بلا تعليق

كنت ناوية أكتب تدوينة تانية خالص ....لكن ما علينا الظروف تحكم

أعلنت اليوم نتائج استفتاء الدستور و طبعا النتيجة 75.9 % يعني جيد جدا .....يا سلام

لا أدري لماذا أحسست بالدموع في عينى عندما عرفت الخبر بالرغم من توقعاتى بأن تزيد النسبة عن ذلك ب15% على الأقل بالطبع فسياسة القهر نتائجها لابد و أن تكون 100% 0

الصحف كلها بتحلل و تقول ان تعديلات الدستور هي تمهيد لتوريث الحكم .......0

لا أدري لماذا تذكرت طليق إحدي قريباتى عندما كان في فراش الموت و شعر بدنو أجله جمع أولاده من طليقته التى كان ظلمها كثيرا في حياته و ظلم أولاده منها بظلمه لها أكثر ....جمعهم لا ليعيد لها حقوقها ....و لكن ليوصيهم بألا يعطوا لأمهم حقوقها و إلا سيحرمهم من الميراث............0

في الماضي السحيق عندما كان يشعر الانسان بأن أجله قد اقترب كان يستعيد ماضيه و يحاول أن يقترب من ربه بأن يعيد للناس حقوقهم ....أما الآن ........لا تعليق

اللهم إنا نسألك حسن الخاتمة

لا نحن نحن........... و لا الزمان هو الزمان

أستطيع أن أقول أن حالتى النفسية اليوم هي الأسوأ ...........
كثيرا ما يسألنى أصدقاء الكلية أو القليل منهم الذين أقابلهم بالصدفة أو الذين لازالت بيننا مكالمات هاتفية قليلة للاطمئنان عن رأيي إذا كنا الآن أحسن من أيام الكلية التى كانت بها شقاء و عناء كثيرين جدا أم أن حالنا كان أفضل في أيام الكلية؟؟
و لكنى كنت أجاوب بأننا الآن أحسن بكثير و كانوا هم دائما معارضين لى متعللين باننا الآن نتعب و نحمل الهموم رغما عنا و اننا مهما كنا نتعب في الكلية و لكن همومنا لم تكن بذلك القدر و أن أيام الكلية كنا صغار و أننا الآن نشعر باننا كبرنا زيادة عن اللزوم.
و لكن كانت دائما وجهة نظري بأننا الآن نعرف ما نفعل و نستطيع التخطيط لحياتنا افضل دون ان يتحكم فينا دكاترة الجامعة المتغطرسون ...
و للحق أيضا كنت أحاول أن أنظر للمسألة بشئ من التفاؤل و أشعر نفسي بأن الحاضر أفضل من الماضي و أن المستقبل أفضل إن شاء الله..........
و لكنى اليوم أشعر كم كانوا صادقين في شعورهم فنحن بالفعل كبرنا............
كبرنا قبل الأوان ...... حملنا الهم بدري ......
كلنا تغيرنا حتى الذين يصرون على العكس...............
3 سنوات و نصف مرت على تخرجنا من الكلية .... كلما قابلت أحدهم شعرت كم تغيرنا......كلما نظرت لنفسي و تذكرت حالنا أيام الكلية ....عرفت كيف أننى أنا نفسي تغيرت..
صديقاتى .........أحبهن كثيرا ...و لكن.....شئ تكسر بيننا
زملاء الجامعة و مساحة الاحترام التى كانت بيننا كلها كانت ذكريات جميلة .....و لكن الآن ....شئ تكسر بيننا
أعترف أننى كنت سببا في ذلك الشئ الذي تكسر ..... لا أنكر ذلك و خاصة فيما يتعلق بمساحة الإحترام التى كانت بينى و بينهم .. كنت اريدها اكبر ... او بمعنى أصح ..كنت اريد أن أقطع علاقتى بهذه الحياه......... كنت قد مللت من هذه الحياه...
كنا بحق ملتزمين....أكثر من الآن.... بالرغم من ذلك الاختلاط الذي يسمونه في الكلية...
أتذكر اجتماعات الأبحاث و كيف كنا في أول كل اجتماع ننظر في الأرض من فرط ما كنا نريد لعلاقاتنا سويا شكلا محترما و أتذكر أيضا كيف كانت تتلاشي تلك النظرات الخجولة بالوقت و لا يشغل بالنا إلا تلك الهموم الكبيرة في أعيننا وقتها و هي انجاز على الأقل خمس أبحاث في الغالب يجب أن نسلمها كلها في وقت واحد.
أتذكر هؤلاء الناس الذين كنت أتمنى أن أتعرف عليهم و ان أكون قريبة منهم و لكن خجلى منعنى..... لو رأيت هؤلاء الناس الآن ما ترددت في ان أذهب لهم و أتعرف عليهم .....ألم اقل أنى تغيرت كثيرا....
كنا بحق ملتزمين ..... أكثر من الآن ....كانت البراءة تحيطنا
كانت شرائط عمرو خالد هي الأشياء المتبادلة بيننا.......كنا نتحدث كثيرا عن الضلال الذي يعيش فيه الكثير من طلبة الجامعة و عن كثرة سماعهم للموسيقى والأغانى....و عندما تمر بنا لحظات عصيبة في تجهيز الأبحاث نجد أحدنا تبرع و وضع شريطا قديما لاحد الأغانى ليروح عنا ..............و لا يجد من يعارضه منا......الآن لا يحدث أحدنا نفسه بهل مشاهدة قنوات الأغانى كثيرا حرام ام لا ....ألم أقل أننا تغيرنا كثيرا
ذكرتنى هذه الذكريات بأبيات فاروق جويدة:
لم لا نقول أمام كل الناس .........ضل الراهبان
لم لا نقول حبيبتى ..........قد مات فينا العاشقان
فالعطر عطرك و المكان هو المكان
لكننى ما عدت اشعر في ربوعك بالأمان
شئ تكسر بيننا
لا أنت أنت
و لا الزمان هو الزمان
أعتقد ان ما فقدناه بمرور الوقت هو شئ كبير.............هو البراءة

احذر ...... اللبن فيه سم قاتل

حتى اللبن يا ناااااااس......حسبنا الله و نعم الوكيل
من قبل التحقيقات الصحفية بكتيير و انا بسمع عن موضوع بودرة البلاط..
من حوالى سنة كنت بتكلم مع اخويا عن اللبن و بحكم انه كان وقتها في بكالوريوس زراعة قسم ألبان كان بيكلمنى عن ان عندهم دكتور في الكلية بيقولهم ان في مصانع ألبان بتنتج لبن ليس له علاقة نهائيا بالجاموسة او البقرة و ساعتها ماصدقتش أخويا ، كان بيكلمنى عن خلطة معينة بيعملوها بتخلى الخليط لا يختلف نهائيا عن اللبن و ان الخلطة دي ما حدش يعرف يكشفها أبدا حتى الأجهزة الحديثة ، قالى كمان ان المصانع الكبيرة بتستخدم الخلطة دي لما يكون عندهم نقص في المواد الخام اللى هي اللبن طبعا.
من ساعتها و انا عندي شك في كل الألبان المصنعة لكن نسيت الموضوع و رجعت بعدها أشرب لبن عادي.
لغاية من حوالى 6 شهور لما كنت في البلد و كنا بتكلم مع خالى اللى عايش في البلد و قالنا ان تجار اللبن في بلدنا كلهم اغتنوا و بقوا راكبين عربيات آخر موديل و السر في انهم بيعملوا خلطة غريبة عبارة عن بودرة بلاط و بطاس و زهرة غسيل و ان في شخص معين هو اللى جه بلدنا و عرفهم الخلطة دي و كلهم بقوا بيعملوها داخل البيوت و يوردوها على القاهرة و يبيعوا للمصانع و الشركات كمان .
جمعنا كلام أخويا على كلام خالى و الرؤية أصبحت أوضح بعد ما عرفنا من اخويا ان الخلطة دي بتدخل جهاز غريب اسمه " المجنس" ده بيخلى المركبات تدخل في بعضها لدرجة انها لا تكتشف أبدا .
من يومها قاطعنا اللبن في البيت خالص و حتى لو نفسنا هفتنا على كوباية شاي بلبن كنا بنشربه و احنا عندنا يقين ان ده مش لبن و كان بينتهي بيه الأمر لحوض المطبخ.
مرة تانية كان ابن عمي بيتكلم مع اخويا و حكاله ان ابن خاله بيشتغل مع واحد من تجار اللبن في بلدنا و انه ( ابن عمي ) راح له مرة الشغل و شاف الجهاز ده بنفسه وواحد واقف عليه و قدامه كوباية لبن طبيعي ينظر للونها و يغرف كوباية من بودرة البلاط و يفرغها في الجهاز و ينظر لكوباية اللبن تاني فيلاقى اللون مش مظبوط فيغرف من زهرة الغسيل اللى جنبه و يفرغ في الجهاز و ابن عمي بيقول ان الراجل بصراحة كريم جدا في موضوع بودرة البلاط ده .... ياللا خلى الناس تشرب....
اتخرج اخويا و اشتغل في شركة ألبان مهندس جودة.....
و كانت الضربة القاضية عندما جاء لنا مرة يحكي عن حديثه مع تاجر اللبن الذي يورد لهم اللبن في الشركة .....
قبل ما احكى الحديث لازم اقولكوا ان عملية الكشف عن اللبن في المصنع دي عبارة عن جهاز بيكشف نسبة المياه في اللبن و الجهاز ده بصراحة دقيق جدا لدرجة ان لو الكوباية كانت مغسولة و مش متنشفة مثلا بيعطى نسبة مياه في اللبن ... و لكن المشكلة مش في الميه خالص زي ما انتو عارفين...
المهم اخويا حب يهزر مع التاجر بيقوله : "على فكرة احنا عارفين ان ده مش لبن حقيقى بس احنا بنكبر دماغنا "
راح التاجر قاله بابتسامة عريضة :" لا يا باشمهندس ازاي تقول كده ...... يعني هو مرة بيكون لبن و مرة لأ و الدنيا بتمشي مفيش مشاكل ..هههههه"
شوفتوا بقى.... يعني بلسان التاجر نفسه بيعترف انه مش لبن .
أنا عندي سؤال بس هو الناس دي بتشرب و لادها ايه؟؟
طب بيجيلهم نوم باليل ازاي ؟؟؟؟؟؟؟
ربنا يسترها علينا . دي الناس الغلابة بتقطع من قوتها علشان تجيب اللبن ده لولادها يكونوا بيشتروا لولادهم السم اللى هيموتهم ...
اللهم ارحمنا...
اللهم إذا أردت لعبادك فتنة فاقبضنا إليك غير فاتنين و لا مفتونين ...

دماء أسرانا

إلى التلفزيون الاسرائيلى

أحييكم . لقد أثرتم كل ما بداخلنا من ألم في هذا الموضوع .و نلتم كل أغراضكم الدنيئة.

عندما علمت بخبر بث التليفزيون الاسرائيلي فيلما يفضح جرائمهم بأسرانا استعجبت كثيرا ألم نكن نعلم ذلك ؟ أليست كل ذاكرتنا عن النكسة تدور حول ما حدث لأسرانا فيها أليس تاريخنا الحديث و مسلسلاتنا و أفلامنا تتحدث عن ما حدث لأسرانا على أيديهم؟؟!!أم أننا كنا ننتظر منهم الاعتراف لنتحرك ؟؟!!!!

عجيب امرنا جدا . نسامح قبل أن يطلب المخطئ منا السماح .ننسي بشاعتهم بينما هم يذكرونها جيدا.

نغض الطرف بينما هم يطلبون منا العكس ..

و في النهاية يظهر لنا وجها سمجا لطالما ألفناه على شاشة التلفاز و يقول لنا ان الامر لا يستدعي كل ذلك .. هي مجرد زوبعة في فنجان ...

و لكنى أطمئن المسئول جدا سواء قلت ذلك أو لم تقل فنحن ألفنا التسامح . ليست هذه الطعنة الوحيدة في صدورنا لنتأوه منها فطعناتكم أشد و أقسي و أكثر .على الأقل عندما يطعننا العدو نعرف أنه عدوا و نتخذه كذلك و لكن عندما يطعننا راعاتنا و الموكلون بحمايتنا لا ندري لمن نذهب و بماذا نرد .... أليس ذلك أقسي ؟؟؟!!!!!

كلام كلام

أوقات أفوق و يحل عني غبايا

و اشعر كأنى فهمت كل الخبايا

و افتح شفايفي عشان حقول الدرر

مااقولش غير حبة غزل في الصبايا

عجبي

عندك حق و الله يا صلاح جاهين...

أول ما عملت المدونة تخيلت انى هقول و هقول و هكتب كل يوم رأيي في اللى بيحصل في البلد حواليه و أنا مش عارفة أغيره .

و بعد شهر تقريبا من بداية عملى للمدونة أكتشفت انى كل اللى قلته مجرد كلام. كلام و خلاص .

كلام و لا قدم و لا أخر و ياريته حتى بين حقائق و لا أظهر شئ جديد ....

بلدنا اللى بيتكلموا فيها أكتر بكتير من اللى بيشتغلوا و دي مشكلة . و اللى بيشتغلوا ما بيتكلموش و دي مشكلة بردو.

شئ من الرشوة

اليوم كان آخر يوم لي في تعلم قيادة السيارات .

ركبت السيارة و معى القائدو بدأنا الدرس .

سألنى : " هي كريستيان ديور دي حريمى و لا رجالى"

قلتله : " أعتقد ان ها حريمي بس هي ماركة عالمية ممكن يكون منها الرجالى ة الحريمي"

القائد:" أصل النهاردة في واحدة آخر يوم ليها زيك كده بردو جابتلى هدية بارفان كريستسان ديور بس أعتقد انها حريمى لأن ريحتها حريمي اوي "

أنا :" سكوووت تااااااااام"

القائد:" اديتها للسكرتيرة أصلى مش هستعملها "

أنا :" بردو سكووووت تاااااااام"

القائد : " كانت اديتلى 30 و لا 40 جنيه في ظرف و خلاص هو أنا هعمل ايه بالبارفان"

أنا : " أصل في ناس كتير مش بتعرف البارفانات الحريمى من الرجالى"

القائد ( طبعا بعد ما زهق من سكووووتى التاااام) : هو انتى تعرفى حد في المرور هيعملك الرخصة ".

أنا: " لأ ".

القائد:"لو احتجتى حد يعملهالك ابقى قوليلى".

أنا :" هو انت تعرف حد في المرور".

القائد:" ايوة أعرف واحد شغال هناك بيعملها ب700 جنيه ايه رأيك ؟"

أنا :" يااااه 700 جنيه"

القائد :" ده علشان خاطري انا انما هو بياخد من الناس 1500 جنيه "

أنا :" بس أنا أخويا عملها من غير واسطة"

القائد :" معقولة ؟!!! هو في حاجة بتتعمل دلوقتى من غير واسطة . على العموم جربي و لو احتجتى ابقى قوليلى"

و انتهت المناقشة . ايه رأيكو ؟!!!!!!!!!!

خلصت الحصة و أنا حاسة ان بلدنا كلها أصبحت بالشكل ده مفيش حاجة بتمشي فيها غير بالفلوس ..... رايحة اتعلم السواقة في مكتب و بالطبع دفعتلهم فلوس علشان يعلمونى و بالطبع الراجل ده بياخد مرتب منهم و ده أصلا شغله ليه يحاول يبتزنى و يحشرلى حكاية علشان يفهمنى انه من الواجب عليه انى اجيبله هدية في آخر حصة و طبعا أنا لما طنشت بقيت في نظره بخيلة و مقرحة.

طيب اتعلمت السواقة و لسة طبعا همارس كتير و بعدين هروح اعمل الرخصة طيب ما دمت اتعلمت ايه لزمة انى ادفع رشوه لموظف في المرور علشان يعملى الرخصة ؟!!!!!! حد يجاوبنى الله يخليكوووووو هو الابتزاز المهنى اللى الراجل ده حاول يعمله معايا مش يعتبر شئ من الرشوة ؟!!!

هو مش الرسول صلى الله عليه و سلم قال للرجل اللى كان بيوزع الصدقات و جتله هدية و راح للنبي عليه الصلاة و السلام و قاله هذا لكم و هذا أهدي إلى فرد الرسول صلى الله عليه و سلم عليه " فليقعد أحدكم في بيت أمه ثم لينظر سيأتيه أم لا "

هو ايه اللى حصل في الدنيا؟؟ ليه الحرام بقت ليه مسميات كتيرة عندنا و كلها من باب إحلاله .

طيب لو قلنا ان الراجل ده ماضربنيش على ايدي علشان اجيبله هدية و لا اديله 40 جنيه في ايده طيب الراجل التانى اللى عمل تسعيرة للرشوة ده بيحللها لنفسه ازاي ؟ و أكيد هتلاقيه موظف محترم و واخد وضعه و أول ما الأذان يأذن يكون هو على سجادة الصلاة .الله أعلم

أرجوكم حد يقولى هو انا اللى مش فاهمة الدنيا و لا هما اللى غلط؟

أقول ايه بس ؟ ........ اللهم أخرجنا من الدنيا دون أن تلوثنا الدنيا ........آمين

ممكن نتعرف

أول مرة أعمل مدونة. اعذروني هكون مرتبكة شوية .
قبل ما نتعرف انا عايزة الاول اقولكم انا عملت المدونة ليه؟
مش علشان انا عضوة في حركة سياسية معينة ........
ولا علشان ليه اهتمامات فنية أو دينية كبيرة......
انا بنت عربية مسلمة مصرية ............
عندي 25 سنه ...........كتير مش كده؟
حلمى بلادنا تكون أحسن بلاد في العالم . نفسي مانعيشش عالة على البلاد المتقدمة . نفسي لما الواحد مننا يسافر و يقول انه عربي يقولها بفخر و يلاقى نظرة الاعجاب في عيون الناس.
أعتقد هو ده الحلم العربي . إن الانسان العربي ترجعله كرامته المهانة.و علشان كده حبيت أعمل مدونة علشان افضفض فيها لمن يهمه الأمر و اقول آرائي البسيطة و أحلامى للى مهتم يعرف أحلام بنت عربية .
هواياتى: القراءة - كتابة القصص - مشاهدة التليفزيون (في بعض الأحيان ده عيب مش ميزة)- الطبخ .
اهتماماتى :دين - سياسة( اذا اتفقنا على مسمى ان السياسة هي كل ما يخص أمور الناس) -فن - هندسة( نسيت اقول انى مهندسة) .
اعتقد دي معلومات مبدئية عنى و سنوافيكم بالأخبار بعد الفاصل................