1- السعادة قرار : ده حقيقي مهما كنا بنقاوح في الموضوع ده صحيح مش دايما الحزن بايدينا لكن لما الحزن بيطول غالبا احنا اللى بنتسلذ الاحساس ده و بنطوله بمزاجنا.
2- لو عاوز تتعلم ماتاخدش كل الحاجات من اللى بيعلمك مسلم بيها ، اللى بيعلمك بيعلمك من خلال تجربته و رؤيته الشخصية اللى اكيد فيها قصور ،حط تجربتك الشخصية و نكهتك المميزة على الحاجة اللى بتتعلمها يمكن تتوصل لحاجة جديدة تعلمها للى علمك كمان.
3- عاوز تحس بشعور باباك و مامتك ، خليك مسئول عن طفل لمدة ساعة مسئولية كاملة يعني تبقى مسئول انك تسكته لو عيط و تأكله لو جعان و تغيرله كمان لو لزم الأمر ، ساعتها هتعرف يعني ايه الكلام اللى كانوا بيقولوهولك باباك و مامتك انهم ممكن يعملوا اي حاجة علشان انت تبقى كويس.
4- ما تحكمش على حد من انطباع شخصي واحد و لا من موقف واحد ، عادة الناس بتتغير ، جرب تقعد مع حد انت مش بتحب قعدته قوي لكن بنظرة مختلفة و حاول تفتش عن الحاجة الكويسة اللى فيه و أكيد هتلاقيها لو انت موضوعي و ساعتها هتعرف ان الحياة أجمل لما نتقبل بعض و ندي فرص لبعض أكتر و أكتر .
5- سيب للدنيا فرصة تفاجئك ، ماتستعجلش كل حاجة و ماتقولش ان حظك قليل و الناس حظها اكتر منك ، ربنا قسم المفاجآت الحلوة علينا بالتساوي لكن كل واحد بياخد مفاجأته في الوقت المناسب ، من الآخر ماتاخدش الدنيا عافيه :)
6- لو فاكر ان مأساتك أكبر مأساة في الدنيا فأحب اقولك انك أنانى جدا ، كل واحد فينا اتكسر و مر في حياته بامتحان كان بمثابة نقطة تحول ، فيه ناس اتغيرت لأنها كان لازم تتغير و ناس اتغيرت لأنها استسلمت و ناس تانية المأساة خلت معدنهم يبرق من كتر ما النار صهرته ، كل ما كانت مأساتك كبيرة و انت وقفت قدامها كل ما معدنك لمع بعد ماتخلص ..و أكيد هتخلص .
7- ماتحاولش تكون التاني بتاع حد لأنك مش هتعرف و لأنك هتضيع النسخة الأصلية منك .. أجمل ما فيك ان مافيش منك اتنين .
8- ماتحاولش تقلد النسخة القديمة منك حتى لو كانت أحسن بكتير منك دلوقتى... مفيش حد بيرجع لزي ماكان زمان ...لكن ممكن تبقى أحسن من زمان و من دلوقتى لما تعرف ايه الحاجات اللى كانت حلوة فيك زمان و تزودها على الحاجات اللى اكتسبتها دلوقتى و ان شاء الله الناتج يبقى بنى آدم أجمل .
9- مهما صعبت عليك الدنيا لما تدعي من قلبك هتجيلك رسالة من ربنا بتقولك انك مش وحيد ربنا اللى خلق الكون ده كله بيسمعك انت فلان الفلانى و بيستجيب ليك انت و شايفك فما تقلقش .
10 - لو اقتنعت بحاجة من الكلام ده كمل عليه و انا هضيفها و لما يوصلوا خمسة و عشرين نقطة هننشرهم تاني يمكن ينفعوا حد تالت :)
هناك ٧ تعليقات:
يا كلامك يا آية :)). رائعة انت بجد
تاني واحدة دايما مقتنعة بيها جدا
التالتةكمان ومجرباها كتير :)). فاكرة كمان إن أختي أول ما خلفت..بعدها بأيام جت لماماو وقفت، و بعد سكون غريب قالتلها ماما؟؟ انت إزاي ربيتينا كلنا كدة؟ انت تعبتي أوي يا ماما :).عمري ما أنساها بجد
السادسة..أكيد. دايما لازم نفتكر اللي أقل مننا في كل حاجة.دي قناعةدايما فاكراها
الـ"حاجة" التامنة.. انت بتهزري؟ :(. أهي دي زعلتني أوي
بعدكلامك مش متأكدة إني هعرف أضيف حاجة:). بس أوعدك هفكر في دروس دنيتي
وحشتيني
هوباااااااا
............
انت اروع حبيبتي بجد انتى واحشاني جدا
بالنسبة للتامنة :) ما تزعليش بس عن تجربة هي دي الحقيقة الزمن مش بيرجع لورا بس احنا نقدر لو استعنا بالله اننا نخلى الجاي افضل من اللى فات إن شاء الله
:)
يارب حياتك كلها سعادة يا أجمل بوبا
تدوينة جاية في وقتها بجد
رغم انقطاعي عن التدوين من فترة
بس دخلت اليومين دول كده اشوف اخبار الناس ايه ... بجد تسلمي يا آية
:)
دائما كلامك رائع
ودائماً مفيد جدا
لم يخيب ظنى بك يوماً
ولم يتغير رائى بك رغم مرور كل تلك السنين
كل كلمه تحمل الكثير من الحكمه
دمتى فى منتهى السعاده
تحياتى
كلام جميل جدا .. تقبل مروري
برافووووووووووووو
"أجمل ما فيك ان مافيش منك اتنين"
وااو بجد
وأنا من عندي :
دايما خللي عندك أمل ان بكرة أحسن
"بكرة هو أول يوم ف حياتي اللي أحب أعيشها "
اشكركم جميعا
و ياريت اي حد عنده خلاصة تجربة يضيفها علشان ممكن تنفع حد تانى
صحيح احنا مش بنتعلم غير من التجربة و الخطأ لكن العقلاء مننا بيستفيدوا من تجارب غيرهم
دمت جميعا بخير
إرسال تعليق