هلاوس :)

- كانت دايما بتسمع عن رقص العصفور المذبوح لكن عمرها ماصدقت ان العصفور ممكن يرقص و هو بيموت غير لما لقت نفسها بأعلى صوتها بتضحك و هي الستارة بتنزل في آخر المسرحية و الناس مقطعة ايديها تسقيف على مشهد النهاية اللى بتتقتل فيه البطلة ، بس صوتهم ماكانش واضح قوي في ودانها ...أصلها كانت فعلا بتموت ..

- " أسوء ما في الرومنسيات أنهن ينتقمن بضراوة" كانت كل ما تفكر في الجملة دي بتسأل نفسها يا ترى ممكن ييجي عليه يوم و اعرف انتقم؟ و لما حبت تنتقم منك مالقتش أكتر من انتقام انها ما تنزلش دمعة واحدة على ذكرياتك ...حلفت مش هتدمع و عرفت تعملها ... و انتقمت منك بضراوة

- كان كل دوره في حياتها مجرد رابع استيمشن ، الشخص اللى بييجي علشان اللعبة تكمل ، لكن لما اللعيبة انسحبوا كلهم و مافضلش غيره فكرت كتير اشمعنا هو اللى دايما موجود في كل لعبة رغم تغيير الأشخاص كل مرة ، اكتشفت ان دوره كان أكبر من الرابع استيمشن بكتير ...كان الميزان اللى بيوزن جنانها في كل لعبة و يعرفها انها كانت مجرد لعبة ...النهاردة عرفت لما لقت نفسها بتلعب استيمشن لوحدها بأربع شخصيات من غير ما حد يقول لها ...يا مجنونة

- كان مؤمن جدا بالإشارات مع انه مابيعرفش يفسرها ، لكن أكتر اشارة كان نفسه يعرف معناها هي يوم ميلاده خمسة يونيو ، كل نكسة في حياته كان دايما بيرجعها لأنه أصلا اتولد يوم النكسة و لما كانوا اصحابه بيهزروا معاه كان هو الوحيد اللى بيصدق هزارهم ، لما حبها خاف يقول لها على يوم ميلاده و خاف يقرب أكتر ، كان كل يوم يعدي يخاف أكتر من اليوم اللى قبله ، لما سابته من قبل ما يقول لها كلمة بحبك عرف ايه العلاقة بينه و بين النكسة ... انه دايما مابيحاربش ..قلبه بيتضرب و هو لسة على الأرض

- " ماما هو بابا هيروح النارعلشان بيشرب سجاير؟"

"بيتهيألي لأ"

" مش انتى قولتيلي ان اللى بيشرب سجاير هيروح النار؟ اشمعنا بابا؟"

"لأن بابا مش بيسرق و مش بيكذب و مش بيخون و مش بيغش"

" هو ينفع ابقى زي بابا و ما اشربش سجاير"

" مش عارفة"

"أنا لِسه يارب . . بحطة إيدك ع المسرَح....أنا لِسه بحاوِل أستوعِب ف طبيعة الدور ....

معييش النَص ... و خايِف بس أتوه و أسرَح...وقت أما تقرر تِكشِفني بـ سبوتّ النور....."

— مصطفى إبراهيم