٢٠٠٧-٠٦-١٠

تاج لأول مرة ....من هوندا


لأول مرة في تاريخى التدوينى القصير يجيلى تاج و مين مين كمان من صديقتى التى لا أعرفها هوندا طبعا أنا بشكرها على التاج الظريف ده و كمان بشكرها لأنها أول واحدة تبعتلى تاج أصل التاجات دي بتفكرنى بلعبة كنا بنلعبها انا و صاحباتى في ثانوي

توكلنا على الله


1- أحب شخص لقلبك في الدنيا؟
الرسول صلى الله عليه و سلم ثم أمي الحبيبة صاحبتى اللى بموت فيها و بابا العزيز ثم اخواتى العساسيل و صاحباتى و أولهم بسمة انتيمتى طبعا انتو متعرفوش بسمة بس هي شخصية جميلة قوي و انا بحبها قوي قوي قوي و بحب كل الناس اللى حوالية الطيبين اللى مش بيحبوا يضايقوا غيرهم

2- انسان مستعد تضحي بحياتك – ركز فى كلمة حياتك – عشانه؟
نظريا : أي حد مادام معاه الحق
عمليا : ما اتحطتش في موقف زي ده قبل كده لكن عموما انا نفسي أموت شهيدة و اللى يموت دون عرضه و ماله فهو شهيد



3- انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟ كل اللى أياديهم ملطخة بدماء أسرانا و اخواننا في فلسطين و العراق و الجميع بلاد المسلمين و حتى بلاد غير المسلمين اللى احتلوها الجبابرة ....كل اللى بيدي نفسه الحق يقتل في خلق الله و يستعبدهم و يمص خيراتهم


4- ما هو اسم اجمل كتاب كتبه بشر قراته ومحتفظ به حتي الان؟
بين يدي عمر (خالد محمد خالد)0


5- اسم كتاب كتبه بشر برضة- انت متعلق بيه وبتقرأه كل فترة؟
كتب كتيرة أنا عموما معظم الكتب اللى قريتها بحب ارجعلها تانى منهم مثلا
سلسلة الصحابة (خالد محمد خالد)
لا تحزن (عائض القرني)
معظم كتابات (توفيق الحكيم)
العبقريات
قوة التفكير الابداعي (توني بوزان)


6-
اهم جهاز منزلى انت متعلق بيه او بتستخدمه كتير؟
زمان كان التليفزيون ...دلوقتى أكيد الكمبيوتر

7- مكان تحس بالراحة عندما تدخله؟
المسجد بالذات في رمضان(الملايكة بتكون زيادة شوية)0
بيتنا و انا راجعة من الشغل
دار الحصري في ميعاد الدرس الأسبوعي بتاعنا يوم الأحد



8- شىء تحس بالراحة النفسية عندما تنظر اليه؟
صور المسجد النبوي و الروضة الشريفة (يارب أزورهم قريب أنا و كل اللى نفسهم في الزيارة )
السماء وقت الشروق و الغروب
و البحر أحيانا لكن في الغالب بخاف منه


9- مكان تحس فيه بالحنين الى شىء لا تدرى ماهو و ذكريات جارفة الى لاشىء؟
الكعبة و المسجد النبوي (شوق إلى الحج و العمرة )
المسجد الأقصى(شوق و حنين لتحريره)
المساجد القديمة و الآثار الإسلامية ..بتفكرنى بعصر النهضة الإسلامية


10-أجمل مدينة زرتها داخل مصر؟
أنا للأسف مزرتش مدن كتيرة في مصر لكن في اللى زرتهم
الساحل الشمالي
بلدنا ..الغربية


11- أجمل مكان طبيعي رأيته داخل مصر ؟
صور جبل سيناء (لسة مازرتوش)0
القاهرة من فوق المقطم
أي مكان فيه خضرة كتيير


12- شخصية كارتونية بتحبها
كتييييييييييير
عم دهب
بطوط
الجدة بطة
مينى
تيمون و بومبا
شلبي و وشوشنى
سيمبا
بكار


13- انوع هاتفك المحمول؟
ليه بس الإحراج ده
نوكيا 3200
ايه ماله؟؟؟مش بيقول ألو؟؟؟
انا متبعة النظرية المعمارية اللى بتقول : الشكل يتبع الوظيفة


14- سرعة بروسيسور جهازك؟
الأسئلة دي بتاعت أخويا بس في الغالب 2.1

15- حجم ذاكرة –هارد- جهازك؟
120

16- المساحة التى تشغلها المواد الاسلامية على جهازك؟
20 لكن ليه الأسئلة دي العبرة مش بالمساحة على الهارد


17- أهم هدف انت واضعه لحياتك الآن؟
إنى أكون قدوة صالحة لأولادي إن شاء الله
انى أكمل حفظ القرآن الكريم
انى اتعلم على قد ما أقدر في مجالى (الهندسة المعمارية)0


18- مواصفات فتى الأحلام بالنسبة لك؟
يااه انا كنت محددة مواصفات كتيرة لكن أنا واثقة ان ربنا هيرزقنى بحد أحسن من كل المواصفات اللى كنت محددها
و عموما في حاجات ما ينفعش اتنازل عنها إن شاء الله
1- الأخلاق - أنا آسفة انى مش بقول التدين في الأول لكن بصراحة دلوقتى فيه متدينين أخلاقهم مش قد كده-يعني يكون ابن ناس و أهله مربينه كويس
2- التدين
3- يكون عنده هدف لا يتنازل عن تحقيقه
4- يكون بيحب النجاح للآخرين زي ما بيحبه لنفسه (يعني مش منفسن هههه)0


صف ما يأتى

:

شعورك لما بتسمع كلمة مصر ؟
بحس انى ممكن أضحي بحياتى علشان هي تكون أحسن


شعورك لما بتسمع كلام عن اليهود؟
بتحفز و أشتغل أكتر علشان نكون أحسن منهم و نسترد أرضنا منهم

شعورك لما بتشوف ظابط شرطة؟
بفتكر كل النماذج اللى قابلتها في حياتى منهم و بقعد أدور على حد كويس فيهم مش بلاقى و بعدين بقول أكيد فيه منهم كويسين بردو بس أنا ما قابلتهمش لسة


شعورك لما بتشوف الكناس العجوز فى الطريق؟
بقول أين أنت يا عمر
لو كنت موجود كنت صرفتله راتب شهري و عينتله واحد يرعاه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بقول يارب يكون الجوهر زي المظهر حتى لا تكون فتنة لضعاف النفوس

احساس يراودك فى اشارة مرور مغلقة بسبب مسئول كبير؟
بجد بيبقى نفسي أقوله :
يا بيه انت بس تقعد في مكتبك المكيف دي في حد ذاتها خدمة كبيرة للوطن علشان الشعب يعرف يقضي مصالحه

و بما أن التاج علينا حق فأنا أحب أمرر التاج ده لكل المدونين اللى أعرفهم بس في كتير منهم جاوب عليه علشان كده همرره للى ما جاوبوش عليه قبل كده على حد علمى و على الله بقى ما يجاوبوش عليه هبعتلهم كل يوم تاج لغاية ما يزهقوا منى

إصرار أمل
أحمد منسي
عم أحمد رفعت
همسة قلم
أ/ محمد البنا
لو كنت أعلم

و كل تاج و انتو طيبين و على الأسئلة مجاوبين

هناك ٣٠ تعليقًا:

غير معرف يقول...

يا سلاااام
أنا أول واحد
أنا آسف و الله بس إعذريني إن كنت مقصر بس إنتي عارفة إني يا دوب مخلص ثانوية عامية و كنت صايع في بلاد الله يومين

حلو التاج و أتمنى يكون عرفنا على جزء ولو بسيط من شخصيتك

يسعدني جدا إنك تنضمي لجمعية محبي بكار
مش عارف الناس بيكرهوه ليه مع إنه لازم يشجعوا الصناعة الوطنية

أنا التاج دا اتمررلي تلات مرات دلوقتي بس بيني و بينك مكسل أرد عشان ممرر

هأبقى أحاول أحطله حتتين سكر و أجاوبه

تحياتي

غير معرف يقول...

يللا كمان تعليق لوجه الله
حد دافع من جيبه حاجة
بس دا حقك و الله

بنك الطعام:
أنا فاكر كويس إني شاركت كمتطوع في حاجة زي دي في رمضان اللي كان ف تانية ثانوي و عجبتني الفكرة ساعتها جدا لأنو هنا بتعرفي العائلات الكبيرة لما بتعمل أكل بيفيض منه بالهبل و كان دة بيترمي ف الزبالة لأنو بيتعمل أكل جديد تاني يوم و بالتالي فالأكل دا أولى بيه الناس الفقرا بس السنة دي ما رحتش

الله يخربيت الثانوية العامة يا شيخ

لكن الأحلى عندكو إن الفكرة دي طول السنة و و الله حاجة تفرح القلب ف بلد زي مصر تلات أرباعها حوالين خط الفقر

القديسين:
يسؤني إني كنت كدة زمان فعلا بعدين سبحان الله ربنا سلط عليا واحد من أشكالهم فحسيت بحجم المأساة اللي بسببها للآخرين فبطلت لكني ما زلت حريص إني أتعلم و أكون خلوق لكن إذا واحد مش عاجبه كده خلاص مش لازم أبينله إني مثالي
بس دا ما يمنعشي إني أقول ع الغلط غلط

تحياتي و استحمليني >>أخوكي الصغير

الحلم العربي يقول...

الأخ محمد فوزي آل ربيع:
انت نورت المدونة و الله ...أنا كنت همررلك التاج ده لكن حسيت كده انك مشغول اليومين دول فقلت الثانوية العامة اهم...التاجات تتعوض بعد كده
لكن على العموم لما تفضي حاول تجاوب عليه علشان نتعرف على شخصيتك و معاميقك ...و ابقى اعصر عليه لمونتين علشان هو ممرر
......
بالنسبة لبنك الطعام
جزاك الله خيرا على جهدك فيه و ربنا يجعله في ميزان حسناتك ...و مستنيينك اول ما تيجي مصر تشارك في بنك الطعام المصري ...انت فاكر نفسك هتهرب مننا و لا ايه

بالنسبة للقديسين
أنا كمان كنت زيك و يمكن انا كتبت التدوينة دي كنت بوصف فيها نفسي أحيانا ....لكن في ناس الموضوع بيكون عندهم زيادة شوية لدرجة انهم يكرهوا الناس التانية في الصح
الاعتدال في كل شئ مطلوب و خصوصا في نقد الناس
فيه حكمة بتقول
" النصح ثقيل فلا تجعله جدلا و لا ترسله جبلا"

......
و دايما انت منور المدونة
تحياتي

mohamed elbanna يقول...

اجابات كتير جميله وقريبه من ربنا ان شاء الله
ربنا يباركلك
وكويس انك طلعتى تقريبا كده من سكان اكتوبر والله اعلم
اعتذر عن الاجابة لأنى سبق وجاوبت
وكانت فضيحه بجلاجل
و شكرا لتشريفك لى بذكر اسمى

صباح الفل

الحلم العربي يقول...

أ/ محمد البنا
ربنا يكرمك يا رب
لا و الله انا مش من سكان اكتوبر هو حضرتك بتقول كده علشان دار الحصري يعني ..لا أصل في فرع تاني في مصر الجديدة هو اللى بحضر فيه ...و على العموم فرع الحصري بتاع أكتوبر ده ليه ذكريات جميلة معايا أيام ما كنا بنحضر دروس أ/ عمرو خالد...كانت أيام جميلة بجد
شكرا ان حضرتك فكرتني بيها
و اعتذار حضرتك مقبول عن الإجابة بس ما يمنعش انى بردو كل ما يجيلى تاج همرره لحضرتك ...أنا بقول من الأول علشان ما تزهقش منى...ههه
شرفتنى
و تحياتي

هوندا يقول...

لا يسعنى القول الا ان اقول قشطة ياباشا ههههههه عسل ياحلم ربنا يكرمك بس طلع فينا حاجات من بعض وبتقرى تنمية بشرية كمان لا قشطة قشطة
مبروك عليكى التاج وتعيشى وتتوجى :)

الحلم العربي يقول...

هوندا باشا
و انا كمان لا يسعني إلا أن أرد ..قشطة يا زعيم ...ههههههه
ده شرف ليا ان يبقى فينا حاجات من بعض ...و انتى كمان بتحبي التنمية البشرية ..ايه الجمال ده

شكرا على التاج و عقبال ما اتوجك على عريسك اللى مواصلاته صعبة ده ...ما تقوليله ياخد تاكسي بقى و يجيب عريسي معاه ...شكلهم كده مطبقين ورديتين و هيركبوا الأتوبيس أبو شلن بدل ابو ربع جنيه علشان يوفروا زي حنفي
هههههههههه
سلام يا قمر

ولــــــــــو يقول...

زميلتي العزيزه
اسمحي لي ان ادعوكي زميلتي حيث اننا خريجي نفس الكليه وان كنا لسنا من نفس القسم واعتقد اننا لسنا من نفس الجامعه ايضا احيكي اولا على شجاعتك وعلى ارائك في الرد على التاج كما اود ان اخبرك انني لم اتماك نفسي بعد اكتشافي لبلوجك اليوم ولم استطع الخروج ولا التعليق الا بعد قراءته كاملا بجميع البوستات وكل التعليقات

احيي فيكي نقاءك ووضوحك وعلى الدرب سائره دائما ان شاء الله

ابو العربى يقول...

اجبات غايه فى الروعه تنبع من جوهر متدين
والسؤال الى ملقتش حد مجاوب ذيك بتاع الشب الى يلبس الجلباب
احلى رد شوفته فى كل التاجات
تحياتى

غير معرف يقول...

اجابات جمييييلة

وما اجمل حب الشهادة

ياسر سليم يقول...

إجابات موفقة

وربنا يوفقك و تكملى حفظ القرآن الكريم

تحياتى

الحلم العربي يقول...

زميلى : و لو
تشرفت بزيارتك لمدونتى لأول مرة و طبعا حضرتك تدعونى باللى تحبه و انا كمان هقولك زميلى بما اننا خريجى نفس الكلية
جزاك الله خيرا على التشجيع و يا رب تكون المدونة عجبتك
و ده شرف ليه انك تقراه كله
ربنا يكرمك يارب و يوفقك
و أهلا بيك في أي وقت
أنا كمان هرد الزيارة و هقولك على رأيي في مدونتك إن شاء الله
تحياتي

الحلم العربي يقول...

الأخ ضد الظلم
أشكرك على التشجيع و على الزيارة و دايما منور المدونة
و زي ما بنقول كده على اللى ملتزم دينيا في مظهره لازم نقول كده بردو على كل الناس ما ينفعش نحكم على حد من مظهره...ربنا يطهر قلوبنا جميعا من النفاق و أنفسنا من الرياء
شرفتنى و تحياتي لك

الحلم العربي يقول...

الأخ مصراوي أوي
شكرا على وجودك
ما أجمل الشهادة فعلا ...اللهم ارزقنا اياها جميعا في سبيل نصرة دينك...آمين
تحياتي لك

الحلم العربي يقول...

الأخ ياسر سليم
أهلا بيك في المدونة
آمييييين يارب العالمين
ربنا يجعل القرآن ربيع قلوبنا و نور أبصارنا و جلاء همومنا و أحزاننا ...ربنا يذكرنا منه ما نسينا و يعلمنا منه ما جهلنا و يرزقنا تلاوته و تدبره و العمل به على الوجه الذي يرضيه عنا

جزاك الله خيرا

غير معرف يقول...

www.khirat-elshater.blogspoزورو مدونات ابناء المعتقلين وخاصة مدونة ابناء المهندس خيرت الشاطر

قضية عم أحمد Ahmed Case يقول...

انا قريت التاج وهجاوب عليه طبعا علشان مرحش في داهية ، بس انا خايف بعدما اجاوب عليه ناس كتير ماعرفنيش :)

بس حاضر يا فندم علم ويتفذ

الحلم العربي يقول...

أحمد رفعت
منتظرين الاجابات يا افندم و كويس ان التهديدات الفظيعة اللى عملتهالكوا جابت نتيجة ...انت خايف لأبعتلك كل يوم تاج و لا ايه؟؟؟
هههههههههه
على العموم انا متأكدة ان اجاباتك هتكون متميزة زي جميع تدويناتك...
تحياتي و شكرا على قبول التاج

شماعة يقول...

ما أحلاه الرجوع إلى الله ويا له من موضوع جميل جدا وينمن عن طيب القلب وحسن العقيدة

سندباد يقول...

انجزتي فاجزتي
تحياتي

غير معرف يقول...

رشحتك في الاستفتاء ضمن المدونات الاكثر تاثيرا


صدقيني مش بقول كدة علشان ترشحيني لا خاااااالص

بس فعلا مدونتك وتدويناتك تستحق وتحياتي

الحلم العربي يقول...

كريم فؤاد
تشرفت بوجودك لأول مرة في مدونتى
فعلا ما أحلاه الرجوع إلى الله و ربنا يكرمك على التشجيع ...يارب يكون عملنا موافق لأقوالنا جميعا
أشكرك و أهلا و سهلا بيك

الحلم العربي يقول...

sendbad
أهلا بحضرتك
تفتكر انى اجزت فعلا ده انا حاسة اني رغيت اوي في التدوينة دي
مع انى مش بحب التدوينات الطويلة

ربنا يكرمك على ذوقك و أهلا بحضرتك شرفتنى
تحياتي

الحلم العربي يقول...

مصراوي أوي
تحياتي لك و الله ده ذوق من حضرتك جدا
و من غير ما حضرتك ترشحنى بجد مدونتك اللى تستحق ذلك لأنها مدونة ايجابية جدا يكفي ان حضرتك اول واحد تتفاعل مع موضوع بنك الطعام ...ده ينم عن مسارعة في الخير
ربنا يجعلك من الذين يسارعون في الخيرات دائما و يجازيك خير على ذلك

انا هروح الاستفتاء و اشوف ايه الأخبار فيه يعني نزيه و لا زي انتخابات مجلس الشورى كده....ههههه
و أكيد هرشح حضرتك إن شاء الله لأنك تستحقها أكثر منى

تحياتي

نقطة مية يقول...

شكل بطوط هو حلم المدونين الاول..متفقة معاكي على مواصفات فتى الاحلام...على فكرة التاج ده مر على اغلب المدونين

اجابات تلقائية و تعرف ربنا
تحياتي يا قمر

الحلم العربي يقول...

نقطة مية
أهلا بيكي يا قمر
طبعا بطوط ده حبيبي أصله طيب خالص و ولاد أخوه تاعبينه شوية ...
ربنا يرزقك بفتى أحلامك كما تمنيتيه

فلعا التاج ده مر على كل المدونين اصله تاج ظريف و أسئلته حلوة

شكرا لوجودك يا عزيزتى و تحياتي القلبية

هوندا يقول...

هههههه معلش يابنتى المواصلات غاليه انتى عارفه بقا اشمعنا هيا كل حاجة غلت

momken يقول...
أزال المؤلف هذا التعليق.
momken يقول...

من سياق التاج ده واضح ان الى بعته له غرض معين فى نفسه وعاوز يعرف حجات خاصه وشخصيه عنك
وواضح انه مهتم بالحجات دى اوى
انا اكاد اجزم انه عاوز....اا
عاوز..... يادى الكسوف ياناس مش عارف انطقها

انا اكاد اجزم انه عاوز يشترى الكمبيوتر بتاعك
اهو قولتها اخير ا
وربنا يتمم بخير ااقصد البيعه طبعا

تحياتى

الحلم العربي يقول...

momken
ههههههههههه
بقى كده يا هوندا و انا اللى كنت فاكراكي صاحبتى طلعتى عاملة لى تاج علشان عايزة تشتري الكمبيوتر بتاعي

لكن أنا لن أتنازل عن كمبيوتري أبدا لأن الكمبيوتر لا يقدر بالبتنجان ....و بتسألى على موبايلى نوعه ايه ليه بقى؟؟؟ ...شكلك كده عايزة تشتريه هو كمان
بس لما أشوفك يا هوندا

هههههههههههههه

شكرا يا أستاذ ممكن على التوضيح ده أنا عارفة طبعا ان حضرتك جاي تهدى النفوس ....
بس التاج ده لف على المدونين كلهم تقريبا أما ألحق أحذرهم بقى أحسن يبيعوا كمبيوتراتهم من غير ما يبعتولى عمولتى ..........

تحياتي