2009-01-31

البحر بيضحك ليه


البحر غضبان ما بيضحكش
أصل الحكاية ما تضحكش
البحر جرحه ما بيدبلش
و جرحنا و لا عمره دبل
........................

قللنا فخارها قناوي
بتقول حكاوي و غناوي
يا قلة الذل انا ناوي
ما أشرب ولو في المية عسل
........................
ياما ملينا و ملينا
لغيرنا و عطشنا ساقينا
صابرين و بحر ما يروينا
شايلين بدال العلة علل
....................مساكين بنضحك في البلوة
زي الديوك و الروح حلوة
سارقاها في السكين حموة
و لسة جوة القلب أمل
..........................
بينى و بينك سور ورا سور
و أنا لا مارد و لا عصفور
في ايدي عود قوال وجسور
و صبحت أنا في العشق مثل
.........................
في بالي ياما و على بالي
و اللى بيعشق ما يبالى
ما يهمكيش من عزالي
يا حلوة لو مرسالي وصل
......................
ملحوظة : الكلمات كلمات أغنية للشيخ إمام رحمه الله

هناك 8 تعليقات:

Wish I were a Butterfly ... يقول...

يا ما ملينا و ملينا
لغيرنا وعطشنا ساقينا

مساكين بنضحك في البلوة
زي الديوك والروح حلوة

حسيت الجمل دي في المصريين أوي أوي

لو كانت كلماتك. يبقى بجد فنانة ماشاء الله
لو كانت مش كلماتك يبقى اختيارك جميل يا حلم

الحلم العربي يقول...

لا هي مش كلماتي للأسف دي كلمات أغنية للشيخ إمام
فعلا اختيارك للجملتين دول بالذات منطبق على المصريين اوي
اشكرك على فهمك العميق
و شكرك على وجودك انتى عارفة قد ايه بفرح لما بشوف تعليقك
أه على فكرة بلاد النفط بتسلم عليكي :)))

momken يقول...

وليل تباريحنا جارحنا

نضيع وتضيع ملامحنا

نتوه فى زحمه العالم

منلقاش نفسنا مالم

لروحنا نعود ونبقى احنا



تسلم ايدك بوس جميل

تحياتى

الحلم العربي يقول...

momken
......
ايه الكلام الجميل ده يا ممكن ، تعليقك غلب البوست بكتير

انا نفسي اعود لروحي و نفسنا كلنا نعود لروحنا و نبقى احنا
هو ده كلامك و لا ايه؟؟
تسلم لنا يا ممكن و تسلم لنا تعليقاتك
دايما منورنى

Wish I were a Butterfly ... يقول...

:)
لوهلة حسيتها فعلا زي أغانيه بس فكرت إن ممكن يبقى انت اللي كاتباها برده :). ليه لأ يعني؟

بحبها أوي على فكرة:) بلاد النفط يعني
بس يوم بعد يوم بكرهها لما تاخد الناس اللي بحبها وتبعدهم عني
يارب تكوني مستريحة في شغلك هناك يا حلم

sakayar يقول...

كلمات اكثر من رائعة
سمعتها زمان من منير فوق الرائعة
رغم اني مش بسمع أغاني من زمان لكن كلمات الاغنية نفسها بتقول دي مصر
شكرا على الكلمات والانتقاء الجميل

الحلم العربي يقول...

wish i were a butterfly
.......................
ربنا يجبر بخاطرك يا فراشتي يا رافعة معنوياتي ...معقولة انا اكتب الكلام الجامد ده؟!!!
و الله هو مش ذنب بلاد النفط هو ذنبنا احنا
لكن ربنا ما يجيبش فرقة و لا بعاد بينك و بين اي حد بتحبيه يا اجمل فراشة
الحمد لله على كل حال انا كويسة
يا رب تكوني انتى كمان كويسة :))

الحلم العربي يقول...

sakayar
........
العفو يا سكايار
فعلا و علشان كده انا اقتبستها علشان بتقول مصر
وحشتك مصر زيي مش كده ؟؟
يا رب تكون مبسوط عندك
نورت المدونة :))