٢٠١١-٠٦-٢٠

عامل مساعد - عن التحرش الجنسي


عمرك جربت التحرش الجنسي؟

يعني عمرك كنت طرف من أطرافه سواء الفاعل أو المفعول بيه؟

طيب عمرك حطيت نفسك مكان المفعول بيه؟

عمرك حسيت إحساسه؟

تيجي نتكلم عن إحساس المفعول بيه في عملية التحرش الجنسي

في البداية لازم أقولك على أطراف عملية التحرش

طبعا انت متخيل انهم اتنين الفاعل و المفعول بيه طيب ايه رأيك انهم 3 أطراف فاعل و مفعول بيه و عامل مساعد

تخيل نفسك في الأتوبيس في المترو في الشارع في طابور العيش أو التموين أو أي مكان ممكن يحصل فيه تحرش جنسي بفتاه

قدامك فتاه عادية جدا مش ضروري تكون لابسة بدي ضيق أو بنطلون مفصل جسمها كله لأن مبقتش دي الحاجات اللى بتستفز المتحرش لأنه ببساطة مش دي طريقة تفكيره هو كل اللى عايزه أي حاجة نوعها أنثى بغض النظر هي لابسة ايه

وقدامك بني آدم بغض النظر عن سنه و لونه لكن نوعه هو المهم .. ذكر.. و قرر فجأه انه يتحول لذئب لمدة خمس دقايق يمارس فيهم التحرش بالانثى اللى قدامك

كده عندنا طرفين من الثلاثة الفاعل و المفعول بيه ناقص الطرف الثالث اللى هو العامل المساعد اللى قلتلك عليه و اللى هيقوم بيه هو حضرتك

ايييون حضرتك اللى هتقوم بالدور ده لأنك بتقوم بيه فعلا في الحياة تحب تعرف ازاي؟

أصل لما الذئب البشري هيحاول يتحرش بالأنثي هيكون رد فعلك واحد من ثلاثة:

1-إما إنك هتحاول بأي طريقة توجد له عذر زي مثلا إن لبسها مش كويس أو إنها هي اللي شجعته على كده أو إنه شاب و ظروفه صعبة أو إنه راجل كبير و شكله محترم أكيد مش قصده أو أو و بالتالي هتسكت و تكبر دماغك و تقول و أنا مالي

2- هتنكر و تندد باللي حصل قدامك و تمصمص شفايفك على اللى حصل للناس و للأخلاق ومش بعيد تقوم تشتم الذئب البشري أو تديله نظرة إستحقار من إياهم و تسيبه و تمشي

3- هتتغاظ من اللى حصل و تتخيل إنه حصل لبنتك أو لأختك و هتقوم تضرب الذئب البشري و تلم عليه المكان كله و تتعاونوا كلكوا على إعطاؤه درس عملى على كل حتة في جسمه و طبعا هيشاركك في ده كتير من اللى هموم الدنيا واجعاهم و مش لاقيين حاجة يفشوا فيها غليلهم

أحب أقولك انك في ال3 حالات قمت بدورالعامل المساعد على أتم وجه و ساعدت الذئب البشري في الحصول على المتعة اللى كان عايزها اللى ما كنتش هتكتمل إلا بمساعدة حضرتك....تحب تعرف ازاي؟

في الحالة الأولى بتاعت اللى بيجيب الذنب على الضحية دي طبعا واضحة لأن الذئب البشري ما بيقدمش على الفعل ده غير لأنه متأكد ان فيه ناس زي حضرتك أول حاجة هتيجي في دماغهم هو ان البنت هي اللى غلطانه و ده طبعا جابه من الموروث الشعبي اللى اتربينا عليه كلنا اللى بيقول ان الستات هما سبب الخطيئة دايما حتى لو كانوا هما الضحية

أما في الحالةالتانية اللى أنكرت فيها و نددت ومش بعيد تكون شتمت الذئب البشري فأحب أقولك ان سيكولوجية الذئب البشري بتستلذ النوع ده من الإهانات و يمكن فيه منهم ما بيحسش بمتعة كونه ذئب بشري غير لما يتشتم من واحد زي حضرتك و طبعا يا حبذا لو عملت التصرف الثالث اللى هو الضرب لأنه و-دي المشكلة - بيسبب نوع أعلى من اللذة للذئب البشري.

هتقولى أمال يعني أعمل ايه ؟ و كده نبقى جينا للنقطة الأهم و اللى هي احساس البنت اللى حصل لها ده و رد فعلها

أما عن احساسها فمش محتاجة أقولك قد ايه بتكون حاسة بالمهانة و الاستحقار لكل ما هو ذكر في الدنيا و كتير من البنات بتسبب لهم التحرشات الجنسية نوع من الخوف من المجتمع بيوصل أحيانا لمشاكل حقيقية في التعامل مع الناس ده لأنها ما بتبقاش عارفة تتصرف إزاي

يعني تصوت و تلم عليه الناس و تكون فضحت نفسها - حسب الموروث الشعبي إياه- و لا تضربه و ساعتها ممكن هو كمان يتهور و يضربها و لا تسكت و تكتم في نفسها و ساعتها تتربي جواها العقدة النفسية و الخوف من المجتمع و التقوقع داخل الذات اللى قلتلك عنه

و لأن التصرف الأسلم في الحالة دي هو إن البنت تاخد الذئب ده و تسلمه لأقرب ضابط شرطة و تعمل فيه محضر و لأن 98 % من البنات في بلدنا ما بيقدروش يعملوا كده لأنهم بيكونوا في أضعف موقف ممكن تتحط فيه بنت و لأن 98% من اللى بيقوموا بدور العامل المساعد بيتصرفوا بطريقة من ال3 طرق الغلط زي حضرتك و ما بيساعدوش البنت في الوصول لقسم الشرطة لأنهم خايفين أو مش عايزين مشاكل

لكل الأسباب دي التحرش الجنسي في مصر تطور لدرجة انه أصبح جماعي في الشوارع و طبعا ما لحقناش ننسي حوادث التحرشات الجماعية في الأعياد

المركز المصري لحقوق المرأة بيقول ان 40% من البنات و الفتيات في مصر بيتعرضوا للتحرش الجنسي بصورة شبه يومية سواء بالكلمة أو بالنظرة أو باللمس أو بما أفطع من كده الأمر اللى نتج عنه 20 ألف حالة اغتصاب سنوية بمعدل امرأتين كل ساعة

و انت لسة مصر بتدين البنت و بتحملها تخاذلك عن مساعدتها

إذا ....مبروك عليك وظيفة عامل مساعد لعمليات التحرش

هناك ٤ تعليقات:

BasseM يقول...

تحليل متميز جدا ووجهة نظر قيمه

momken يقول...

الموضوع اصبح مقرف ومقزز فعلا من شده التركيز عليه بلا فائده

اعتقد وهذا اجتهاد شخصى ان الاعلام هو سبب تلك الظاهره..المستحدثه فى مجتمعنا

والسينما ايضا تتحمل عبىء كبير فى الامر

الموضوع مش موضوع اخلاق لان الشخص الى بيتحرش بيروح يصلى بعد من يخلص الى فايده...المصيبه انه اعتقد ان ده حق مكتسب كل من هن فى الشارع ملكه

بالنسبه لموضوع البنات ودورها فى الامر
فاسمحى لى يا سيدتى
فصمت الانثى البغيض هو السبب

تقدرى تقوليلى
لو وحده طلعت المترو وقالت لو حد قرب منى مافيش غير الشوز....تعتقدى حد يقدر يبصلها
مش بقول كلهن يعملن كده

لكن احيانا ذلك المتحرش بيعتقد ان الانثى تتجاوب معه فيتمادى ...ثم يعتقد بخياله المريض انهن جميعا يستمتعن بلامر ويجاوبن
هنا تكمن المصيبه

كنت حضرت مؤتمر فى دبى عن موضوع التحرش فى الدول الاسلاميه وسمعت فيه عجايب
وسمعت اراء اطباء نفسين
وقالوا الموضوع مالوش اى دعوة بتاخر سن الزواج خالص بدليل ان هناك متزوجون يتحرشون
اتصدمت والله

يومها قلت كلمه فى المؤتمر مختصرها

(طالما الرجاله عندنا جامدين اوى ومش قدرين يمسكوا نفسهم حتى فى الشوارع طب ايه كميه المنشتطات الجنسيه دى الى بتتباع فى العالم العربى)


الموضوع مهم اوى


تسلم ايدك



تحياتى

الحلم العربي يقول...

باسم
....
اشكرك بشدة


ممكن
.....
و الله انا كمان صدمت من الحقائق اللى بتقولها ، و يمكن عندك حق في ان جزء من المشكلة بسبب ان الستات بيتكسفوا او بيخافوا لكن الموروث الشعبي اللى اتربينا عليه للأسف هو اللى بيخلى نظرة المجتمع للست اللى بتدافع عن حقها و كأنها مسترجلة او اخلاقها مش مظبوطة او بتحب الفضايح
للأسف عندنا امراض كتيرة محتاجين نتعالج منها

اشكرك على اثراء المدونة بتعليقاتك :)

افلام اون لاين يقول...

مشكوووووووووووووور