٢٠٠٨-٠٢-٠٤

لك الله يا غزة


كنت بتكلم مع أصحابي في المكتب , واحدة منهم كانت بتحكي انهم في اليوم اللى فات نزلوا العيلة كلها و راحو النادي و لما جاعوا راحومجمع المطاعم في النادي و كل واحد فيهم طلب من مطعم شكل اللى طلب من هارديز و اللى طلب من ماكدونالدز و اللى طلب من بيتزا هت و هكذا
المهم تطرق الكلام لطعم كل مطعم من الاتنين و مين بيفضل المطعم الفلانى و مين بيفضل المطعم الآخر
و جه دوري في إبداء الرأي فقلت : " أنا أصلا مقاطعة المطاعم دي علشان أميركية"
و كانت بداية مناقشة و جدال أسفرت عن شعوري باحباط كبير

أنا عارفة إن فيه ناس كتير مش مقتنعين بموضوع المقاطعة و عارفة حجتهم إن المطاعم دي بيشتغل فيها ناس مصريين ...لكن بمنتهى البساطة ردي عليهم بيكون ان من ترك شيئا لله عوضه الله خيرا منه
و إن المطاعم دي ليها بدائل مصرية و محليه لو احنا نفعنا المطاعم دي الموظفين تلقائيا هيتنقلوا للمطاعم المصرية

اللى أحزننى و ادي بيه لحالة الاحباط مش ده و لكن الكلام اللى سمعته من زملائي عن رأيهم في القضية الفلسطينية ونصرة الأقصى
مش معقول نكون عايزين ننتصر على عدونا و احنا لسه فينا اللى بيقولوا ان "الفلسطينيين هما اللى باعوا أرضهم "أو" إن الأقصى ده مسئولية الفلسطينيين" أو "إن الفلسطينين اللى بيموتوا دول هما اللى مش عارفين يطلعوا من فلسطين" أو بقى اللى يقول لك " بص للفلسطينيين عايشين حياتهم ازاي في الدول الأخرى"
لا ولما تقول للواحد فيهم : طيب هتقول لربنا ايه لما يسألك عملت ايه لإخوانك اللى بيموتوا في فلسطين أو عملت ايه للأقصى يرد عليك و يقول لك : " انا بس اصلي لي ركعتين وانا ابقى عملت اللى عليه "

طبعا فيه ناس مش هتصدق الكلام ده زي ما انا ماصدقتش انى بسمعه لكن للأسف هي دي الحقيقة , لسه فينا ناس بتفكر كده , لسة فينا ناس بتسلم ودانها لألاعيب الصهاينة في التوقيع بيننا كأمة واحدة .
الصهاينة من أول يوم عرفوا االطريقة اللى هتخليهم ينتصروا علينا , طريقة إشعال فتيل النزعات العصبية و القبلية بيننا , طول ما احنا حاسيين ان فلسطين شئ و احنا شئ طول ما الغزاة هيقدروا علينا و المخزي و المحزن انك تلاقى اللى بيغذي ده ناس مننا بقصد أو بدون قصد أو بعدم فهم للمعنى الحقيقى للقضية ..

و مستغربين احنا ليه بيحصل فينا كده ؟؟؟!!!!!

بجد بجد لك الله يا فلسطين
و لك الله يا غزة

و لك الله يا أقصى
و لكم الله يا أهلنا و إخواننا في فلسطين و العراق و جميع بلاد الأمة الحزينة

هناك ١٧ تعليقًا:

AHMED SAMIR يقول...

موضوع المقاطعة دة قتل بحثا
انا شخصيا اعاني في احيان كتيرة من المقاطعة بسبب عملي في شركة ادوية بريطانية
لا الشركة افلست ولا اوقفت نشاطها
ومازالت هي رقم 1 عالميا
المقاطعة مش هي الحل...الحل اننا نتحد ونبقى كلمتنا واحدة..وطبعا دة من رابع المستحيلات
تحياتي واحتراماتي

mo'men mohamed يقول...

أختى الحلم العربى
طول ما الجهل موجود يبقى لازم نسلم ودانا للصهاينة
وطول ما السللبية موجودة
يبقى تغور فلسطين و أهلها و القدس
وطول ما الإنصراف عن روح الإسلام موجود يبقى ليه نقاطع

أما اللى بيقول أصلى ركعتين و خلاص ده معلش يعنى انسان سلبى يستحق عقاب الله

انا معاك ان انا ممكن اصلى ركعتين و ابقى عملت اللى عليا
بس ده لو معنديش حاجة تانية اعملها
عاجز عن عمل اى شىء تانى
اما اذا كان بايدى اتبرع و اتابع وأنشر قضية و اجاهد بنفس وبمال و بمجهود
واكتفى بركعتين
يبقى انا كده آثم لأن ربنا قال ( و أعدوا لهم ما استطعتم) ونلاحظ كلمة ما استكاعتم دى
لإنها كلة ذات مدلول
جزاكم الله كل خير
السلام عليكم

momken يقول...

المقاطعه ماشى لكن برضو لازم نظهر ازاىان الاموال العربيه والبترول بيهدر تحت اقدام الجوارى والغلمان

لازم الناس تعرف ان العبايات اصبحت خاويه الا من نعره قبليه متخلفه

ولازم الناس تعرف رجال العرب اغلبهم ماتوا فى الغزوات الاسلاميه
ومن هم موجودون هم اشباه الرجال

اسف على انفعالى

تحياتى

الحلم العربي يقول...

A.SAMIR
........
معاك ان الحل هو انا نتحد ....لكن من رابع المستحيلات ليه بس ؟؟ ربنا يسهل لسة عندي أمل بردو
بالنسبة لموضوع المقاطعة :كل اللى مع المقاطعة ما مانعوش اننا ما نقاطعش المنتجات اللى ما ندرش عليها زي القمح الأمريكي مثلا لغاية ما نقدر ننتج الحاجات دي
لكن مثلا الوجبات السريعة و الحاجة الساقعة و السجاير الأمريكية نقدر نستغني عنهم
و لا ايه رأيك

تحياتي و اشكرك على رأيك

غير معرف يقول...

أجدنا الصراخ والعويل، حتى بُحت منا الأصوات، ووهنت منا الحناجر، وجفت منا الدموع.

تعودنا مشاهد الأطلال والنعوش والجثث والدماء، حتى صار تعداد القتلى مجرد أرقام لا معنى لها.

صارت آذاننا تستمتع بعويل النساء وبكاء الأطفال، حتى تجمدت منا القلوب وتحجرت المشاعر.

صار القلم يخجل من الكتابة، وصار اللسان يعف عن الكلام، بعد أن خاضا كل ميدان للخطابة والتصنيف والتنظير، حتى استنُفدت كل الكلمات، وتعفنت كل العبارات.

والله العين تدمع والقلب يتقطع والعجز يطوقني والظلم قطع اوصالي انا ها هنا في القدس وهم في غزة
على تراب واحد وسماء واحده وقلبي وقلبهم واحد
انا ها هنا اتقطع وهم هناك يتمزقون
ما بيدي غير الدعاء والبكاء لأجلكم يا اهلي الصامدون تحت الحصار

بوركتـ

روري

Dr.khaled يقول...

جزاك الله خيرا

على غيرتك على الدين

Oma يقول...

احنا بجد مشكله

من زمان اوي وكلو بيتكلم في موضوع المقاطعه ده

لكن بنقاطع يوم واتنين.....وخلاص

آه اكيد مافيش بديل كويس

لكن اكيد ربنا هيعوضنا لو احنا كنا ناويينها بجد

السلبيه دي مشكله ازليه

اشكرك لانك فكرتيني

الحلم العربي يقول...

mo'men mohamed
..............
جزاك الله حيرا على كلامك ....هو ده اللى انا عايزة اقوله
ان الصلاة و العبادة شئ جميل لكن فيه فرض عليك بردو و هو انك تنصر دينك في العالم كله و لو بالمقاطعة
و الله بردو لسة فيه أمل و صحيح فيه ناس بتتكلم بالطريقة دي لكن الأكثر إن شاء الله غيرانين على دينهم و عروبتهم
ربنا ينصرنا
و أشكرك على تعليقك

الحلم العربي يقول...

momken
......
لا تتأسف على انفعالك فهذا اقل شئ يجب ان نفعله
لكن بردو فيه أمل و بردو فيه رجال إن شاء الله
هذا رجائي من الله و رجاؤنا جميعا
أن يخرج منا صلاح الدين

اشكرك على انفعالك فهذا يؤكد ان أملى ليس من فراغ
تحياتى الخالصة

الحلم العربي يقول...

MĕŢø & ŘǿŖêĔ
.............
و الله عندك حق
للأسف اعتدنا الصمت و المشاهدة
اعتدنا السلبية و ارتضينا الهوان
حماكم الله و ثبتكم أهل فلسطين في كل مكان
تحيتى لك و لكل اهل فلسطين الصابرة الصامدة
و اهلا بك لأول مرة في المدونة

الحلم العربي يقول...

ض/ خالد
.......
و جزاك مثله إن شاء الله
و قدرنا جميعا ان نترجم هذا إلى شئ عملى يفيد الأمة
تحياتى و احترامي

الحلم العربي يقول...

oma
...
انا اللى بشكرك لأن مجرد احساسنا ان ده واجب علينا شئ كويس ....ربنا يقدرنا جميعا نعمل شئ كويس و نبعد عن السلبية اللى اوافقك انها آفة المجتمع
آشكرك جدا على تعليقك و على وجودك في المدونة
تحياتي

غير معرف يقول...

بجد بجد ... اصبت بقشعريرة تهز بدني أثناء قرائتي للبوست

أنا كفلسطيني مغترب أجد الكثير من العينات التي تتهمنا ببيعنا أراضينا ... و لا يعلموا أن جدتي تحتفظ بمفتاح بيتها في غزّة من سنة 1965 .. عندما هُجّرنا من غزة ...

لكن ماذا ستقولين لفئة جاهلة بالوضع ... ستشرحين وستشرحين و لكن بالمقابل لن يقتنعو

والله يعون بعون أهلنا بفلسطين و يفرج كربة أهل غزة

تحياتي و تقديري

Aml Ghonaim يقول...

لا أستطيع أن أقول انني أيضا أصبت بالاحباط ؛؛؛ لأني للأسف أواجه نماذج كثر من هؤلاء فكيف اذا كان هؤلاء ممن يعدون لبناء أمة طال وقت اعدادها ؛؛؛ أقصد طلبة العلم الشرعي ؛؛؛
الجهل ثم الجهل ثم الجهل بمتطلبات واقعنا وأمتناو اليأس السريع من جانب الدعاة سببا مباشرا فيما نعانيه ؛؛يتبقى لنا أن نظل صامدين ؛؛ صامــــدين بكل مافي نفوسناو مشاعرنا ونحاول أن نبث في قلب الجميع أننا لن نتغير ! من يدري ربماو قتها يعجبهم صمودنا لا أكثر فيكونوا معنا ؛؛؛؛
اشتقت اليك كثيرااااا

الحلم العربي يقول...

سامي منصور
..........
أنا آسفة إن كان كلامي ضايق حضرتك لكن تأكد إن الكلام ده بيضايقنا كلنا و زي ما يه ناس مش حاسين بالقضية زي ما فيه ناس هدفهم هو تحرير فلسطين و مؤازرة إخواننا في فلسطين....
كل ما أستطيع أن أقوله هو انك و جميع الفلسطينيين في حل من إثبات تمسككم بأراضيكم و إن اتهمكم البعض فالتهة مردوده عليهم.....
ثبتكم الله و نصركم و قوي من عزائمكم

تحياتي الخالصة لك و لجميع اهلنا في فلسطين

الحلم العربي يقول...

rama
....
:) :) :)
واحشاني يا قمر

الحلم العربي يقول...

اصرار أمل
.........
أختى الجميلة أمل
أتفق معك في آرائك و في تحليلك لأسباب ضعف نفوسنا في تلك المسأله ...
و اتفق معك أيضا في ضرورة إصرارنا على موقفنا فليس لنا طريق غيره

افتقدتك كثيرا
عود أحمد
تحياتي ثم تحياتي