ما حرمتش ......تاج تاني

عايزة أقولكوا ان التاج اللى فات سبب ليه ضيق شديد لأنى ضايقت بيه ناس لما مررته لهم و اعتذارا لهم و لأي حد ما بيحبش التاجات ....أنا مش همررلهم التاج ده و حتى لو مررته لأي حد منهم فياريت يسامحونى و ما يجاوبوش و أنا هكون متفهمة جدا لوجهة نظرهم

ندخل بقى في التاج

انت مين ؟؟-
اسمي آية ...في ناس بتحب تدلعنى بيويا أو أيويا لكن الأظرف اللى بيدلعوني بآية بتفخيم الألف أو اللى بيقولولى أوءة لأنى بحس انهم بيذمونى مش بيدلعوني ..هههههه

بنت مسلمة عربية مصرية و انتمائي الأكثر للثلاث حاجات دول

اللى بياخدوا بالظاهر بيقولوا مهندسة و بيقولوا طيبة و هادية لكن العالمين ببواطن الأمور عارفين انى لا بفهم في الأولى و لا انا التانية و لا التالتة

مين اكتر ست اشخاص بتحبهم ؟؟؟-
انظر التاج اللى فات و انت تعرف

هل انت سعيد ؟؟ -
ما يهمنيش أكون سعيدة دلوقتى قد ما يهمنى أكون سعيدة في الآخرة علشان كده عمري ما سألت نفسي السؤال ده و لا ركزت في إجابته .....الأهم هو الرضا و أنا الحمد لله راضية جدا و بتمنى من ربنا انه يوفقنى أعرف أستغل النعم اللى أنعم عليه بيها في الخير

لو اجتمعت مع حسنى مبارك فى مكان واحد هتعمل ايه ؟ -
اتعلمت من التنمية البشرية انى لما حد يسألنى سؤال و أنا مش عايزة اجاوب عليه أرد عليه بالسؤال ده

انت بتسأل السؤال ده ليه؟؟؟؟؟

لو جاوبتني هرد على سؤالك

عموما : هغنيله أغنيه : اخترناه اخترناه....قاعدين ع المصطبة وياه

لو معايا مليون و نص اعمل ايه ؟؟؟ -
ربع مليون لبنك الطعام

ربع مليون لتزويج كام شاب من الفقراء

نصف مليون أبدأ بيه مشروع في دماغي نفسي أعمله لأطفال الشوارع

نصف مليون أفتح بيه مكتب هندسي معماري

بتحب مصر ؟؟ -
أمال يعني؟؟؟؟

طبعا بحبها

انت مسلم ؟؟ -
الحمد لله

ليه ؟؟ -
لأنى من يوم ما ابتديت أفهم رضيت بالله ربا و بالإسلام دينا و بسيدنا محمد صلى الله عليه و سلم نبيا و رسولا

مين اكتر شخصية متقدرش تستغنى عنها ؟؟؟ -
أكيد أمي ربنا يخليها و يحفظها و يبعد عنها كل مكروه

ايه اكتر موقف محرج ؟؟ -

ههههههه. كنت في الثانوية العامة و رايحة أذاكر مع واحدة صاحبتى ليلة امتحان الفيزياء ... و أنا رايحة عندها حسيت ان الجزمة واسعة على رجلى ...استغربت شوية و بعدين نسيت

المهم رحت عندها والمذاكرة خدتنا و هي قالتلى ريحي نفسك اقلعى الجزمة قلعتها عادي ....

و أنا ماشية جيت ألبسها .....مش راضية تتلبس أبدا ...و أحاول ...مفيش

عملت كل الحاجات ...لبيسة ...مفيش ....استنى شوية و آجي ألبسها تاني ....مش ممكن

المهم كان شكلى محرج جدا ...خصوصا ان اخواتها الولاد كانوا موجودين و كل شوية يعدوا علينا لأننا كان قاعدين في الرسيبشن ...و أحس انهم مش قادرين يمسكوا نفسهم من الضحك...أنا كمان قعدت أضحك زي الهبلة لأن الموقف بجد كان يفطس من الضحك ...و اللى زود الموضوع انى كلمت اخواتى في البيت علشان حد فيهم ييجي و يجيبلى واحدة تانية معاه ...مالقيتش حد من اخواتى الولاد في البيت

المهم من ستر ربنا ان أخوها كان عارف طريق بيتنا راح جابلى واحدة تانية من بيتنا لبستها و من يومها عمري عمري عمري ما أقلع جزمتى عند حد و لو حصلى ايه
ههههههههههههههههههه

الامنية اللى اتمنى تحقيقها؟؟

لو السؤأل على أمنية واحدة تبقى أكيد ان ربنا برحمته يدخلنى الفردوس الأعلى من الجنة بجوار الرسول صلى الله عليه و سلم أنا و كل من أحبهم

جينا بقى للكلام اللى بيزعل الناس مننا : همرر التاج لمين؟؟

همرره لكل الناس اللى عندي في يمين المدونة و خصوصا الناس اللى ما بيحبوش التاجات منهم (غلسة غلسة )ههههههههه

عن الصبر و الإنتظار

في وجه المصاعب .....نقف ....نتأمل ...نتحير

أحيانا تجبرنا الحياة على الصبر.....و أحيانا تجبرنا على الانتظار ....و أحيانا أخرى تجبرنا على ....الصمت

إذا أردت أن أتكلم عن الصبر هنا فأنا أكاد أجزم أنه لا يوجد على أرض الوطن العربي من لا يحفظ هذه الكلمات:0

إن الله مع الصابرين

و اصبر و ما صبرك إلا بالله

إنما يوفى الصابرون أجرهم بغير حساب

الصبر مفتاح الفرج

كلها عبارات جميلة نحفظها جيدا و مصدرها آيات القرآن الكريم و ميراث قديم من الأجداد و الأباء عن معاني الصبر المحمودة................0

و لكن هل نحن بالفعل نصبر ؟؟؟....أم ننتظر

و ما الفرق بين الصبر و الانتظار ؟

أعتقد ان مفهوم الصبر هو الصبر عند المصيبة أو البلاء ....أن ترتضي ما كتبه الله عليك و أن تحمده على البلاء كما حمدته من قبل على النعمة ...إن كنت قد فعلت

أن تبذل جهدك كي تحسن من وضعك و لكن إن لم يحالفك التوفيق فلتصبر و لترضى و لكن مع الاستمرار في العمل و البذل

هذا هو مفهوم الصبر من وجهة نظري

أما ما نفعله أو يفعله كثيرون مناهو.................. الإنتظار

أن تنتظرهم بينما تعلم انهم لن يأتوا أبدا

هؤلاء ...الذين كلما هبت رياح ذكراهم ملئت عيناك دموعا لم تمسحهما غير يداك

هؤلاء الذين نسوا ...و باعوا ...و تركوك ....و لكنك تأبى إلا أن تلعب دور الشهيد المنتظر

هؤلاء الذين أخذوا و لم يعطوا ....هؤلاء الذين وعدوك ....ثم خانوا....و لكنك دائما تلتمس الأعذار

أن تنتظرها كي تكون حياتك أفضل و كي تستقر في حياتك و كأنها امتلكت مفاتيح حياتك قبل أن تراها....تلك التى سوف يكون كلامها أعذب من صوت أمك ......تلك التى ستحبك و تبذل من أجلك كل شئ .......تلك التى ستعطيها حنانا لم تعطه من قبل لأمك التى بذلت بالفعل من أجلك كل شئ

أن تنتظريه ...ذلك الذي سيجعل لحياتك معني ...ذلك الذي سيجعلك تنظمين وقتك و تهمتين بنفسك .....ذلك الذي سيفهمك من قبل أن تتحدثي ....ذلك ال ..............الذي هو في علم الغيب

من منا ليس في حياته ذلك الشئ الذي يشل حركته و يجعله ينتظر

ينتظر لحظة الاستقرار كي يحدد حلمه و أهدافه

ينتظر رمضان كي يقرأ القرآن

ينتظر ليلة خالية البال كي يركع هاتين الركعتين في جوف الليل

ينتظر النصف الآخر كي يقلب له موازين الحياة

ينتظر ضربة الحظ التى ستجعله سعيدا طوال حياته

ينتظر الحب كي يعطي

ينتظر الأمل كي يبذل

ينتظر النهاية كي يبدأ

استوقفتنى مرة جملة سمعتها تقول :

"أصعب ما في حياة الموظفين الانتظار فهم :

في أول اليوم ينتظرون آخره كي يعودوا للبيت

و في أول الأسبوع ينتظرون آخره كي يحصلوا على يوم الإجازة

و في أول الشهر ينتظرون آخره كي يحصلوا على الراتب .....فحياتهم كلها انتظار"

للصبر حلاوة لأن آخره جزاء بغير حساب ...أما الانتظار فآخره.....انتظار فحسب

كلام أغاني

اشتروني و اشتروا خاطر عيوني......ريحوني
ياللى غاويين تتعبوني ........ريحوني
صدقوني
النهاردة أنا بين ايديكوا صدقوني
بس بكرة هتدوروا مش هتلاقوني
صدقوني بكرة
هتدوروا مش هتلاقوني
.........................
جزء من أغنية لوردة

حد فهم حاجة؟؟؟؟؟
مفهمتوش!!!!!!
ليه بس كده؟؟؟؟؟
من الآخر هو ده اللى انا حاسة بيه النهاردة

هو مش كلام أغاني ؟؟
بس ساعات بيبقى في الجووول
يا سلام عليكي يا وردة لما تبدعي

نفسك....إن لم تشغلها بالطاعة ....شغلتك بالمعصية

الشباب عايز يتجوز ....و البنات عايزة عربيات

أولا عايزة أقدم لكم شكر و اعتذار

أما الشكر فلكل اللى حاولوا يخففوا من حالة الضيق اللى كنت فيها اليومين اللى فاتوا ....بجد جزاكم الله خيرا
و أما الاعتذار فلأنى كئبتكوا معايا في التدوينة اللى فاتت و مش المفروض ان الناس جاية تقرا المدونة علشان تكتئب ....لكل اللى اتضايقوا من حالة الغم اللى كنت عاملاها ...اعتذر بشدة


ندخل بقى في الموضوع

بحاول أرصد حال الشباب و البنات في سني و نظرتهم للزواج، و تحديدا بدأت من آخر سنة في الكلية ليه يعني حوالي من أربع سنين

كنت مثلا بسأل زملائي الشباب : عايزين تعملوا ايه لما تطلعوا من الكلية؟؟0

منهم اللى كان بيقولى عايز افتح مكتب ، و اللى كان بيقول عايز أدور على شغلانة كويسة بمرتب كويس ، واللى كان عايز يسافر ..

و لما كنت بسألهم عايزين تعملوا كده ليه ؟ كان الإجماع انهم عايزين يكونوا نفسهم علشان يتجوزوا أو علشان لما يتقدموا لواحدة يكونوا جديرين بيها و ما يقعدش باباها يقوله منين و بتقبض كام و شقتك فين و الحاجات الكتير اللى بيخاف منها أي شاب رايح يتقدم لعروسة....

و خلال الثلاث سنوات اللى مرت من ساعة ما اتخرجت من الكلية لغاية دلوقتى و أنا بحاول أشوف ايه اللى حصل للشباب دول

واحد منهم مثلا : خطب من حوالى ست شهور و كان طاير من الفرحة و عرفت أد ايه كان بيقول إنه مبسوط و إنه لقى البنت اللى كان بيحلم بيها و ان هو ده كان أمله في الحياه ..و حاجات كتير بالشكل ده

طبعا احنا قلناله ألف مبروك و احنا بجد مبسوطين ...بس كانت فيه حاجة غريبة لاحظناها انه مبسوط أوي و فكرنا ياترى البنت مبسوطة أوي كده زيه؟؟

بعدها بشهرين كانت واحدة زميلتى بتكلمه و بتسأله عن أحواله و بالمرة قالت تسأله على خطيبته و كان الرد المفاجأة : " لأ هي خلاص ما بقتش خطيبتى احنا سيبا بعض" 0

واحد تانى : كان نفسه يخطب و هو في الكلية لكن ظروفه ما كنتش مساعداه ...بعد ما اشتغل و ضمن وظيفة كويسة فوجئنا بيه بيتقدم لواحدة مننا و لأنه ماكانش مناسب ليها رفضت....ساعتها قالها :"لو سمحتى ما تقوليش لحد من زملائنا في الكلية " لكن هي كانت بالفعل قالت لنا

بعدها بشهرين اتقدم لواحدة تانية مننا و رفضت ....بعدها بشهرين تانيين تقدم لواحدة ثالثة مننا و رفضت ...و كان كل مرة يقول للى بيتقدملها نفس الجملة انها ما تقولش لحد

لغاية ما بعدها خطب واحدة من برة الكلية و اتجوز فعلا

واحد ثالث كان معانا في الكلية كان كل أمله انه يخلص الكلية بأي تقدير علشان يشتغل في أي شغلانة بتجيب فلوس كتير و لتكن البورصة مثلا .....

بعد ما اتخرجنا فتح مكتب شوية و بعدين اشتغل مقاول شوية و بعدين فوجئنا بيه اشتغل في البورصة ...طيب ليه كده ده انت مهندس ...كان رده :" يعني هي الهندسة هقبض منها كام في الشهر ..أنا مرتبي من البورصة أضعاف مرتبي من الهندسة "...0

و دلوقتى بيدور على عروسة أهم حاجة ان يكون شكلها حلو لدرجة انه خطب مرتين و محصلش نصيب و بيدوردلوقتى بكل طريقة على عروسة تكون كويسة و حلوة .......

واحد رابع خطب مرتين و ماحصلش نصيب و في كل مرة يكون مزأطط و الفرحة مش سايعاه و محسس كل اللى حواليه انه أسعد إنسان في الدنيا ....و بعد كل مرة يقول اصلها كانت كذا و كذا و طبعا يطلع فيها القطط الفاطسة

.....................

أما البنات

كذا واحدة اتجوزت و قعدت في البيت

أما اللى دخلوا معترك الحياة و الشغل ................

واحدة كل نفسها انها تحوش و تجيب عربية لدرجة انها قالتلى مرة لما كن متقدم لها عريس :" أنا بس أجيب عربية و مش عاية اتجوز خالص"ساعتها استغربت جدا

واحدة تانية لما اتخطبت قعدت تحسبها بالورقة و القلم هو خطيبها بيقبض كام و هي كام و كانت مضايقة جدا انه بيقبض اقل منها ( على فكرة هي مش مادية خالص في الحقيقة بالعكس تماما )

واحدة تالته مش مهم عندها تتجوز المهم انها تكمل حلمها و تفتح شركة بتاعتها و هي في سبيل الحلم ده ممكن تضحي بكل شئ

واحدة رابعة لا هي عايزة ده و لا ده ....كل حلمها انها يكون عندها فيلا بتاعتها تعيش فيها لوحدها بعيدا عن غطرسة الأباء و تحكم الاخوات الكبار

واحدة خامسة سابت كل اللى اتعلمته في الكلية و بتبتدي دلوقتى تتعلم العلم الشرعي و سابت الشغل علشان عايزة تتجه لدراسة الدين لأنها مقتنعة ان كل اللى اتعلمته في الكلية علم لا ينفع

و كتير من البنات اللى اتخرجوا و اشتغلوا أفكارهم بيتتغير من ناحية الجواز بالذات

الظاهرة دي مستوقفاني بقالى فترة

ليه الشباب بقوا بجد نفسهم يتجوزوا و فيه منهم اللى بيتجوز لمجرد الجواز و بيكونوا طايرين من الفرحة لما يخطبوا لمجرد انه يتقال على الواحد فيهم انه خطب ...

أما البنات بقى طموحها حاجة تانية خالص

بحاول أفسر وجهة نظر البنات .....يمكن ما بقاش الأمان للبنت دلوقتى راجل لأن فيه رجالة كتير بتمثل مثال سئ للبنات

يمكن الفلوس بقت أمان أكتر للبنت على أساس ان لو معاكي فلوس تقدري تعملى اللى انتى عايزاه من غير ما حد يتحكم فيكي

يمكن نظرة المجتمع دلوقتى للست اللى بتشتغل انها ست ليها وزنها أما اللى قاعدة في البيت تربي العيال دي عالة على المجتمع مثلا

يمكن لأن في رجالة كتيرو انا أعرف كتير بالنوعية دي معتمدين بشكل أساسي على مرتبات زوجاتهم و كأنها من واجبات الزوجة انها كمان تصرف على البيت فالبنت بتقول و انا ليه اتجوز و اجيب واحد يشاركنى في تعبي كمان

يمكن لأن الستات في مجتمعنا بجد بيتعبوا أوي و بالذات المرأة العاملة اللى مطلوب منها تكون في الشغل مركزة و زي النحلة و البيت جميلة و مرتبة و كل شئ تمام و في تربية الأولاد حكيمة و صبورة و كل الحاجات دي ...أما الراجل فبمجرد دخوله البيت هو عبارة عن كائن له كل الحقوق ....من حقه ما يشوفش حاجة مش عاجباه ...من حقه ياكل في الوقت اللى متعود عليه ...من حقه ما ينزعجش من صوت الولاد ...من حقه ولاده يتربوا أحسن تربية لأن هي دي مسئولية الست ...من حقه كل شئ و ليس عليه من المسئوليات شئ

طبعا أنا لا اتكلم عن جميع الرجال و لا جميع النساء ...فأنا شخصيا لم أر ذلك المثال في بيت أبي و أمي و لكنى رأيته في بيوت أخرى

مش عارفة تحليلى صح و لا غلط لكن ايه رايكوا انتوا ؟؟؟مش بجد الموضوع ده محتاج بعض التأمل ؟؟؟؟

مدينتى بلا عنوان

مش بحب اكتب عن نفسي تدوينات ...لكن النهاردة بجد محتاجة أكتب لأنى مضايقة كتير

مش عارفة مالي

كتبت ثلاث تدوينات و حفظتهم في الدرافت لأنى مش راضية عنهم

مخنوقة

مضايقة

و لأنى مش بحب اتكلم عن نفسي هنا هسيبكوا مع قصيدة كئيبة معبرة عن حالتى لفاروق جويدة بس جميلة جدا جدا
هي القصيدة طويلة شوية لكن تستحق القراءة

مدينتي.. بلا عنوان

........................

ما عاد يا دنياي وقت للهوى
ما عاد همس الحب.. في وجداني
ما عاد نبض الحب ينطق بالمنى
و كفرت بالدنيا.. و بالإنسان
فحملت أحلاما تلاشى سحرها
كرفات قلب ضاق بالأكفان
و نسيت أزهارا غرسناها معا
و جنى عليها الدهر بالحرمان
و جنيت منها الحزن كأسا ظالما
كم ذبت يا عمري من الأحزان
و حسبت أن العمر بحر هادئ
فرأيت موج البحر كالبركان
و غرقت في ألم الحياة و هدني
عبث السنين.. و حيرة الفنان
فالكأس أيام نعيش بحزنها
و العمر سجن خانق الجدران
و الناس أطياف تمر كأنها
أشباح صيف شاحب الأغصان
هم كالسكارى في الحياة و خمرهم
أمل عقيم.. أو شعار فان
و تعربد الأيام فيهم ما ترى
في العمر في الأخلاق.. في الوجدان
ما أجبن الإنسان يدفن عمره
ليعيش تحت السوط.. و السجان
و يقول حظي أن أعيش ممزقا
و أظل صوتا.. لا يراه لساني

* * *

ما عاد يا دنياي وقت للهوى
ما عاد نبض الحب.. في وجداني
الحب أن نجد الأمان مع المنى
ألا يضيع العمر في القضبان
ألا تمزقنا الحياة بخوفها
أن يشعر الإنسان.. بالإنسان
أن نجعل الأيام طيفا هادئا
أن نغرس الأحلام كالبستان
ألا يعاني الجوع أبنائي غدا
ألا يضيق المرء.. بالحرمان
أخشى بأن يقف الزمان بحسرة
و يقول كانوا.. لعنة الإنسان
فغدا سيذكرنا الزمان بأننا
بعنا الهواء الطلق.. بالدخان

* * *

كلماتنا صارت تباع و تشترى
و بأبخس الأسعار.. بالمجان
كلماتنا يوما أضاءت دربنا
فلقد عرفنا الله في القرآن
و نساؤنا صغن الحياة رواية
كلماتها شيء.. بغير معاني
الفقر حطم في النساء حياءها
صارت تباع بأرخص الأثمان
و شبابنا جعلوا الحياة قضية
إما يمين.. أو يسار قاني
و نسوا تراب الأرض ويح عقولهم
هل بعد ((طين الأرض)) من أوطان؟
و شيوخنا بخلوا علينا بالمنى
من يا ترى يحيا.. بغير أماني؟
قالوا لنا: إن الحياة تجارب
و الويل كل الويل.. للعصيان
تركوا لنا وطنا حزينا ضائعا
تركوا الربيع ممزق الأغصان

* * *

كم قلت من يأس سأرحل علني
أجد الظلال على ربى النسيان
حتى يعود الحب يملأ مهجتي
و يشع نورا في سماء كياني
لكنني أدركت أن بدايتي
و نهايتي.. ستكون في أوطاني
و سأسأل الأيام علّ مدينتي
يوما تعرف قيمة الإنسان
فمتى شجون الليل تهجر عشنا؟
و متى الزهور تعود للأغصان؟
و متى أعود لكي أراك مدينتي
فرحى بغير اليأس.. و الأحزان؟
أترى سنرجع ذات يوم بيتنا
و نراه كالأمل الوديع.. الحاني؟
أترى سترحمني مدينتنا التي
قد صرت أجهل عندها.. عنواني؟
قد أنكرتني في الزحام و ما درت
أني يمزقني لظى.. حرماني
إني وليدك يا مدينتنا فهل
صار الجحود.. طبيعة الأوطان؟!
هل صار قتل الابن فيك محللا
أم صار حكم الأرض للشيطان؟
إني تجاوزت الحديث و إنما
حقي عليك.. سماحة الغفران
فإذا غضبت فأنت أمي فارحمي
و إذا عتبت فذاك من أحزاني

............................
فاروق جويدة

لعب و جد

في الصغر نلعب ...حتى نتعلم كيف نحقق في الحياه ما نحققه في اللعب
......................... و في الكبر نلعب ...حتى نحقق في اللعب ما لم نستطع تحقيقه في الحياة

........................

تهييسة مواطن

تاج لأول مرة ....من هوندا

لأول مرة في تاريخى التدوينى القصير يجيلى تاج و مين مين كمان من صديقتى التى لا أعرفها هوندا طبعا أنا بشكرها على التاج الظريف ده و كمان بشكرها لأنها أول واحدة تبعتلى تاج أصل التاجات دي بتفكرنى بلعبة كنا بنلعبها انا و صاحباتى في ثانوي

توكلنا على الله


1- أحب شخص لقلبك في الدنيا؟
الرسول صلى الله عليه و سلم ثم أمي الحبيبة صاحبتى اللى بموت فيها و بابا العزيز ثم اخواتى العساسيل و صاحباتى و أولهم بسمة انتيمتى طبعا انتو متعرفوش بسمة بس هي شخصية جميلة قوي و انا بحبها قوي قوي قوي و بحب كل الناس اللى حوالية الطيبين اللى مش بيحبوا يضايقوا غيرهم

2- انسان مستعد تضحي بحياتك – ركز فى كلمة حياتك – عشانه؟
نظريا : أي حد مادام معاه الحق
عمليا : ما اتحطتش في موقف زي ده قبل كده لكن عموما انا نفسي أموت شهيدة و اللى يموت دون عرضه و ماله فهو شهيد


3- انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟ كل اللى أياديهم ملطخة بدماء أسرانا و اخواننا في فلسطين و العراق و الجميع بلاد المسلمين و حتى بلاد غير المسلمين اللى احتلوها الجبابرة ....كل اللى بيدي نفسه الحق يقتل في خلق الله و يستعبدهم و يمص خيراتهم


4- ما هو اسم اجمل كتاب كتبه بشر قراته ومحتفظ به حتي الان؟
بين يدي عمر (خالد محمد خالد)0


5- اسم كتاب كتبه بشر برضة- انت متعلق بيه وبتقرأه كل فترة؟
كتب كتيرة أنا عموما معظم الكتب اللى قريتها بحب ارجعلها تانى منهم مثلا
سلسلة الصحابة (خالد محمد خالد)
لا تحزن (عائض القرني)
معظم كتابات (توفيق الحكيم)
العبقريات
قوة التفكير الابداعي (توني بوزان)


6- اهم جهاز منزلى انت متعلق بيه او بتستخدمه كتير؟
زمان كان التليفزيون ...دلوقتى أكيد الكمبيوتر

7- مكان تحس بالراحة عندما تدخله؟
المسجد بالذات في رمضان(الملايكة بتكون زيادة شوية)0
بيتنا و انا راجعة من الشغل
دار الحصري في ميعاد الدرس الأسبوعي بتاعنا يوم الأحد


8- شىء تحس بالراحة النفسية عندما تنظر اليه؟
صور المسجد النبوي و الروضة الشريفة (يارب أزورهم قريب أنا و كل اللى نفسهم في الزيارة )
السماء وقت الشروق و الغروب
و البحر أحيانا لكن في الغالب بخاف منه


9- مكان تحس فيه بالحنين الى شىء لا تدرى ماهو و ذكريات جارفة الى لاشىء؟
الكعبة و المسجد النبوي (شوق إلى الحج و العمرة )
المسجد الأقصى(شوق و حنين لتحريره)
المساجد القديمة و الآثار الإسلامية ..بتفكرنى بعصر النهضة الإسلامية


10-أجمل مدينة زرتها داخل مصر؟
أنا للأسف مزرتش مدن كتيرة في مصر لكن في اللى زرتهم
الساحل الشمالي
بلدنا ..الغربية


11- أجمل مكان طبيعي رأيته داخل مصر ؟
صور جبل سيناء (لسة مازرتوش)0
القاهرة من فوق المقطم
أي مكان فيه خضرة كتيير


12- شخصية كارتونية بتحبها
كتييييييييييير
عم دهب
بطوط
الجدة بطة
مينى
تيمون و بومبا
شلبي و وشوشنى
سيمبا
بكار


13- انوع هاتفك المحمول؟
ليه بس الإحراج ده
نوكيا 3200
ايه ماله؟؟؟مش بيقول ألو؟؟؟
انا متبعة النظرية المعمارية اللى بتقول : الشكل يتبع الوظيفة


14- سرعة بروسيسور جهازك؟
الأسئلة دي بتاعت أخويا بس في الغالب 2.1

15- حجم ذاكرة –هارد- جهازك؟
120

16- المساحة التى تشغلها المواد الاسلامية على جهازك؟
20 لكن ليه الأسئلة دي العبرة مش بالمساحة على الهارد


17- أهم هدف انت واضعه لحياتك الآن؟
إنى أكون قدوة صالحة لأولادي إن شاء الله
انى أكمل حفظ القرآن الكريم
انى اتعلم على قد ما أقدر في مجالى (الهندسة المعمارية)0


18- مواصفات فتى الأحلام بالنسبة لك؟
يااه انا كنت محددة مواصفات كتيرة لكن أنا واثقة ان ربنا هيرزقنى بحد أحسن من كل المواصفات اللى كنت محددها
و عموما في حاجات ما ينفعش اتنازل عنها إن شاء الله
1- الأخلاق - أنا آسفة انى مش بقول التدين في الأول لكن بصراحة دلوقتى فيه متدينين أخلاقهم مش قد كده-يعني يكون ابن ناس و أهله مربينه كويس
2- التدين
3- يكون عنده هدف لا يتنازل عن تحقيقه
4- يكون بيحب النجاح للآخرين زي ما بيحبه لنفسه (يعني مش منفسن هههه)0

صف ما يأتى

:

شعورك لما بتسمع كلمة مصر ؟
بحس انى ممكن أضحي بحياتى علشان هي تكون أحسن


شعورك لما بتسمع كلام عن اليهود؟
بتحفز و أشتغل أكتر علشان نكون أحسن منهم و نسترد أرضنا منهم

شعورك لما بتشوف ظابط شرطة؟
بفتكر كل النماذج اللى قابلتها في حياتى منهم و بقعد أدور على حد كويس فيهم مش بلاقى و بعدين بقول أكيد فيه منهم كويسين بردو بس أنا ما قابلتهمش لسة


شعورك لما بتشوف الكناس العجوز فى الطريق؟
بقول أين أنت يا عمر
لو كنت موجود كنت صرفتله راتب شهري و عينتله واحد يرعاه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بقول يارب يكون الجوهر زي المظهر حتى لا تكون فتنة لضعاف النفوس

احساس يراودك فى اشارة مرور مغلقة بسبب مسئول كبير؟
بجد بيبقى نفسي أقوله :
يا بيه انت بس تقعد في مكتبك المكيف دي في حد ذاتها خدمة كبيرة للوطن علشان الشعب يعرف يقضي مصالحه

و بما أن التاج علينا حق فأنا أحب أمرر التاج ده لكل المدونين اللى أعرفهم بس في كتير منهم جاوب عليه علشان كده همرره للى ما جاوبوش عليه قبل كده على حد علمى و على الله بقى ما يجاوبوش عليه هبعتلهم كل يوم تاج لغاية ما يزهقوا منى

إصرار أمل
أحمد منسي
عم أحمد رفعت
همسة قلم
أ/ محمد البنا
لو كنت أعلم

و كل تاج و انتو طيبين و على الأسئلة مجاوبين

افتح حسابك.....في بنك الطعام

شاء الله أن أجتمع بذلك الرجل في مكان عمل واحد

و شاء الله أن يتوسم في شيئا من حب التطوع للخير
و شاء الله أن فتح أمامى ذلك الباب
...............
أنا لم أدخل بعد ذلك الباب و لكن بما أنه وضع في يدي أمانة بعد الاجتماع ان أخبر كل من أتوسم فيهم الخير ...فها أنا أخبركم لأننى أتوسم فيكم الخير الكثير
............

الموضوع : بنك الطعام

.............................

لا أدري إن كان احدكم سمع عنه أم لا قبل ذلك و لكنى كنت قد سمعت عنه بالفعل قبل أن ألتقي مديري الجديد في العمل و الذي يعمل مديرا للمتطوعين في هذا المشروع الخيري الضخم ...........

فكرة المشروع :

بداية جاءت فكرة المشروع عندما كان يمشي رئيس مجلس إدارة المشروع في إحدى المناطق العشوائية ووجد امرأة تحمل طفلا رضيعا تبحث في القمامة ثم وجدت شيئا فأخذته من القمامة ثم وضعته في فم الطفل ..........(لا حول و لا قوة إلا بالله هذا يحدث في مصر ) فقرر أن يبدأ مشروعا خيريا يساعد هؤلاء الذين لا يجدون الطعام ...هؤلاء الذين يمرضون لانهم لا يجدون ما يقتاتوا به ..وبعد البحث وجد أنهم كثيرون في بلادنا

الهدف من المشروع:

القضاء على الجوع في مصر سنة 2025

آلية المشروع :

جمعية خيرية هدفها توفيروتوصيل الطعام للأيتام و كبار السن و الأرامل و الأسر المحتاجة و الأشخاص الغير قادرين علي العمل و الكسب تقوم فكرة بنك الطعام علي تلقي التبرعات النقدية و العينية و الأغدية غير المستغلة والفائضة عن طريق جمعها من مختلف الشركات و الهيئات و المؤسسات و الافراد والاستفادة منها في توفير الطعام بصفة دورية للمحتاج الحقيقي -

وقد أنجز المشروع العديد من الإنجازات منها :0

- يقوم "بنك الطعام "بتوزيع الأطعمة الطازجة علي دور الأيتام والمستشفيات الحكومية مثل الألبان والمربات و العصائرو البيض و الفواكه والخضروات ......الخ

- يقوم "بنك الطعام " بإطعام عدد من الأسر بصفة منتظمة شهرياً في الوقت الحالي بالطعام الجاف الرئيسي و المخطط زيادة العدد 200 ألف أسرة سنوياً (مليون مواطن) بتكلفة تزيد عن 240 مليون جنية خلال الفترة القادم وذلك عن طريق زيادة الموارد المتوقعة للبنك

- يقوم "بنك الطعام "بدوره القومي حال حدوث الكوارث لا قدر الله حيث قمنا بتوزيع 38 الف وجبة بميناء سفاجا لأهالي المصابين في كارثة غرق العبارة السلام 98

- يقوم "بنك الطعام "برعاية الإحتفال السنوي بيوم اليتيم حيث يتكفل البنك بكافة الوجبات المطلوبة لعدد 60 ألف طفل بالقاهرة والجيزة والمحافظات الأخري سواء كانت جافة أو ساخنة كما تكفل البنك أيضا بتجهيز البوفيه الخاص بحفل الزفاف الجماعي وساهم البنك في المؤتمر التحضيري ليوم اليتيم العربي الذي أقيم بجامعة الدول العربية

- قام و مازال "بنك الطعام " بنشر ثقافة إستغلال الأطعمة السليمة بالفنادق الكبري ( إداره الفنادق و اصحاب المناسبات ) و قد تم توزيعها كالتالي :

- "بنك الطعام" سن سنة حسنة في تحويل شريعة الأضحية الي مشروع حضاري منظم لأول مرة في مصر.

حيث تبني هذا المشروع الحضاري بالاشتراك مع المصرف المتحد بعد دراسة نمط توزيع لحوم الآضاحي في جمهورية مصر العربية والذي يتسم بعدم الوصول إلي كثير من المستحقين الحقيقيين ونسبة كبيرة من العشوائية؛ فيصل في بعض الأحيان إلي الأسرة الواحدة أكثر من كيس من اللحم وبعض الأسر لايصلها اللحم منذ سنوات في حين أن بنك الطعام المصري لديه الكثير من الحالات المدروسة في جميع أنحاء الجمهورية.

و يفخر "بنك الطعام" بأنه قد وصل إلي كثير من الأسر المستحقة في قري ومحافظات لايصل إليها أحد و قد تم توزيع اللحوم المجمدة علي 160 جمعية علي مستوي 25 محافظة. و بشكل منظم وحضاري وفي وقت قياسي وفي سيارات تجميد و تبريد لضمان الصلاحية.

- لأول مرة في مصر قام "بنك الطعام" بإستخدام نسبة من لحوم الآضاحي في تصنيع معلبات مطبوحة (خضار بالحم جاهز للأكل)و بصلاحية تمتد إلي عام و بالتالي نستطيع أن نوفر للأسر المستحقة وجبة من اللحوم بشكل شهري وليس مرة واحدة في العام ( خطوة في طريق العمل الجماعي المنظم لصورة الأضحية )

- إمتداد لهذه الفكرة يقوم "بنك الطعام" بذبح الكفارات و النذور و الفدو و الصدقات بالنيابة عن الأفراد و القيام بتوزيعها علي المحتاجين الحقيقيين.

احتياجات المشروع :

(1) تبرعات عينية (مادية أو وجبات )

(2) نحتاج لك سفيراً للخير

(3)نشر أهداف و فكرة عمل "بنك الطعام"

(4)نشر ثقافة إستغلال الأطعمة السليمة

(5)نشر الوعى لدى الأفراد عن كيفية التعامل مع الأطعمة و توزيعها للمحتاجين مباشراً من المنازل

(6)المعاونة فى تعبئة الشنط الشهرية

(7)تولى مسئولية "قائد فريق" و إستقدام و تدريب و متابعة المتطوعين

(8)المعاونة فى "مركز تلقى الإستفسارات ( الذى سيتم إستحداثه )

(9)المعاونة فى تقديم فكرة "بنك الطعام" خلال المناسابات التى يقيمها البنك

(10)المعاونة فى الإستعلام عن مستحقين الدعم طبقاً للطلبات الواردة منهم

(11)توصيل الشنط الشهرية

(12)إحياء مبادىء و قيم تكافل المجتمع و تكامله

و لمعلومات أكثر يمكنكم الدخول على موقع بنك الطعام
www.egyptianfoodbank.com

و للاستفسار عن كيفية المشاركة و التطوع في المشروع يمكنكم إرسال ايميل لى برغبتكم في المشاركة حتى أرسل لكم استمارة التطوع عن طريق هذا الايميل

we_must_b@hotmail.com

آسفة للإطالة و لكن للأهمية و يسعدنى تفاعلكم مع الفكرة و نشرها ولنحتسب جميعا الثواب عند الله

ملحوظة : هذا المشروع ليس قاصرا على دين أو عرق أو جماعة فهو عبارة عن دعوة إنسانية للقضاء على الجوع في
مصر

ملحوظة تانية (آسفة لكن من التعليقات ظهرلى شئ ....يمكن أنا ما عرفتش أعبرعنه كويس في التدوينة لكن في حاجة مهمة) :

طبعا التبرعات العينية أو المادية شئ مهم جدا للبنك و طبعا دي من مصارف الزكاة يعني لو حد يعرف رجل أعمال ممكن يدله على الباب ده .....لكن السبب اللى أنا أصلا ناشرة الفكرة علشانه هو إن البنك محتاج للمتطوعين جدا و خاصة في تعبئة الشنط الشهرية و ده طبعا كويس علشان الشباب اللى زينا اللى ميقدروش يدفعوا مبالغ كبيرة و في نفس الوقت عايزين يزكوا عن صحتهم ......فجزاكم الله خيرا نشر الفكرة بين الشباب لعل الله يجعلها في ميزان حسناتنا جميعا ...

و زي ما قلتلكوا استمارة التطوع عندي لكن مش عارفة احملها فاللى عاوزها يبعتلى ايميل بس و انا هبعتهاله...جزاكم الله خيرا

مأساة المثالي

"Saints are boring"

"القديســــون مضجــــرون "

كلمة سمعتها في فيلم أجنبي لكني أشعر بوجودها في حياتنا
نحترم الإنسان المثالى
لكن عندما نصاحب نصاحب هؤلاء المخطئين أمثالنا
............
فهؤلاء المثاليون
لا يعجبهم شئ
دائما ينصحون
و كأنهم بلا أخطاء
و الغريب أنك عندما تتصيد لهم الخطأ و تواجههم به
يعترفون
ثم يشكرونك
ثم يتوبون
ثم يزداد حبهم لك
فتزداد غيظا منهم
...............
أليسوا بحق مضجرين
!!!!!!!!!!!!!!!!!

أحلامك الضائعة

يوما من الأيام حلمت حلما كبيرا
و عندما لم تمتلك الشجاعة كي تصر على حلمك
أضعت حلمك الكبير
و عندما لم تستطع أن تعيش بدون حلم
بحثت
ثم بحثت
فأصبحت مجرد باحث عن أي حلم صغير
حتى تستطيع أن تحيا
و نسيت
أنك إن لم تمتلك يوما حلما كبيرا
سوف تكون أداة تنفذ أحلام الآخرين
ترى ...هل تجد يوما حلمك الكبير القديم
؟؟؟؟؟
أم ستظل تبحث عن حلم جديد
؟؟؟؟؟؟؟

رب أرني أنظر إليك

قالها سيدنا موسى عندما أراد أن يرى الله سبحانه و تعالى

أربع كلمات أدعو بها كلما تعثرت و فقدت توازنى

"رب أرني أنظر إليك"

بالطبع لا أعنى الجملة كما قالها سيدنا موسى

كل ما أعنيه هو

"رب أطلق بصري و بصيرتى حتى أجد طريق الحق....طريق الصالحين...الطريق الذي يصل بي إلى رضاك"

رب أرني .....رب أرنا جميعا

رب أر الأمة تنظر إليك

سيناء ...و أغانى السلام

من كام يوم كنت بقلب في التليفزيون كعادتى لما أحب أن أعرف عن كل القنوات كل شئ حتى أقرر أنى سأشاهد لا شئ
المهم ..جلست أقلب في القنوات حتى رأيت أغنية لمجموعة من المغنيين المصريين ...لا و كمان بتتكلم عن سيناء ..إذا ..لازم اتفرج عليها
ما انكرش ان الأغانى الوطنية دلوقتى مش زي زمان .
بردو ما الأغانى الدينية مش زي زمان.
ما بقتش بقعد استنى الاغانى دي زي ما كنت زمان بقعد استنى أغنية وطنى حبيبي الوطن الأكبر مثلا و أقعد أغنى معاها .
الأغانى فقدت مصداقيتها .
عاملة زي الفراخ البيضا كده .
لا طعم و لا لون و لا ريحة.
على العموم دي سمة الجيل كله
المهم لفت نظري حاجة
المطربين لابسين أبيض
قلت أكيد قصدهم على السلام.....السلام اللى هو الخياااااااار الاستراتيجى
قلت ماشي نعديها
كلمات الأغنية كلها عن ان سيناء مهد للديانات
و ان في أنبياء كتير مشيوا على أرضها
و على استحياء كده جابوا سيرة ان في ناس استشهدوا فيها
كلام جميل
...................................
اللى استفزنى بقى وخلى الدم يضرب في نفوخي هو آخر مشهد
الصورة على جسر مليان رايات بيضا مرفوعة
!!!!!!!!!!!!!!!!!!!!!!!!!!!!!!!!
حد يقولى معناها ايه
؟؟؟؟؟؟؟
طيب المخرج العبقري اللى صور الأغنية دي مفكرش يعنى يحط صورة علم مصر و لو حتى لحفظ ماء الوجه
؟؟؟؟؟؟؟؟؟
ده حتى ما هانش عليه يجيب صورة العلم طول الأغنية
!!!!!!!!!!!!!!
و كأن سيناء دي بلد مستقلة أو بقعة على الخريطة محدش يعرفها و هو بقى بيعرفنا عليها
بلد السلام
بلد الرايات البيضا المرفوعة
بلد خطى عليها كل الانبياء فعشان خاطرنا محدش ييجي يحاربنا فيها
و احنا علشان ما تزعلوش مش هنحط عليها علم مصر
هو ده السلام
؟؟؟؟؟؟؟؟؟؟؟؟؟؟؟؟؟
أعتقد لو كان حط علم مصر كان هيقول المعنى بشكل أحسن
يمكن مش عارف معناه كويس

الأحمر: دم خير أجناد الأرض اللى روى أرض سيناء قبل ما ترويها الماء
الأبيض : سلام مش استسلام...نسالم من يسالمنا و نعادي من يعادينا
الأسود: سمار ولادنا ...طين الأرض و خيرها...لون مقابر الغزاه اللى ماليه بلادنا
................
هو ده علم مصر زي مانا شايفاه و اللى عندى أحسن من مية راية سلام سياسية
..........................
مش عارفة إذا كانت أغنية زي دي فرحت أهالى سيناء و لا لأ لكن الأكيد انها حرقت دمى
...........

مقتل القمر

....وتناقلوا النبأ الأليم على بريد الشمس
في كل مدينة ،
(( قُتِل القمـــر ))!
شهدوه مصلوباً تَتَدَلَّى رأسه فوق الشجر !
نهب اللصوص قلادة الماس الثمينة من صدره!
تركوه في الأعواد ،
كالأسطورة السوداء في عيني ضرير
ويقول جاري :
-(( كان قديساً ، لماذا يقتلونه ؟))
وتقول جارتنا الصبية :
- (( كان يعجبه غنائي في المساء
وكان يهديني قوارير العطور
فبأي ذنب يقتلونه ؟
هل شاهدوه عند نافذتي _قبيل الفجر _ يصغي للغناء!؟!؟))
..... ........ .......
وتدلت الدمعات من كل العيون
كأنها الأيتام – أطفال القمر
وترحموا...
وتفرقوا.....
فكما يموت الناس.....مات !
وجلست ،
أسأله عن الأيدي التي غدرت به
لكنه لم يستمع لي ،
..... كان مات !
****
دثرته بعباءته
وسحبت جفنيه على عينيه...
حتى لايرى من فارقوه!
وخرجت من باب المدينة
للريف:
يا أبناء قريتنا أبوكم مات
قد قتلته أبناء المدينة
ذرفوا عليه دموع أخوة يوسف
وتفرَّقوا
تركوه فوق شوارع الإسفلت والدم والضغينة
يا أخوتي : هذا أبوكم مات !
- ماذا ؟ لا.......أبونا لا يموت
- بالأمس طول الليل كان هنا
- يقص لنا حكايته الحزينة !
- يا أخوتي بيديّ هاتين احتضنته
أسبلت جفنيه على عينيه حتى تدفنوه !
قالوا : كفاك ، اصمت
فإنك لست تدري ما تقول !
قلت : الحقيقة ما أقول
قالوا : انتظر
لم تبق إلا بضع ساعات...
ويأتي!
***
حط المساء
وأطل من فوقي القمر
متألق البسمات ، ماسيّ النظر
- يا إخوتي هذا أبوكم ما يزال هنا
فمن هو ذلك المُلْقىَ على أرض المدينة ؟
قالوا: غريب
ظنه الناس القمر
قتلوه ، ثم بكوا عليه
ورددوا (( قُتِل القمر ))
لكن أبونا لا يموت
أبداً أبونا لايموت !

..........................

أمل دنقل

بعد كام يوم

بعد كام يوم يوم ميلادي
تفتكروا افرح و لا ازعل
يعمل ايه الواحد يوم ما يتم ربع قرن
من زمان بستنى يوم زي ده
خايفة منه
خايفة منه اوي
انا عارفة نفسي
مش هعرف امسك نفسي
هحاسب نفسي
هكتشف
انى لليوم ده ما قدمت شئ افتكره لنفسي
تفتكروا افرح و لا أزعل
........................

هندسة الحياة

ليست المرة الأولى التى يمسك فيها بتلك الزجاجة

زجاجة بنية اللون مكتوب عليها (سم قاتل)....0

..................................

و لكن هذه المرة لم يكتف المهندس شوقى بأن يخرج الزجاجة من درج المكتب لينظر إليها كعادته ثم يعيدها إلى مخبأها؛ بل أمسك بها و ضغط على فوهتها ثم فتح الغطاء

لقد إتخذ قراره

الرحيل إلى الأبد

لكن قبل الرحيل أخذ يفكر

هل أرحل هكذا دون أن أترك شيئا لهذه الدنيا التى أودت بي لهذه النهاية ؟؟

لا لن أتركها تفوز في النهاية

ستكون آخر ورقة أكتبها لهذه الدنيا هي حقيقتها

سوف أكشفها أمام نفسها ...و لكن بطريقتى...0

سوف أرسم لها حقيقتها ....لن أنسى أبدا أننى مهندس ..هكذا تعلمت في هذه الدنيا ..أن أرسم كل شئ ...و كما تعلمت ذلك منها سوف أرده عليها وبالا لما فعلت بي

هاهاها ...ايه أيها الدنيا ...سوف أرسم لك حقيقتك الآن

...............................

يضع ورقه أمامه

يمسك قلما سميكا

يحاول أن يرسم

يفكر

يسأل نفسه

من أنت أيها الدنيا؟؟

تلمع عينياه

يرسم ثلاثة أضلاع

يتذكر أستاذة الفلسفة في الثانوية العامة و هي تقول : " الحق - الجمال - الخير ".... يتأمل ...ينظر إلى المثلث بامتعاض ثم يمسك الورقة و يمزقها

........................

ينظر إلى جدران الغرفة

تلمع عيناه مرة أخرى

يتأمل

ينطر إلى الورقة

يرسم مربعا

يتذكر أباه في الحبس ...هو أيضا في حبس و لكن ..شتان بين الحبسين فجدران حبس أبيه لا تحرمه من أن يبتسم و لو قليلا لا لشئ إلا لأنه يعلم أنه يوما ما سيخرج من هذا الحبس ...أما شوقي فلن يخرج من حبسه أبدا فجدران حبسه الأربعة داخله ...قابعة في قلبه ..حاول الكثيرون أن يخرجوه منها و حاول هو أيضا ان يخرج منها كثيرا و لكن...لم يخرج حتى الآن

يفكر ...كيف كان أمله كبيرا عندما تزوج سنية أن تكون هي ذلك الشئ الذي يخرجه من ذلك الحبس ..و لكن على العكس ...يتمنى الآن لو لم يقابلها تلك الخرقاء عالية الصوت لا يهمها إلا ولدهما ...لا تهتم به إبدا ..تعامله كخيال يعيش معهم إلا أنه خيال مطيع يسمع الأوامر و ليس عليه إلا التنفيذ فقط

تدمع عيناه

ينظر إلى المربع في الورقة

يمسح ضلعا من أضلاعه

يطيل الضلعين المجاورين ..ثم يعيد رسمه بعد أن أصبح المربع مستطيلا

............................

يتمعن المستطيل

يهز رأسه

تمر أمامه صورة جده ذلك الطاعن في السن ...خمسة و ثمانون سنه ..ياااه ..لقد عاش طويلا ..كانت حياته كذلك المستطيل ...طويلة طويلة ...و لكن ماذا حدث له في النهاية .....أمراض عضال ...تأوهات مريرة ...أدوية قاتلة ...عذاب ..عذاب ..ثم سكون تااااااام

..................................

ينظر إلى المستطيل

يحرك رأسه بالنفي

يتذكر سلمى تلك الطفلة الجميلة ..إبنه أخيه عندما ابتلعتها دوامة البحر منذ خمسة سنوات ...لا ينسى شكلها و هي تدور في الدوامة أمامه و هو عاجز ...لم يستطع أن ينقذها ...كم كان يحبها وكم كان مشهد الدوامة مرير

تسقط من عينيه دمعة

يرسم دائرة الدوامة على الورقة

يضع القلم

يبكي

يبكى

....................................

يتذكر رئيسه في العمل ذلك المتغطرس و هو يقول :"لا لن نقبل هذا المشروع إنه مشروع صغير جدا " ثم يعود في اليوم التالى ليقول :"شوقى ...سوف نبدأ بالعمل في هذا المشروع "0

تمر أمامه صورة المذيعة في التلفاز " استقبل اليوم وزير الخارجية وزير خارجية دولة العدو و اتفقا على التعاون المشترك في حل أزمات المنطقة "ثم يذكر في نفس االقناة و نفس المذيعة و هي تقول " و قد صرح وزير الخارجية أن الدولة لن تسكت عن حقوق أبنائها التى ضاعت على يد دولة العدو

عالم عشوائي

هلامي

يمسك القلم

ينظرإلى الدائرة ثم يرسم أشكالا عشوائية تخرج

يتذكر في الصف الأول الثانوي تلك المدرسة الحسناء و هي تقول " الأميبا حيوان ذو شكل هلامي" ..يتذكر و هو يسألها "مامعنى شكل هلامي" ..تمسك المدرسة بالطباشير ثم ترسم له الشكل الهلامي على السبورة ...لم يكن يعلم أنه سوف يستخدم تلك المعلومة في ذلك

و لكن المهم أنه قد توصل أخيرا لنتيجة ترضيه

يبتسم

تتسع ابتسامته

يضحك

يضحك

............................

"لقد انتصرت عليك أيها الدنيا ..الآن عرفتك ..و الآن فقط كشفت حقيقتك أمام نفسك ..سوف اتركك تحتسين كؤوس الندم ...و سوف أحتسي أنا ذلك الشراب اللذيذ ...ذلك الشراب الذي سيحول بينى و بينك"0

يمسك الزجاجة يرفعها ببطء

يضع فوهتها على شفته

يميلها

................................

"هذا الولد في منتهى البلاهة و لابد أن تذاكر له مسائل الرياضيات فهو لا يفهم في هذه المادة شئ ...هيا لتذاكر له ..أسرع".0

قالتها سنية ثم خرجت من الحجرة مثل المدفع الذي أطلق رصاصته و استدار يبحث عن شئ آخر ليطلق عليه البعض..0

و لكن ماذا حدث لشوقي؟؟ !!!....لقد وضع الزجاجة على المكتب و قال :"محمود ..ولدي ...نعم لقد نسيته ..نسيت أننى لابد أن أذاكر له حتى يصبح مهندسا كما تمنيت ..إذا سأؤجل الانتحار حتى أذاكر له ...لا سأؤجله حتى ينجح في الثانوية العامة ...لالا سأؤجله حتى يتخرج من كلية الهندسة و يعمل و يتزوج ....هاها ..و ما يدرينى أنى سأعيش حتى ذلك العمر ...يالنى من أبله ..."0

يضع الزجاجة على المكتب ثم يمشي

يقف

يتذكر

يتذكر إمام المسجد في آخر جمعة صلاها منذ شهرين عندما كان يروي ذلك الحديث عن رسول الله صلى الله عليه و سلم ..كان يقول :

ذات مرة رسم رسول الله صلى الله عليه وسلم خطاً مستقيماً ثم تلا قول الله تعالى: "وأن هذا صراطي مستقيماً فاتبعوه ولا تتبعوا السبل فتفرق بكم عن سبيله "، ثم رسم على جوانب الخط المستقيم الطويل خطوطا متعرجة وقال: (على كل طريق من هذا شيطان يدعو).

...................................

يبتسم ثم يرجع للورقة

يضحك

يمزق الورقة و يلقى بها

يأخذ ورقة جديدة

بيضاء

يرسم عليها خطا مستقيما

و فقط

...........................

"محمود ......هات كتاب الهندسة بسرعة عنوان الدرس تعريف الخط المستقيم : هو أقصر طريق بين نقطتين

.....................................