٢٠٠٨-٠٤-٠٩

الطريقة المدروسة في عبور شوارع المحروسة


من واقع خبرة 9 سنوات (خمسة كلية +أربعة عمل) في التعامل مع شوارع المحروسة و مواصلاتها العجيبة ، أنقل لكم تجربتى الشخصية مع عبور شوارع المحروسة

لا تتعجبوا من فضلكم ، فعبور أحد شوارع العاصمة هو بحق بالنسبة لي تحدي يومي أواجهه مثلما يواجه جنودنا البواسل الأعداء على الجبهة بكل شجاعة و جسارة

و مثل أي جندي لابد من التدريب قبل مواجهة العدو ، فأنا بدوري أرى أننا - نحن الذين لا نمتلك أو نستعمل السيارات الخاصة - لابد و أن نتدرب جيدا قبل مواجهة العدو -جميع السيارات-

و إليكم خلاصة تجربتى في مواجهة جحافل السيارات في شوارع القاهرة:

1- لابد و أن تضع نصب عينيك أنك في مواجهة عدوك بحق ذلك الذي قهرك و سلبك حقك المشروع في أن تسير مطمئنا في شارعك بل و يفرض عليك أيضا متى تعبر الشارع و متى تنتظر حتى يعبر هو بسيارته اللعينة ، و بما أنك في حرب فلابد أن يكون هدفك هو إحدى الحسنيين إما النصر عليه و العبور العظيم إلى الجانب الآخر من الشارع أو الشهادة ويالها من هدف سامي
و بما أن الشهادة أحد النتيجتين فمن المحبذ بل و من الضروري أن تنطق بالشهادتين قبل عملية العبور .

2- قديما قالوا إختار الصديق قبل الطريق ، فما بالك و أنت في مواجهة العدو ، إذا فأنت بحاجة إلى صحبة آمنة في عملية العبور ، و في الغالب تكون هذه هي الطريقة المثلى في عملية العبور ، ستنتظر إن لم تكن في عجلة من أمرك حتى يتجمع عدد كبير من الناس ثم تنتظر أيضا حتى يتبرع أحدهم بدور مستكشف الفرقة و أحيانا قائد العمليات ثم تنتظر اللحظة الحاسمة التى سيتخذ هذا القائد فيها القرار و اللحظة المناسبة للهجوم ثم يحدث الهجوم دفعة واحدة ، ووقتها تكون عملية العبور تقريبا قد تحققت و لكن حذاري من الفرقة في وسط الطريق لأن تلك الفرقة قد تودي بحياة أحدكم لا قدر الله ...
التحرك سويا و الكل خلف القائد الذي ارتضيتموه من البداية....و معا نعبر إلى المستقبل أقصد إلى الرصيف الآخر

3- حذاري ثم حذاري ثم حذاري من العبور خلف الفتيات ، فأنت لا تعلم شيئا عن ترددهن أمام السيارات ، بل و لا تعلم شيئا أيضا عن ارتباكهن في المواقف الصعبة أمام سيارة نقل أو ميكروباص ،فحرصا على سلامتك كجندي في أرض المعركة لا تحاول أن تعبر الشارع خلف فتاة و بالطبع لن أقول لك خلف امرأة لأن النساء عادة لا يحبذن هذا النوع من القيادة .

4- اتفقنا سويا على أن العدو المستهدف لدينا هو السيارات بجميع أنواعها ، و لكننا لم نتفق على تحبيذ المواجهة لكل أنواع السيارات ، فليس كل عدو يواجه ، بل هناك من الأعداء من إذا اتقيت شره و تجاهلته كنت أكثر أمنا على حياتك ، و لست بحاجة بالطبع أن أعرف لك هذا النوع فبالطبع أنت تعرفه جيدا إنه
الميكروباص و سيارات النقل الثقيل ....فهؤلاء يا عزيزي ليسوا أعداء عاديين بل هم العدو الأعمي الذي لا يترك أمامه أخضرا و لا يابس ...إذا فهذا النوع لا يفضل مواجهته إلا لراغبي الخيار الآخر من النتائج المرجوة ألا و هو الشهادة

5- ينصح بعدم العبور وراء كبار السن و ذوي المعاشات تجنبا لحدوث نوبات السكر و الضغط المفاجئة عافانا الله و إياكم

6- تأكد تماما أن شخصيتك القوية هي من يفرض نفسه على العدو الذي أمامك و أن الحرب النفسية عليها عامل كبير في هزمه و تقهقره أمام لهيب النيران المنبعثة من حدقتيك....تركيز تام على حدقتى العدو - ثبات في أرض المعركة مع حركة باليد تعنى توقف إن لزم الأمر- ثم هجوم ساحق ماحق

7- لا تتردد ...و لماذا التردد و النتائج معروفة كما قلت لك و كلاهما خير لك ....تذكر جيدا أن الأيدي المرتعشة لا تصنع المستقبل و كذلك الأرجل المرتعشة لا تصنع العبور ..

و أخيرا
أتمنى لكل جنودنا البواسل عبورا آمنا و وصولا مستقرا إلى أرض الوطن

ملحوظة: في حالة الحوادث لا قدر الله يرجى عدم الإبلاغ عن المدونة فالمدونة ليست مسئولة عن سوء التنفيذ



هناك ٢٠ تعليقًا:

هوندا يقول...

هههههههههههههههههههههههههههههههههه الحمدلله المنصورة تمام جدا اى نعم اوقات بتكون زحمة بس مش زى القاهرة بص نظرياتك فعلا صحيحه ميه فى الميه وبستخدمها اوقات بطريقه غير مباشرة فى طرق كتير فى المنصورة سريعه فمعاناه ان الواحد يعدى منها وبتحتاجى صحبه فعلا

أنا وصاحبى يقول...

اتفق معك بشده

MarwaAshraf يقول...

يا عم يا عم

حلو أوي جدا خالص موت
بس في مشكلة أكبر وأكبر إنت مش خدتي بالك منها.. إن العدو موجود مكانك ومحتله.. العربيات بتركن وبتمشي على الرصيف وبتأخد صف أول وتاني وتالت ورابع تسيب ليك خرم تعدي منه أو تعدي من تحتيها .. ها ايه بقية الخطة .. ازاي نتعامل مع الاحتلال

ها؟؟؟؟؟؟؟؟؟؟؟؟؟؟؟؟؟؟

Wish I were a Butterfly ... يقول...

إنت بجد سكررررر
:)))
ضحكتيني جدا جدا بالنصايح دي يا حلم
بس فعلا كلهم صح جدا، و على فكرة اسم البوست ينفع عنوان كتاب كويس أوي :)
أنا فعلا بقول الشهادة قبل ما أعدّي من زمان..لدرجة إن دلوقتي بأة الموضوع لا إرداي :) تحسي إنك نازلة البحر وانت مش بتعرفي تعومي مثلا
موافقاكي في كل اللي قلتيه و خصوصا النقطة التالتة
بس.. عن تجربة..مش دايما بيكون التردد هي الصفة،ساعات بتكون التناحة والثبات في وسط أرض المعركة..لحدماتلاقي جندي ضحى بنفسه عشان ينتشلك من أدام دبابة ضخمة -أتوبيس- :)) ودة عن تجربة للأسف

تحياتي

الحلم العربي يقول...

honda
......
طب الحمد لله ان المنصورة مش كده و عقبال القاهرة ما تبقى زي المنصورة ...تفتكري ممكن؟؟؟
ههههههههههههه

الحلم العربي يقول...

أنا و صاحبي
..........
و أنا يشرفني اننا نبقى متفقين و مبروك المدونة الجديدة (:
أشكرك

الحلم العربي يقول...

rama
....
ايه يا راما الأسئلة العويصة دي ؟؟؟
دي عايزة بوست و مخمخة يا بنتى ..
انتى عارفة انا و انا داخلة العمارة بتاعت الشغل بقعد ألف حوالين العربيات زي ما اكون بلعب الكراسي الموسيقية
هههههههه
عموما هحاول امخمخ في الموضوع ده و اقولك
شرفتينى أوي جدا خالص يعني

الحلم العربي يقول...

wish i were a butterfly
........................
هههههههههه
اهو انتى اللى سكر و عسل كمان
ايوة يا بنتى ينفع كتاب و المرور في مصر يستحق كتاب فعلا و بردو مش هيلاقوله حل

انا كمان بقول الشهادة حتى لو كنت بعدي شارع 2 متر علشان عارفة ان شوارع مصر مالهاش كبير ههههههه

و البنات بقى طبعا ...هما صنفين صنف متردد و صنف تنح و كلاهما ما ينفعش تعدي وراه ...أحسن حاجة ان الرجالة بيتبرعوا بالأدوار دي هههههه

أشكرك يا صديقتى الجديدة و نورتينى بجد

عــلاء ســالـــم يقول...

السلام عليكم

ياخبر !!!
انا لو ماشي في شارع ولقيت الوضع زي الصورة اللي عندك دي أول حاجه هاعملها إني أعزل من البلد دي .
أكتر حاجه بأكرهها في حياتي هي الزحمة

مافيش في الدنيا أجمل من الهدوووووووووووء

خالص تحياتي

الحلم العربي يقول...

علاء سالم
........
و عليكم السلام و رحمة الله و بركاته
هو حضرتك عايش فين أصلا ...هو انت مش من البلد دي ؟؟؟
أصل انا سيادتك من ساعة ما اتولدت و هي البلد بالشكل ده ....و مش بفكر اسيبها دلوقتى على الأقل
ههههههههه
الهدوء جميل فعلا لكن هو فين ؟؟؟؟؟؟؟

أشكر لك مرورك الكريم

momken يقول...

ههههههههههههه
والله انتى فقريه
بس دمك سكر

وجديده حكايه خفه الدم دى

كنتى الاول متبنيه موضوع التقل صنعه

البوست دمه زى السكر حسيستينى انتى فة الحرب العالميه الخامسه

المهم بما انى من جيش العدو
الى هما جوة العربيات
عاوز اقولك على ملاحظه غريبه جدا بس موجوده بكثافه
خصوصا بين البنات والستات
الا وهى
انهم مش بيبوصوا وهما بيعدوا الشارع خالص
بالعكس ممكن يبوصوا الناحيه التانيه تخيلى
فاكره واحنا صغيرين لما اهلينا كانوا بيوصونا نبوص كده وكده قبل ما نعدى
ولوفى عربيه جايه نقف مكانا ومنتحركش لحد الشارع ما يفضى

فى بنات كتير جدا جدا جدا بقى ملهمش علاقه بالموضوع ده
والله العظيم مش بيبصوا خالص فى اتجاه العربيات....خاااالص
يا ايما بيبصوا قدمهم...او بيبصوا فى الاتجاه التانى

اخر مره كنت فى سته اكتوبر حصلت معايا قررت انزل وانقشها ورجعت فكلامى وقررت انقشها وانا فى العربيه
تخيلى الرد كان ايه
بتقولى متبوص انت وخد بالك مش معاك فرامل؟؟؟

تخيلى
يعنى لو بغير السى دى
او بدور على الموبيل تحت الكرسى هى هتموت وهى معتمده على النظريه دى

كفايه رغى بقى

البوست دمه زى السكر

هعمل بانصايح دى

تحياتى

الحلم العربي يقول...

momken
.......
هههههههههه
ايه حكاية التقل صنعة دي??? بقى انا كنت كده? لالالالالا انا اللى اعرفه ان التقل صلصة
و بعدين هو انت بتتكلم كمان مش كفاية انك طلعت من العدو ؟؟
بقولك ايه ...بينى و بينك كده مفيش قدامك دبابة نص عمرأصلى نفسي ابقى من العدو بقى زهقت من الكفاح الشعبي ههههههههههه
على فكرة موضوع البنات ده حقيقي جدااااا و بعترف انى احيانا ببقى منهم ....بجد انا اكتشفت الموضوع ده من حوالى سنتين لما مرة كنت بعدي الشارع و قال ايه ما حبكش معايا أسمع قرآن إلا و أنا بعدي الشارع و فجاة لقيت سواق تاكسي من ورايا بيقولى " يا باااااااااردة"
بصراحة ما زعلتش منه لأنى اكتشفت انى كنت بعمل مصيبة وكنت هودي نفسي في داهية هههههههههههه
و كمان موضوع انهم بيعتمدوا على الفرامل ده أكيد ....سمعت الموضوع ده من كذا واحدة قبل كده " هو يعني مش معاه فرامل "
انت نورتنا بتعليقك الظريف و دايما منورنا يا أستاذ ممكن

محمد السيد..مش حاسكت يقول...

مش عارف إيه اللي جابني هنا دلوقتي ...
بس أنا قلت أسلم وبس .....

أنا اساسا بقي لي فترة مش بادخل مدونات .... لانشغالي مش لحاجة تانية ...

بس قلت اسلم ياأفندم ...

اجي الاقي ضرب النار ده برضه اسمه كلام؟


دمتي بخير ... وصحة طيب ...

الحلم العربي يقول...

محمد السيد .....مش حاسكت
........................
يا فاندم حضرتك تشرفنا في أي وقت
و لو نعرف و الله كنا فرشنا المدونة رمل و عملنا حالة هدنة أو على الأقل تهدئة و ضبط للنفس
على العموم انت نورتنا و ما تغيبش عنا كتير
دمت بخير

عــلاء ســالـــم يقول...

ههههههههههههه

لا طبعاً انا من البلد بس من المنصورة مش القاهرة .

عندنا أحياناً زحمه لكن مش بالشكل دا

حائر في دنيا الله يقول...

أنا خلاص اتعودت
ارفع ايدي لأي سواق
واغمص عيني
واعدي
على بركة الله
وهوا حر
أكيد مش مستغني عن عربيته

لأن غير كدا مش هعدي

بس والله موضوع جميل اوي

لك تحياتي
السلام عليكم

الحلم العربي يقول...

علاء سالم
.......
هو ايه حكاية المنصورة ...الظاهر اني هعزل المنصورة قريب واضح انها غير عندنا خالص
طيب ايه رأيك تاخدوا شوية زحام من عندنا و اهو المليان يكب على الفاضي ههههههه
نورتنا
و أشكرك على ذوقك

الحلم العربي يقول...

حائر في دنيا الله
..............
يا نهار ابيض يا احمد لأااااااااا
انت لو اعتمدت على النظرية دي تبقى مستغني عن روحك
هو صحيح صاحب العربية مش مستغني عنها لكن دي في الأول و في الآخر حديد يعني ممكن تتصلح بسهولة لكن تصليح البني آدم صعب
هههههههههه

طيب المهم بتقول الشهادتين و لا لأ
ربنا يستر
تحياتي و أشكرك على التشجيع

Ahmed Mansi يقول...

مساء الهنا
انا مش هعلق على الموضوع انا هعلق على التعليقات
اولا لان ماشاء اللة البوست بقالة شعبية وجمهور ودى حاجة تسعدنى طبعا لانة دليل على النجاح مبروك عليكى
ثانيا تناولك لموضوعات الحياة الكفاحية فى البلد عجيب ودا الى خلى التعليقات تكون سريعة ودمها خفيف لانها من واقع الحياة
تحياتى

الحلم العربي يقول...

mansi
.....
ايه الكلام الجميل ده لأ احنا مش قده
ربنا يكرمك يا افندم و ياريت تكتر من زياراتك لأنك كسول شوية في المدونات مش كده و لا ايه
بس اسعدتني زيارتك بجد و تعليقك :))