2010-05-13

عدت يا يوم مولدي



في مثل هذا اليوم 13مايو سنة 1982 يعني من 28 سنة بالضبط كنت بعيط واااء واااء لأنى جيت للدنيا ، أصل كلنا تقريبا بنعيط أول ما بنيجي الدنيا عادي يعني
و الحقيقة دي كانت المرة الأولى اللى أعيط فيها لكن أكيد ماكانتش الأخيرة .
و بعيدا عن العياط و الحاجات دي المفروض أكون مبسوطة و لو اني ما اعرفش بالظبط ليه المفروض أكون مبسوطة يوم ميلادي مع اني كبرت سنة ، لكن يمكن المقصود من الفرحة اننا نفرح بسنة عدت عملنا فيها حاجة جديدة ، أصل أكيد في السنة دي فيه و لو حاجة واحدة جديدة عملناها أو درس اتعلمناه أو تجربة مرينا بيها كانت كويسة أو وحشة المهم اننا قابلناها
و يمكن تكون الفرحة في يوم الميلاد فرحة بأننا النهاردة أصغر من السنة الجاية بسنة كاملة ، يعني قدامنا سنة نعمل فيها حاجة جديدة نفرح بيها و احنا بنحتفل بيوم ميلادنا الجاي
ومن غير لخبطة كتير هحاول افتكر اللى حصل لي خلال العام الماضي
1- رجعت من الكويت بعد قرار أخذ مني تفكير كتير لكن أنا سعيدة بيه لأنى اتعلمت من تجربة السفر بما فيه الكفاية و اعتقد انى أخدت القرار في الوقت المناسب الحمد لله
2- اتوطدت علاقتى بناس كانوا بمثابة أيقونات التفاؤل و التعافي و الفضل لله في وجودهم في حياتي
3- قرأت عدد من الكتب لا بأس أذكر منهم :
لم أعرف أن الطواويس تطير - بهاء طاهر
البستان - محمد المخزنجي
اليهود في عقل هؤلاء- عبد الوهاب المسيري
الآن أفهم - زغازيغ - الغرفة207- أحمد خالد توفيق
ما فعله العيان بالميت - بلال فضل
و كتب أخرى استفدت منها الكثير و الكثير
4- مريت بالصدمة اللى بياخدها كل واحد جرب الحياة خارج مصر ولو لسنة واحدة و ساعد في زيادة شعوري بالصدمة بعض المحن اللى مر بيها ناس قريبين مني و أظهرتلى قد ايه للأسف بلدنا مش بتتقدم بينا
5- أخدت خطوة كان نفسي فيها من زمان و اشتركت في ورشة الكتابة اللى فعلا اتعلمت فيها كتير و قابلت فيها ناس محترمة جدا بداية من أ/ محمد حسنين اللى المفروض اكتب عنه تدوينة لوحده لغاية أصدقائي في الورشة اللى استفدت كتير منهم
6- كان نتاج الورشة كتاب نكش فراخ تجربة استفدت من الأخطاء فيها أكتر من الحاجات الكويسة ناس كتير شكرت في الكتاب و ناس كتير أفادوني بنقدهم و ملاحظاتهم أتمنى اننا نعرف نتفاداها في الجزء الثاني اللى هيكون جاهز قريبا إن شاء الله
كفاية كده بقى أصل دي سنة كاملة أكيد حصل فيها حاجات تانية :)
أما السنة الجديدة فأتمنى حاجات كتيرة فيها أولها و آخرها يتلخص في كلمتين
1- الإخلاص
2- الهمة
يااااارب اجعل أعمارنا شاهدا لنا لا علينا
و اهدنا فيها للصراط المستقيم

ملحوظة : العنوان مقتبس من أغنية لفريد الأطرش بس كئيبة قوي ماينفعش أكتب كلماتها في مناسبة زي دي :)
ملحوظة تانية : نستقبل جميع أنواع التهاني و الأمنيات و التورتات الحقيقي منها و الافتراضي و نشكركم لحسن تعاونكم
أختكم : آية :))

هناك 10 تعليقات:

zazooo يقول...

ya ray2ah(((((((((((

الجــــيرة والعشــــرة يقول...

كل سنة وانتي طيبة، وإن شاء الله تحقق كل امنياتك السنة دي.

MR.PRESIDENT يقول...

كل سنة وانت طيبة
انا اكبر منك بيومين واصغر ب 6 سنين

كل عام وانتي بخير

وعبال ما تحققي كل امنياتك

قلب ينبض لله يقول...

كل سنة وانتي طيبة يا آية
اه انا شوفت كومنتك عندي قولت دي آية اللي قابلتها في الورشة

دخلت البلوج اتأكد طلعتي فعلا هيا
بجد وحشااااااااااااااني جداااااااااا

ربنا يعود عليكي الأيام بالهنا والسعادة يااااااااااااارب

الحلم العربي يقول...

زازووو
.......
شكرا شكرا ربنا يروقك زيي يا أختى يا حبيبتي :))

الحلم العربي يقول...

الجيرة و العشرة
...............
و انت طيب يارب و ربنا يحققلك كل أمنياتك انت كمان
أشكرك بشدة

الحلم العربي يقول...

mr.president
............
يااااااه الريس برج الثور زيي انه لشرف كبير يا افندم :)))
كل سنة و انت طيب و يارب تكون سنة مليانة نجاح و ثقة إن شاء الله

الحلم العربي يقول...

قلب ينبض لله
...........
و انتى طيبة يا رضوى انتى كمان واحشااااني جدا و اتمنى اشوفك قريب إن شاء الله و على طول متابعة مدونتك
فيه ناس ماينفعش ننساهم :))

هوندا يقول...

كا سنة وانتى بخير يايويو :))

الحلم العربي يقول...

هوندتى : و انتى طيبة يا هنودة متشكرة جدا :))