2007-04-20

إلى الأمة


مالك كده متغيرة
لون الشحوب ظاهر على خدودك و هامة قصيرة
كنتى زمان للكل أم دلوقتى ليه يا أمي بقيتي صغيرة
...........................................................
صرخ الضعيف فيكي و قال يا أمي أااااااااااه
و لا حد رد عليه و لا سمعتى نداه
حتى يا أمي بقيتى على ضعف ابنك متكبرة
...............................................
طلعوا الصغار يقولوا خلاص كبيرنا مات
وظهرلنا فيران كانت في الجحور زمان تبات
و بكرة يبقى للفيران قصور و بوابات
و انتى لسة يا أمى قاعدة متسمرة
.............................................
القلب كان للحزن يزعل أو يأن
دلوقتى أصبح للسعادة يبات يحن
يكتب في ليلته على الحيطان الأمل
يصبح يلاقي حيطان حياته متدمرة
..............................................
نفسي في يوم ألاقى ابنك بقى فتى
و تقولى للعالم ولدى الفارس أتى
و يعود بنا للنور و للربيع بعد الظلام و الشتا
يا هل ترى يا أمى لليوم ده متحضرة
.....................................

ليست هناك تعليقات: