عدت يا يوم مولدي

في مثل هذا اليوم 13مايو سنة 1982 يعني من 28 سنة بالضبط كنت بعيط واااء واااء لأنى جيت للدنيا ، أصل كلنا تقريبا بنعيط أول ما بنيجي الدنيا عادي يعني

و الحقيقة دي كانت المرة الأولى اللى أعيط فيها لكن أكيد ماكانتش الأخيرة .

و بعيدا عن العياط و الحاجات دي المفروض أكون مبسوطة و لو اني ما اعرفش بالظبط ليه المفروض أكون مبسوطة يوم ميلادي مع اني كبرت سنة ، لكن يمكن المقصود من الفرحة اننا نفرح بسنة عدت عملنا فيها حاجة جديدة ، أصل أكيد في السنة دي فيه و لو حاجة واحدة جديدة عملناها أو درس اتعلمناه أو تجربة مرينا بيها كانت كويسة أو وحشة المهم اننا قابلناها

و يمكن تكون الفرحة في يوم الميلاد فرحة بأننا النهاردة أصغر من السنة الجاية بسنة كاملة ، يعني قدامنا سنة نعمل فيها حاجة جديدة نفرح بيها و احنا بنحتفل بيوم ميلادنا الجاي

ومن غير لخبطة كتير هحاول افتكر اللى حصل لي خلال العام الماضي

1- رجعت من الكويت بعد قرار أخذ مني تفكير كتير لكن أنا سعيدة بيه لأنى اتعلمت من تجربة السفر بما فيه الكفاية و اعتقد انى أخدت القرار في الوقت المناسب الحمد لله

2- اتوطدت علاقتى بناس كانوا بمثابة أيقونات التفاؤل و التعافي و الفضل لله في وجودهم في حياتي

3- قرأت عدد من الكتب لا بأس أذكر منهم :

لم أعرف أن الطواويس تطير - بهاء طاهر

البستان - محمد المخزنجي

اليهود في عقل هؤلاء- عبد الوهاب المسيري

الآن أفهم - زغازيغ - الغرفة207- أحمد خالد توفيق

ما فعله العيان بالميت - بلال فضل

و كتب أخرى استفدت منها الكثير و الكثير

4- مريت بالصدمة اللى بياخدها كل واحد جرب الحياة خارج مصر ولو لسنة واحدة و ساعد في زيادة شعوري بالصدمة بعض المحن اللى مر بيها ناس قريبين مني و أظهرتلى قد ايه للأسف بلدنا مش بتتقدم بينا

5- أخدت خطوة كان نفسي فيها من زمان و اشتركت في ورشة الكتابة اللى فعلا اتعلمت فيها كتير و قابلت فيها ناس محترمة جدا بداية من أ/ محمد حسنين اللى المفروض اكتب عنه تدوينة لوحده لغاية أصدقائي في الورشة اللى استفدت كتير منهم

6- كان نتاج الورشة كتاب نكش فراخ تجربة استفدت من الأخطاء فيها أكتر من الحاجات الكويسة ناس كتير شكرت في الكتاب و ناس كتير أفادوني بنقدهم و ملاحظاتهم أتمنى اننا نعرف نتفاداها في الجزء الثاني اللى هيكون جاهز قريبا إن شاء الله

كفاية كده بقى أصل دي سنة كاملة أكيد حصل فيها حاجات تانية :)

أما السنة الجديدة فأتمنى حاجات كتيرة فيها أولها و آخرها يتلخص في كلمتين

1- الإخلاص

2- الهمة

يااااارب اجعل أعمارنا شاهدا لنا لا علينا

و اهدنا فيها للصراط المستقيم

ملحوظة : العنوان مقتبس من أغنية لفريد الأطرش بس كئيبة قوي ماينفعش أكتب كلماتها في مناسبة زي دي :)

ملحوظة تانية : نستقبل جميع أنواع التهاني و الأمنيات و التورتات الحقيقي منها و الافتراضي و نشكركم لحسن تعاونكم

أختكم : آية :))