٢٠٠٩-٠١-٠٣

عذرا غزة


جلستا الفتاتان أمام التلفاز ، تقلب أحدهما قنواته و صدفة جاء المؤشر على قناة الجزيرة فإذا بالمذيع يقول :"
ارتفاع ضحايا مجزرة غزة الي 250 شهيدا و 1600جريحا و استمرار العملية العسكرية لإسرائيل ضد غزة وسط صمت عربي"
الفتاة الأولى : " مش ممكن اللى بيحصل ده ، حرام ، ليه بيحصل فينا كده؟، احنا لازم نعمل حاجة "
الفتاة الثانية :" أيوة لازم نعمل حاجة نساعد إخواننا في غزة "
الفتاة الأولى :" طيب نعمل إيه ؟"
الفتاة الثانية :" ندعيلهم في كل صلاة ربنا يرحمهم و ينصرهم"
الفتاة الأولى : " أيوة أنا هدعيلهم في الصلاة ، أوووه ...ده العصر أذن و أنا ما صليتش الظهر ، طيب لما المسلسل يخلص بس هقوم و أصلى الظهر و العصر و ادعيلهم ، ....... بس الدعاء مش كفاية عايزين نعمل حاجة تانية ... لازم نعمل حاجة ...تفتكري نعمل ايه تاني؟"
الفتاة الثانية :" نتبرع علشانهم "
الفتاة الأولى :" نتبرع بإيه ؟"
الفتاة الثانية :" بفلوس أو دم "
الفتاة الأولى :" بس احنا مش معانا فلوس ، و ........
يأتى صوت مذيع الجزيرة : " و الآن نشاهد صاروخ منطلق من إسرائيل متجها نحو غزة على الهواء مباشرة ......."
الفتاة الثانية : " عندك حق ....احنا مش معانا فلوس .... و لا عندنا دم "

هناك ١٠ تعليقات:

AbdElRaHmaN Ayyash يقول...

واقع مضحك
مبكي
حقيقي

سمكه واحده يقول...

شر البليه ما يضحك
اه والله لا فلوس ولا دم
بجد دي الخلاصه

الحلم العربي يقول...

abdelrahman ayyash
..................
للأسف الشديد يا عبد الرحمن ، ربنا يهدينا بقى

الحلم العربي يقول...

سمكة واحدة
.........
فعلا شر البلية ما يضحك ، بس للأسف حتى ما ينفعش نضحك في اللى احنا فيه ده ، حتى الضحك ما بقاش من حقنا ...
ادعي الله لأهل غزة يا سمكة ربنا يرحمهم و يهدينا
شكرا لمرورك

momken يقول...

والله بنات عسل

او بنات جدعان فعلا

ربنا يغفر لينا تقصيرنا نحو اخواننا واهلينا فى غزة

ويعطينا من عنده دم وكرامه وعزة

تحياتى

الحلم العربي يقول...

momken
......
آمين يا رب
ربنا يهدينا و يبعد عنا الفرقة و العصبية و الجاهلية اللى احنا فيها
أشكر لك وجودك الكريم

حزينه يقول...

حلو بس حزين
حلو بس بيجرح
بجد اللى بيحصل فى غزة دة
يستاهل اننا نعمل حاجه بجد
بوست جميل

حزينه

Wish I were a Butterfly ... يقول...

شر البلية ما يضحك

مش عارفة أقوللك إيه لأن فعلا فعلا... ربنا يهديناو يسامحنا على تقصيرنا

أنا بجد بحبك في الله
بجد

الحلم العربي يقول...

حزينة
......
ايوة يا جزينة عايزين نعمل حاجة بس مش عارفين ، و بندور على الحل مع انه في ايدينا بس هو محتاج مننا وقت و جهاد و احنا مستعجلين عايزين كل حاجة دلوقتى حالا

أنا معاكي لازم نعمل حاجة لأهلنا في غزة بس مش عارفة لغاية دلوقتى ايه اللى ممكن نعمله و يفيدهم بجد مش مجرد تبرعات بتجيلهم بعد ما يكون العدو خلص عليهم

اشكرك على مرورك و يا ريت ما نبطلش كلنا دعاء لله انه يرحم أهل غزة

الحلم العربي يقول...

wish i were butterfly
.....................
و يعلم الله انى كمان بحبك في الله
أحبك الله الذي أحببتني فيه

فعلا عندك حق احنا متخاذلين قوي ، ربنا يغفر لنا تقصيرنا في حقهم و ينصرهم و يقوبنا علشان نقدر ننصرهم

تحياتي يا فراشتي