إنها الجنة فهل من مشمر؟؟

نفسي أعمل عمل كويس يفيد الأمة
و أول ما أعمله أموت شهيدة في سبيل الله
و أكون أتميت حفظ القرآن الكريم
و بعد ما أموت
أقابل الرسول صلى الله عليه و سلم
و أنزل على يده الشريفة أقبلها و أكلمه
و أقوله "يا جدي يا حبيبى يا رسول الله ...أتعبتنا الدنيا كثيرا فهل تشفع لنا كي ندخل الجنة"؟؟
و يأتى يوم القيامة
و يقال لأصحاب القرآن -بس أصحابه بجد الذين يقيمون حدوده و حروفه مش حروفه فقط - و أتمنى أن أكون منهم فيقال اقرأ و ارق و رتل كما كنت ترتل في الدنيا فإن منزلتك عند آخر آية تقرؤها
فأقرأ و أقرأ و أقرأ حتى أصل لسورة الناس فأجد يد النبي الكريمة تأخذ بيدي و تدخلنى الفردوس الأعلى ثم أجد هناك كل أحبتى و اخوانى في الله
بابا و ماما و اخواتى
صديقات القرآن
صديقات الدراسة
أخواتى في المدونات
كل أحبتى في الله
و اتمشى مع رسول الله صلى الله عليه و سلم في الجنة
و يورينى قصري في الجنة و يكون بجواره صلى الله عليه و سلم
و يفرجنى قصور الصحابة اللى هما جيراني
ده قصر سيدنا أبو بكر الصديق....الله ياله من قصر جميل ....صحيح قصر يليق بصديق رسول الله
ده قصر سيدنا عمر رضى الله عنه....ايوه و دي الجارية اللى كانت بتتوضأ و الرسول أزاح وجهه عنها لما علم ان ده قصر سيدنا عمر لأنه رجل يغار...أمنك يغار يا رسول الله ؟؟!!
و ده قصر سيدنا بلال
و ده قصر السيدة مريم العذراء ...ما شاء الله على النور
و ده قصر السيده فاطمة الزهراء رضى الله عنها
كل الصحابة جيرانى
كل الضياء أمامي
كل النعيم في يدي
وأقف متأملة ....و أسأل نفسي......ماذا فعلت في الدنيا كي يجازينى الله كل هذا الخير الذي لم تره عيناي من قبل
و لم تسمعه أذناي من قبل
و لم يخطر على قلبي من قبل
فهل وصلت الرسالة؟؟؟

حدثنا ‏ ‏عبد الله بن عبد الرحمن ‏ ‏أخبرنا ‏ ‏يزيد بن هارون ‏ ‏أخبرنا ‏ ‏همام ‏ ‏حدثنا ‏ ‏زيد بن أسلم ‏ ‏عن ‏ ‏عطاء بن يسار ‏ ‏عن ‏ ‏عبادة بن الصامت

أن رسول الله ‏ ‏صلى الله عليه وسلم ‏ ‏ ‏ ‏قال :
" في الجنة مائة درجة ما بين كل درجتين كما بين الأرض والسماء والفردوس أعلاها درجة ومنها تفجر أنهار الجنة الأربعة ومن فوقها يكون العرش فإذا سألتم الله فسلوه الفردوس"
صدق رسول الله صلى الله عليه و سلم

رواه الترمذي

رمضان السنة دي

‏عن ‏ ‏أبي هريرة ‏ ‏رضي الله عنه ‏
أن رسول الله ‏ ‏صلى الله عليه وسلم ‏ ‏قال
‏ ‏ "إذا جاء رمضان فتحت أبواب الجنة وغلقت أبواب النار ‏ ‏وصفدت ‏ ‏الشياطين"0
صدق رسول الله صلى الله عليه و سلم
رواه مسلم

رمضان

ذلك الضيف العزيز

ننتظره من العام للعام

يأتينا محملا بالنفحات و البركات و المغفرة و الرحمة من ربنا

فينهل السعداء منا كل قدر استطاعته و قدر همته

منا من تستيقظ همته من أول يوم و ساعة

و منا من لا يستيقظ إلا في العشر الأواخر

و التعساء منا

من يأتى عليهم رمضان فلا ينالون منه إلا الجوع و العطش

و ها قد جاء رمضان هذا العام علينا

نشتم رائحة الجنة من خلاله حتى نعمل لها

و ها نحن نسمع أبواب الجنة تفتح

و أبواب النار تغلق

و السلاسل تأتى كي تقيد الشياطين

أخيرا سنتخلص من الشيطان لشهر كامل

فهل نستطيع اغتنام الفرصة؟؟؟؟

و هل تعلو همتنا في الشهر الكريم كي نلحق الركب السائر نحو الجنة؟؟؟

فيارب أعل همتنا و خلصنا من بقايا الشياطين و مما تركته فينا قبل أن تصفد

فنحن نعلم جيدا أن الشيطان يعلم أنه مصفد لشهر كامل فترك لكل واحد منا ما يشغله عن العبادة في رمضان

و لكنك قلت و قولك الحق

بسم الله الرحمن الرحيم

" إن كيد الشيطان كان ضعيفا"

صدق الله العظيم

و حتى تعلو همتنا في رمضان لابد لنا من عزم و تخطيط

أما العزم فهو نيتنا الخالصة أن نعبدك كما لم نعبدك من قبل

و أما التخطيط فهو جدول نخططه كي يعيننا على أنفسنا حين الضعف و كي يحدد لنا الهدف

أجل

فكل رمضان له هدف

لأننا نعلم جيدا أن رمضان هو تدريب لنا و إصلاح لنفوسنا التى خربتها الدنيا

و لهذا السبب سأعرض عليكم جدولا مقترحا لتنظيم العبادة في رمضان

سوف نعلقه في غرفتنا

و نكتب علي رأسه هدفنا من رمضان هذا العام

فمنا من سيكتب أن هدفه هذا العام أن يخرج من رمضان و قد شربت روحه قيام اليل و لن يستطيع النوم بعد رمضان قبل أن يركع لله و لو ركعتين قيام

و منا من سيجعل هدفه هو بر الوالدين ...و سيقول لنفسه " إن استطعت ألا أغضب والدي منى طوال الشهر فسوف أكون بهذا حققت الهدف و شربته روحى لطوال العام"

و منا من سيجعل هدفه صلة الرحم فسوف يصل رحمه و خاصة هؤلاء الذين لا يراهم إلا من العام للعام أو ربما لا يراهم من الأصل

و هكذا و هكذا سوف يحدد كل منا هدفه

بالطبع لن نهمل باقى العبادات و لكن سنجعل التركيز الأكبر في الهدف

و الجدول في الصور القادمة

ملحوظات على الجدول:

1- لصعوبة تنزيل الجدول كملفword قمت بنزيله على هيئة صور و حتى ينسخه كل منا بطريقته و بيده على الورقة التى سوف نعلقها في غرفتنا.

2- يمكن إزالة أي من الخانات لأنه بالطبع لا يكلف الله نفسا إلا وسعها فمن يرى انه لن يستطيع فعل كل هذه الأعمال له أن يلغي ما يراه صعبا أو زائدا.

3- بالنسبة لخانة نوع الصيام لمن لا يعرفها : فالصيام ثلاثة أنواع:

(1) صيام العوام : و هو صيام الجوع و العطش فقط.

(2) صيام الخواص : و هو صيام الجوارح أي العين صائمة عن النظر الحرام و الأذن صائمة عن سماع الحرام و اللسان صائم عن قول الحرام و النميمة و الغيبة و اليد صائمة عن فعل الحرام و الأرجل صائمة عن الذهاب للحرام و بالطبع البطن صائمة عن الأكل و الشرب.

(3) صيام خواص الخواص : هو صيام القلب عن كل ما يشغل النفس إلا الله فهو يذهب للعمل و لكنه في معية الله و هو نوع ليس بالسهل و لكن إن استطاع أحدنا أن يقوم به و لو ليوم واحد كان له بمثابة عيد...

4- بالنسبة لخانة صلة الرحم هي أسبوعية لأنه من الصعب أن يفعلها المرء يوميا و لكن من قدره الله على ذلك فجزاه الله كل الخير..

5- مدى نجاحنا في الجدول يتوقف على المداومة طوال رمضان و على الاستمرارية في هدفنا بعد رمضان و ثباتنا عليه فهل من مشمر للتغيير و لعبادة الله على بصيرة بتخطيط و تركيز و همة ؟؟

جزاكم الله خيرا نشر الفكرة على المدونات إذا أعجبتكم و بالطبع من له تعليق أو تعديل فسوف يسعدنا استقباله في التعليقات

و أخيرا

كل عام و أنتم إلى الله أقرب

و على طاعته أدوم

و لحب الخير أسبق

و للجنة أرغب

اللهم اجعل رمضان هذا العام فتحا للأمة يارب العالمين

ملحوظة: هذا البوست تعاون مشترك بين أصحاب المدونات التالية

قضية عم أحمد

الحلم العربي

إلى من أتمنى أن أكون من أصحابه

منذ نشأت و أنا أعرفك

سمعت عنك كثيرا

أحببتك رغم صغري و قبل أن أعرف معني الحب

كنت بمجرد أن أسمعك

أريد أن أسمعك و لا أسمع غيرك

هم ساعدونى على ذلك كثيرا

نعم ....كانوا يحبونك أيضا

كانوا يقولون عنك و منك الكثير

و كنت أسمعهم

و كبرت

و عندما كبرت ووعيت

و علمت كيف الحب

أحببت أكثر و أكثر

أردت أن أعرفك أكثر و أكثر

أردت أن أكون أقرب

و عندما أردت

بل عندما أراد الله أن يجمعنا بهذا القرب

و سهل لي أجواء القرب منك

ذهبت و أنا خائفة

كنت أقول لنفسي "نعم أعرفه منذ صغري و لكن هل أنا حقا أعرفه"

و عرفتك منهم ...أشخاص آخرون غير الذين كانوا بالقبل

و لكنهم أعلمونى عنك الكثير

الكل يراك من وجهة مختلفة

و الكل لا يزال يريد أن يعرف عنك الكثير

و مهما عرفوا لن يستطيعوا أن يعوا كل الحقيقة

والحقيقة انك لا تنضب

لا تنفد

و جلست اليك و سمعتك بصوتى

بل إننى سمعت نفسي بصوتك

و اعتقدت و قتها أننى من أصحابك

ومشيت وسط الناس أزهو و إن حاولت إظهار العكس

و لكن الحقيقة أننى كنت أزهو بذلك

و كيف لا و أنت من أنت

و كيف لا و من يعرفك ينال ما ينال من ذلك الشرف

ثم بعدت

لا أدري كيف بعدت

و لا كيف استطاعت نفسي أن تبعد

و ماذا حدث للشوق الذي كان يعترينى لأن أذهب و أكون معك

مدة من الزمن

أو زمن من العمر

لا أدري كم

و لا كيف

و لكنه قد حدث بالفعل

كنت فقط أكتفى بأن أنظر إليك كل يوم

أسمع منك القليل

و يسمع قلبي أقل

و ذات يوم ذهبت

ذهبت لهؤلاء الذين يعرفونك بحق

أصحابك الحقيقيين

كنت أعتقد أننى منهم

و لكن

عندما جلست إليهم و سمعتك بصوتهم

و عرفت كيف يعرفونك

و سمعت كيف يفهمونك

أدركت

أننى ما كنت تلك يوما

أدركت أننى اكتفيت منك بالقليل

بالرغم من أنك تحوي الكثير و الكثير و الكثير

و منذ وقتها علمت

أن أصحابك

لا يفارقونك أبدا

و لا حتى لتلك المدة التى تركتك فيها

أعدك

بل أعد نفسي

ألا أحرمها منك ثانية

ألا أتركك ثانية

فأنت منهاجي

و حياتي

و بدونك

حياتي سراب ووهم

فهل تقبلنى من أصحابك

و هل يوما أستطيع

أن كون من أهلك

أتمنى

بل أذوب شوقا لذلك

و يقينى في ربي أنه يوما سيمنحنى القدرة و القوة على أن أكون

فاشفع لي عند ربي أن أكون

كما يريد ربي و كما قال الرسول

عن أنس رضي الله عنه

أن رسول الله صلى الله عليه وسلم قال:

" إن لله أهلين من الناس "

قيل: من هم يا رسول الله ؟

قال: " أهل القرآن هم أهل الله وخاصته "

رواه النسائي وصححه الألباني

عن عبد الله بن عمر رضي الله عنهما قال:

قال رسول الله صلى الله عليه وسلم:

" يقال لصاحب القرآن :

اقرأ وارتق ورتل كما كنت ترتل في الدنيا

فإن منزلتك عند آخر آية تقرؤها "

رواه الترمذي وأبوداود والنسائي

وأحمد والحاكم وابن حبان

و قال رسول الله صلى الله عليه و سلم

" الماهر بالقرآن مع السفرة الكرام البررة ، و الذي يقرأ القرآن ويتتتع فيه و هو عليه شاق له أجران"

وقال رسول الله صلى الله عليه و سلم

" خيركم من تعلم القرآن و علمه"

صدق رسول الله صلى الله عليه و سلم

ألا يكفى ذلك كي تعلمون من هو؟؟؟

خنقتيني

بحب النور
لأن النور بيهديني
و أكره عتمة الضلمة في عز الليل تغطينى
أقولك حاجة يا دنيا
و من قلبي : خنقتيني

اللهم بلغنا رمضان

كنت بتصفح موقع الأستاذ عمرو خالد و لقيت الموضوع ده ....يا ريت كلنا نحاول نعمل الفكرة دي لغاية رمضان ما يبدأ
عايزين تعرفوا الفكرة ...
ادخلوا على اللينك

اقترب رمضان فهل أنتم مستعدون؟؟

إلى حلمي الذي لم يأت بعد........؛

لن أنتظرك
و لن أكون لغيرك

لن أنتظرك كي أحقق أحلامي الأخري
لأن الحياة قصيرة كما تعلم

و لن أكون لغيرك
لأنى - كما تعلم - لا أتنازل عن أحلامي بسهولة
و لن أستطيع

بين توظيف الموهبة....... والاغترار بها

صلاح جاهين:0

موهبة فذة ...كنت لوقت قريب احترمها جدا بل و اعتبره من هؤلاء القلائل الذين جاد بهم الزمان ... ليس في موهبة الرباعيات و الكتابة فقط ...و لكن في الفكر و الآراء عامة و في كل شئ

إلى أن سمعت عن الخلاف الذي كان قد حدث بينه و بين الشيخ الغزالى رحمه الله و كيف كان الخلاف على شئ جوهري في الدين و هو الحجاب الإسلامى و كيف كانت طريقة صلاح جاهين في نقد الشيخ بالكاريكاتير لاذعة غير متناسبة مع قدر الشيخ الغزالى رحمه الله .....وقتها سألت نفسي .....هل تعطيه موهبته التى أعترف بها الحق في أن يسلطها بذلك الشكل على رمز من رموز الدين في ذلك الوقت؟؟؟؟؟؟؟

أسامة أنور عكاشة:0

لم و لن أنسي تلك المسلسلات التى أعتبر نفسي كنت مبهورة بها ....الشهد و الدموع - ليالى الحلمية بأجزاءه الخمسة - ضمير أبلة حكمت - الحب و أشياء أخرى - أرابيسك - امرأ

ة من زمن الحب - .....و جميع اعماله التى كنت و لا زلت أتابعها بشغف و ارفع القبعة لها من فرط الاعجاب بامتلاك كاتبها لأدواته دون أن يخرجنا عن النص أو يجنح بنا بعيدا عن إطار الفكرة بشكل متناغم جميل.....

ثم تأتينى الصدمة :0

تصريح لأستاذ أسامة أنور عكاشة بأن حجاب الفنانات ما هو إلا مؤامرة مقصود بها تفريغ الفن من محتواه، وتحويله إلى "وهابي"، وعودة هؤلاء المعتزلات هو تنفيذ لمخطط خليجي الغرض

منه تقديم أعمال درامية مصرية دون المستوى
،

و كثير من المواهب و الشخصيات ذوي الأفكار المتميزة

و الموهوبة ...تتغير نظرتنا لهم فجأة عندما نسمع بعض أفكارهم المختلفة عن المألوف
و حتى لا أتجنى على أحد فاختلاف الآراء بطبيعة الحال لا يفسد للود قضية كما يقولون ...و لكن أي اختلاف آراء ؟؟؟؟ أتكون الثورة على ثوابت الدين و الحياة مجرد اختلاف في الآراء ؟؟؟ أم أن الموهبة و العقل المتقد يعطي صاحبه الحق في التحليق بعيدا عن السرب بل و أن يصنع سربا جديدا يفتح الباب لأن يحلق ورائه من لا يمتلكون موهبته و المبهورون بها و من اختلطت عليهم الأفكار ...و من لا يستطيعون التفريق بين الاعجاب و التبعية...
و فيم نعمل العقل و الموهبة ؟؟؟؟
أفي كل شئ نستطيع أن نقحم أفكارنا ؟؟؟
أفي أمور الدين أيضا؟؟؟
بالطبع لا
فالله سبحانه و تعالى أعطانا المواهب و التفكير و العقل كي نتفكر و نهتدي إلى الطريق الصحيح ...و لكن أنى عرفنا ذلك الطريق و اتبعناه فليس لنا الحكم في شئ قد حكم الله فيه ... و كيف يعطي الإنسان لنفسه الحق في أن يكون له الخيرة بعد أن قضى الله و رسوله أتكون مظلة التنوير أو الإصلاح أو الانفتاح أو كما يسمون أكبر و أقرب للإنسان أم مظلة الدين الذي خلقنا من أجله و من أجل إعلاءه و لأجله سوف نحاسب بعد الموت

تأملت حينا ...هل يفرح الإنسان بالموهبة عندما يكتشفها في نفسه أم يدعو الله ألا تكون نقمة عليه...وكيف يقيس الإنسان موهبته أكانت نعمة أو نقمة؟؟؟ أعتقد أن المقياس الحقيقي هو الدين
فمهما حاول البعض التمرد و الانفتاح يأتينا شرع الله دائما بالفائدة القصوى للمجتمع...
و لكل من تغره موهبته أو يتخيل أن تفكيره و عقله أرجح من ثوابتنا أقول : لا تجعل شكر النعمة تمردا على شرع من وهبك إياها فالله سبحانه و تعالى أعطانا العقل كي نهتدي به لا كي نضل و نضل من لا يمتلكون ثقافتنا...و الله سبحانه و تعالى خلقنا و هو أعلم بنا و بما يصلحنا و قد أنزله سبحانه في كتابه و في سنة حبيبه صلى الله عليه و سلم فلنبحث عن الإصلاح الحقيقي في أمورنا خير من أن نضيع حياتنا في التفكير في أشياء أراحنا الله من عناء التفكير فيها و قضي فيها من فوق سبع سماوات

بسم الله الرحمن الرحيم
" وماكان لمؤمنٍ ولامؤمنةٍ إذا قضى الله ورسوله أمراً أن يكون لهم الخيرة من أمرهم ومن يعص الله ورسوله فقد ضل ضلالاً مبيناً "
صدق الله العظيم

ملحوظة: ذكر بعض الأسماء لم يكن المقصود به التجريح أو النقد بأي شكل من الأشكال و لكنى أردت أن أوضح الفكرة بالأمثلة و أناقش الأفكار مع كامل احترامي لهم و لأعمالهم التى ساهمت في تشكيل مجتمعنا في الوقت االحالي..

زازووو... في الفضاء الالكترونى

لولا حالة الحزن اللى تخيم على من الأمس لكانت انطباعاتى أكثر فرحا من ذلك
و لكنها الحياة كعادتها
دائما يختلط فيها طعم الحزن مع الفرح و الألم مع السعادة و البكاء مع الضحك

أما عن الخبر الذي خفف من حالة الحزن فهو
دخول اختى عالم التدوين
حياة زازووو....كما اختارت لمدونتها عنوانا
بالطبع لم افرح لمجرد ان اختى دخلت عالم التدوين
و لكن
لأن ذلك جاء بعد إلحاح منى عليها بذلك
فأنا أرى ان كلماتها تستحق ان تقرأ
و إن كنت ادعي حب الكتابة
فقراءة كتابات أختى متعة حقيقية بالنسبة لى

هي أختى الكبرى
دكتورة ....بيقولوا
جراحة ....و هي فعلا كذلك ....في الحق
منذ صغري..... و كما يفعل الأخوة الصغار دائما...يتخذون من أخواتهم الكبار قدوة...فقد كانت و مازالت لي قدوة ...و إن اختلفنا في بعض الأشياء
و لكنى دائما أحمل لها قدرا كبيرا من العرفان
فلولاها ما كنت أحببت القراءة
و لولاها ما كانت تشكلت أحلامى بذلك الشكل

انا هوجع دماغكوا بالكلام عنها ليه؟؟؟؟؟؟؟؟؟؟
ادخلوا مدونتها و انتوا تعرفوها

http://zazooo-life.blogspot.com/

و ما تنسوش تقولولي رأيكو

سلام

إنا لله و إنا إليه راجعون

تلقيت صباحا من صديقتى المدونة هوندا خبر وفاة مدونة زميلة لم أكن أعرفها و لكنى عندما دخلت مدونتها و كأنى عرفتها ...و كأنى عانيت معها ما عانت من المرض ....
حزنت كثيرا لوفاتها ....رحمها الله
و اكتب لكم هذه التدوينة حتى ندعول لها جميعا بالرحمة و بأن يسكنها الله الفردوس الأعلى من الجنة و يلهم أهلها الصبر و السلوان....
و حتى نتعظ جميعا من الموت ....حقا ... كفى بالموت واعظا
اللهم ارحم اختنا شيماء و اجعل قبرها روضة من رياض الجنة
اللهم اسكنها الفردوس الأعلى من الجنة
آميييييييين

عنوان مدونة شيماء رحمها الله
http://shikoonline.blogspot.com/
اقرأو الشات بوكس ستجدوا الخبر من أخوها يبلغ بوفاتها

و لا تنسوا الدعاء لها يسر الله لنا من يدعو لنا عند الموت

لعنة الأوتوكاد

هل تعلم أن حياتك مثل برنامج أتوكاد

إذا أردت أن تفتح صفحة جديدة في حياتك اضغط
file / new
إذا أردت أن تستعيد الماضي اضغط
file / open
و شاهد الماضي
إذا أردت أن تري الصورة بشكل عام اضغط
zoom /all
أما إذا اردت أن تري تفاصيل الحياة بوضوح اضغط
zoom /window
أراك تريد أن ترى الحياة من كل الاتجاهات فلتضغط
3d orbit
هل تاملت يوما تلك الحياة بطبقاتها ؟؟
الاوتوكاد أيضا يحمل الطبقات ذات الألوان و الأشكال المختلفة تماما مثل الحياة
فقط عليك ان تضغط
format / layers
تريد أن تقيم أحلامك و تقيسها ؟؟
فما وحدة القياس التى تريد ؟؟؟
هل تعلم انك تمتلك الكثير منها تحت يديك في هذا البرنامج
فقط افعلها و اضغط
dimensions
لتجد العديد من الاختيارات

الناس تماما مثل أوامر الاوتوكاد
فستجد منهم من يشبه أمر ال
move
متحرك دائما ...يعمل و لا يكل ...و لكن قليلا ما يعمل هذا الأمر في حياتنا تري لم؟؟!!!0
منهم من هو مثل ال
rotate
يأخذ حاجته منك ثم يستدير ليبحث عن آخرين لينال منهم البعض
أما ال
mirror
ستجده و لكن قليلا في حياتك فهذا هو الصاحب الذي هو مرآتك ...يكشف لك عما بداخلك يصارحك
يصدقك فصديقك كما تعلم من صدقك لا من صدَقك
trim
اقطع به العضو الذي لابد من بتره حتى يصح البدن كله
أما
extend
فصل به من وصلك .... ومن قطعك إن لزم الأمر
explod
ستحتاجه كثيرا عندما تريد أن تنفجر و تفجر كل ما حولك من سلبيات
أما
scale
ستحتاجه عندما تريد ان تعرف حجمك مقارنة بأحجام الآخرين
انعش حياتك...... فقط اضغط
REGEN

أخطأت كثيرا في الطريق عليك ب
undo


و لكن تبا للاوتوكاد فالحياة لا تحمل ال

UNDOOOOOO

فضفضات ....و إيمان....بحبك وحشتينى

فضفضات

مش مصدقة نفسي انى بقالى أكتر من أسبوع ما كتبتش ....مستغرباني أوي
طبعا أنا زهقتكوا من الكلام عن نفسي اللى مبحبوش ...بس لازم أفضفض علشان ما اطقش و كمان لازم أشكركم كلكوا على مشاعركم الجميلة و نصائحكم الأجمل ....طول مانا قاعدة في الشغل بحاول افتكر كلامكوا و تشجيعكوا ليه ...صحيح ماما و اصحابي و كل اللى حوالية حاولوا يشجعونى لكن علاقة المدونين ليها طعم مختلف

كان نفسي اطمنكوا و اقول لكو انى بقيت بنام كويس و مواعيدى اتنظمت و كله بقى تمام ....لكن للأسف مفيش حاجة من دي حصلت

الحمد لله خلصت جزء كبير من الشغل اللى كنت بعمله في البيت و اطحنت فيه ...و طبقت فيه كام يوم من غير نوم أو بساعات نوم قليلة و كنت بروح الشغل مش قادرة ...لكن البركة في النسكافيه ...صحيح مضر لكن مجبر أخاك لا بطل

اليومين اللى فاتوا كانوا غريبين ...ماما و بابا و اخواتى سابونى و راحو بيتنا الجديد و انا كنت مضطرة اقعد لوحدي مع اخويا اللى عنده مشواير كتير و مش بيرجع غير بالليل اوي ....و اكتشفت انى لغاية دلوقتى مش بعرف انام لوحدي ...ههههههه..أه و الله ...مع انى كنت هموت من التعب و نفسي انام لكن كل ما عينى تروح في النوم اصحى مفزوعة ...كل ما اقول لحد يضحك عليه و يقولولى انتى لسة عيلة ...الظاهر ان عندهم حق

مواعيد الشغل الجديدة خلتنى بقالى 3 أسابيع ما رحتش معهد تحفيط القرآن و لغاية دلوقتى معرفش عملوا ايه ....ادعولى اعرف اكمل معاهم و ربنا يقدرنى اعرف اوفق بين الحفظ و الشغل لأنى الفترة اللى فاتت فاتنى كتير اوي و مستوايا بقى وحش بعد ما كنت خلاص قربت اكون معلمة لأن مديرة المعهد كانت هتديلى فصل جزء عم أدرس لهم ....خايفة يكون ده من ذنوبي .....ادعولى ربنا يغفر لى ....و انجح في الاختبار الصعب ده.....و ربنا يخلص نوايانا جميعا

اللهم إنا نعوذ بك من السلب بعد العطاء

أما بقى عن الشغل الجديد فحدث و لا حرج
كل يوم فيه جديد
نفسيتى ...حبة فوق ...و حبة تحت

بتفرق معايا الناس أوي....و هي دي مشكلتى
أنا عارفة ان مشكلتى انى عشرية شويتين و مش عارفة أتأقلم مع فكرة انى خلاص سبت الناس اللى في الشغل القديم و المفروض آخد على الناس الجديدة ....و بحاول فعلا ....اتصاحبت عليهم و بقينا بناكل و بنصلى مع بعض و بنغلس على بعض أحيانا ...لكن لسة في دماغى (وما الحب إلا للحبيب الأول)ههههههههه
خصوصا انهم جادين شوية ...يعني في الشغل القديم كان فيه حالة من المرح الدائم ....و التجديد المستمر ...ناس داخلة و ناس طالعة ....بتوع الحسابات بيتخانقوا مع الشئون القانونية ....و المدير بيتخانق مع الأوفيس بوي و كمان شوية كلنا قاعدين نهزرمع بعض ....اجتماعات بنقعد فيها نتكلم عن نرتب هنروح الرحلة الجاية فين .....هههههه و وشوية حد فينا عمل مشكلة صغيرة مع صاحب الشركة....و هكذا و هكذا
أما الآن ...الناس كلها قاعدة مركزة في الكمبيوترات ....ممكن تعدي ساعات كاملة ما تسمعش فيها كلمة لحد بالرغم من ان العدد كبير ...لكن الكل مركز و بيشتغل ...طبعا ده كويس للخبرة و الحاجات دي ....لكن بردو جو المرح بيعطي دفعة كويسة للعمل

المهم ...بالطبع انا دوشتكوا و صدعتكوا ....كان نفسي اتكلم عن إيمان صاحبتى اللى كنت بقالى 4 سنين ماشفتهاش و قابلتها امبارح لكن تدوينة تانية إن شاء الله

الدعاااااااااء جزاكم الله خيرا


ملحوظة:رمضان قرب أوي يا جماعة اوصيكم بالاستعداد له علشان ما يجيش و يعدي من غير ما ناخد بالنا خلوها في لسانكم على طول
اللهم بلغنا رمضان
اللهم بلغنا رمضان
اللهم بلغنا رمضان

تعب كلها الحياة

أول ما عملت مدونة كنت مبسوطة جدا ...كان بيتهيألى انى مش ممكن ييجي عليه يوم و ما ادخلش عليها و اشوف اللى فيها مهما كنت مشغولة و لما تابعت مدونات ناس كتير كانت اكتر حاجة بتضايقنى انى اشوف حد بيسيب مدونته بالكام يوم من غير ما يدخل عليها ...كنت بحس زي اللى بيسيب زرعة صغيرة من غير مية لمدة كبيرة و ما كنتش أعرف إنى في يوم هكون زيهم ....لكن غصب عني

ايوة غصب عني........حاجات كتير بتحصل لي اليومين دول:
0 *رحت شغل جديد و سبت الشغل القديم اللى كنت مرتبطة بيه جدا ....كان نفسي أكمل التدوينة اللى ابتديتها و كنت بحكي فيها عن أثر كل واحد منهم في نفسي لكن مش فاضية ....غصب عني
من الأسبوع اللى فات و أنا في الشغل الجديد ....بتعب جدا ...كأنى أول مرة أشتغل ...كل يوم أروح أنام لغاية تانى يوم و أجازة يوم الجمعة مش بتكفينى طبعا لأنى قبل كده كنت باخد يوم السبت كمان دلوقتى يوم واحد و بيعدي هوا

نفسي أحكيلكوا عن حالتى النفسية اللى بتتأثر بكل كلمة حد يقولها لى في الشغل الجديد لأنه شغل جديد عليه جدا

نفسي أحكي لكم عن الناس اللى في الشغل الجديدو نظرتى الأولية ليهم طبعا ما ينفعش أحكم على الناس من الأول و لكن عايزة أقول لكوا الانطباعات الأولى ...لكن بردو ...غصب عني

بواقى الشغل القديم لسة ما خلصتش و لسة بعمل فيها في البيت و اللى زاد كمان ان الهارد بتاع الكمبيوتر اللى في البيت بيعمل حركات ندالة و شكله كده عايز يتغير و مش عارفة اشتغل خالص ده غير انى زي ما قلتكوا .....مش فاضية أصلا

مواضيع كتير عايزة اكتبها و ناس كتير عايزة اتابع مدوناتهم لكن يا ريت يعذرونى مرحلة و تعدي إن شاء الله


اللعبة : دي مدونة لعبة بنلعبها أنا و بعض المدونين الكرام و اللى حطت بذرتها أميرة البلطجية و المفروض ان عليه الدور لكن أنا بقول لها ما تقلقيش انا هآخد دوري إن شاء الله

يا ريت تعذرونى كلكوا انى مش بتابع أوي لكن على الأقل بحاول أعرف أخبار مدوناتكوا و أقرأ حتى لو ما قدرتش أعلق عندكوا

ادعولى أوي لأن الشغل الجديد ...جدييييييييييييد جدا و غريب بالنسبة لى و نفسي أعمل فيه حاجة كويسة .....

الله المستعان

سلامو عليكوا

أه نسيت اقول لكو الصورة اللى فوق دي بتاعت سندريلا ....بمناسبة انى اليومين دول عاملة زيها في النصف الأول من الحكاية لما كانت بتكنس و تنفض و تغسل لمرات أبوها بس أنا بقى برسم و أظبط و أطبع و أعدل و أهشر و أراجع

عصرية

في آخرالزمان

يصير الكذب ....تجارة

و الإحساس ....دعارة

و المدفع في يد الطفلة ...دمية

و الدم يجري بين الكفين ......طهارة

قد أصحو يوما من غيبوبة

فأراني فأرا في مختبر أو أنبوبة

فالأحياء حقول تجارب

و أمام عيون التاريخ .....حجارة

.....................

جزء من قصيدة قرأتها منذ عدة سنوات في إحدى المجلات لشاعر مغمور

ما حرمتش ......تاج تاني

عايزة أقولكوا ان التاج اللى فات سبب ليه ضيق شديد لأنى ضايقت بيه ناس لما مررته لهم و اعتذارا لهم و لأي حد ما بيحبش التاجات ....أنا مش همررلهم التاج ده و حتى لو مررته لأي حد منهم فياريت يسامحونى و ما يجاوبوش و أنا هكون متفهمة جدا لوجهة نظرهم

ندخل بقى في التاج

انت مين ؟؟-
اسمي آية ...في ناس بتحب تدلعنى بيويا أو أيويا لكن الأظرف اللى بيدلعوني بآية بتفخيم الألف أو اللى بيقولولى أوءة لأنى بحس انهم بيذمونى مش بيدلعوني ..هههههه

بنت مسلمة عربية مصرية و انتمائي الأكثر للثلاث حاجات دول

اللى بياخدوا بالظاهر بيقولوا مهندسة و بيقولوا طيبة و هادية لكن العالمين ببواطن الأمور عارفين انى لا بفهم في الأولى و لا انا التانية و لا التالتة

مين اكتر ست اشخاص بتحبهم ؟؟؟-
انظر التاج اللى فات و انت تعرف

هل انت سعيد ؟؟ -
ما يهمنيش أكون سعيدة دلوقتى قد ما يهمنى أكون سعيدة في الآخرة علشان كده عمري ما سألت نفسي السؤال ده و لا ركزت في إجابته .....الأهم هو الرضا و أنا الحمد لله راضية جدا و بتمنى من ربنا انه يوفقنى أعرف أستغل النعم اللى أنعم عليه بيها في الخير

لو اجتمعت مع حسنى مبارك فى مكان واحد هتعمل ايه ؟ -
اتعلمت من التنمية البشرية انى لما حد يسألنى سؤال و أنا مش عايزة اجاوب عليه أرد عليه بالسؤال ده

انت بتسأل السؤال ده ليه؟؟؟؟؟

لو جاوبتني هرد على سؤالك

عموما : هغنيله أغنيه : اخترناه اخترناه....قاعدين ع المصطبة وياه

لو معايا مليون و نص اعمل ايه ؟؟؟ -
ربع مليون لبنك الطعام

ربع مليون لتزويج كام شاب من الفقراء

نصف مليون أبدأ بيه مشروع في دماغي نفسي أعمله لأطفال الشوارع

نصف مليون أفتح بيه مكتب هندسي معماري

بتحب مصر ؟؟ -
أمال يعني؟؟؟؟

طبعا بحبها

انت مسلم ؟؟ -
الحمد لله

ليه ؟؟ -
لأنى من يوم ما ابتديت أفهم رضيت بالله ربا و بالإسلام دينا و بسيدنا محمد صلى الله عليه و سلم نبيا و رسولا

مين اكتر شخصية متقدرش تستغنى عنها ؟؟؟ -
أكيد أمي ربنا يخليها و يحفظها و يبعد عنها كل مكروه

ايه اكتر موقف محرج ؟؟ -

ههههههه. كنت في الثانوية العامة و رايحة أذاكر مع واحدة صاحبتى ليلة امتحان الفيزياء ... و أنا رايحة عندها حسيت ان الجزمة واسعة على رجلى ...استغربت شوية و بعدين نسيت

المهم رحت عندها والمذاكرة خدتنا و هي قالتلى ريحي نفسك اقلعى الجزمة قلعتها عادي ....

و أنا ماشية جيت ألبسها .....مش راضية تتلبس أبدا ...و أحاول ...مفيش

عملت كل الحاجات ...لبيسة ...مفيش ....استنى شوية و آجي ألبسها تاني ....مش ممكن

المهم كان شكلى محرج جدا ...خصوصا ان اخواتها الولاد كانوا موجودين و كل شوية يعدوا علينا لأننا كان قاعدين في الرسيبشن ...و أحس انهم مش قادرين يمسكوا نفسهم من الضحك...أنا كمان قعدت أضحك زي الهبلة لأن الموقف بجد كان يفطس من الضحك ...و اللى زود الموضوع انى كلمت اخواتى في البيت علشان حد فيهم ييجي و يجيبلى واحدة تانية معاه ...مالقيتش حد من اخواتى الولاد في البيت

المهم من ستر ربنا ان أخوها كان عارف طريق بيتنا راح جابلى واحدة تانية من بيتنا لبستها و من يومها عمري عمري عمري ما أقلع جزمتى عند حد و لو حصلى ايه
ههههههههههههههههههه

الامنية اللى اتمنى تحقيقها؟؟

لو السؤأل على أمنية واحدة تبقى أكيد ان ربنا برحمته يدخلنى الفردوس الأعلى من الجنة بجوار الرسول صلى الله عليه و سلم أنا و كل من أحبهم

جينا بقى للكلام اللى بيزعل الناس مننا : همرر التاج لمين؟؟

همرره لكل الناس اللى عندي في يمين المدونة و خصوصا الناس اللى ما بيحبوش التاجات منهم (غلسة غلسة )ههههههههه

عن الصبر و الإنتظار

في وجه المصاعب .....نقف ....نتأمل ...نتحير

أحيانا تجبرنا الحياة على الصبر.....و أحيانا تجبرنا على الانتظار ....و أحيانا أخرى تجبرنا على ....الصمت

إذا أردت أن أتكلم عن الصبر هنا فأنا أكاد أجزم أنه لا يوجد على أرض الوطن العربي من لا يحفظ هذه الكلمات:0

إن الله مع الصابرين

و اصبر و ما صبرك إلا بالله

إنما يوفى الصابرون أجرهم بغير حساب

الصبر مفتاح الفرج

كلها عبارات جميلة نحفظها جيدا و مصدرها آيات القرآن الكريم و ميراث قديم من الأجداد و الأباء عن معاني الصبر المحمودة................0

و لكن هل نحن بالفعل نصبر ؟؟؟....أم ننتظر

و ما الفرق بين الصبر و الانتظار ؟

أعتقد ان مفهوم الصبر هو الصبر عند المصيبة أو البلاء ....أن ترتضي ما كتبه الله عليك و أن تحمده على البلاء كما حمدته من قبل على النعمة ...إن كنت قد فعلت

أن تبذل جهدك كي تحسن من وضعك و لكن إن لم يحالفك التوفيق فلتصبر و لترضى و لكن مع الاستمرار في العمل و البذل

هذا هو مفهوم الصبر من وجهة نظري

أما ما نفعله أو يفعله كثيرون مناهو.................. الإنتظار

أن تنتظرهم بينما تعلم انهم لن يأتوا أبدا

هؤلاء ...الذين كلما هبت رياح ذكراهم ملئت عيناك دموعا لم تمسحهما غير يداك

هؤلاء الذين نسوا ...و باعوا ...و تركوك ....و لكنك تأبى إلا أن تلعب دور الشهيد المنتظر

هؤلاء الذين أخذوا و لم يعطوا ....هؤلاء الذين وعدوك ....ثم خانوا....و لكنك دائما تلتمس الأعذار

أن تنتظرها كي تكون حياتك أفضل و كي تستقر في حياتك و كأنها امتلكت مفاتيح حياتك قبل أن تراها....تلك التى سوف يكون كلامها أعذب من صوت أمك ......تلك التى ستحبك و تبذل من أجلك كل شئ .......تلك التى ستعطيها حنانا لم تعطه من قبل لأمك التى بذلت بالفعل من أجلك كل شئ

أن تنتظريه ...ذلك الذي سيجعل لحياتك معني ...ذلك الذي سيجعلك تنظمين وقتك و تهمتين بنفسك .....ذلك الذي سيفهمك من قبل أن تتحدثي ....ذلك ال ..............الذي هو في علم الغيب

من منا ليس في حياته ذلك الشئ الذي يشل حركته و يجعله ينتظر

ينتظر لحظة الاستقرار كي يحدد حلمه و أهدافه

ينتظر رمضان كي يقرأ القرآن

ينتظر ليلة خالية البال كي يركع هاتين الركعتين في جوف الليل

ينتظر النصف الآخر كي يقلب له موازين الحياة

ينتظر ضربة الحظ التى ستجعله سعيدا طوال حياته

ينتظر الحب كي يعطي

ينتظر الأمل كي يبذل

ينتظر النهاية كي يبدأ

استوقفتنى مرة جملة سمعتها تقول :

"أصعب ما في حياة الموظفين الانتظار فهم :

في أول اليوم ينتظرون آخره كي يعودوا للبيت

و في أول الأسبوع ينتظرون آخره كي يحصلوا على يوم الإجازة

و في أول الشهر ينتظرون آخره كي يحصلوا على الراتب .....فحياتهم كلها انتظار"

للصبر حلاوة لأن آخره جزاء بغير حساب ...أما الانتظار فآخره.....انتظار فحسب

كلام أغاني

اشتروني و اشتروا خاطر عيوني......ريحوني
ياللى غاويين تتعبوني ........ريحوني
صدقوني
النهاردة أنا بين ايديكوا صدقوني
بس بكرة هتدوروا مش هتلاقوني
صدقوني بكرة
هتدوروا مش هتلاقوني
.........................
جزء من أغنية لوردة

حد فهم حاجة؟؟؟؟؟
مفهمتوش!!!!!!
ليه بس كده؟؟؟؟؟
من الآخر هو ده اللى انا حاسة بيه النهاردة

هو مش كلام أغاني ؟؟
بس ساعات بيبقى في الجووول
يا سلام عليكي يا وردة لما تبدعي

نفسك....إن لم تشغلها بالطاعة ....شغلتك بالمعصية

الشباب عايز يتجوز ....و البنات عايزة عربيات

أولا عايزة أقدم لكم شكر و اعتذار

أما الشكر فلكل اللى حاولوا يخففوا من حالة الضيق اللى كنت فيها اليومين اللى فاتوا ....بجد جزاكم الله خيرا
و أما الاعتذار فلأنى كئبتكوا معايا في التدوينة اللى فاتت و مش المفروض ان الناس جاية تقرا المدونة علشان تكتئب ....لكل اللى اتضايقوا من حالة الغم اللى كنت عاملاها ...اعتذر بشدة


ندخل بقى في الموضوع

بحاول أرصد حال الشباب و البنات في سني و نظرتهم للزواج، و تحديدا بدأت من آخر سنة في الكلية ليه يعني حوالي من أربع سنين

كنت مثلا بسأل زملائي الشباب : عايزين تعملوا ايه لما تطلعوا من الكلية؟؟0

منهم اللى كان بيقولى عايز افتح مكتب ، و اللى كان بيقول عايز أدور على شغلانة كويسة بمرتب كويس ، واللى كان عايز يسافر ..

و لما كنت بسألهم عايزين تعملوا كده ليه ؟ كان الإجماع انهم عايزين يكونوا نفسهم علشان يتجوزوا أو علشان لما يتقدموا لواحدة يكونوا جديرين بيها و ما يقعدش باباها يقوله منين و بتقبض كام و شقتك فين و الحاجات الكتير اللى بيخاف منها أي شاب رايح يتقدم لعروسة....

و خلال الثلاث سنوات اللى مرت من ساعة ما اتخرجت من الكلية لغاية دلوقتى و أنا بحاول أشوف ايه اللى حصل للشباب دول

واحد منهم مثلا : خطب من حوالى ست شهور و كان طاير من الفرحة و عرفت أد ايه كان بيقول إنه مبسوط و إنه لقى البنت اللى كان بيحلم بيها و ان هو ده كان أمله في الحياه ..و حاجات كتير بالشكل ده

طبعا احنا قلناله ألف مبروك و احنا بجد مبسوطين ...بس كانت فيه حاجة غريبة لاحظناها انه مبسوط أوي و فكرنا ياترى البنت مبسوطة أوي كده زيه؟؟

بعدها بشهرين كانت واحدة زميلتى بتكلمه و بتسأله عن أحواله و بالمرة قالت تسأله على خطيبته و كان الرد المفاجأة : " لأ هي خلاص ما بقتش خطيبتى احنا سيبا بعض" 0

واحد تانى : كان نفسه يخطب و هو في الكلية لكن ظروفه ما كنتش مساعداه ...بعد ما اشتغل و ضمن وظيفة كويسة فوجئنا بيه بيتقدم لواحدة مننا و لأنه ماكانش مناسب ليها رفضت....ساعتها قالها :"لو سمحتى ما تقوليش لحد من زملائنا في الكلية " لكن هي كانت بالفعل قالت لنا

بعدها بشهرين اتقدم لواحدة تانية مننا و رفضت ....بعدها بشهرين تانيين تقدم لواحدة ثالثة مننا و رفضت ...و كان كل مرة يقول للى بيتقدملها نفس الجملة انها ما تقولش لحد

لغاية ما بعدها خطب واحدة من برة الكلية و اتجوز فعلا

واحد ثالث كان معانا في الكلية كان كل أمله انه يخلص الكلية بأي تقدير علشان يشتغل في أي شغلانة بتجيب فلوس كتير و لتكن البورصة مثلا .....

بعد ما اتخرجنا فتح مكتب شوية و بعدين اشتغل مقاول شوية و بعدين فوجئنا بيه اشتغل في البورصة ...طيب ليه كده ده انت مهندس ...كان رده :" يعني هي الهندسة هقبض منها كام في الشهر ..أنا مرتبي من البورصة أضعاف مرتبي من الهندسة "...0

و دلوقتى بيدور على عروسة أهم حاجة ان يكون شكلها حلو لدرجة انه خطب مرتين و محصلش نصيب و بيدوردلوقتى بكل طريقة على عروسة تكون كويسة و حلوة .......

واحد رابع خطب مرتين و ماحصلش نصيب و في كل مرة يكون مزأطط و الفرحة مش سايعاه و محسس كل اللى حواليه انه أسعد إنسان في الدنيا ....و بعد كل مرة يقول اصلها كانت كذا و كذا و طبعا يطلع فيها القطط الفاطسة

.....................

أما البنات

كذا واحدة اتجوزت و قعدت في البيت

أما اللى دخلوا معترك الحياة و الشغل ................

واحدة كل نفسها انها تحوش و تجيب عربية لدرجة انها قالتلى مرة لما كن متقدم لها عريس :" أنا بس أجيب عربية و مش عاية اتجوز خالص"ساعتها استغربت جدا

واحدة تانية لما اتخطبت قعدت تحسبها بالورقة و القلم هو خطيبها بيقبض كام و هي كام و كانت مضايقة جدا انه بيقبض اقل منها ( على فكرة هي مش مادية خالص في الحقيقة بالعكس تماما )

واحدة تالته مش مهم عندها تتجوز المهم انها تكمل حلمها و تفتح شركة بتاعتها و هي في سبيل الحلم ده ممكن تضحي بكل شئ

واحدة رابعة لا هي عايزة ده و لا ده ....كل حلمها انها يكون عندها فيلا بتاعتها تعيش فيها لوحدها بعيدا عن غطرسة الأباء و تحكم الاخوات الكبار

واحدة خامسة سابت كل اللى اتعلمته في الكلية و بتبتدي دلوقتى تتعلم العلم الشرعي و سابت الشغل علشان عايزة تتجه لدراسة الدين لأنها مقتنعة ان كل اللى اتعلمته في الكلية علم لا ينفع

و كتير من البنات اللى اتخرجوا و اشتغلوا أفكارهم بيتتغير من ناحية الجواز بالذات

الظاهرة دي مستوقفاني بقالى فترة

ليه الشباب بقوا بجد نفسهم يتجوزوا و فيه منهم اللى بيتجوز لمجرد الجواز و بيكونوا طايرين من الفرحة لما يخطبوا لمجرد انه يتقال على الواحد فيهم انه خطب ...

أما البنات بقى طموحها حاجة تانية خالص

بحاول أفسر وجهة نظر البنات .....يمكن ما بقاش الأمان للبنت دلوقتى راجل لأن فيه رجالة كتير بتمثل مثال سئ للبنات

يمكن الفلوس بقت أمان أكتر للبنت على أساس ان لو معاكي فلوس تقدري تعملى اللى انتى عايزاه من غير ما حد يتحكم فيكي

يمكن نظرة المجتمع دلوقتى للست اللى بتشتغل انها ست ليها وزنها أما اللى قاعدة في البيت تربي العيال دي عالة على المجتمع مثلا

يمكن لأن في رجالة كتيرو انا أعرف كتير بالنوعية دي معتمدين بشكل أساسي على مرتبات زوجاتهم و كأنها من واجبات الزوجة انها كمان تصرف على البيت فالبنت بتقول و انا ليه اتجوز و اجيب واحد يشاركنى في تعبي كمان

يمكن لأن الستات في مجتمعنا بجد بيتعبوا أوي و بالذات المرأة العاملة اللى مطلوب منها تكون في الشغل مركزة و زي النحلة و البيت جميلة و مرتبة و كل شئ تمام و في تربية الأولاد حكيمة و صبورة و كل الحاجات دي ...أما الراجل فبمجرد دخوله البيت هو عبارة عن كائن له كل الحقوق ....من حقه ما يشوفش حاجة مش عاجباه ...من حقه ياكل في الوقت اللى متعود عليه ...من حقه ما ينزعجش من صوت الولاد ...من حقه ولاده يتربوا أحسن تربية لأن هي دي مسئولية الست ...من حقه كل شئ و ليس عليه من المسئوليات شئ

طبعا أنا لا اتكلم عن جميع الرجال و لا جميع النساء ...فأنا شخصيا لم أر ذلك المثال في بيت أبي و أمي و لكنى رأيته في بيوت أخرى

مش عارفة تحليلى صح و لا غلط لكن ايه رايكوا انتوا ؟؟؟مش بجد الموضوع ده محتاج بعض التأمل ؟؟؟؟