٢٠٠٧-٠٧-٢٣

فضفضات ....و إيمان....بحبك وحشتينى

فضفضات


مش مصدقة نفسي انى بقالى أكتر من أسبوع ما كتبتش ....مستغرباني أوي
طبعا أنا زهقتكوا من الكلام عن نفسي اللى مبحبوش ...بس لازم أفضفض علشان ما اطقش و كمان لازم أشكركم كلكوا على مشاعركم الجميلة و نصائحكم الأجمل ....طول مانا قاعدة في الشغل بحاول افتكر كلامكوا و تشجيعكوا ليه ...صحيح ماما و اصحابي و كل اللى حوالية حاولوا يشجعونى لكن علاقة المدونين ليها طعم مختلف

كان نفسي اطمنكوا و اقول لكو انى بقيت بنام كويس و مواعيدى اتنظمت و كله بقى تمام ....لكن للأسف مفيش حاجة من دي حصلت

الحمد لله خلصت جزء كبير من الشغل اللى كنت بعمله في البيت و اطحنت فيه ...و طبقت فيه كام يوم من غير نوم أو بساعات نوم قليلة و كنت بروح الشغل مش قادرة ...لكن البركة في النسكافيه ...صحيح مضر لكن مجبر أخاك لا بطل

اليومين اللى فاتوا كانوا غريبين ...ماما و بابا و اخواتى سابونى و راحو بيتنا الجديد و انا كنت مضطرة اقعد لوحدي مع اخويا اللى عنده مشواير كتير و مش بيرجع غ
ير بالليل اوي ....و اكتشفت انى لغاية دلوقتى مش بعرف انام لوحدي ...ههههههه..أه و الله ...مع انى كنت هموت من التعب و نفسي انام لكن كل ما عينى تروح في النوم اصحى مفزوعة ...كل ما اقول لحد يضحك عليه و يقولولى انتى لسة عيلة ...الظاهر ان عندهم حق

مواعيد الشغل الجديدة خلتنى بقالى 3 أسابيع ما رحتش معهد تحفيط القرآن و لغاية دلوقتى معرفش عملوا ايه ....ادعولى اعرف اكمل معاهم و ربنا يقدرنى اعرف اوفق بين الحفظ و الشغل لأنى الفترة اللى فاتت فاتنى كتير اوي و مستوايا بقى وحش بعد ما كنت خلاص قربت اكون معلمة لأن مديرة المعهد كانت ه
تديلى فصل جزء عم أدرس لهم ....خايفة يكون ده من ذنوبي .....ادعولى ربنا يغفر لى ....و انجح في الاختبار الصعب ده.....و ربنا يخلص نوايانا جميعا

اللهم إنا نعوذ بك من السلب بعد العطاء


أما بقى عن الشغل
الجديد فحدث و لا حرج
كل يوم فيه جديد
نفسيتى ...حبة فوق ...و حبة تحت

بتفرق معايا الناس أوي....و هي دي مشكلتى
أنا عارفة ان مشكلتى انى عشرية شويتين و مش عارفة أتأقلم مع فكرة انى خلاص سبت الناس اللى في الشغل القديم و المفروض آخد على الناس الجديدة ....و بحاول فعلا ....ات
صاحبت عليهم و بقينا بناكل و بنصلى مع بعض و بنغلس على بعض أحيانا ...لكن لسة في دماغى (وما الحب إلا للحبيب الأول)ههههههههه
خصوصا انهم جادين شوية ...يعني في الشغل القديم كان فيه حالة من المرح الدائم ....و التجديد المستمر ...ناس داخلة و ناس طالعة ....بتوع الحسابات بيتخانقوا مع الشئون القانونية ....و المدير بيتخانق مع الأوفيس بوي و كمان شوية كلنا قاعدين نهزرمع بعض ....اجتماعات بنقعد فيها نتكلم عن نرتب هنروح الرحلة الجاية فين .....هههههه و وشوية حد فينا عمل مشكلة صغيرة مع صاحب الشركة....و
هكذا و هكذا
أما الآن ...الناس كلها قاعدة مركزة في الكمبيوترات ....ممكن تعدي ساعات كاملة ما تسمعش فيها كلمة لحد بالرغم من ان العدد كبير ...لكن الكل مركز و بيشتغل ...طبعا ده كويس للخبرة و الحاجات دي ....لكن بردو جو المرح بيعطي دفعة كويسة للعمل

المهم ...بالطبع انا دوشتكوا و صدعتكوا ....كان نفسي اتكلم عن إيمان صاحبتى اللى كنت بقالى 4 سنين ماشفتهاش و قابلتها امبارح لكن تدوينة تانية إن شاء الله

الدعاااااااااء جزاكم الله خيرا


ملحوظة:رمضان قرب أوي يا جماعة اوصيكم بالاستعداد له علشان ما يجيش و يعدي من غير ما ناخد بالنا خلوها في لسانكم على طول
اللهم بلغنا رمضان
اللهم بلغنا رمضان
اللهم بلغنا رمضان

هناك ٣٠ تعليقًا:

أميرة البلطجية يقول...

يا حلم يا جميلة
ربنا يباركلك
انهاردة الاتنين
الناس خلاااااااااااص على اخرها
بليز بليز انهاردة بقي
ربنا معاكي

mo'men mohamed يقول...

اللهم بلغنا رمضان
وحمدا لله اختى انك بقيتى بخير
ومتخافيش مش حيطلعلك عفريت لو نمتى لوحدك
السلام عليكم

أميرة البلطجية يقول...

تسلم ايدك
بجد الجزء التاني جمييييييييييييل
:)

محمود على يقول...


ربنا معاكي
وربنا يديكي علي قد نيتك

Unknown يقول...

الحمد لله الصبر جاب نتيجه

ونتيجه فاقت توقعاتي

بجد الجزء التاني جميل جميل جميل

تسلم ايدك


اعرفك بيا عشان دي اول مره

مشمش

--------------

نرجع للبوست بقي

جمدي قلبك .. وغمضي عينك .. وقولي الدعاء .. ونامي علي جنبك اليمين .. وان شاء الله مش حتصحي مفزوعه .. وعموما حاجه زي دي بتيجي بالتعود , السن مالوش علاقه

علي فكره جميل قوي جو الشغل القديم رحلات و فسح وخناقات .. حاجه ليها طعم

بس برضه الجد جد .. وشكل الوظيفه الجديده بتاعتك حاجه حتفيدك بجد
ربنا يوفقك

اسكندراني اوي يقول...

مبروك اولا
وربنا معاكي ويقويكي
على فكره موضوع تغيير الناس في الشغل دي مشكله كبيره وعامل اساسي في الاستقرار النفسي للشخص في عمله
لكن النصيحه
كوني حريصه
وربنا يهديكي سواء السبيل ان شاء الله

الله ينور ثانيا
الجزء بتاعك في اللعبه حلو اوي

تسلم ايديكي

تحياتي

ولــــــــــو يقول...

كان الله في العون
وان شاء الله ربنا يوفقك والامور تتظبط وجزاكي الله خيرا عن التذكره بقرب رمضان
تحياتي

محمود على يقول...
أزال المؤلف هذا التعليق.
الحلم العربي يقول...

أميرة البلطجية
.............
شكرا على تشجيعك يا قمر ...و الحمد لله انه عجبك ...ربنا يوفق اللى عليهم الدور ..
تحياتي و شكرا على الفكرة الجميلة

الحلم العربي يقول...

mo'men mohamed
..............
آمين
شكرا ليك على اهتمامك ...و فعلا إنشاء الله مش هيطلعلى عفريت لكن أعمل ايه في أفكار الطفولة اللى مش بتسيبني...أصلى مش متعودة أبعد عن مامتى..هههههههه
تحياتي

الحلم العربي يقول...

محمود على
..........
شكرا على الدعوات الجميلة ...و لك مثله إن شاء الله
تحياتي

الحلم العربي يقول...

М€ŝЋМΣŞĦ
.......
أهلا بيكي يا مشمش و الحمد لله ان الجزء التاني عجبك ...متشكرة جدا

فعلا موضوع النوم لوحدي ده بالتعود ... المشكلة انى مش واخدة عليه...

و كلامك عن الشغل الجديد صح فعلا بس ربنا يسهل و أعرف أتأقلم بسرعة ....
أشكرك بشدة على تشجيعك و نورتى المدونة لأول مرة

تحياتي

هوندا يقول...

ياحبيبتشى يابنتى اجمدى كده معدش فى عفرييت ياستى شغلى قران حتى وان شاء الله كله هيظبط

الحلم العربي يقول...

اسكندراني اوي
.............
فرصة سعيدة أولا
و شكرا على تشجيعك و دعواتك و هعمل إن شاء الله بالنصيحة

و تسلم تعليقاتك انت و تشجيعك

نورتنى لأول مرة و يا رب ما تكونش الأخيرة
تحياتي

الحلم العربي يقول...

ولــــــــــو
..............
شكرا لك
كان الله في عوننا جميعا
و يارب نعرف نعمل حاجات كويسة استعدادا لزمضان علشان يكون أحسن رمضان في حياتنا إن شاء الله

تحياتي

الحلم العربي يقول...

HoNdA
......
هههههههههه انتى عرفتى منين ان معدش فيه عفاريت ...هو حضرتك قابلتى عفريت قبل كده و لا حاجة ؟؟
ههههههههه
لازم أغلس عليكي شوية مش هنوده حبيبتى؟
شكرا على احساسك بيه بس خلاص أنا عرفت حل الموضوع ده ....انى مانامش لوحدي تاني...هههههههههه..عيلة و سأظل حتى النهاية

تحياتي يا قمر

سندباد يقول...

اللهم ما بلغنا رمضان
فضفضي ولا يهمك كلنا بتجيلنا حالة الفضفضة دي
تحياتي

Unknown يقول...

علي فكره يا حلم .. في حاجه مهمه قوي

انا مشمش
مش مشمشه

:)

momken يقول...

علشان تعرفى زميلك جبتلك نموزج من انواع المواضفين الى ممكن تقبليهم
وهما كالاتى


هزيز الدنب :

هو كائن حي يتكاثر في مكاتب المدراء وفي الممرات التي يمر منها المدير ويتمتع بالدجل والخداع وله خمسين وجه وهو لا يستطيع مجاراة الناجحين فيلجا لهز الدنب يتميز بذكاء مجامله عالي جدا ولا يعمل الا قبل حضور المدير او المسؤول بخمس دقائق ويتظاهر بالتعب والاجتهاد، يتغذى على المدح والعلاوات وكلمات الشكر، ودائما يمدح نفسه بانه شريف ونظيف اليد ويأخذ رزقه من تعب جبينه، وكما قالت الشاعره الكبيره شيرين : انا مش بتاعت الكلام ده انا كنت طول عمري جامده

ضريب الاسافين :

هو كائن حي يتكاثر في اماكن استراحات الموظفين، يتمييز بقوة السمع والشم، يستطيع شم الاخبار والمصائب عن بعد، وسريع جدا بنقل المعلومات، يستطيع قلب الامور بلحظات، يتغذى على ضحاياه من الموظفين المساكين، وكما قال الشاعر: ما بدي قلك شوبني.. شو الي جرالي بهالدني

كثير الحكي :

كائن كلامه اكثر من فعله يستطيع التكلم بخمسين كلمه في الثانيه، كلامه كثير لكنه طيب القلب ولا يؤذي احد، وكل مشكله تقع على راسه في النهايه، يتكاثر في الحمامات العامه وفي كل مكان يوجد به طعام، وكما قال الشاعر:المتعوس متعوس ولو حطوله في ....... فانوس

الساكت :

كائن حي لا يتكلم كثيرا، يسمع اكثر من ان يتكلم، يجب الحذر منه عودة لقول الشاعر : ماتخاف غير من الساكت.. ويأخذ كل ما يريد، لكن بدون ما يحس حد، صبور وذكي جدا وكما قال الاديب الكبير : ساكت قلبي عمبيشكي ساكت... لا ما بدي ابكي ساكت... عيوني عمتحكي انا ساكت



الخويثه:

كائن حي فاتح فمه دائما.. معاهم معاهم ..عليهم عليهم، ليس لديه شخصيه، ليس له رأي، اخر واحد بدوام واول واحد بروح، دائما تعبان ومش طايق حاله يتغذى على الشيبس والاندومي، وهذا كما قال الشاعر الكبير سعد الصغير وحركب الحنطور وتحنطر درجن درجن .

اللي ملوش دخل:

كائن حي، دائما يكون لابس بدله من غير كرافه، وموجود في مكاتب المحامين ومكاتب العقارات، ليس له عمل فبيشتغل بالناس، يمتاز بثقالة الدم، يتغذى على العزايم والقهوة والشاي، عديم الاحساس، يمتاز بقوة العين عند حضور الطعام، وكل ما تطرده( برجع بطلع) ودائما بعرف بكل شي، وبعرف كل الناس، وكل ما يتوكل بموضوع بخربه وبخربطه وبفشل.. وكما قالت الشاعره نانسي : شخبط شخابيط.. لخبط لخابيط ..مسك الألوان ورسم عالحيط

غير معرف يقول...

الشغل الجديد واضح انه كويس هوا دا الشغل ايوة كدة كل يركز في اللي قدامه خلينا نتقدم بقي

ربنا يتم عليكي حفظ القران يا رب

اول مرة اشعر باهمية الدعاء اللهم بلغنا رمضان نتيجة لمرضي

اللهم بلغنا رمضان
..............................

جزاكي الله خيرا علي زيارة مدونتي اثناء فترة مرضي وربنا يديم عليكي نعمة الصحة

الحلم العربي يقول...

sendbad
........
شكرا يا أستاذ سندباد ...و اعذرونى ان فضفضاتى كترت لكن بحب حسن استماعكوا و بشكركم عليه جدا

تحياتي لك و نورتنى

الحلم العربي يقول...

М€ŝЋМΣŞĦ
........
أنا آسفة جدا ...م شعرفة الموضوع ده بيحصل معايا كتير ليه ...لكن أنا افتكرت حضرتك بنت لما دخلت على لينك الاسم و لقيت مدونة
organic moslimah
بعتذر مرة أخرى و أهلا بيك في المدونة المتواضعة

الحلم العربي يقول...

momken
......
ههههههههههههههههه
شكرا على النصائح الغالية ....حاولت اطبقها على حد ملقيتش ...الحمد لله زمايلى كلهم غير كده خالص
لكن النماذج دي موجوده فعلا و بتظهر اكتر في المؤسسات الحكومية ...
تجميعة أكثر من رائعة ...أنصحك تنزلها تدوينة علشان الناس كلها تقرأها


شكرا لتعبك معايا و تحياتي القلبية

الحلم العربي يقول...

مصراوي أوي
...........
حمد الله على السلامة
لا تتخيل سعادتى برجوعك لعالم التدوين ... أتم الله شفاك حتى تقدر على جعل رمضان هذا أحسن رمضان في حياتك

اللهم بلغنا رمضان جميعا في أحسن حال و اعنا على ذكرك و شكرك و حسن عبادتك

تحياتي أخى الكريم و تمنياتى لك بكامل الصحة و العافية

حلم الحرية يقول...

ربنا ييسرلك امورك
ويوفقك في شغلك الجديد
ويرزقك وقت عشان تدخلي البلوج تنزلي مواضيع عليه وتتابعي عالم المدونين


بخصوص النوم لوحدك
جهزي العدة والعتاد استعدادا لمواجهة العفريت لو ظهر
متقلقيش بقي لو ظهر هتضربيه
روحي نامي وانتي مطمنة


جزاكي الله خيرا علي التذكرة الاخيرة
اللهم بلغنا رمضان

منتظرينك ...متغيبيش كتير عن مدونتك

Aml Ghonaim يقول...

ياحبيبة قلبى ...
بكرة تتعودى ؛ أو _ ودى فكرة أجمل _ تحاولى تنقليلهم الجو اللى كان هناك .....
بس كلامك المرة دى طمنى عليك شوية ؛
ان شاء الله ربنا يكرمك ؛ ويحببك فى المكان اللى يسره ليك ....
وينقلك لبيتك الجديد ( بيتك ) ....
وجزاك الله الجنة على التذكرة برمضان ...
اللهم بلغنا رمضان ...
بجد : انى أحبك فى الله ............

الحلم العربي يقول...

حلم واحدة بتحب البلد دي
.......................
آمين شكرا جدا على تشجيعك يا غاليتى

هعمل بنصيحتك في موضوع النوم ...بس مش عارفة ايه اللى ممكن اضرب بيه العفريت ....يعني شوكة من المطبخ تنفع ؟؟؟ ههههههههه

جزانا و اياكي خيرا .. اللهم بلغنا رمضان

إن شاء الله هحاول ماغيبش لأنكوا بتوحشونى جدا و بتوحشنى تدويناتكوا جداجدا

تحياتي لك و نورتينى

الحلم العربي يقول...

اصرار أمل
.........
حبيبتى الغالية
ما أحلاها من كلمة
"انى أحبك في الله "
أحبك الله الذي أحببتينى فيه و أشهد الله أنى أحبك في الله أيضا

فكرة حلوة موضوع انى انقل الجو القديم و لو انها صعبة شوية بس هحاول ...ربنا يسهل

فعلا انا الآن أحسن مما مضى الحمد لله

فهمتك و انتى بتركزي على كلمة (بيتك ) آمين ربنا يسمع منك ...بس يا تري مش هعرف انام فيه بردو ...هههههه
الله اعلم

جزانا الله و إياكي الجنة و أعاننا على حسن عبادته

انى أحبك في الله

ياسر سليم يقول...

اللهم بلغنا رمضان

وحمدلله على السلامة

ويارب تستريحى اكتر واكتر فى الشغل الجديد

وان شاء الله مستنيين البوست بتاع ايمان صاحبتك :)

الحلم العربي يقول...

ياسر سليم
.........
أهلا بيك نورت المدونة

شكرا ليك و لدعواتك ربنا يتقبل منك و يجازيك مثلها آمين

إن شاء الله هكتب البوست بتاع ايمان و إن شاء الله يعجبكوا أنه متعلق بخلاف وجهات النظر و انه لا يمنع ان اتنين يكونوا بيحبوا بعض في الله زي علاقتى بيها كده

اللهم بلغنا رمضان

تحياتي لك و أهلا بيك دايما