنا يوما أضاءت دربنا
فلقد عرفنا الله في القرآن
و نساؤنا صغن الحياة رواية
كلماتها شيء.. بغير معاني
الفقر حطم في النساء حياءها
صارت تباع بأرخص الأثمان
و شبابنا جعلوا الحياة قضية
إما يمين.. أو يسار قاني
و نسوا تراب الأرض ويح عقولهم
هل بعد ((طين الأرض)) من أوطان؟
و شيوخنا بخلوا علينا بالمنى
من يا ترى يحيا.. بغير أماني؟
قالوا لنا: إن الحياة تجارب
و الويل كل الويل.. للعصيان
تركوا لنا وطنا حزينا ضائعا
تركوا الربيع ممزق الأغصان

* * *

كم قلت من يأس سأرحل علني
أجد الظلال على ربى النسيان
حتى يعود الحب يملأ مهجتي
و يشع نورا في سماء كياني
لكنني أدركت أن بدايتي
و نهايتي.. ستكون في أوطاني
و سأسأل الأيام علّ مدينتي
يوما تعرف قيمة الإنسان
فمتى شجون الليل تهجر عشنا؟
و متى الزهور تعود للأغصان؟
و متى أعود لكي أراك مدينتي
فرحى بغير اليأس.. و الأحزان؟
أترى سنرجع ذات يوم بيتنا
و نراه كالأمل الوديع.. الحاني؟
أترى سترحمني مدينتنا التي
قد صرت أجهل عندها.. عنواني؟
قد أنكرتني في الزحام و ما درت
أني يمزقني لظى.. حرماني
إني وليدك يا مدينتنا فهل
صار الجحود.. طبيعة الأوطان؟!
هل صار قتل الابن فيك محللا
أم صار حكم الأرض للشيطان؟
إني تجاوزت الحديث و إنما
حقي عليك.. سماحة الغفران
فإذا غضبت فأنت أمي فارحمي
و إذا عتبت فذاك من أحزاني

............................
فاروق جويدة

لعب و جد

في الصغر نلعب ...حتى نتعلم كيف نحقق في الحياه ما نحققه في اللعب
......................... و في الكبر نلعب ...حتى نحقق في اللعب ما لم نستطع تحقيقه في الحياة

........................

تهييسة مواطن

تاج لأول مرة ....من هوندا

لأول مرة في تاريخى التدوينى القصير يجيلى تاج و مين مين كمان من صديقتى التى لا أعرفها هوندا طبعا أنا بشكرها على التاج الظريف ده و كمان بشكرها لأنها أول واحدة تبعتلى تاج أصل التاجات دي بتفكرنى بلعبة كنا بنلعبها انا و صاحباتى في ثانوي

توكلنا على الله


1- أحب شخص لقلبك في الدنيا؟
الرسول صلى الله عليه و سلم ثم أمي الحبيبة صاحبتى اللى بموت فيها و بابا العزيز ثم اخواتى العساسيل و صاحباتى و أولهم بسمة انتيمتى طبعا انتو متعرفوش بسمة بس هي شخصية جميلة قوي و انا بحبها قوي قوي قوي و بحب كل الناس اللى حوالية الطيبين اللى مش بيحبوا يضايقوا غيرهم

2- انسان مستعد تضحي بحياتك – ركز فى كلمة حياتك – عشانه؟
نظريا : أي حد مادام معاه الحق
عمليا : ما اتحطتش في موقف زي ده قبل كده لكن عموما انا نفسي أموت شهيدة و اللى يموت دون عرضه و ماله فهو شهيد


3- انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟ كل اللى أياديهم ملطخة بدماء أسرانا و اخواننا في فلسطين و العراق و الجميع بلاد المسلمين و حتى بلاد غير المسلمين اللى احتلوها الجبابرة ....كل اللى بيدي نفسه الحق يقتل في خلق الله و يستعبدهم و يمص خيراتهم


4- ما هو اسم اجمل كتاب كتبه بشر قراته ومحتفظ به حتي الان؟
بين يدي عمر (خالد محمد خالد)0


5- اسم كتاب كتبه بشر برضة- انت متعلق بيه وبتقرأه كل فترة؟
كتب كتيرة أنا عموما معظم الكتب اللى قريتها بحب ارجعلها تانى منهم مثلا
سلسلة الصحابة (خالد محمد خالد)
لا تحزن (عائض القرني)
معظم كتابات (توفيق الحكيم)
العبقريات
قوة التفكير الابداعي (توني بوزان)


6- اهم جهاز منزلى انت متعلق بيه او بتستخدمه كتير؟
زمان كان التليفزيون ...دلوقتى أكيد الكمبيوتر

7- مكان تحس بالراحة عندما تدخله؟
المسجد بالذات في رمضان(الملايكة بتكون زيادة شوية)0
بيتنا و انا راجعة من الشغل
دار الحصري في ميعاد الدرس الأسبوعي بتاعنا يوم الأحد


8- شىء تحس بالراحة النفسية عندما تنظر اليه؟
صور المسجد النبوي و الروضة الشريفة (يارب أزورهم قريب أنا و كل اللى نفسهم في الزيارة )
السماء وقت الشروق و الغروب
و البحر أحيانا لكن في الغالب بخاف منه


9- مكان تحس فيه بالحنين الى شىء لا تدرى ماهو و ذكريات جارفة الى لاشىء؟
الكعبة و المسجد النبوي (شوق إلى الحج و العمرة )
المسجد الأقصى(شوق و حنين لتحريره)
المساجد القديمة و الآثار الإسلامية ..بتفكرنى بعصر النهضة الإسلامية


10-أجمل مدينة زرتها داخل مصر؟
أنا للأسف مزرتش مدن كتيرة في مصر لكن في اللى زرتهم
الساحل الشمالي
بلدنا ..الغربية


11- أجمل مكان طبيعي رأيته داخل مصر ؟
صور جبل سيناء (لسة مازرتوش)0
القاهرة من فوق المقطم
أي مكان فيه خضرة كتيير


12- شخصية كارتونية بتحبها
كتييييييييييير
عم دهب
بطوط
الجدة بطة
مينى
تيمون و بومبا
شلبي و وشوشنى
سيمبا
بكار


13- انوع هاتفك المحمول؟
ليه بس الإحراج ده
نوكيا 3200
ايه ماله؟؟؟مش بيقول ألو؟؟؟
انا متبعة النظرية المعمارية اللى بتقول : الشكل يتبع الوظيفة


14- سرعة بروسيسور جهازك؟
الأسئلة دي بتاعت أخويا بس في الغالب 2.1

15- حجم ذاكرة –هارد- جهازك؟
120

16- المساحة التى تشغلها المواد الاسلامية على جهازك؟
20 لكن ليه الأسئلة دي العبرة مش بالمساحة على الهارد


17- أهم هدف انت واضعه لحياتك الآن؟
إنى أكون قدوة صالحة لأولادي إن شاء الله
انى أكمل حفظ القرآن الكريم
انى اتعلم على قد ما أقدر في مجالى (الهندسة المعمارية)0


18- مواصفات فتى الأحلام بالنسبة لك؟
يااه انا كنت محددة مواصفات كتيرة لكن أنا واثقة ان ربنا هيرزقنى بحد أحسن من كل المواصفات اللى كنت محددها
و عموما في حاجات ما ينفعش اتنازل عنها إن شاء الله
1- الأخلاق - أنا آسفة انى مش بقول التدين في الأول لكن بصراحة دلوقتى فيه متدينين أخلاقهم مش قد كده-يعني يكون ابن ناس و أهله مربينه كويس
2- التدين
3- يكون عنده هدف لا يتنازل عن تحقيقه
4- يكون بيحب النجاح للآخرين زي ما بيحبه لنفسه (يعني مش منفسن هههه)0

صف ما يأتى

:

شعورك لما بتسمع كلمة مصر ؟
بحس انى ممكن أضحي بحياتى علشان هي تكون أحسن


شعورك لما بتسمع كلام عن اليهود؟
بتحفز و أشتغل أكتر علشان نكون أحسن منهم و نسترد أرضنا منهم

شعورك لما بتشوف ظابط شرطة؟
بفتكر كل النماذج اللى قابلتها في حياتى منهم و بقعد أدور على حد كويس فيهم مش بلاقى و بعدين بقول أكيد فيه منهم كويسين بردو بس أنا ما قابلتهمش لسة


شعورك لما بتشوف الكناس العجوز فى الطريق؟
بقول أين أنت يا عمر
لو كنت موجود كنت صرفتله راتب شهري و عينتله واحد يرعاه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بقول يارب يكون الجوهر زي المظهر حتى لا تكون فتنة لضعاف النفوس

احساس يراودك فى اشارة مرور مغلقة بسبب مسئول كبير؟
بجد بيبقى نفسي أقوله :
يا بيه انت بس تقعد في مكتبك المكيف دي في حد ذاتها خدمة كبيرة للوطن علشان الشعب يعرف يقضي مصالحه

و بما أن التاج علينا حق فأنا أحب أمرر التاج ده لكل المدونين اللى أعرفهم بس في كتير منهم جاوب عليه علشان كده همرره للى ما جاوبوش عليه قبل كده على حد علمى و على الله بقى ما يجاوبوش عليه هبعتلهم كل يوم تاج لغاية ما يزهقوا منى

إصرار أمل
أحمد منسي
عم أحمد رفعت
همسة قلم
أ/ محمد البنا
لو كنت أعلم

و كل تاج و انتو طيبين و على الأسئلة مجاوبين

افتح حسابك.....في بنك الطعام

شاء الله أن أجتمع بذلك الرجل في مكان عمل واحد

و شاء الله أن يتوسم في شيئا من حب التطوع للخير
و شاء الله أن فتح أمامى ذلك الباب
...............
أنا لم أدخل بعد ذلك الباب و لكن بما أنه وضع في يدي أمانة بعد الاجتماع ان أخبر كل من أتوسم فيهم الخير ...فها أنا أخبركم لأننى أتوسم فيكم الخير الكثير
............

الموضوع : بنك الطعام

.............................

لا أدري إن كان احدكم سمع عنه أم لا قبل ذلك و لكنى كنت قد سمعت عنه بالفعل قبل أن ألتقي مديري الجديد في العمل و الذي يعمل مديرا للمتطوعين في هذا المشروع الخيري الضخم ...........

فكرة المشروع :

بداية جاءت فكرة المشروع عندما كان يمشي رئيس مجلس إدارة المشروع في إحدى المناطق العشوائية ووجد امرأة تحمل طفلا رضيعا تبحث في القمامة ثم وجدت شيئا فأخذته من القمامة ثم وضعته في فم الطفل ..........(لا حول و لا قوة إلا بالله هذا يحدث في مصر ) فقرر أن يبدأ مشروعا خيريا يساعد هؤلاء الذين لا يجدون الطعام ...هؤلاء الذين يمرضون لانهم لا يجدون ما يقتاتوا به ..وبعد البحث وجد أنهم كثيرون في بلادنا

الهدف من المشروع:

القضاء على الجوع في مصر سنة 2025

آلية المشروع :

جمعية خيرية هدفها توفيروتوصيل الطعام للأيتام و كبار السن و الأرامل و الأسر المحتاجة و الأشخاص الغير قادرين علي العمل و الكسب تقوم فكرة بنك الطعام علي تلقي التبرعات النقدية و العينية و الأغدية غير المستغلة والفائضة عن طريق جمعها من مختلف الشركات و الهيئات و المؤسسات و الافراد والاستفادة منها في توفير الطعام بصفة دورية للمحتاج الحقيقي -

وقد أنجز المشروع العديد من الإنجازات منها :0

- يقوم "بنك الطعام "بتوزيع الأطعمة الطازجة علي دور الأيتام والمستشفيات الحكومية مثل الألبان والمربات و العصائرو البيض و الفواكه والخضروات ......الخ

- يقوم "بنك الطعام " بإطعام عدد من الأسر بصفة منتظمة شهرياً في الوقت الحالي بالطعام الجاف الرئيسي و المخطط زيادة العدد 200 ألف أسرة سنوياً (مليون مواطن) بتكلفة تزيد عن 240 مليون جنية خلال الفترة القادم وذلك عن طريق زيادة الموارد المتوقعة للبنك

- يقوم "بنك الطعام "بدوره القومي حال حدوث الكوارث لا قدر الله حيث قمنا بتوزيع 38 الف وجبة بميناء سفاجا لأهالي المصابين في كارثة غرق العبارة السلام 98

- يقوم "بنك الطعام "برعاية الإحتفال السنوي بيوم اليتيم حيث يتكفل البنك بكافة الوجبات المطلوبة لعدد 60 ألف طفل بالقاهرة والجيزة والمحافظات الأخري سواء كانت جافة أو ساخنة كما تكفل البنك أيضا بتجهيز البوفيه الخاص بحفل الزفاف الجماعي وساهم البنك في المؤتمر التحضيري ليوم اليتيم العربي الذي أقيم بجامعة الدول العربية

- قام و مازال "بنك الطعام " بنشر ثقافة إستغلال الأطعمة السليمة بالفنادق الكبري ( إداره الفنادق و اصحاب المناسبات ) و قد تم توزيعها كالتالي :

- "بنك الطعام" سن سنة حسنة في تحويل شريعة الأضحية الي مشروع حضاري منظم لأول مرة في مصر.

حيث تبني هذا المشروع الحضاري بالاشتراك مع المصرف المتحد بعد دراسة نمط توزيع لحوم الآضاحي في جمهورية مصر العربية والذي يتسم بعدم الوصول إلي كثير من المستحقين الحقيقيين ونسبة كبيرة من العشوائية؛ فيصل في بعض الأحيان إلي الأسرة الواحدة أكثر من كيس من اللحم وبعض الأسر لايصلها اللحم منذ سنوات في حين أن بنك الطعام المصري لديه الكثير من الحالات المدروسة في جميع أنحاء الجمهورية.

و يفخر "بنك الطعام" بأنه قد وصل إلي كثير من الأسر المستحقة في قري ومحافظات لايصل إليها أحد و قد تم توزيع اللحوم المجمدة علي 160 جمعية علي مستوي 25 محافظة. و بشكل منظم وحضاري وفي وقت قياسي وفي سيارات تجميد و تبريد لضمان الصلاحية.

- لأول مرة في مصر قام "بنك الطعام" بإستخدام نسبة من لحوم الآضاحي في تصنيع معلبات مطبوحة (خضار بالحم جاهز للأكل)و بصلاحية تمتد إلي عام و بالتالي نستطيع أن نوفر للأسر المستحقة وجبة من اللحوم بشكل شهري وليس مرة واحدة في العام ( خطوة في طريق العمل الجماعي المنظم لصورة الأضحية )

- إمتداد لهذه الفكرة يقوم "بنك الطعام" بذبح الكفارات و النذور و الفدو و الصدقات بالنيابة عن الأفراد و القيام بتوزيعها علي المحتاجين الحقيقيين.

احتياجات المشروع :

(1) تبرعات عينية (مادية أو وجبات )

(2) نحتاج لك سفيراً للخير

(3)نشر أهداف و فكرة عمل "بنك الطعام"

(4)نشر ثقافة إستغلال الأطعمة السليمة

(5)نشر الوعى لدى الأفراد عن كيفية التعامل مع الأطعمة و توزيعها للمحتاجين مباشراً من المنازل

(6)المعاونة فى تعبئة الشنط الشهرية

(7)تولى مسئولية "قائد فريق" و إستقدام و تدريب و متابعة المتطوعين

(8)المعاونة فى "مركز تلقى الإستفسارات ( الذى سيتم إستحداثه )

(9)المعاونة فى تقديم فكرة "بنك الطعام" خلال المناسابات التى يقيمها البنك

(10)المعاونة فى الإستعلام عن مستحقين الدعم طبقاً للطلبات الواردة منهم

(11)توصيل الشنط الشهرية

(12)إحياء مبادىء و قيم تكافل المجتمع و تكامله

و لمعلومات أكثر يمكنكم الدخول على موقع بنك الطعام
www.egyptianfoodbank.com

و للاستفسار عن كيفية المشاركة و التطوع في المشروع يمكنكم إرسال ايميل لى برغبتكم في المشاركة حتى أرسل لكم استمارة التطوع عن طريق هذا الايميل

we_must_b@hotmail.com

آسفة للإطالة و لكن للأهمية و يسعدنى تفاعلكم مع الفكرة و نشرها ولنحتسب جميعا الثواب عند الله

ملحوظة : هذا المشروع ليس قاصرا على دين أو عرق أو جماعة فهو عبارة عن دعوة إنسانية للقضاء على الجوع في
مصر

ملحوظة تانية (آسفة لكن من التعليقات ظهرلى شئ ....يمكن أنا ما عرفتش أعبرعنه كويس في التدوينة لكن في حاجة مهمة) :

طبعا التبرعات العينية أو المادية شئ مهم جدا للبنك و طبعا دي من مصارف الزكاة يعني لو حد يعرف رجل أعمال ممكن يدله على الباب ده .....لكن السبب اللى أنا أصلا ناشرة الفكرة علشانه هو إن البنك محتاج للمتطوعين جدا و خاصة في تعبئة الشنط الشهرية و ده طبعا كويس علشان الشباب اللى زينا اللى ميقدروش يدفعوا مبالغ كبيرة و في نفس الوقت عايزين يزكوا عن صحتهم ......فجزاكم الله خيرا نشر الفكرة بين الشباب لعل الله يجعلها في ميزان حسناتنا جميعا ...

و زي ما قلتلكوا استمارة التطوع عندي لكن مش عارفة احملها فاللى عاوزها يبعتلى ايميل بس و انا هبعتهاله...جزاكم الله خيرا