٢٠٠٧-٠٧-٠٩

عصرية


في آخرالزمان




يصير الكذب ....تجارة

و الإحساس ....دعارة



و المدفع في يد الطفلة ...دمية



و الدم يجري بين الكفين ......طهارة



قد أصحو يوما من غيبوبة




فأراني فأرا في مختبر أو أنبوبة




فالأحياء حقول تجارب




و أمام عيون التاريخ .....حجارة


.....................



جزء من قصيدة قرأتها منذ عدة سنوات في إحدى المجلات لشاعر مغمور

هناك ٤٢ تعليقًا:

حزيــــــــــــــــــن يقول...

السلام عليكم اختاه
غالبا ما نجد قصائد رائعه لشعراء مغمورين وكثيرا ما طوى التاريخ كلمات ومواهب لم يراها الا صاحبها
عجبنى اخر بيت
طبعا لو بتحبى الشعر عليكى وعلى فاروق جويده
تحياتى

حزيــــــــــــــــــن يقول...

لقيت نفسى اول تعليق
فرجعت تانى اسيب كمان تعليق
اصله مهانش عليا اسيب الفرصه دى كده
ياريت تنضمى لتجمع المدونون المصريون وتنشرى الفكره هتلاقى الرابط فى مدونتى فى السايد بار
انا همشى بقى بس جايز ارجع تانى اصل موضوع او تعليقات دا جامد اوى
:-)

الحلم العربي يقول...

الأخ حزين
........
شرف ليه ان حضرتك تكون اول تعليق خصوصا ان حضرتك شاعر
و كلام حضرتك مظبوط كثيرا ما طوى التاريخ مواهب و أظهر على الساحة أنصاف مواهب
أنا فعلا بحب شعر فاروق جويدة جدا و هو المفضل بالنسبة لى ...

بالنسبة لموضوع تجمع المدونون العرب ممكن أكون غلسة و أسأل عن جدوي الموضوع لأنى شوية مش فاهماه...لكن إن شاء الله هدخل على الرابط في مدونة حضرتك و لو اقتنعت بالفكرة هنشرها

شكرا لحضرتك و تحياتي

حزيــــــــــــــــــن يقول...

مش هتفهمى حاجه من الرابط بصى هو جرووب على الياهو بتشتركى فيه وبعد كده اى حد مشترك هيبعت رساله هتوصل لكل الجروب بس

Alaa يقول...

شاعر مغمور بس جامد

تحياتي

محمود على يقول...

ممكن يكون شاعر مغمور بس عبر باسلوب
قوي قوي عن حالنا دلوقتي

momken يقول...

اختيار رائع لابيات معبره جدا عن واقع
موضوع بين دفتى رحاه
سالوا قديم احد الشيوخ
قالوا يا شيخ اين العيب واين العوج
قال هذه البلد مثل العصا التى استند عليها العوج فيها من فوق

شكرا لامانه النقل وامانه الملكيه الفكريه

تحياتى

ولــــــــــو يقول...

معنى كده ان احنا عدينا اخر الزمان بمراحل
بعض الناس لما بتكتب عن موضوع هايحصل بعد زمن مش بيتخيلوا ان اللي بيكتبوه واللي فاكرينه خيال علمي هايبقى حقيقه غير قابله للجدل
ده مالوش علاقه بالكلام اللي اعتقد انه انعكاس لحاله احنا عايشينها من زمان
احيي الكاتب على ماكتب واحييكي على انك عرفتينا بواحد كان مغمور وانشاء الله شعره عندك يعرف النور

قضية عم أحمد Ahmed Case يقول...

عجبتني أوي الصورة مع الكلام ، شعر جميل .
اختيار جميل ايتها الحلم العربي .

تحياتي

الحلم العربي يقول...

حزين
.....
شكرا للاهتمام ...لكن ممكن طلب غلس ...ممكن تقولى ايه الموضوعات الأساسية في الجروب أصل أنا مشتركة في جروبات كتير و بيجيلى على الايميل رسائل كتير مش بقدر افتحها ...لكن لو الجروب مواضيعه حلوة ممكن اشترك

شكرا و تحياتي

الحلم العربي يقول...

علاء
...
فعلا أنا للأسف مش لاقية المجلة و لا الكشكول اللى كنت كاتبة فيه باقى القصيدة كان ليها جزء تانى حلو أوي ..أنا كتبت اللى انا حفظاه منها فقط

تحياتي

هوندا يقول...

ياحلاوة انا كنت هظن سوء فيكى انك الى كتباها كنت عقطع علاقتى فورا بيكى اصل مبحبش الشعرررر بس هو كلام جميل عموما ومعبر وينطبق ع الفترة الحالية

الحلم العربي يقول...

محمود على
........
فعلا ياما في الشعر مغامييير
و حالنا فعلا منطبق على القصيدة

تحياتي و اهلا بيك

الحلم العربي يقول...

momken
......
ربنايكرمك يا افندم نورت المدونة

لكن أنا مش مع الشيخ هي أصلا العصاية كلها معوجة و محتاجة تصليح مش رأسها فقط

تحياتي

الحلم العربي يقول...

ولو
...
صحيح موضوع الخيال العلمى ده منطبق علينا و الظاهر اننا في آخر الزمان فعلا ..لأن الارض اخذت زخرفها و ازينت و ظن أهلها أنهم قادرون عليها مثلما قال الله سبحانه و تعالى و لكن نسأل الله أن يرحمنا

تحياتي

الحلم العربي يقول...

أحمد رفعت
.......
تعليق حضرتك اللى جميل و بالنسبة للصورة حبيت تكون صورة غريبة شوية و قلت بلاش أحط صورة كئيبة لأن الشعر نفسه يوحي بالتشاؤم شوية
على العموم الحمد لله انها عجبتك و شكرا جدا على التعليق

تحياتي

الحلم العربي يقول...

honda
.....
عيب عليكي يا هنودا هو أنا بردو وش ذلك ...أنا مجرد ناقلة
وبعدين تعالى هنا ...انتى مبتحبيش الشعر ليه يا هانم ...طيب ...هبقى اشوف الموضوع ده معاكي لما اشوفك على الماسنجر ....

سلام يا قمررررررررررررررررر
هههههههههههههههههههههههه

سندباد يقول...

اختيار جميل
تحياتي

أميرة البلطجية يقول...

هاى حلم
انا نزلت الجزء بتاعي
لو سمحتى ردي عليا اقصاها يوم الجمعة اذا كنتي حتكملي ورايا وله لأ
سي يو

غير معرف يقول...

ومن بعض المغمورين يخرج جميل الحكم
وتحياتي لانتقائك الجميل

الحلم العربي يقول...

sendbad
.......
شكرا يا افندم
شكرا لوجودك و نورتني

الحلم العربي يقول...

أميرة البلطجية
............
علم و ينفذ إن شاء الله هكمل وراكي و ربنا يعيننى شكلك كده كاتبة كلام كبير
ربنا يسهل
شكرا للمتابعة و الاهتمام
تحياتي

الحلم العربي يقول...

حائر في دنيا الله
.............
تحياتي للتعليقات المتميزة و أهلا بحضرتك
فعلا من بعض المغمورين يخرج كلام أكثر إبداعا مما هو على الساحة

تحياتي و أهلا بحضرتك دايما

ياسر سليم يقول...

السلام عليكم

اختيار موفق اختى الكريمة

بارك الله فى اختيارك

وجزاكم الله خيراً

هوندا يقول...

قمر فى عينك ياارض ههههههههههه

الحلم العربي يقول...

ياسر سليم
.........
شكرا لوجودك و لتشجيعك و بارك الله فيك

تحياتي

الحلم العربي يقول...

هههههههه
ازاي قمر في عينى يعني أنا أصلا شمس يا بنتى مش قمر ولا أرض ...

من تواضع لله رفعه

Aml Ghonaim يقول...

افتقدت تدويناتك واختياراتك الشعرية تلك كثيرااااا
غالبا ماتختزينه فى ذاكرتك يكون على ألسنة الجميع ...
دمتى بهذا الفهم ؛
وهذا التألق .......

الحلم العربي يقول...

اصرار أمل
.........
أنا التى افتقدت تعليقاتك جدا
عود أحمد ....أؤديك في المقولة و أشكرك على التواجد و التعليق الجميل
و بانتظار تدويناتك المتميزة

تحياتي

semsem يقول...

اختيار هايل
وابيات معبرة فعلا

تحياتى لكى

الحلم العربي يقول...

semsem
.......
أهلا بيكي في المدونة و نورتينى
الحمد لله انها عجبتك خاصة ان انتى فنانة و رأيك يهمنى

شكرا لوجودك و تحياتي

اسلام رفاعى يقول...

فعلا قصيدة رائعة جدا وده واقع احنا بنعيشه
....................................
سعيد بزيارة المدونة الرائعة دى

أميرة البلطجية يقول...

ها يا جميل؟
اخبارنا اييييييييييييييه؟

حزيــــــــــــــــــن يقول...

ياه كل دى ناس جت بعدى
بصى هو الجروب لسه صغير اوى مفهوش غير حداشر مشترك بس
لسه اصلا محدش بيبعت رسائل بس المفروض انه رسائل خاصه بعالم التدوين

الحلم العربي يقول...

إسلام رفاعي
..........
أنا أسعد و الله بزيارة حضرتك و يا ريت تتكرر
فعلا ده واقع بنعيشه دلوقتى لكن نسأل الله العافية

تحياتي و شرفنى وجودك

الحلم العربي يقول...

أميرة البلطجية
.............
أخبارنا انى معاكو وهاخد دوري إن شاء الله و مش هتأخر ..
أنا حطيت كام فكرة كده للتكملة و هشتغل عليهم
لكن تصدقى بقى ان دوري ده أصعب دور لأنه مقيد و في نفس الوقت لازم يكون حاجة كويسة علشان الناس تعرف تكمل عليه

الله المستعان
تحياتي يا جميل

الحلم العربي يقول...

حزين
......
طيب أنا عارفة انى غلسة لكن ممكن اعتذر عن الدعوة لأنى بجد مش هكون عضو فعال في الجروب لأنى بقيت مش بدخل على المدونة كتير و كمان مش هفيد الناس أوي لكن أوعدك لو فيه موضوع حيوي للنقاش على الجروب أنا هدخله على طول

شكرا جدا على الدعوه و بعتذر مرة تانية
تحياتي

ابو العربى يقول...

والله هى روعه ومعبره للغايه

تحياتى

الحلم العربي يقول...

ضد الظلم
........
جزاك الله خيرا
دائما يولد الابداع من رحم الأحزان

شكرا لوجودك و تحياتي لك

أميرة البلطجية يقول...

ماشي يا قمر
طمنتيني
وخلينا على اتصال..لحسن الديانا زي مانتي عارفة
هههههه

مشروع انسان يقول...

القبض على معتز منفى والجيزاوى بحبك يا مصر
تم إلقاء القبض صباحا على كل من المدون معتز عادل صاحب مدونة منفى
وأحمد الجيزاوى صاحب مدونة بحبك يا مصر
وذلك إثناء ذيابهم إلى الهايكستب بطرق مصر إسماعيلية الصحراوى للتضامن مع المحالين عسكريا
monzer they catch me in my way to cairoi donot know were they will take me nawtell all of them to take care and iam with u in modawn7"anafrom mo3takal
وما ألمنى اكثر ولم اقرأه إلا عند كتابة هذه الرسالة هي كلمته الأخيرة
donot forget me

وكانت رسالة أحمد الجيزاوى كالآتي
رسالة للجميع
أنا فى المترو واتقبض عليا خلى بالكم وتروحوا لوحدكم كانت رسالة معتز الساعة السابعة تقريبا، أما رسالة أحمد فبعديها بنصف ساعة تقريبا والامر بين يدي الله جميعا، وحسبى الله ونعم الوكيل
والسلام عليكم ورحمة الله وبركاته ...أخوكم منذر
نقلا من مدونة حين البأس...لاخويا منذر

غير معرف يقول...

من شعر أحمد فؤاد نجم


ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر وتبعت فلوسك دولار او ريال

واحبك تطبل تهلل تهبل عشان مطش كوره وفيلم ومقال

واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك وأذل اللي جابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجيبلك جمااااال