٢٠٠٧-٠٥-١٢

سيناء ...و أغانى السلام



من كام يوم كنت بقلب في التليفزيون كعادتى لما أحب أن أعرف عن كل القنوات كل شئ حتى أقرر أنى سأشاهد لا شئ
المهم ..جلست أقلب في القنوات حتى رأيت أغنية لمجموعة من المغنيين المصريين ...لا و كمان بتتكلم عن سيناء ..إذا ..لازم اتفرج عليها
ما انكرش ان الأغانى الوطنية دلوقتى مش زي زمان .
بردو ما الأغانى الدينية مش زي زمان.
ما بقتش بقعد استنى الاغانى دي زي ما كنت زمان بقعد استنى أغنية وطنى حبيبي الوطن الأكبر مثلا و أقعد أغنى معاها .
الأغانى فقدت مصداقيتها .
عاملة زي الفراخ البيضا كده .
لا طعم و لا لون و لا ريحة.
على العموم دي سمة الجيل كله
المهم لفت نظري حاجة
المطربين لابسين أبيض
قلت أكيد قصدهم على السلام.....السلام اللى هو الخياااااااار الاستراتيجى
قلت ماشي نعديها
كلمات الأغنية كلها عن ان سيناء مهد للديانات
و ان في أنبياء كتير مشيوا على أرضها
و على استحياء كده جابوا سيرة ان في ناس استشهدوا فيها
كلام جميل
...................................
اللى استفزنى بقى وخلى الدم يضرب في نفوخي هو آخر مشهد
الصورة على جسر مليان رايات بيضا مرفوعة
!!!!!!!!!!!!!!!!!!!!!!!!!!!!!!!!
حد يقولى معناها ايه
؟؟؟؟؟؟؟
طيب المخرج العبقري اللى صور الأغنية دي مفكرش يعنى يحط صورة علم مصر و لو حتى لحفظ ماء الوجه
؟؟؟؟؟؟؟؟؟
ده حتى ما هانش عليه يجيب صورة العلم طول الأغنية
!!!!!!!!!!!!!!
و كأن سيناء دي بلد مستقلة أو بقعة على الخريطة محدش يعرفها و هو بقى بيعرفنا عليها
بلد السلام
بلد الرايات البيضا المرفوعة
بلد خطى عليها كل الانبياء فعشان خاطرنا محدش ييجي يحاربنا فيها
و احنا علشان ما تزعلوش مش هنحط عليها علم مصر
هو ده السلام
؟؟؟؟؟؟؟؟؟؟؟؟؟؟؟؟؟
أعتقد لو كان حط علم مصر كان هيقول المعنى بشكل أحسن
يمكن مش عارف معناه كويس

الأحمر: دم خير أجناد الأرض اللى روى أرض سيناء قبل ما ترويها الماء
الأبيض : سلام مش استسلام...نسالم من يسالمنا و نعادي من يعادينا
الأسود: سمار ولادنا ...طين الأرض و خيرها...لون مقابر الغزاه اللى ماليه بلادنا
................
هو ده علم مصر زي مانا شايفاه و اللى عندى أحسن من مية راية سلام سياسية
..........................
مش عارفة إذا كانت أغنية زي دي فرحت أهالى سيناء و لا لأ لكن الأكيد انها حرقت دمى
...........

هناك ٢٢ تعليقًا:

الحصان الأسود يقول...

أنا ماشفتش الاغنية و لا سمعت عنها بس يمكن قصدة انها طريق الحجاج
و مش شرط ان الاعلام البيضاء هيه علامة الاستسلام
ماهو برضة الحجاج و هما طالعين الحج بيرفعوا اعلام بيضاء عالسيارات و التاكسي لغاية المطار او الميناء للعبارة

تحياتي

الحلم العربي يقول...

الحصان الأسود
شرفت مدونتى
بس المطربين ما كانوش لابسين لبس الحجاج...و بعدين انا مش معارضة ان يكون فيه رايات بيضاء لكن على الأقل كان جاب سيرة مصر و العلم المصري خصوصا اننا بنتكلم عن سيناء ..سيناء اللى ناس كتير ضحت بأرواحها علشان يترفع عليها العلم المصري
يبقى لما نعمل عليها أغنية ..أقل حاجةإننا نرفع العلم المصري فيها ...و مفيش مانع بعد كده لو رفعنا الأعلام البيضاء
شكرا لتعليقك
تحياتى

هوندا يقول...

يابنتى علم مصر بقا بيتحط ع الشباشب دلوقتى

"رمز السيادة الوطنية يستخدم في الحمامات.. "شباشب" مطبوع عليها العَلَم المصري تغزو الأسواق بـ 15 جنيهًا فقط"

http://www.almesryoon.com/Archive/ShowDetails.asp?NewID=33942&Page=1

الحلم العربي يقول...

honda
يا نهار ابيض ...مش مصدقة
على الشباشب ...أكيد الصور دي متفبركة ......معقول
اوعى تقوليلى انهم
made in china
دي تبقى مصيبة لو في ناس بتستعملها فعلا
هي البلد ايه اللى جرالها
الله يسامحك يا هوندا
هو انا يا بنتى ناقصة حرقة دم

غير معرف يقول...

طبعا علم مصر كان لازم يبقي في الكادر

هما مين دوا اساسا اللي هيغنوا اغاني وطنية....شلة التافهين اللي بنشوفهم ع الفضائيات؟؟؟؟

لو هما دول اللي هيزودوا وطنيتنا يبقي احنا منستاهلش نكون مصريين اساسا

الحلم العربي يقول...

الاخ مصراوي أوي
من غير ما نعيب في حد يعني هو عندك حق فعلا مش دول اللى هيعلمونا الوطنية لكن نعمل ايه هو ده اللى موجود دلوقتى
اللى بيغني أغنية وطنية و هو أصلا متهرب من الجيش ...و اللى بتغنى أغنية وطنية كدعاية لشركة معينة ....و هكذا و هكذا ما بقاش في حد بيعمل حاجة من أجل عيون الوطن,,, و لسة ياما نشوف
ربنا يرحمنا

سندباد يقول...

مساء الخير
دي زيارتي الاولي وتشاء الاقدار ان يكون البوست شديد وصدامي اوي انا شفت الاغنية وعلي الرغم من ان محدش غني لمصر بعد الحليم غير محمد منير الا انها عجبتني بس بصراحة انا مخدتش بالي او مجاش في بالي موضوع العلم ده انما عندك حق العلم ده رمز للدولة

الحلم العربي يقول...

brother sendbad
طبعا شرفت مدونتى و يارب ماتكونش آخر مرة
انا آسفة إذا كان البوست شديد و صدامى لكن الموضوع بجد حرق دمى ...أو يمكن انا فهمته بصورة غلط
لكن دي سيناء يا جماعة لازم و احنا بنعمل عنها عمل نكون حريصين أوي على ظهور قيمتها و قيمة الناس اللى ضحوا بحياتهم علشانها و قيمة بلدنا طبعا...
أعتقد الموضوع ليه علاقة بان الفن دلوقتى بقى سبوبة و سلق بيض
مش عارفة الحركة دي مقصودة و لا لأ لكن حتى لو مش واخدين بالهم يبقى عذر أقبح من ذنب
شرفت مدونتى مرة تانية و فرصة سعيدة
تحياتى

هوندا يقول...

ههههههه معلش يابنتى انا دمى اختفى اساسن بس انا جايبه الخبر من جريدة المصريون موضوع الصناعه ده بقا معرفوش بصراحة ربنا يستر

Aml Ghonaim يقول...

لم أسمع هذه الأغنية ؛ لكن كأنى سمعت أختى تتحدث عنها ...
ياحبيبتى ؛ الأمر أننا نسينا كل شىء الا الرايات البيضاء ؛
أتعرفين لم ؟ لأننا استمرأنا الاستسلام ؛
ولماذا استمرأناه ؟ لأنه لم يعد لدينا قدرة على التحدى ؛ أو على مواجهة مانقدر عليه حتى ؛ فما بالك بما لانقدر عليه ؟؟؟؟
ذكرتينى ؛
لى قصة طويييييييييلة مع الأغانى الوطنية ؛
كنت أحب بشدة أغنية لمحمد ثروت وأنا طفلة ؛
ذكرتينى بها ؛؛؛؛
واليــــــــــوم :
لم يعد هناك أغان حتى !!!!!
تحياااتى الخالصة لك ياحبيبة ؛؛
ودعواتى لك ....

الحلم العربي يقول...

honda
و الله بجد انا مش عارفة بنطلب من الجيل الصغير الانتماء ازاي و حواليهم كل اللى بيحصل ده...
ربنا يرحمنا
شكرا على وجودك يا قمر
سلام

الحلم العربي يقول...

عزيزتى أمل
فعلا نحن استمرأنا الاستسلام...تحقق فينا قول الرسول صلى الله عليه و سلم :"حب الدنيا و كراهة الموت"
حتى أمجاد أجدادنا نضيعها بفن جاهل و أغاني لا تنفع بل تضر ...تميع الانتماء بداخلنا....
الاغانى زمان كان ليها هدف نبيل علشان كده كانت بتأثر فينا ...حتى في الجيل اللى قبلنا كانت كلمات زي القومية العربية و الوحدة العربية حلم بجد للفلاح البسيط و العامل ...أما الآن أصبح كل واحد له عالمه ، عايز يكفي عياله أكل و شرب بالعافية و يمشي جنب الحيطة أحسن...يمكن هو ده الفرق اللى خلى الأغانى بتاعتهم زمان كان ليها طعم أما أغانينا الآن .........
تحياتى و دعواتى لك

قضية عم أحمد Ahmed Case يقول...

مساء الفل
انا مشفتش الاغنية ديه الحمد لله
بس بجد انا عندي سؤال هو احنه فعلا دلوقتي بقه عندنا اغاني وطنية يا استاذة اللى بيغني لمصر دلوقتي نانسى عجرم انا بقالى قرن مسمعتش اغنية وطنية حسستني بالحنين والحب للاسف .

المشكله اكبر من كبير من الاغنية المستفزه المشكله في قتل الوطنية اللى حصل في الشعب المصري الشقيق

غير معرف يقول...

هههههههههههههه

أنا موتت من الضوووحك

أغاني وطنية مين؟

مش نانسي عجرم بقت تغني أنا مصري

ما هو إذا المصري بقا النموذج اللي هما حاطينه في الكليب

يبقى نعمل أغاني وطنية ليه؟
عندنا نانسي و إذا حبكت نجيب هيفا
عادي يعني

و بصي بقه
عايز أقول للحصان الأسود اللي ف الأول ده اللي فاكر نفسه جاب التايهة
ما يتفلسفشي كتير

الحلم العربي طول ما هوا حلم مش هيتحقق
الأحلام ما بتتحققش
لازم يكون رؤيا

أنا كنت داخل أرد الزيارة و الله بس بجد المدونة عجبتني فعلا و حاسس إني متوازن نفسيا لما بقرأها
شكلي هآجي هنا كتير

تحياتي و شكرا على المعرفة الحلوة دي

الحلم العربي يقول...

أحمد رفعت
مساء النور
فعلا احنا مبقاش عندنا أغانى وطنية ...و لا أغانى دينية...و لا حتى أغانى عاطفية ...و لا فن من أساسه
احنا بقى عندنا أي سفه و استخفاف بعقول الناس علشان الشركات تعمل دعاية و إعلانات و الناس تبيع و المواطن يدفع لآخر قرش في جيبه و جيب اللى جنبه لأن المواطن من كتر ما الاعلان عاجبه هيشتري الحاجة حتى لو فلوسها مش معاه....
و طبعا المفروض ان الأغانى اللى يعرضوها علينا و اللى بيسموها وطنية تنمى في أبنائنا الانتماء و حب مصر لأن الفاضلة نانسي بتحب المصري اللى ابوه مصري
...........
آسفة على الإطالة بس انت جيت على الجرح
تحياتى العميقة لأنك دايما بتيجى على الجرح

الحلم العربي يقول...

محمد فوزي آل ربيع
أهلا بيك في المدونة لاول مرة
طبعا شر البلية ما يضحك ...ليك حق تضحك و الله
انت فاكر في ماتش النهائي بتاع الأمم الافريقية لما المنتخب المصري كسب المباراه ...ساعتها المعلق المخضرم مدحت شلبى من كتر فرحته قعد يغني اغنية نانسي عجرم في الميكروفون على الهواء ..............
يومها قلت نفس الكلام اللى انت بتقوله...
إذا كانت دي الاغاني الوطنية بتاعت دلوقتى يبقى الجيل الجاي هيكون عامل ازاي؟؟؟
ربنا يستر
شرفت مدونتى و يا رب الزيارة دي تكرر ...يبقى شرف ليه
تحياتى

حزيــــــــــــــــــن يقول...

انت شكلك مصراوى اوى انا اول مره اجى عندك
ابقى زورنى
http://mazaag.blogspot.com

الحلم العربي يقول...

الاخ حزين
لا انا مش مصراوي اوي...أنا مصراوية أوي...هههههه
أصلى بعتز جدا بتاء التأنيث
و إن صح القول انا وطنية عربية اوي أوي
شكرا لتعليقك و مرورك
أنا بالفعل زرت مدونتك ...مدونة متميزة حقا في حب مصر
تحياتى

صاحب البوابــة يقول...

مقال جميل

به مشاعر معبرة

عما وصل اليه حالنا من مآسي

تحياتي لقلمك المبدع

الحلم العربي يقول...

صاحب البوابة
جزاك الله خيرا
شرفت مدونتى لأول مرة و يسعدنى وجودك ...
تحياتى

حلم الحرية يقول...

ولو اني مش باعتبر الاغاني دي اغاني وطنية
وباتفق مع اراء اللي سبقوني وعلقوا...اذا كان نانسي عجرم غنت وقالت انا مصري ..يبقي ازاي وطني

حتي في الغنا بنستورد ناس تغنيلنا واللي ينرفز ان اسمها اغنية وطنية

انا شفت الاغنية وبصراحة ما اخدتش بالي من الاعلام جايز لاني مكملتهاش لغاية الاخر

لكن طبعا اصدق
بصراحة يعني اعلامنا المبجل يعملها
يعني هيه الاغنية حتخرج لا سمح الله عن السياق العام وتحط علم مصر
تحط علم مصر ليه طالما العلم الابيض موجود

نفسي حد دارس لغة عربية يروح يفهمهم الفرق بين السلام والاستسلام
احسن شكلها عويصة اوي وهما مش قادرين يفهموا الفرق بين المعنيين
وشكلنا محتاجين متخصص عشان يفهمهم الفرق


مدونتك جميلة
سعيدة باول زيارة ليا فيها

الحلم العربي يقول...

واحدة بتحب البلد دي
أنا أسعد بتعرفي عليك
فعلا احنا محتاجين مدرسين في كل المواد يعلموا القائمين على البلد و على الفن في بلادنا الفرق بين السلام و الاستسلام
شكرا لمرورك
تحياتى