2007-04-29

يا عم فك التكشيرة



النهاردة حالتى غريبة جدا


في حاجات كتيرة مضايقانى لكن بالرغم من كدة عايزة اكون مبسوطة


ساعات بحس انى متفائلة جدا زيادة عن اللزوم و ساعات بحس انى كئيبة و قتمة


كل اللى انا عارفاه دلوقتى انى عايزة أكون مبسوطة


و بما إن مفيش حاجة حوالية تبسط


فتحت فايل عندي كنت شايلاه للأوقات اللى زي دي الاوقات اللى بكون عايزة ابقى مبسوطة بس مش عارفة ، الفايل ده مليان نكت ...قديمة..ممكن ...بايخة ...ممكن بردو ...بس الأكيد إنها ممكن تطلع الواحد من مود الكآبة


و على رأي عمنا صلاح جاهين:


الضحك قال يا سم على التكشير


أمشير و طوبة و أنا ربيعي بشير


مطرح ما بظهر بنتصر ع العدم


إن شاء الله اكون رسماية بالطباشير


عجبي




شوية نكت :
تلاته خرجوا في رحلة سفاري..واحد مصري والتاني صومالي والتالت أمريكاني..دخلوا ناموا..وصحيوا بعد 300سنة!..كل واحد فيهم قام رجع بلدة..
الصومالي شغل الراديو سمع: (الصومال لن تتنازل أبدا عن حقها الشرعي والتاريخي في ولاية نيوجيرسي)
الأمريكي شغل الراديو سمع: (سيدافع الجيش الأمريكي عن البلاد لآخر جندي!)
المصري شغل الراديو سمع: (إخترناه..وبايعناه...وعشان كده احنا اخترناااااااااااااااااااه!) مفيش فايدة

واحد بيقول لخطيبته لما ازمرلك انزلى قالتله هو انت اشتريت عربيه قاللها لأ اشتريت زماره
ومرة مدرس بيسأل تلميذ

المدرس: الثعلب يا حبيبى بيبض ولا بيولد


التلميذ: أصل التعلب ده يا استاذ مكار وممكن يعمل أي حاجة

مرة واحد بلاديتنا بيدهن الحيطة.... قالوله طب حط جرنال تحتك... قال لهم : لا مش مهم انا كدا طايل

بلاديتنا بيكتبوا محاضرة مع الدكتور كل ما يمسح السبورة يقطعوا الورقة

واحد مسطول راح مطعم وقال لصاحب المطعم سندوتش طعمية من غير سلطة.. صاحب المطعم كمان مسطول قال له من غير سلطة ايه؟ قال له : من غير سلطة قوطة – صاحب المطعم : ماعنديش سلطة قوطة اعمله من غير سلطة طحينة؟؟؟

مرة واحدة ست بتقول لجارتها الحقيني يا أم محمد بعت جوزي يجيبلي ملوخية راح مخبوط بأتوبيس ... يالهوي وعملتي إية ..عملت بامية وامري لله

مرة شرطي مرور مسك واحدبيعمل امركانى بالعربية .. وقاله ادفع مخالفة 50 جنيه ... رد السواق وقال :ماعيش إلا ورقة بــ 100 جنيه ..... قال له شرطي المرور خلاص روح اعمل أمريكانى بــ 50 جنيه تانيه ..وارجع

كمسارى ماشى فى جنازة بيقول يا جماعة الجنازة فاضية قدام


واحد سكران فتح التلاجه وبص للجلي ...وجده بيرتعش: قالوه متخفش هاخد عصير

بطة راحت لبقال قالت له عندك سكر ؟؟ قال لها لا.. راحت له تاني يوم قالت له عندك سكر؟؟ قال لها لأ ، وعارفه لو جتيني تاني حدق رجليك المفلطحه في الأرض... راحت له تاني وقالت له عندك مسامير؟؟ قال لها لأ .. قالت له طب عندك سكر؟؟

أستاذ كيمياء راح يشوف نتيجة ابنه لقاها ..... راسب أزرق


بيقولك مره واحد بخيل

ابنه: بابا انا عايز 50 قرش
أبوه: انت عايز 40 قرش هاتعملايه بال 30 ممعاييش غير ريال تاخد بريزه

في واحد جندي حطوه في الجبهة على الخط الأول مع العدو وقالو له: أول ما تحس بأيتحرك للعدو فورا تقولنا عندك هنا جهاز تليفون على اتصال مباشر مع القيادة.
وفييوم لاحظ الجندي تحرك العدو فرفع التليفون، وقال: ألو قيادة العدو على بعد 5 كم. فقالو له علم.
بعد نص ساعة تانية رفع سماعة التليفون وقال: ألو قيادة العدو علىبعد كيلو واحد فقالو له علم, ومجاش حد.
وبعد نص ساعة كمان، اتصل بيهم وقال: ألوقيادة؟ قالوله: نعم؛ فقال لهم: اتفضلو كلموا العدو


واحد بعربية شبح واقف فى إشارة مرور جنب واحد بعربية سيات، صاحب العربية السيات بصمن فوق لتحت لصاحب العربية الشبح وقاله تبدل عربيتى بعربيتك وتدفع لى مليون جنيه؟

الراجل التانى قاله إنت مجنون ولا شكلك كده؟ فرد عليه صاحب السيات وقاله: أناعربيتى فيها عفريت يحقق لك أى حاجة، المهم دخل صاحب الشبح معاه فى السيات وحركالدركسيون فظهر العفريت، فقاله صاحب العربية: قوام هات شاى ليا وقهوة للبيه فراحجابها له، المهم بدلوا العربيات وأخد صاحب السيات مليون جنيه كمان، وأما دخل صاحب الشبح العربية السيات وحرك الدركسيون ظهر الجنى فقاله عايزك ترجع لى عربيتى تانىوالمليون جنيه رد الجنى وقاله: معلش أنا بتاع شاى وقهوة بس
قال رسول الله صلى الله عليه و سلم
"تبسمك في وجه أخيك صدقة"
صدق رسول الله صلى الله عليه و سلم
أتمنى تكون النكت عجبتكوا......0

هناك 13 تعليقًا:

مصراوي أوي يقول...

نورتي مدونتي ومدونتك جميلة جدا

نكتة الزمارة دي مش ممكن.....هههههههههههه

جديدة بصراحة
بس لازم منهربش من الواقع لو في حاجة قلقانا وتستدعي التفكير فيها

وتحيااااااااتي

احمد رفعت يقول...

ربنا يسعد قلبك زي ما ضحتيني
بس انتى عارفه كنت بسأل صحابي كتير سؤال وناس كتير معرفتش اجابة السؤال ده .
هو انت لما بتكوني متضايقة اوي في حاجه معينه لما بتعمليها بتفكك او تبسطت ؟؟
عارفه فيه ناس تغني فيه ناس تعزف فيه ناس تنزل البحر تعوم الرسول صلى الله عليه وسلم كان بيقول ارحنا بها يا بلال .
انتى بقه عندك حاجه تبسطك :)))

يارب اشوفك على طول مبسوطة .
على فكرة انا بعد اذنك طبعا ضفت مدونتك في مدونتي .

ويجعلة عامر

الحلم العربي يقول...

الأخ مصراوي أوي
ربنا يكرمك ..مدونتك منورة بأصحابها
أضحك الله سنك
الحياة مليانة متاعب و منها اللى لا يستدعى الواحد يفكر فيه كتير لأنه إن شاء الله هيزول لوحده المتاعب دي هي اللى بحاول أهرب منها بالطريقة دي ..........
تحياتى

الحلم العربي يقول...

الأخ أحمد رفعت
ربنا يسعدك
فعلا في بعض الأشياء ممكن و لو مؤقتا تبسط الإنسان لو مهموم و أعتقد ده أحسن للإنسان علشان يعرف يفكر في مشاكله بشكل عقلانى بعيدا عن الضغط العصبي ..أنا عن نفسي في حاجات كتير ممكن تخرجنى من حالة الكآبة أولها قراءة القرآن بصوت عالى ثم الكتابة أو قراءة قصة خفيفة ..بس في الآخر الموضوع مترتب على رغبة الشخص نفسه لو عايز يطلع من حالة الكآبة هيطلع و لو مش عايز مفيش حاجة ممكن تطلعه منها أبدا.........ربنا يبعد عنا جميعا الهم و الحزن
بالنسبة لموضوع إضافة مدونتى في مدونتك ...و هل في هذا إستئذان ؟! ..ده شرف ليا ...أنا فعلا شفت الرابط لمازرت مدونتك و سعدت بذلك...
ربنا يكرمك
و تحياتى

مصراوي أوي يقول...

احيانا افتكر حاجة او موقف بيكون مضحك واضحك علية في اوقات مالهاش علاقة بالموضوع

وانا رايح شغلي النهاردة وماشي ف الشارع افتكرت نكتة الزمارة ....بقيت ماسك نفسي بالعافية ليقول مين المجنون اللي ماشي يضحك ده


اشكرك يا اختي الفاضلة
وربنا يفرج عنك كل هم
الاستغفااااااار يفرج الهم

الحلم العربي يقول...

الأخ مصراوي أوي
جزاك الله خيرا ..اللهم اغفر لنا و للمسلمين جميعا
أنا كمان بيحصلى الموقف ده كتير و بكون مش قادرة أمسك نفسي من الضحك و خصوصا و انا ماشية في الشارع أو قاعدة في الشغل لوحدي و فجأة حد يدخل عليه يلاقينى بضحك.بس عادي الناس كلها بتعمل كده ...
ربنا يبسطك على طول و يبعد عنك أي هم أو حزن...........
تحياتى

HoNdA يقول...

ههههههههههه توحفة ع فكرة احساس الواحد بالضايق او بالسعادة ليه دخل م كون الشخص عايز يحس بايه
فلو حسيتى انك عايزة تبقى مبسوطة هتبقى مبسوطة بس طول مانتى قاعدة قولى انا مبسوطة انا مبسوطة لحد ماعقلك يصدق :)

عجبتنى دى اوى
ابنه: بابا انا عايز 50 قرش
أبوه: انت عايز 40 قرش هاتعملايه بال 30 ممعاييش غير ريال تاخد بريزه

الحلم العربي يقول...

honda
عندك حق فعلا
في التنمية البشرية بيقولوا ان القائد الناجح دائما متفائل و كلنا محتاجين نقود حياتنا صح علشان كده لازم نزيد من مساحة التفاؤل في حياتنا
و يارب أشوفك مبسوطة على طول

HoNdA يقول...

يارب:)
اسميل للحياة تسميل لك

HoNdA يقول...

بقولك ايه يابنتى اسلوبك ماشاء الله زورى دار النشر دى مجانا للمدونين وكدا بجد خسارة ممكن تفيدك
دار السوسن للنشر
http://www.darsawsan.blogspot.com/

الحلم العربي يقول...

شكرا على الرابط
زورت الموقع فعلا و عجبنى أوي ..
إن شاء الله هبعتلهم الحاجات اللى كتبتها ..ربنا يكرمك

الحصان الأسود يقول...

ههههههههههههههههه

ربنا يسعدك مثل ما اسعدتنا

تحياتي

الحلم العربي يقول...

الحصان الأسود
أضحك الله سنك
و ربنا يسعدك دايما
تحياتى