٢٠٠٧-٠٨-١٠

بين توظيف الموهبة....... والاغترار بها

صلاح جاهين:0
موهبة فذة ...كنت لوقت قريب احترمها جدا بل و اعتبره من هؤلاء القلائل الذين جاد بهم الزمان ... ليس في موهبة الرباعيات و الكتابة فقط ...و لكن في الفكر و الآراء عامة و في كل شئ

إلى أن سمعت عن الخلاف الذي كان قد حدث بينه و بين الشيخ الغزالى رحمه الله و كيف كان الخلاف على شئ جوهري في الدين و هو الحجاب الإسلامى و كيف كانت طريقة صلاح جاهين في نقد الشيخ بالكاريكاتير لاذعة غير متناسبة مع قدر الشيخ الغزالى رحمه الله .....وقتها سألت نفسي .....هل تعطيه موهبته التى أعترف بها الحق في أن يسلطها بذلك الشكل على رمز من رموز الدين في ذلك الوقت؟؟؟؟؟؟؟

أسامة أنور عكاشة:0
لم و لن أنسي تلك المسلسلات التى أعتبر نفسي كنت مبهورة بها ....الشهد و الدموع - ليالى الحلمية بأجزاءه الخمسة - ضمير أبلة حكمت - الحب و أشياء أخرى - أرابيسك - امرأ
ة من زمن الحب - .....و جميع اعماله التى كنت و لا زلت أتابعها بشغف و ارفع القبعة لها من فرط الاعجاب بامتلاك كاتبها لأدواته دون أن يخرجنا عن النص أو يجنح بنا بعيدا عن إطار الفكرة بشكل متناغم جميل.....
ثم تأتينى الصدمة :0
تصريح لأستاذ أسامة أنور عكاشة بأن حجاب الفنانات ما هو إلا مؤامرة مقصود بها تفريغ الفن من محتواه، وتحويله إلى "وهابي"، وعودة هؤلاء المعتزلات هو تنفيذ لمخطط خليجي الغرض
منه تقديم أعمال درامية مصرية دون المستوى
،

و كثير من المواهب و الشخصيات ذوي الأفكار المتميزة
و الموهوبة ...تتغير نظرتنا لهم فجأة عندما نسمع بعض أفكارهم المختلفة عن المألوف
و حتى لا أتجنى على أحد فاختلاف الآراء بطبيعة الحال لا يفسد للود قضية كما يقولون ...و لكن أي اختلاف آراء ؟؟؟؟ أتكون الثورة على ثوابت الدين و الحياة مجرد ا
ختلاف في الآراء ؟؟؟ أم أن الموهبة و العقل المتقد يعطي صاحبه الحق في التحليق بعيدا عن السرب بل و أن يصنع سربا جديدا يفتح الباب لأن يحلق ورائه من لا يمتلكون موهبته و المبهورون بها و من اختلطت عليهم الأفكار ...و من لا يستطيعون التفريق بين الاعجاب و التبعية...
و فيم نعمل العقل و الموهبة ؟؟؟؟

أفي كل شئ نستطيع أن نقحم أفكارنا ؟؟؟
أفي أمور الدين أيضا؟؟؟

بالطبع لا
فالله سبحانه و تعالى أعطانا المواهب
و التفكير و العقل كي نتفكر و نهتدي إلى الطريق الصحيح ...و لكن أنى عرفنا ذلك الطريق و اتبعناه فليس لنا الحكم في شئ قد حكم الله فيه ... و كيف يعطي الإنسان لنفسه الحق في أن يكون له الخيرة بعد أن قضى الله و رسوله أتكون مظلة التنوير أو الإصلاح أو الانفتاح أو كما يسمون أكبر و أقرب للإنسان أم مظلة الدين الذي خلقنا من أجله و من أجل إعلاءه و لأجله سوف نحاسب بعد الموت
تأملت حينا ...هل يفرح الإنسان بالموهبة عندما يكتشفها في نفسه أم يدعو الله ألا تكون نقمة عليه...وكيف يقيس الإنسان موهبته أكانت نعمة أو نقمة؟؟؟ أعتقد أن المقياس الحقيقي هو الدين
فمهما حاول البعض التمرد و الانفتاح يأتينا شرع الله دائما بالفائدة القصوى للمجتمع...
و لكل من تغره موهبته أو يتخيل أن تفكيره و عقله أرجح من ثوابتنا أقول : لا تجعل شكر النعمة تمردا على شرع من وهبك إياها فالله سبحانه و تعالى أعطانا العقل كي نهتدي به لا كي نضل و نضل من لا يمتلكون ثقافتنا...و الله سبحانه و تعالى خلقنا و هو أعلم بنا و بما يصلحنا و قد أنزله سبحانه في كتابه و
في سنة حبيبه صلى الله عليه و سلم فلنبحث عن الإصلاح الحقيقي في أمورنا خير من أن نضيع حياتنا في التفكير في أشياء أراحنا الله من عناء التفكير فيها و قضي فيها من فوق سبع سماوات

بسم الله الرحمن الرحيم
" وماكان لمؤمنٍ ولامؤمنةٍ إذا قضى الله ورسوله أمراً أن يكون لهم الخيرة من أمرهم ومن يعص الله ورسوله فقد ضل ضلالاً مبيناً "
صدق الله العظيم


ملحوظة: ذكر بعض الأسماء لم يكن المقصود به التجريح أو النقد بأي شكل من الأشكال و لكنى أردت أن أوضح الفكرة بالأمثلة و أناقش الأفكار مع كامل احترامي لهم و لأعمالهم التى ساهمت في تشكيل مجتمعنا في الوقت االحالي..

هناك ٣٩ تعليقًا:

ولــــــــــو يقول...

للاسف فيه ناس بعد ما توصل لمستوى معين من الفكر تعتقد انها لابد ان تعترض على بعض التوابت لمجرد اثبات الوجود سواء هذه التوابت ف العقيده او التاريخ او الاجتماعيات
ناس تعبانه ف دماغها
وللاسف معظم الحالات دي بنكتشف بعد فتره انها حتى لم تكن افكار مقتنعين بها ولكن تم فيها دفع المقابل
حسبنا الله ونعم الوكيل
بس الحمد لله معظم الناس دي مش بتبقى ليها افعال مؤثره ف المجتمع تدعو الى زعزعه معتقدات البعض وحتى وان كان لها تاثير فاحب اطمنك اننا شعب غير قابل للتغيير خلاص اتبرمج على حاجات معينه وحتى ماعندوش القدره انه يفكر ف صلاحيه الكلام ده
اطمنى
اسف على الانقطاع

انا اول تعليق
yes i made it

الحلم العربي يقول...

و لو
....
فعلا أؤيد كلامك الأول و لكن بخصوص طمئنتك ليه ...أنا شايفة انى ما تاطمنش اوي لأن للأسف فيه ناس بتترسخ في أذهانها الأفكار دي و بيكون صعب تغييرها بعد كده ...و بص للجيل الجديد اللى ماشي في الشوارع لابس بنطلونات لوويست و انت تعرف و كمان البنات اللى بقى البادي على الحجاب شئ طبيعي عندهم

تحياتي لك و منور المدونة بعدد الانقطاع و طبعا شرف ليه انك تكون اول تعليق

هوندا يقول...

معتقدش ان ليها علاقة بالغرور هو فى الغالب بتكون معتقدات خاطئة او اتباع حزب او منهج معين وبيحاولو يستغلو شعبيتهم انهم يروجو ليها بس انا من راى ان مهما ان كان فى ثوابت دينية زى خط احمر ممنوع الاقتراب منها

الحلم العربي يقول...

HoNdA
......
ممكن يكون كده فعلا ... و ممكن يكون كل واحد فاكر انه ممكن يكون له معتقداته لوحده حتى لو هتعارض الدين ....و دي عشوائية طبعا

تحياتي لك وشكرا لوجودك

محمود على يقول...


كلامك بالتاكيد صح
بس كمان غلط
الاراء ديه اراء شخصيه
مع احترامي الكامل للشيخ الغزالي وجاهين
وعكاشه
الي عارف دينه عارف دينه
مش مستني حد يقوله يعمل ايه وميعملش ايه
وكمان بصراحه بقي
انتي عاجبك شكل البنات الي ماشيه في الشارع
تلاقيها لابسه ضيق
وحط رووووج بالفروله
وضاربه اي لاينر ومانكير
ونص شعرها باين
وتقولك سبانش

طب والنبي ارد عليها اقولها ايه
وفي بنات زي القمر مش لابسين حجاب
ومتدينين اكتر من الاسبنش

أحمد حربية يقول...

خلينا نبص للموضوع ببساطة ...جاهين و أسامة أنور عكاشة و حسين فهمي و فاروق حسني وغيرهم كتيييير بيقولوا إنهم مش بيحبوا الحجاب....خلاص ما يتحجبوش!!
فنان بينقاض نفسه والحرية اللي بينادي بيها هو الخسران ....الإسلام أكبر منهم جميعا

أحمد

Halawa يقول...

مكنتش أعرف بموضوع أبو صلاح ده

بس للأسف ساعة هوجة
وزير الثقافة بتاعة الحجاب
اتصدمت في عكاشة وسيد حجاب وعمار الشريعي لما كانوا بيقولوا انه حر
وان الحجاب درجة تانية

بس للأسف احنا كده
كل أصحاب الفكر الفني لازم يتحرروا
مش عارف هو ايه اللي محررهم أصلا
ويثوروا على أي حاجة


لو شفتي عمارة يعقوبيان
وتصدير الفكر ده في كل أفلام وحيد حامد
بجد بيجيلي الضغط
الجمال ربنا خلقه علشان الناس تشوفه
شوية جمل مستفزة
وازاي ده متصدر جوة الدراما
انك تقبله كمواطن عادي
الارهاب والكباب
الارهابي ,مرجاااان
وان الصياعة والخمرة والصرمحة
حداقة وفتاكة وليبرالية

ربنا يهديهم جميعااااااا
ويسامحهم

momken يقول...

متفق معاكى جدا
كتير اوى من المبدعين بيصبهم الغرور ويتكلموا فى الى ميفهموش فيه
وطبعا بيكون كلامهم غلط بيسبب لهم سقطات
اه مبدعين اه حلوين اوى بس لانهم بيتكلموا فى الى يعرفوة
لكن لو حلقوا خارج السرب هيضلوا الطريق


اعلمى أنه يجب علينا ألا نركز كثيراً على إتجاه الريح ، إنما يجب أن نركز على كيفية التحكم في الشراع


اعلمى أنه إذا إجتمع عليك من هم أقوى منك .. إحتفظى بهدوئك وإبتسامتك في الوقت الذي يتوقع أعداؤك أن يروك مهزومه .. وقل سيأتي دوري وتحين ساعتي للتغلب والظفر

تحياتى

AbdElRaHmaN Ayyash يقول...

كلام جميل اوي اوي اوي
الناس دي في منها مبدعين
لكن ده لا ينفي اختلافنا الجذري معهم في نقاط
يعني انا اقدر ابداع اسامة انور عكاشة
لكن انا مش هاخد منه دين ولا هتعلم منه حاجه و لا هحترمه في طريقة نقاشه بالذات
زي ما انا لا احترم اللي رفع عليه دعوى تفريق بينه و بين زوجته لما هو شتم سيدنا عمرو بن العاص
جاهين و نجم و غيرهم
كلهم ناس مبدعين لا شك
لكن في نفس الوقت مش ممكن اتعلم منهم حاجه من الدين ولا اخد كلامهم عن الحجاب او الشعائر الاسلامية زي ما هاخده من فقيه او عالم
شتان يعني
عموما موضوع جميل فعلا
و الكاريكاتير معبر
سلاام

الحلم العربي يقول...

محمود علي
.........
أهلا بيك أولا
ثانيا ..أنا كمان هقولك كلامك صح و غلط في نفس الوقت ..
صح ان اللى عارف دينه عارفه و اللى مش عارفه أكيد مش المفروض يعرفه من غير أهله ...لكن أحب اقولك انه للأسف غير اهله دول مؤثرين جدا و بيكنوا أحبانا فتنة للناس التانية لما بيتكلموا في أمور غير اختصاصاتهم لأنها بتكون في عيون معجبيهم قواعد مش مجرد آراء و دي طبعا مشكلة كبيرة...

و بالنسبة للبنات اللىوصفتهم و قارنت بينهم و بين غير المحجبات المحتررمات:أنا رأيي ان الحجاب جزء من الدين اللى طبقته مش معناه انها قديسة و اللى ماطبقتوش و طبقت أشياء أخرى من الدين مش معناه انها خلاص اعفاء من الحجاب مادامت محترمة ....الاتنين بيكملوا بعض الحجاب الصحيح و الالتزام بتعاليم الدين و الاخلاق و الاحترام...

تحياتي

الحلم العربي يقول...

أحمد حربية وسيد تركي
.....................
أهلا بيك و نورت المدونة
طبعا كلامك صح : الإسلام أكبر منهم جميعا ....لكن بردو علينا واجب تجاه الإسلام اننا نبين المفهوم الصحيح علشان الناس للأسف ساعات بتنقاد لكلام الناس دي ...

تحياتي ليك

الحلم العربي يقول...

Halawa
.........
أنا عارفة انك بتحب ابو صلاح جدا بدليل مدونتك ....لكن هنعمل ايه كل انسان له تفكيره و لعله ربنا غفرله ما فعله وقتها في محنة مرضه الأخير رحمه الله و رحم الشيخ الغزالى منارة العلم الذي تفاه الله في أطهر بلاده و دفن في البقيع ...

بصراحة انا كمان بيتحرق دمى جدا من الجمل اللى بتتقال في أفلام اللى ذكرتهم خاصة ان الأعمال دي بتأثر في الشباب الصغير اللى مانالوش حقهم من الثقافة و المعرفة و التليفزيون و السينما هما مصدر ثقافتهم و دي مصيبة كبيرة لازم نحاول نحلها...

تحياتي لك و شرفتنى لأول مرة في المدونة

الحلم العربي يقول...

momken
......
أستاذ ممكن : هو حضرتك بتجيب الكلام ده منين ؟؟....بجد جمل حضرتك جميلة جدا أعجز عن الرد عليها ....شكرا

خالص تحياتي

الحلم العربي يقول...

AbdElRaHmaN Ayyash
..................
أهلا بيك ...عود أحمد

متفقة معاك تماما و يا ريت الناس تعرف تفرق كده ما بين واحد بيبدع في شئ بيفهمه ناخده منه و لما بيقول رأيه في حاجة مش المفروض يقول رأيه فيها أصلا فما نسمعلوش أصلا...
تحياتي لك
و على فكرة الكاريكاتير انا واخداه من موقع الأستاذ عمرو خالد

dead man يقول...

موضوع الحجاب من المواضيع الشائكة جدا واللي بيكثر فيها الكلام وبتجدد كل يوم

بس أنا حبيت أقول حاجة، الخلاف بين الشيخ الغزالي وصلاح جاهين كان ليه بقية انتهت فيها المشكلة بين الاتنين كنت أحب انك توضحيها

ثانيا بالنسبة لأسامة أنور عكاشة هو مش دي بس مواقفه .. ممكن كمان تشوفي تراجعه عن مواقفه من القومية العربية في الأيام اللى فاتت.. انا عارف ان مش هي دي القضية اللى بتتكلمي فيها بس حبيت أوضح الصورة

بعدين بصراحة بالنسبة للكاركايتير شايفه مش صحيح تماما، مش كل واحد بيتكلم وشايف ان في حاجات محتاجة اعمال العقل يبقى بيخلل في الثوابت ..

تحياتي

لو كنت أعلم يقول...

ببساطة شديدة

نحن في عصر المستنقعات الفكرية المقنعة

خلف شعار الحرية

MarwaAshraf يقول...

عارفة ياحلم يا عربي أنت جيتي على الجرح .. كتييير جدا بيكون في ناس بنقرأ ليهم وبنحبهم أوي وبننقل افكارهم ومعجبين جدا بابداعهم وفجأة بوم .. صدمة جامدة جدا لما تلاقيهم مختلفين معاكي في ثوابت ما ينفعش أنك حتى تتناقشي فيها

على فكرة الصدمات وأنا مصرة إن إطلق عليها صدمات في المبدعين دول بتخلق عندي تناقض رهيب وحيرة وكم من الأسئلة بدون إجابة

سلامات

الحلم العربي يقول...

dead man
........
أولا : أنا سعيدة بانك كررت الزيارة عندنا و يارب ما تقطعش الزيارة أبدا....نورتنا

ثانيا : اسمحلى اختلف معاك في نقطة ان الحجاب من القضايا الشائكة ....في رأيي هو من القضايا المحسومة لكن مش عارفة الناس ليه بتحب تتكلم عنه و كأنه غير ذلك....

بالنسبة لقصة الشيخ الغزالى و صلاح جاهين رحمهما الله ... انا فعلا لم اكن أعلم و اعذر لي جهلة بباقى القضية ....و اشكرك جدا على التوضيح

لكن انا لم اكن اقصد النزاع بين الشخصين بقدر قصدي توضيح سبب الخلاف في انه شئ جوهري جدا في الدين

بالنسبة لأسامة انور عكاشة ...مش عارفة ساعات بحس ان الناس دي ما تقولش أرائها في المواضيع دي أحسن لأنها بتخسر قطاع كبير من الجمهور خاصة لما تكون آرائهم غير مألوفة و غير ممنطقة

بالنسبة للكاريكاتير ...هو بيوصف بعض البرامج و مش كلها ...لما تلاقى واحدة مذيعة مستفزة كبيرها تقدم برنامج اغاني ده لو عرفت تقدمه يعني جايبه شيخ و قاعدة قدامه تتكلم معاه في أمور فقهية و تقول رأيها و كأنها عائشة عبد الرحمن في زمانها ....

تحياتي لك
و أكرر تشرفى بزيارتك

الحلم العربي يقول...

لو كنت أعلم
...........
"المستنقعات الفكرية المقعنة"000
جامد جدا المصطلح ده و صح اوي .احييكي بشدة

اوجزنتي فأعجزتي

تحياتي القلبية

الحلم العربي يقول...

RAMA
....
الجميلة راما عندنا ...يا مرحبا يا مرحبا

فعلا انا كمان زيك ياما اتصدمت في ناس كنت معتبراهم قدوات و مثل اعلى ...لكن هي كده الحياة في الآخر كل انسان فيه جانب صح و جانب غلط
و للأسف صعب اوي دلوقتى تلاقى حد مش بيجمع كذا متناقض مع بعض في نفسه ......

شرفتينى يا قمر

سندباد يقول...

ربنا يجعله في ميزان حسانتك ياصديقتي
انا مؤيد كل كلامك وانا كان في شخصيات كتيرة كنت مبهور بيها وفجاة بلقيها قمة النفاق والتضاد بل والزندقة احيانا
ولنا الله
تحياتي

حائر في دنيا الله يقول...

ربما الدين والالتزام والتدين هو عقدة لكثير من المثقفين، ولا اعلم من اين جاءت تلك العلاقة المتوترة بينهم مع ان الدين يدعو للتنوير والتثقيف والوعي
والي ان يبتعد مثقفنا عن هواه وسلطانه ويتبع ضميره ودينه فسيسقط من الشجرة الكثير من الثمار التي نظن انها جيدة وهي للاسف معطوبة

لك تحياتي
السلام عليكم

dead man يقول...

أولا أحب أقولك أن الشرف ليا أنا في زيارة المدونة عندك .. واعذرلي لي تعليقي غير المنتظم .. بس ان شاء الله هينتظم

وبالنسبة لموضوع الحجاب فهو بالنسبة لي أمر محسوم .. لكن صدقيني هو للبعض غير محسوم.. وليس بالضرورة البعض ممن يطلق عليهم البعض الاخر العلمانيين..

فبعض المحجبات.. وانا أعرف منهن.. ما زلن يناقشن الحجاب بين أنفسهن

وبالنسبة للكاريكاتير فكان الأفضبل أنك توضحي ده أنه مقصود بيه ايه..

وعلي فكرة في مقال في المصري اليوم النهاردة لجمال البنا "اسرائيليات في البخاري"

http://www.almasry-alyoum.com/article.aspx?ArticleID=72335
ممكن تقريه

الحلم العربي يقول...

sendbad
........
المدونة نورت بوجود حضرتك
فعلا فيه ناس لما بتظهر موهبتهم و بياخدوا فرصتهم ممكن يجترؤا على أي شئ علشان يفضلوا في الساحة...

و فعلا لنا الله في اللى بيحصل لعقول ولادنا من تشتت و لخبطة

تحياتي

الحلم العربي يقول...

حائر في دنيا الله
..............
و الله زمان يا استاذ .... حضرتك فين من زمان....بجد نورتنا

اؤيد كلام حضرتك جدا ....و مش عارفة ليه فعلا بقى الدين اهون شئ عندنا بنتكلم فيه بدون علم

ربنا يرحمنا جميعا

تحياتى و ما تتأخرش علينا

الحلم العربي يقول...

dead man
........
اشكرك بشده على ذوقك الجم

بالنسبة لموضوع الحجاب ...فعلا انا كمان اعرف بنات بيفكروا كده ....لكن انا بعتبره نوع من التخبط اللى جيلنا غرقان فيه
بالنسبة للكاريكاتير ...انا فقط شعرت ان المعنى واضح فماحبيتش تكون التدوينة عبارة عن ملحوظات و خلاص

بالنسبة لمقال المصري اليوم...انا قرأته فعلا و اشكرك جدا عليه ...و مع احترامي الشديد للشيخ جمال البنا لكن اعتقد ان هذه المواضيع لابد ان يجلس فيها علماء الحديث كلهم و يتناقشوا و يخرجوا بالنتيجة المرجوة لأن دخول آراء العامة أمثالى في موضوع زي ده هيسبب بلبلة شديدة خاصة و احنا بنتكلم عن البخاري ....

تحياتي الخالصة

و بجد أثريت المدونة

الصقر الجارح يقول...

والله انا معارف اقول ايه
بس ديه اصبحت حاجه عاديه
يعنى كل يوم نتصدم فى حد كان مسل اعلى ونثق فى غيره وبعديها بتفره تتصدم فيه برده
ومفيش فايده للاسف انا هاقول حاجه انا مش بحب اقولها
ما باليد حيله
بوست جميل كده فى المضمون

Aml Ghonaim يقول...

غاليتى المتألقة :
كلا ؛ انه ليس اغترارا ....
بل هو قرار مسبق ؛
معظم مفكرينا الذى سمح لهم أن يظهروا فى اعلامنا يتبنون مثل هذا النهج التغريبى الذى يريد والذى نجح الى حد كبير فى الجيل السابق أن يمحو هويتنا الاسلامية ؛
أما الجيل الحالى فأعتقد لم يعد لديهم وقت كافى للقراءة لصلاح جاهين أوغيره ؛ فتكفى الكليبات وقنواتها مصادرا للموضة ؛ مش بعيد لأشياء أخرى .....
لا أدرى هل هو تآمرا علينا أم أن البيئة هى التى سمحت بهذا ....
لكنى أعرف أدباء ذوو فكر راق ويحملون همومنا حقا على أكتافهم لم يسمح لهم لفكرهم بالوجود ؛؛؛
لأن هذا كان هدفا مرسوما منذ البداية .....
محو الهوية ؛
وأدبائنا ( قصددوا أم لم يقصدوا ) ساهمو فى تدعيم هذا الهدف ....
نكأتى جراحى ياحلم :
فقد عشت ماكتبتيه ؛ ولكنى كنت فى سن أصغر ؛ ربما تحطمت أحلامى وأنا بعد فى الصف الثالث الاعدادى ؛ سقط كثير من هؤلاء الذين كنت أعدهم قمما ؛ أصبحو بالنسبة لى أرقاما جديدة فى صفوف الفتنة ...........
دمتى ؛ ودام قلمك ياغالية .......

قضية عم أحمد Ahmed Case يقول...

جووووووووووووووووون

بجد موضوع في الجون عجبنب جدا يا حلم يا عربي

اولا انا مقدرتش التعليقات طلها فاسف لو كلامي مكرر .

بس انا ليا وجهة نظر انت ممكن يعجبك شعر امرؤ القيس مع انه كان كافر وقال كلام خارج كتير .

وحتى اصدق كلمة قالها شاعر لم يكن مسلم (الا كل ما خلا الله باطل وكل نعيم لا محالة زائل ) ديه بشهادة النبى .

ممكن هؤلاء يخطئوا بس انا مستحقرش اعمالهم ممكن ما احبهمش على المستوى الانساني بس اعمالهم الجميلة اخلع لها القبعة .

مش عارف وصلت قصدي صح .

وتحياتي لك اوي

غير معرف يقول...

الحكاية مش في كدة بالظبط أوي يعني مش اغترار بالموهبة

و انما الشخص دة بيكون له أساسا أفكار و آراء يمكن كان بيقولها قبل كدة كتير من زمان لكن محدش كان بيسمعله لكن لما انشهر و موهبته نضجت و بقى له جمهور فضل يقول نفس الآراء من غير تغيير يمكن بس حضرتك انصدمتي لأنك أول مرة تعرفي كدة لكن اللي بيكونوا ماشيين جمبهم خطوة بخطوة عارفين إن دي أفكارهم أصلا و إن دا مش شذوذ في تفكيرهم و لا حاجة زي ما الناس بتفتكر

من ناحية إن الآراء دي بتأثر ف الناس فأنا أعتقد إن طريقة تعلقنا للمبدعين طريقة غبية أصلا بحيث إننا بننسى إن سعادة المبدعين دول ناس زينا بياكلوا و بيشربوا و ليهم كل الخصائص الإنسانية إنما العتب على اللي بيعملوهم آلهة و توجه وحيد بالنسبة ليهم و بالتالي قدوتهم و يبدأوا في تقليدهم و تقبل كل أفكارهم

المشكلة في العقلية الشوفونية بتاعة عامة الشعب في كل مكان و زمان ما بيصدقوا يلاقوا واحد يقعدوا يعظموا فيه و يبجلوا فيه من غير ما يفطنوا لحقيقة إنه بشر بيعمل حاجات صح و حاجات تانية غلط

تحياتي

الحلم العربي يقول...

الصقر الجارح
............
أهلا بيك عندنا ....نورت المدونة

فعلا كل يوم نتصدم في حد من الموهوبين ....عارف الحل ايه ...اننا نحاول نربي ولادنا على انهم ينموا مواهبهم علشان يكونوا متميزين لكن الأول نزرع فيهم الدين كويس علشان افكارهم ما تتلوثش و يكونوا قدوات صالحة في المجتمع

تحياتي لك و اهلا بيك

الحلم العربي يقول...

اصرار أمل
.........
أوحشتينى غاليتى

أوافقك الرأي بأن هناك مؤامرة من الخارج على وطننا العربي كي نشعر فيه بالغربة في بلادنا ووسط اهلنا....و لكنى اتعجب كثيرا كيف لأبناءالوطن ان يساهموا في طمس هوية وطنهم ...و ممن؟؟؟ من المفكرين الذين يشكلون ملامح الوطن الثقافية ....إنها حقا لفاجعة

لك الله يا وطن

تحياتي لك

الحلم العربي يقول...

أحمد رفعت
........
عم أحمد بنفسه عندنا ....يا مرحبا يا مرحبا....أنت فين يا عم أحمد بقالك كتير ما شرفتناش ؟؟؟لكن نورت المدونة

تعليق حضرتك اللى في الجون ....فعلا الاختلاف في الآراء لا يعني ان أحكم على الشخص ككل فربما أطلق الله الحكمة على فم المخالف حتى يتصيدها المؤمن ....فالحكمة ضالة المؤمن كما قال رسول الله صلى الله عليه و سلم

و لكن ما يؤلمنى حقا هو ان هناك الكثير من الناس ينساق وراء الأفكار لمجرد أنها خرجت من أحد يكنون له الاحترام بغض النظر عن مفاهيمه المختلفة و ثقافته التى ربما تكون بعيدة عن ثوابتنا

أشكرك بشدة على تعليقك الثري
و خالص تحياتي

الحلم العربي يقول...

محمد فوزي آل ربيع
................
أهلا أهلا بالغائب الحاضر

انت جبت المفيد يا محمد فعلا ....مجتمعنا محتاج اعادة تشكيل لثقافة الاعجاب فالعجاب في مجتمعنا يصل إلى حد الافراط الشديد ....نرسم للموهوب صورة عجيبة بأنه فارس هذا اللزمان و نجلس أمامه فاغرين أفواهنا ننتظر منه الكلمة حتى نقول له آمين بغض النظر عما يقول و بدون أن نمرر هذا الكلام على عقولنا أولا .....

بعيدا عن التدوينة ....يعجبنى جدا تحليلك للأمور ... و اتمنى من الله ان ينفع بك الأمة

تحياتي

انكسارات .. احمد البوهى يقول...

اتفق معكى الى اقصى مدى وربما يفاجئكى ما اقول بان هناك اديب يدرس قصته الطلبة من الابتدائية الى الثاوية بل وفى الجامعات ... وبالفعل احببته الى اقصى مدى ذلك المكافح الذى تحدى كل الظروف وبرغم انه كفيف الا انه استطاع ان يفرض نفسه وبقوة ولقبوه عميد الا..... العربى
*******
هذا الاديب شكك فى القران من الناحية البلاغية وقال ان العرب كانت لديهم كلمة (القتل انفى للقتل) واعتبرها ابلغ من الاية الكريمة (ولكم فى القصاص حياة ) هكذا وقد دافع عن رايه فى معارك ادبية طاحنة مع الاديب الفذ مصطفى صادق الرافعى
******
كم كنت حزينا عندما قرات ذلك منذ ثلاث سنوات
وكم فرحت من بلاغة مصطفى صادق الرافعى فى الرد المحفم العميق القوى على ذلك الاديب الذى كنت احبه

اسف للاطالة ولكن الموضوع آلمنى حقا وذكرنى بما ذكرت
تحياتى لكى

الحلم العربي يقول...

inksarat
........
أهلا بيك لأول مرة عندنا و نورت المدونة

فعلا كلامك صح ....صعب جدا ان الصورة الجميلة اللى رسمناها للناس دي تتحطم قدام عنينا و ما نتألمش

لكن موضوع طه حسين ده أنا بردو سمعت عنه ...و بالرغم بردو من اختلافى الشديد معاه إلا انى سمعت من شيخى لما اتكلم عن الموضوع ده اننا لازم نكون منصفين حتى مع المخالفين لينا ....و لو حد قال رأي معارض للدين نختلف معاه لكن ما يمنعش اننا نأخذ منه رأيه في الأشياء اللى بيفهم فيها ده لو مش معارضة للدين أولا ....

كلام سيخي ده ريحنى كتير لكن بردو لازال للجرح بقية في هؤلاء الذين كطنا نظن أولوياتهم مثل أولوياتنا ...و لكن ليس كل ما يمنى المرء يدركه

تحياتي لك و شرفتنا ....

dead man يقول...

متفق معاكي بشدة في موضوع جلوس العلماء.. لكن المشكلة الان هي من هؤلاء العلماء.. وكيف تجتمع منهم مجموعة تكون كلها علي قدر من الثقة والاتفاق

والمدونة ثرية بناسها

تحياتي

الحلم العربي يقول...

dead man
.........
و الله لسة الأزهر بخير بالرغم من كل اللغط اللى كل شوية يطلع على علماء الأزهر لكن انا شايفة ان الموضوع لو خرج من ايد الأزهر هتبقى خل و كل واحد هيفتى لنفسه

لسة الأزهر بخير و مفيش غير علماؤه هما اللى يقدروا يقوموا بالمهمة دي

تحياتى الشديدة لذوقك الجم

admin يقول...

تم افتتاح مدونات
4xmisr
لتعليم التدوين على بلوجر باحتراف
spot-weblog.blogspot.com
الثانية للتعامل مع الانترنت بأمن
4xpert.blogspot.com
(تحت الانشاء)
باقى المدونات للربح من الانترنت لمن يهتم بذلك
شاكرين لكم سعة صدركم مقدما
وأرجو التواصل معنا بابداء الأراء والتوجيهات شكرا