٢٠١١-٠٦-١٢

هلاوس :)


- كانت دايما بتسمع عن رقص العصفور المذبوح لكن عمرها ماصدقت ان العصفور ممكن يرقص و هو بيموت غير لما لقت نفسها بأعلى صوتها بتضحك و هي الستارة بتنزل في آخر المسرحية و الناس مقطعة ايديها تسقيف على مشهد النهاية اللى بتتقتل فيه البطلة ، بس صوتهم ماكانش واضح قوي في ودانها ...أصلها كانت فعلا بتموت ..

- " أسوء ما في الرومنسيات أنهن ينتقمن بضراوة" كانت كل ما تفكر في الجملة دي بتسأل نفسها يا ترى ممكن ييجي عليه يوم و اعرف انتقم؟ و لما حبت تنتقم منك مالقتش أكتر من انتقام انها ما تنزلش دمعة واحدة على ذكرياتك ...حلفت مش هتدمع و عرفت تعملها ... و انتقمت منك بضراوة

- كان كل دوره في حياتها مجرد رابع استيمشن ، الشخص اللى بييجي علشان اللعبة تكمل ، لكن لما اللعيبة انسحبوا كلهم و مافضلش غيره فكرت كتير اشمعنا هو اللى دايما موجود في كل لعبة رغم تغيير الأشخاص كل مرة ، اكتشفت ان دوره كان أكبر من الرابع استيمشن بكتير ...كان الميزان اللى بيوزن جنانها في كل لعبة و يعرفها انها كانت مجرد لعبة ...النهاردة عرفت لما لقت نفسها بتلعب استيمشن لوحدها بأربع شخصيات من غير ما حد يقول لها ...يا مجنونة

- كان مؤمن جدا بالإشارات مع انه مابيعرفش يفسرها ، لكن أكتر اشارة كان نفسه يعرف معناها هي يوم ميلاده خمسة يونيو ، كل نكسة في حياته كان دايما بيرجعها لأنه أصلا اتولد يوم النكسة و لما كانوا اصحابه بيهزروا معاه كان هو الوحيد اللى بيصدق هزارهم ، لما حبها خاف يقول لها على يوم ميلاده و خاف يقرب أكتر ، كان كل يوم يعدي يخاف أكتر من اليوم اللى قبله ، لما سابته من قبل ما يقول لها كلمة بحبك عرف ايه العلاقة بينه و بين النكسة ... انه دايما مابيحاربش ..قلبه بيتضرب و هو لسة على الأرض

- " ماما هو بابا هيروح النارعلشان بيشرب سجاير؟"
"بيتهيألي لأ"
" مش انتى قولتيلي ان اللى بيشرب سجاير هيروح النار؟ اشمعنا بابا؟"
"لأن بابا مش بيسرق و مش بيكذب و مش بيخون و مش بيغش"
" هو ينفع ابقى زي بابا و ما اشربش سجاير"
" مش عارفة"


"أنا لِسه يارب . . بحطة إيدك ع المسرَح....أنا لِسه بحاوِل أستوعِب ف طبيعة الدور ....
معييش النَص ... و خايِف بس أتوه و أسرَح...وقت أما تقرر تِكشِفني بـ سبوتّ النور....."

هناك ٥ تعليقات:

aya mohamed يقول...

مالقتش أكتر من انتقام انها ما تنزلش دمعة واحدة على ذكرياتك ...حلفت مش هتدمع و عرفت تعملها ... و انتقمت منك بضراوة
عملت كدا انا :D
كان الميزان اللى بيوزن جنانها في كل لعبة و يعرفها انها كانت مجرد لعبة
حلوة اوى الجملة دى
ايه العلاقة بينه و بين النكسة ... انه دايما مابيحاربش
عرفت دلوقتى ايه العلاقة بينى وبين يوم ميلادى العدوان الثلاثى :)
بوست تحفة يا يويو

اميرة هشام يقول...

اقلك سر
مفيش كتابة حلوة من غير كتابة
حلوة اوووووووي عشان بتوجع اوووي

اميرة هشام يقول...

كنت اقصد مفيش كتابة حلوة من غير الم

والكتابة حلوة عشان بتوجع اووي

الحلم العربي يقول...

آيوي
....
برافو عليكي :))
هههههههه ماكنتش اعرف المعلومة دي عنك يا يويو و يا ترى انتى عدوانية كده؟ :)
ربنا يكرمك يا جميل ...شكرا بجد على وجودك


أميرة
.....
ربنا ميجيبش وجع ، احنا بس اللى بندي لأحاسيسنا مساحة أكبر في انها ساعات تموتنا :) وحشتيني باي ذا واي

افلام اون لاين يقول...

مشكوووووووووووووووووووور